Hoe om te oorleef in ’n seksmal samelewing

Wedding rings

Wat het mooi vroue te doen met hamburgers en vinnige karre?  Niks.  Tog is ons samelewing so behep met seks, dat hamburgers en karre só geadverteer word.  Hopelik kyk jy nie na vuil TV programme of tydskrifte nie.  Maar hoe oorleef jy as dié goed vir jou gewys word in die koerant of in advertensies tussen programme, op Facebook, en langs die snelweg?  1 Korintiërs 7:1-9 sal vir jou wys hoe.

 

Geniet die voordele van die huwelik (v.1-5, 9)

Vir sy verjaarsdag maak Jerry se vrou vir hom ‘n vyfgang maaltyd:

 

Kreefkelkie

Biltong en feta sop

Lam skenkel met gebakte aartappels

Mediterreense groente en haloumi slaai

Deense roomys met neute en ryk Swiss sjokoladesous

Jerry se gunsteling kase en sout biskuitjies

 

Na ete probeer Jerry se kinders om hom te versoek met suurwurms, marshmallows, spookasem, en suigstokkies.  Hulle misluk.

 

So is dit met seks:  as jy versadig word by die huis, is die kanse minder dat jy die wêreld se besmette brakwater sal drink.

 

Die Korintiërs het vir Paulus ‘n brief geskryf, waarin hulle ‘n klomp vrae gevra het (v.1, 8:1, 12:1).  In hfst.7 antwoord Paulus hulle vrae oor die huwelik, enkelskap, egskeiding, en hertrou.

 

Sommige van die Korintiërs het met prostitute geslaap (6:15).  As gevolg van die immoraliteit wat in Korinte geheers het, het ander gesê dat die huwelik en seks ongeestelik is (v.1, 1 Timoteus 4:3).  In die verse wat volg antwoord Paulus hierdie beswaar.

 

Soos die Korintiërs moet ons nie toegee aan die wêreld se versoekings om seksueel losbandig te wees nie.  Hoe doen ‘n mens dit?  Moenie saam met iemand in die bed spring of by hulle intrek nie.  Trou as jou drang te groot is (v.1-2, 9).  Moenie soos baie jong mans wees wat nie wil ‘commit’ nie, wat eers oorsee wil gaan vir 5 jaar, eers op 32 wil trou, vir 3 jaar verloof wil wees nie.  Laat asseblief jou dogter toe om te trou as sy die regte man ontmoet het.  Moenie vir haar sê:  ‘Jy moet eers vir 4 jaar gaan studeer’ nie (v.36).

 

Jou seksuele begeerte is natuurlik.  Ja, om te trou omdat jy van begeerte brand is nie die beste motief nie.  Maar dit is beter om te trou as om van begeerte te brand (v.9).  Paulus sê nie die huwelik is beter as enkelskap nie, maar dat dit beter is as om te brand.

 

Maar trou op sy eie is nie genoeg om seksuele versoeking te weerstaan nie.  ‘n Sekere Ruth Smythers, vrou van ds. L.D. Smythers, het in 1894 die volgende oor seks geskryf in Instruction and Advice for the Young Bride:

 

‘One cardinal rule of marriage should never be forgotten:  GIVE LITTLE, GIVE SELDOM, AND ABOVE ALL, GIVE GRUDGINGLY… Most men, if not denied, would demand sex almost every day.  The wise bride will permit a maximum of two brief sexual experiences weekly during the first months of marriage.  As time goes by she should make every effort to reduce this frequency.  Feigned illness, sleepiness and headaches are among the wife’s best friends in this matter.  Arguments, nagging, scolding and bickering also prove very effective if used in the late evening about one hour before the husband would normally commence his seduction

 

Clever wives are on the alert for new and better methods of denying and discouraging the amorous overtures of the husband.  A good wife should expect to have reduced sexual contacts to once a week by the end of the first year of marriage and to once a month by the end of the fifth year of marriage.  By their tenth anniversary many wives have managed to complete their child bearing and have achieved the ultimate goal of terminating all sexual contacts with the husband.  By this time, she can depend upon his love for the children and social pressures to hold the husband in the home.’[1]

 

‘n Man wie se vrou gereeld moeg is, hoofpyn het, nie lus is nie, en sê:  ‘Wag tot môre,’ sal seks soek by sy sekretaresse, ‘n prostituut, of in pornografie.  ‘n Vrou wie se man haar nie liefhet en koester nie, wat gedurig saam met die manne rugby kyk terwyl sy alleen by die huis is met die kinders, wat gereeld vir lang tye weg is vir besigheid, sal seks soek by ‘n man wat haar spesiaal laat voel, in romantiese boeke en films, in ‘n emosionele band met iemand, in pornografie, in haar dagdrome oor ‘n prins op ‘n wit perd.

 

Moet daarom nie die verskuldigde huweliksregte van mekaar af terughou nie (v.3).  Jou liggaam is nie jou eie nie, maar God s’n en jou huweliksmaat s’n (v.4, 6:19-20).  Immorele seks is soos ‘n bloedsuier wat altyd meer wil hê.  Seks in ‘n Christelike huwelik gaan nie oor wat jy kan kry nie, maar wat jy kan gee (v.4).

 

Die dag toe jy getrou het, het jy jouself weggegee.  Dus kan jy nie lewe asof jou liggaam jóúne is nie (v.4).  Jy kan nie seks gebruik om jou maat mee te straf of te manipuleer nie (‘Jy moet eers __ anders kry jy niks’).  Omdat jou liggaam nie jou eie is nie, kan jy ook nie jouself bevredig nie (v.4).

 

Is jy ongetroud?  Jy het nie mag oor iemand anders se liggaam, of hulle oor joune nie.  Seks is bedoel vir die huwelik (v.4, Hebreërs 13:4).

 

Die algemene reël is dat jy nie seks in die huwelik moet weerhou nie.  Tog is daar uitsonderings:  [1] Jy en jou maat moet instem om vir kort tydjie (nie vir maande of jare nie) seks te weerhou, sodat julle ekstra tyd kan gee aan vas en gebed (v.5, Eksodus 19:15, Prediker 3:5).  [2] Soms dwing oorlog of soortgelyke omstandighede ‘n mens om seks vir ‘n tyd lank op te gee (Deuteronomium 24:5, 1 Samuel 21:4-5).

 

Ná die bepaalde tyd moet die man en vrou weer bymekaar kom, anders sal Satan hulle gebrek aan selfbeheersing gebruik om hulle te versoek tot wellus en egbreuk (v.5, 2).  Goeie en gereelde seks is normaal.  Om een keer per jaar seks te hê is abnormaal en gevaarlik (v.5).  Soek hulp as jý in dié situasie is.  As jy aan seksuele sonde toegee sal jy dalk hel toe gaan (6:9-10, Hebreërs 13:4).

 

Geniet die voordele van enkelskap (v.6-8)

Voor hy getrou het, het my vriend ‘n stryd gehad.  Hy het geweet dat enkelskap voordele het wat hy sou moes opgee as hy getrou het.  Dit sou byvoorbeeld makliker gewees het om as enkel man na ‘n vervolgde land toe te gaan vir sendingwerk.  Dis juis om sulke redes wat Paulus enkelskap aanmoedig in v.6-8.

 

Paulus sê nie dat enkel mense móét trou nie, maar dat dit God se gawe of vergunning is om ons te help in ‘n seksmal samelewing (v.6, 1-5).  Dit sou goed gewees het as die Korintiërs enkel kon bly soos Paulus; as hulle kon oorleef sonder seks en die huwelik.  Paulus weet egter dat nie almal hierdie gawe het nie (v.7, Matteus 19:11-12).  Sommige het die gawe gekry om te trou en sal sukkel om enkel te wees.  Ander het die gawe gekry om enkel te wees en sal moeilik ‘n huis, lewe, en liggaam deel met iemand anders (v.7).

 

In v.8 praat Paulus met dié wat nie huweliksmaats het nie:  weduwees en ongetroudes.  Volgens v.10-11, 34 verwys ongetroudes na mense wat nog nooit getroud was nie, asook na mense wat geskei is.  Om enkel te wees is goed.  So iemand is nie slegter af as iemand wat getroud is nie.  As jy enkel is hoef nie jy oor ‘n maat en kinders besorg te wees as daar vervolging kom nie (v.26-28).  Jou aandag is ook nie verdeeld tussen die Here en jou gesin nie (v.32-35).  Paulus self was waarskynlik getroud en ken die voordele van die getroude, sowel as die enkel lewe (v.8, Handelinge 26:5, 10[2]).

 

Is jy enkel?  Geniet die voordele van enkelskap solank jy dit het.  Moenie dink jy mis uit op die goeie lewe, of dink jy is ongetroud omdat daar iets fout is met jou nie (‘Ek is te kort, te lank, te dom, te vet, te maer, te weird, te oud’).  Glo eerder dat jy nou enkel is, omdat God in sy soewereine keuse so besluit het (v.7).  Kan God sy Seun vir jou gee, maar nie ‘n huweliksmaat nie (Romeine 8:32)?

 

Moenie jouself bejammer, depressief en hopeloos raak, bitter wees teen God, ‘n fantasie wêreld skep deur films, sitcoms, en boeke, of wag vir ‘n prins op sy wit perd wat al jou probleme sal oplos nie.  Moenie enkelskap sien as ‘n straf nie, maar as ‘n gawe van God wat jou wil bevoordeel om Hom beter te dien (v.7, 32-35).  Moet daarom nie rondsit en wag vir die regte een nie.  Raak betrokke in die kerk, dien, bou goeie vriendskappe, groei geestelik, en leer by ouer gelowiges oor die huwelik.

 

As jy enkel is en graag wíl trou het ek vir jou ‘n paar wenke:

 

[1] Moenie jou idees oor die huwelik kry in tydskrifte nie, maar in die Skrif.

 

[2] Lees my preek, Opsoek na die regte huweliksmaat op die blog.  Dalk wil jy die huwelikseminaar bywoon wat volgende week begin.

 

[3] Moenie met romanse speel en dink jy kan jou hormone beheer en stop voor jy seks het nie.  Los sulke dinge vir die huwelik.  Werk eerder aan ‘n goeie vriendskap.

 

[4] Moenie te lank wag om te trou as jy die regte lewensmaat ontmoet het nie.

 

[5] Dink reg oor internet ‘dating’.  Dis nie dat internet ‘dating’ noodwendig verkeerd is nie, maar daar is ‘n paar waarskuwings.

 

  • Mense kan vir jou jok en die beste voet voorsit.
  • Die vrou kan ook op die internet rondsnoep om ‘n maat te soek. So neem sy ‘n manlike rol in en word sy die jagter.
  • Jy kan selfgefokus raak en kyk wat jy wil , eerder as om die regte maat te wees.
  • Niemand kan sien hoe die verhouding ontwikkel nie. Baie dikwels is ‘n geheime verhouding ‘n gevaarlike verhouding (Spreuke 18:1).
  • Jy kan twee, drie of meer persone gelyk ‘date’.
  • Die fokus is verkeerd om: romanse voor vriendskap.
  • Iemand kan ‘n ongeredde kerkmens wees, en tog ‘Christen’ sê op sy status.

 

[7] Verliefdheid is ‘n emosie.  Liefde is om op te offer en ander bo jouself te stel.  Moenie die twee verwar nie.

 

[8] Moenie hoër standaarde as God hê, sodat jy weier om te trou as iemand nie aan jóú standaarde voldoen nie (hy moet lank wees…sy moet van sport hou).  Aan die ander kant moet jy nie die duidelike standaarde van die Bybel prysgee of kompromeer nie.

 

[9] Moenie met ‘n ongelowige trou nie (v.39).

 

[10] Moenie met iemand slaap, omdat jy dink jou biologiese klok loop uit en jy graag ‘n kind wil hê nie.  God kan vir jou ‘n kind gee as jy 90 of 100 is (Genesis 17:7, 21:2, 5, vgl. Lukas 1:36-37).

 

Hoekom moet jy die voordele van enkelskap geniet terwyl jy dit het?  As jy eers getrou het, kan jy nie sommer uit die huwelik nie.

 

Watse boek in die Bybel word die minste uit gepreek?  Het jy al ooit ‘n reeks preke uit Hooglied gehoor?  Sal jy skaam, ongemaklik, of kwaad wees as jou ds. ‘n reeks uit Hooglied preek?  Lees jy dit ooit in jou stiltetyd?  Tog is tekste soos Hooglied en 1 Korintiërs 7 (gesonde seks in die huwelik) God se oplossing vir Christene in ‘n seksmal samelewing.

 

Die wêreld blêr hulle gemors in Christene en hulle kinders se ore, terwyl kerk met die waarheid sit, maar hulle hande vou, hulle lippe styf trek, en sê:  ‘Ons praat nie oor sulke goed in die kerk nie.’  Gevolglik is daar gedurig skandes in die kerk.  Die kanse dat ons kinders in só ‘n samelewing oorleef sonder om besmet te word is klein, tensy ons ons hande uit ons sakke haal, ons Bybels oopmaak, en hulle reg leer.

[1] C.J. Mahaney, Sex, Romance and the Glory of God, pp.105-107

[2] Paulus was op die Joodse Raad.  Om deel te wees van die Raad moes jy getroud wees.  Het hy sy vrou in die dood verloor, of dalk deur egskeiding toe hy ‘n Christen geword het (v.15)?

Advertisements

Die Tien Gebooie: Hoe om ander lief te hê

Loving neighbour

In The Secrets of Jonathan Sperry praat mnr. Sperry met ‘n paar jong seuns oor die Here.  Een van die jong seuns, Albert, is nie beïndruk nie en sê:  ‘Ja, die Bybel sê alewig:  “Moenie dit doen nie” en “Moenie dat doen nie.”’  Mnr. Sperry se reaksie was:  ‘Ek sien dit nie so nie.  Alles in die Bybel is daar om ons lewens beter te maak.  Die Bybel sê:  “Moenie steel nie.”  Wil jy hê iemand moet by jou steel Mark?  Nee?  Ek reken dan dat dit ‘n goeie ding is.  Die Bybel sê:  “Moenie lieg nie.”  Wil jy hê iemand moet vir jou lieg Albert?  Nee?  Ek reken dan dat dit goeie ding is, of hoe?’  Albert se reaksie was:  ‘Ek het nog nooit só daaroor gedink nie.’

 

Doen aan ander wat jy aan jouself gedoen wil hê (Matteus 7:12).  Dit is presies hoe ons oor die Tien Gebooie in Eksodus 20:12-17 moet dink – as ‘n uitdrukking van liefde vir jou naaste (Romeine 13:9).

 

Die vyfde gebod (v.12)

Eer jou pa en jou ma.  Om jou ouers te eer is om hulle te vrees en te respekteer (Levitikus 19:3).  Dit is ‘n gesindheid wat lei tot dade van gehoorsaamheid.  Omdat dit eerste ‘n gesindheid is, kan ‘n kind gehoorsaam optree, maar rebels wees in sy hart.  Kinders moet daarom selfs met hulle oë, stemtoon, liggaamshouding, en gesindheid respek wys (Spreuke 30:17).  Ek het onlangs gesien hoe ‘n klein kind sy oë gerol het vir sy ma.  Dit was duidelik dat hy haar nie geëer het nie.

 

Natuurlik is dit nie net kleiner kinders wat hulle ouers moet eer nie, maar selfs jong mense wat die huis verlaat het, en volwasse kinders wie se ouers al oud en grys is (Matteus 15:4-6, Efesiërs 6:1-3, Kolossense 3:20).

 

Vir klein kinders is dit belangrik om te weet dat jý die gesag in hulle lewe is.  As hulle jou gesag uitdaag moet jy hulle straf.  Leer vir hulle om uit liefde vir God aan jou gehoorsaam te wees (Efesiërs 6:1, Kolossense 3:20).  Hulle moenie gehoorsaam wees omdat jy hulle laat skuldig voel, hulle intimideer, of omdat hulle ‘n beloning soos lekkers soek nie.  Dit is reg dat jy met jou jong kinders moet speel.  Maar moenie toelaat hulle jou as ‘n maatjie sien of dat hulle jou slaan nie.

 

Tieners en jong mense moet nogsteeds hulle ouers eer.  Hulle het nie die reg om ‘cheeky’ te wees of teen jou gesag te rebeleer nie (Spreuke 30:11).  Dalk het jy altyd fout gevind of was jy te streng, en is jý die oorsaak dat hulle vandag rebels is (Efesiërs 6:4, Kolossense 3:21).  In só ‘n geval moet jy hulle en die Here se vergifnis vra.

 

As jy egter jou kinders reg grootgemaak het, en hulle nogsteeds rebels is, moet jy die regering se hulp vra.  God het polisie en ander staatsinstansies daargestel om sulke sake te hanteer (sien Deuteronomium 21:18-21).  Onthou jy hoe die polisie in die ou dae rebelse tieners met ‘n rottang geslaan het?

 

Volwasse kinders moet ook hulle ouers eer (Jeremia 35, Spreuke 23:22, Matteus 15:4-6, 1 Timoteus 5:3-8).  Jy het nie die reg om lelik te praat met jou bejaarde ma, jou pa by jou huis weg te jaag, jou ouers af te skryf, hulle te vloek, jou ma te slaan nie (21:15, 17, Spreuke 19:26).  Ek weet van ‘n man wat sy bejaarde ouers by sy huis weggejaag het, en het op RSG gehoor hoe ‘n ander inbel en sê:  ‘Ek slaan my ma.’  Al het jou ouers ook Alzheimers moet jy hulle respekteer.  Moenie jou ouers by die tehuis vir bejaardes aflaai en van hulle vergeet nie.  Dawid het vir sy ouers gesorg en Jesus ook (1 Samuel 22:3, Johannes 19:26-27).

 

Ons teks sê dat jy jou vader en jou moeder moet eer.  Jy moet dit veral onthou as jou ouers geskei is en jy by een van hulle bly.

 

Wie is die ouers vir wie jy respek moet hê?  Dié gebod geld nie net vir biologiese ouers nie, maar ook vir stiefouers (Lukas 2:51), aanneemouers, huisouers in die koshuis of weeshuis, peetouers (Ester 2:7, 20), skoonouers (Miga 7:6), grootouers (1 Timoteus 5:3, 8), ou mense in die kerk (Levitikus 19:32, 1 Timoteus 5:1-2), leiers in ons land, kerke, skole, en werkplekke.

 

Onderwerp jou aan die gesag wat oor jou gestel is.  Jy mag nie vir jou stiefpa sê:  ‘Jy is nie my pa nie en kan nie vir my sê wat om te doen nie!’  Moenie toelaat dat jou kind so praat met jou huweliksmaat nie.  As hulle disrespekvol is moet daar gevogle wees (Spreuke 22:15, 29:15).

 

‘n Kollega se tweede vrou het vir sy seun ‘n opdrag gegee.  Hy het gesê:  ‘Jy is nie my ma om vir my te sê wat ek moet doen nie.’  Toe hy ná skool by die huis kom het hy gevra:  ‘Waar is my kos?’  Sy het gesê:  ‘Ek is nie jou ma nie en hoef nie vir jou kos te maak nie.’

 

Eer jou ouers.  Pasop egter dat jy hulle nie meer liefhet as vir God nie.  As jy tussen jou ouers en die Here moet kies, moet jy die Here kies (Lukas 14:26, Handelinge 5:29).

 

Hoekom moet jy jou ouers eer?  ‘n Kind wat nie sy ouers eer nie, sal ook nie vir ander luister nie.  Later in die lewe sal dit lei tot groot probleme.  Respek vir ‘n mens se ouers is die eerste gebod wat te doen het met medemens verhoudings.  Alle ander verhoudings in die samelewing (gebooie 6-9) sal reg wees as ons verhouding met ons ouers (gebod 5) reg is.  ‘n Samelewing vol van korrupsie, misdaad, bedrog is ‘n samelewing waar kinders nie hulle ouers eer nie.

 

As jy jou ouers eer sal jy lank lewe (v.12, Efesiërs 6:3).  Natuurlik is daar uitsonderings op die reël, maar dié belofte geld in die algemeen.  Soms tref die Here rebelse kinders deur bonatuurlike ingrype, maar gewoonlik sterf hulle deur die normale gevolge van hulle optrede.  ‘n Rebelse kind wat nie vir sy ouers luister nie en dronk word, met ‘n kar jaag, dwelms gebruik, rondslaap, slegte vriende het, en roof sal waarskynlik verongeluk, in ‘n geveg betrokke raak en met ‘n mes gesteek word, aan ‘n oordosis van dwelms sterf, VIGS kry, doodgeskiet word, ensovoorts.

 

Die lang lewe praat nie van ‘n lang maar misrabele lewe nie.  Dit verwys na ‘n lewe van vrede en geluk (Deuteronomium 5:16).  As jy help om ‘n samelewing te bou wat omgee vir ou mense sal jy self die vredevolle vrugte pluk as jý eendag oud is.

 

Jy sal ook lank (vir ewig) lewe op die nuwe aarde.  Jesus het ons ongehoorsaamheid (ook ongehoorsaamheid aan ons ouers) op Homself geneem aan die kruis.  Hy het sy aardse ouers en hemelse Vader geëer en onder andere dié geregtigheid op ons rekord geplaas.  Nou verander Hy ons harte, sodat ons ons ouers wíl eer.

 

Die sesde gebod (v.13)

Moenie moord pleeg nie.  Manslag, doodstraf, selfverdediging, oorlog, jag, en bosbou is nie moord nie (22:2, Numeri 35, Genesis 9:6, Romeine 13:4, Deuteronomium 20, Levitikus 24:17-18).  Die Bybelse definisie vir moord is ‘n kwaadwillige en beplande daad waarin jy iemand doodmaak (Numeri 35:20-21).

 

Laasjaar het mense op RSG se Loslip ingebel en gesê dat moord dikwels op die ingewing van die oomblik plaasvind.  Dit is nie heeltemal waar nie.  Die daad mag dalk onverwags plaasvind, maar haat en bitter gedagtes broei al lankal.

 

Ons almal wil iemand uit ons lewens hê.  Om dit reg kry sal jy hulle haat, ignoreer, uitskuif, afskryf, slegsê, beskinder, vloek, uitskel, slaan, bitter of kwaad wees, weier om hulle te vergewe.  Volgens Jesus en Johannes is dit moord (Matteus 5:21-22, 1 Johannes 3:15).

 

‘n Seuntjie het gesukkel om sy reënjas op die hakkie te kry.  Uiteindelik het hy dit reggekry.  ‘n Meisie het gekom en sy reënjas afgehak om hare op te hang.  Hy was woedend.  Sy ma het dit gesien en vir haar seun gesê:  ‘Dink jy dit sal reg wees om die meisie dood te maak?’  ‘Nee,’ het hy gesê.  ‘Wel, volgens die Bybel het jy nou-net moord gepleeg in jou hart,’ het sy ma gesê.

 

Met verwysing na v.13 sê die ESV voetnota:  ‘The Hebrew word [for murder] also covers causing human death through carelessness or negligence.’  Iemand wat dus nalatig is met ander se lewens pleeg ook moord.  ‘n Man wat byvoorbeeld dronk bestuur en kind dood ry is skuldig aan moord.

 

Deesdae heers daar debat oor dié vorme van moord:

 

GENADEDOOD

Genadedood is moord (iemand het baie gepas gepraat van ‘genademoord’).  Aktiewe genadedood gebeur byvoorbeeld as ‘n dr. ‘n pasiënt inspuit sodat hy sterf.  Passiewe genadedood is as die dr. of familie byvoorbeeld die pasiënt van medisyne ontneem wat sy of haar lewe drasties kon verleng.  Beide aktiewe en passiewe genadedood is moord.

 

Om egter toe te laat dat iemand sterf is anders.  As die dr. of familie byvoorbeeld die sterwende persoon se medikasie wegvat, sodat die sterwensproses nie onnodiglik uitgerek word nie, is dit nie moord nie.  Sodra die medikasie verwyder word, sterf die persoon binne ‘n kort tyd daarna.

 

‘n Man het vir my vertel dat hulle dit met sy skoonpa gedoen het.  In ‘n ander geval het hy sy kind se masjiene laat afskakel.  Persoonlik dink ek dat die eerste geval reg was, maar dat die tweede geval passiewe genadedood was.

 

Ons moet onthou dat verligting van pyn nie ons grootste doel is nie.  Ons hoogste doel is om, ten spyte van ons pyn, die Here te verheerlik.

 

SELFMOORD

Geen moordenaar het die ewige lewe in hom nie (1 Johannes 3:15).  Die meeste mense wat dan selfmoord pleeg is ongered.  Tog moet ons nie dink dat selfmoord die onvergeeflike sonde is, of dat iemand wat dit pleeg outomaties hel toe gaan nie.

 

Ek het gehoor hoe ‘n man by ‘n Bybelstudie sê dat iemand wat selfmoord pleeg dadelik hel toe gaan.  Volgens Romeine 8:38-39 kan niks ‘n ware gelowige skei van God se liefde nie.  Ek het laas naweek ‘n begrafnis bygewoon van ‘n ware gelowige wat selfmoord gepleeg het.

 

Maar ons moet erken dat selfmoord ‘n aaklige, selfsugtige, en skandelike sonde is (1 Samuel 31:4-5, Matteus 27:5, Rigters 9:54, 2 Samuel 17:23, 1 Konings 16:18-19).  Iemand wat selfmoord pleeg beskuldig God vir sy of haar omstandighede, maar vertrou Hom nie vir ‘n uitkoms nie.

 

Daar is vergifnis vir mense wat al probeer het om selfmoord te pleeg.  Vertrou dat die Here jou deur jou moeilike omstandighede sal help (Psalm 42:6).  As jy mense ken wat hiertoe geneig is moet jy hulle met groot deernis en geduld help (1 Tessalonisense 5:14, Judas 22-23).

 

ABORSIE[1]

As die bevrugte eiersel, sigoot, embrio of fetus ‘n mens is, dan is aborsie moord.  Volgens die Skrif is die mens by konsepsie reeds ‘n sondaar en daarom ook ‘n mens (Psalm 51:7).  God beskou die persoon in die baarmoeder as ‘n mens wat na sy beeld gemaak is (21:22-25, Psalm 139:13-16, Jesaja 49:1, Lukas 1:15, 41).

 

Die ongebore baba is nie deel van die ma se liggaam soos haar niere, arms, of mangels nie.  Die kind het sy eie DNA, en dikwels ook sy eie bloedgroep en geslag.  Die ma of die kind kan sterf, terwyl die ander een oorleef.  ‘n Chinese sigoot kan in in ‘n Sweedse ma se baarmoeder ingeplant word, en sal nogsteeds ‘n Chinese baba bly.

 

Dit is ironies dat ons samelewing babas vermoor, maar sê ons moet hulle nie beskadig met drank, sigarette of x-strale tydens swangerskap nie.

 

‘Maar wat as die ma se lewe in gevaar is?’ vra iemand.  Sulke gevalle is bitter skaars.  Indien dit wel die geval is moet jy nie die baba vermoor nie, maar die ma se lewe probeer red.  As die kind in die proses sterf is dit nie moord nie.

 

Is aborsie toelaatbaar vir verkragting en bloedskande?  Nee.  Gee eerder die kind op vir aanneming, maar moenie die baba straf vir die sonde van die verkragter nie.  Deuteronomium 24:16 sê:  “Die vaders mag nie vir die kinders, en die kinders mag nie vir die vaders gedood word nie; elkeen moet vir sy eie sonde gedood word.”

 

Wat as die kind gestremd is?  ‘n Dokter het vir een van ons oud-lidmate gesê:  ‘Die baba in jou baarmoeder het Down sindroom.  Ek beveel aan dat jy die kind laat aborteer.’  Die kind is normaal gebore.  Maar wat ás die kind gestremd was by geboorte?  Het sulke kinders nie die reg om te lewe nie?  ‘n Predikant se dogter het verstandelik gestremd geraak deur ‘n fietsongeluk.  Sal dit aanvaarbaar wees om so ‘n kind dood te maak?  Hoekom is dit dan aanvaarbaar om verstandelik gestremde babas te vermoor?

 

Dalk is jy skuldig aan hierdie sonde.  In Jesus Christus is daar vergifnis vir moordenaars (1 Korintiërs 6:9-11, Lukas 23:34, 43).  Maar as jy jou nie bekeer nie sal jy hel toe gaan (Openbaring 21:8).

 

Die sewende gebod (v.14)

‘n Paar weke gelede het ‘n ongetroude persoon vir my gesê:  ‘Ek weet seks voor die huwelik is verkeerd, maar ek het dit gedoen omdat ek regtig lief is vir die persoon.’  Mense wat só redeneer het nie ‘n begrip van wat liefde is nie.  As jy jou naaste liefhet sal jy sy of haar lewe, reinheid, besittings, en reputasie respekteer.  Met ander woorde, jy sal die Tien Gebooie nakom.

 

In die ou Suid-Afrika was egbreuk ‘n misdaad.  ‘n Maand of twee gelede het ‘n prokureur ‘met groot vreugde’ (sy eie woorde) op RSG gesê dat dit nie méér so is nie.  Daarna het die aanbieder en prokureurs grappe hieroor gemaak en gepraat asof egbreuk goed is.  Volgens die Bybel is dit ‘n lelike sonde.

 

Egbreuk verwys na die verbreking van die huweliksband.  Ons praat hier van enige seksuele sonde:  rondslaap, homoseksualiteit, prostitusie, pedofilia, verkragting, bestialiteit, bloedskande, poligamie, skei en hertrou op onbybelse gronde (Matteus 19:9, 1 Korintiërs 7:15).

 

Tragies om te sê dat hierdie sondes ook in die kerk gevind word.  In ons eie gemeente moes ons al mense hiervoor dissiplineer.  Ander in ons kerk het van hierdie dinge gedoen, maar berou gehad sodat dit nie voor die kerk genoem is nie.  In my bediening het ek al gehoor van lidmate van goeie kerke wat homoseksualiteit beoefen, prostitute besoek, kinders molesteer, met meer as een vrou trou, ‘n sterk seksuele begeerte het vir perde, skei en weer trou asof dit uit die mode uit gaan.  Dit is skandelik!

 

Selfs ongetroudes kan die sewende gebod breek.  As hulle ongetroud is en saamslaap, besmet en onteer hulle die huweliksbed (Hebreërs 13:4).  Op dié manier breek hulle hierdie gebod en sondig hulle.

 

Hoe kan jy dié gebod gehoorsaam?  Van die staanspoor af wil ek duidelik maak dat ek met gelowiges praat.  As jy ongered is kán jy nie God se wet reg gehoorsaam nie (Romeine 8:7-8).

 

So, vir gelowiges sê ek:  Moenie net teen vuil dade probeer veg nie, maar ook teen sondige gedagtes.  Volgens Jesus is wellustige gedagtes reeds egbreuk in die hart (Matteus 5:27-28).  Om onrein gedagtes te wen, moet jy jou hart en denke vul met die Skrif.  Memoriseer en oordink dit:

 

“Waarmee sal die jongeling sy pad suiwer hou?  Deur dit te hou na u woord… Ek het u woord in my hart gebêre, dat ek teen U nie sal sondig nie.” (Psalm 119:9, 11).  “Verder, broeders, alles wat waar is, alles wat eerbaar is, alles wat regverdig is, alles wat rein is, alles wat lieflik is, alles wat loflik is—watter deug en watter lof daar ook mag wees, bedink dit.” (Filippense 4:8).

 

As jy nie jou gedagtes beheer nie, sal dit uiteindelik uitbreek in skandelike dade.  Jy sal oes wat jy geplant het (Galasiërs 6:7-8).  Jy flous jouself as jy anders dink (Jakobus 1:14-15).  As jy aanhou om hierdie dinge te dink, sal jy selfs jou eie suster verkrag (2 Samuel 13), en dalk ‘n moord pleeg om jou sonde te probeer wegsteek (2 Samuel 11).  Dalk sal jou vuil gedagtes duidelik word as jy die dag Alzheimer’s kry en jy allerhande seksuele en perverse opmerkings maak.  Almal sal geskok wees dat ‘n wonderlike mens soos jý dit kan dan, maar wat hulle nie weet nie is dat dít die ware jy is.

 

John MacArthur het van predikante gesê:  ‘When a pastor falls into sexual sin, he doesn’t fall far.’  Sy bedoeling was dat die predikant al lankal met hierdie dinge in sy gedagtes besig is.  Die eintlike daad van egbreuk was net die laaste stap.  Hierdie beginsel geld nie net vir predikante nie, maar vir ons almal.

 

Hier is nog ‘n paar wenke om seksuele sonde te oorkom:

 

  • Vermy mense, plekke, omstandighede wat hiertoe kan lei (Spreuke 5:8, Genesis 39:7, 10). Moenie vir jou vlees die geleentheid skep om te sondig nie (Romeine 13:14).
  • Breek vriendskappe en raak ontslae van CD’s, DVD’s, briewe, geskenke, jou TV en internet konneksie – enigiets wat jou versoek om te sondig. In Jesus se woorde: kap jou hand af en pluk jou oog uit (Matteus 5:29-30).
  • Moenie eers oor hierdie dinge praat nie (Efesiërs 5:3-4). Dit mag jou net opgewonde maak en in die strik laat trap.
  • Pasop vir te veel drank, want dit kan maklik hiertoe lei (Efesiërs 5:18).
  • Pasop ook vir soene wat jou hormone kan opwarm, sodat jy nie weet wanneer om te stop nie (Spreuke 7:13).
  • Wees versigtig vir ledigheid. As jy niks het om te doen nie sal jou vlees en die duiwel vir jou iets kry om te doen (2 Samuel 11:1, 2-5).
  • Geniet jou eie huweliksmaat (1 Korintiërs 7:2-5).
  • Trou (1 Korintiërs 7:9).
  • Moenie onbeskeie klere dra, sodat jy mans versoek nie (1 Timoteus 2:9-10). Weë die een deur wie die versoeking kom (Matteus 18:7).

 

Dink aan die gevolge van egbreuk:

 

[1] Die huwelik is ‘n weerspieëling van Jesus se verhouding met die kerk (Efesiërs 5:22-23).  Iemand wat dan egbreuk pleeg vertel leuens oor Hom.

 

[2] Jou eie reputasie sal skade lei (Spreuke 6:33).

 

[3] Jy sal mense se harte breek:  jou maat en kinders, die ander persoon se maat en kinders, jou geestelike leiers, jou familie, jou medegelowiges (2 Korintiërs 12:21).

 

[4] God sal jou straf met seksueel-oordraagbare siektes, die dood, en die hel (Levitikus 18, 20, Spreuke 5:11, Openbaring 21:8).

 

Die agtste gebod (v.15)

Hierdie gebod kan op honderde maniere toegepas word.  Kom ek noem maar ‘n paar maniere hoe mense vandag steel:

 

  • Mense steel goed uit winkels.
  • Mense breek in by huise.
  • Mense steel geld uit die werk se kleinkas en sê: ‘Ek sal dit later weer terugsit.’
  • Mense steel skryfbehoeftes, papier, gereedskap by die werk.
  • Kinders steel geld by hulle ouers (Spreuke 28:24).
  • Mense misbruik die werk se telefoon, kar, fotostaatmasjien, petrol- of kredietkaart vir hulle private gebruik.
  • Mense hou hulle werkers se salarisse terug, en steel so iemand anders se rente (Levitikus 19:13).
  • Mense vul nie hulle belastingvorms akkuraat in nie, maar omseil die wet op slinkse maniere.
  • Mense word betaal vir 8 ure se werk, maar werk net vir 5 of 6 ure. Hulle steel hulle werkgewer se tyd en geld. Hulle sit op Facebook terwyl hulle moet werk. Hulle vat ekstra tyd vir tee en ete. Hulle gaan McDonald’s toe of kuier by vriende terwyl hulle kliënte moet sien.
  • Mense vra vir kliënte meer geld as wat die produk of diens wat hulle gelewer het, werd is. ‘n Taxi-bestuurder by Durban lughawe het R800 gevra om ons na Port Shepstone toe te vat. Toe ons in Port Shepstone kom het iemand gesê dat hy slegs R80 betaal het. Ek het onlangs navraag gedoen om my kar se skokbrekers te vervang. Die man het my R6500 gevra. Ek het bewyse dat hy my wou indoen.
  • Kinders en studente skryf huiswerk en toetse af. Een leerder het die groeptaak gedoen, maar jy kry die punte. Die vrae- of antwoordstel lek uit. As jy skuldig is hieraan is jy ‘n dief.
  • Mense vat omkoopgeld om iemand gouer en op onwettige maniere te help (bv. met lisensies of paspoorte).
  • Mense maak onwettige kopieë van DVD’s, boeke, rekenaar programme.
  • Mense pleeg plagiaat: hulle vat ‘n ander persoon se werk en maak of dit hulle eie is. Predikante is te lui om ‘n preek voor te berei, en steel ander dominees se preke op die internet (Jeremia 23:30).
  • Predikante speel op mense se gevoelens sodat hulle meer geld in die offergawe sal ingooi. TBN se predikers is veral skuldig hieraan.
  • Mense steel ander se tyd. In die begin van my bediening het ‘n vrou my gereeld gebel en vir ‘n uur op ‘n slag met my gepraat. As jy gedurig laat kom vir afsprake steel jy ander mense se tyd. Bel ten minste en maak verskoning as jy weet jy gaan laat wees. ‘Being late is not loving your neighbour.’ (Stuart Olyott).
  • Mense wys geen respek vir ander mense se besittings nie, maar breek, verloor, beskadig die goed wat hulle leen.
  • Die Kommuniste vat ander se besittings vir hulleself.
  • Mense steel ander om van hulle slawe te maak (21:16). ‘Human trafficking’ is wat hulle dit vandag noem.
  • Mense mors God se geld en besittings wat Hy aan hulle toevertrou het. God sal van ons rekenskap eis oor hoe ons sy eiendom bestee het.
  • Mense betaal nie die geld wat hulle skuld nie (Romeine 13:7-8).

 

Is jy skuldig aan enige van die bogenoemde?  Ja?  Dan is jy ‘n dief.  Bely jou sonde aan God en die mense teen wie jy skuldig is.  Betaal terug wat jy gesteel het (22:7, Lukas 19:8).

 

Ek het onlangs onthou hoe my honde die buurman se haas gevang het.  Hy het my gevra of ek sy haas gesien het.  Ek het ‘nee’ gesê.  Ek moes my leuen aan hom bely en ook restitusie maak (ek het vir hom geld gegee om ‘n nuwe haas te koop).

 

Moenie steel nie, maar werk eerlik en hard.  Deel eerder jou eie geld, tyd, kos, gawes, besittings, en middele as wat jy iemand anders s’n vat (Efesiërs 4:28).  Onthou dat diewe nie die koninkryk van God sal sien nie (1 Korintiërs 6:10).

 

Die negende gebod (v.16)

Jy mag nie vals getuienis teen jou naaste aflê nie.  Wat beteken dit?

 

[1] Jy mag hom nie valslik beskuldig en leuens vertel in die hof nie (Deuteronomium 19:15-21).  In ons land aanvaar prokureurs, regters, en polisiemanne omkoopgeld en vertel hulle leuens.

 

[2] Moenie vals gerugte oor ander versprei nie (23:1).  Mense doen dit veral in e-posse, op Facebook en Whatsapp.  Moenie skinder nie (Levitikus 19:16).  Is dit wat jy oorvertel hoorsê?  Het jy al die feite en ken jy die persoon se motiewe?

 

[3] Moenie oordryf en sê:  ‘Sy is altyd… Hy doen nooit…’

 

Ons moenie net die waarheid oor ander praat nie, maar ook met hulle:

 

[4] Moenie vir jou ouers jok om ‘n pakslae vry te spring nie.

 

[5] Moenie vir mense geskenke belowe wat jy nie gee nie.  “‘n Man wat hom beroem op ‘n geskenk wat hy tog nie gee nie, is soos dampe en wind waar geen reënbui by is nie.” (Spreuke 25:14).

 

[6] Doen wat jy belowe.  ‘Ek sal môre 10:00 daar wees… Ek sal volgende keer kom kyk as jy rugby speel… Ek sal vir jou ‘n lekker koop as jy stilsit by die tandarts… As jy weer op die banke spring gaan ek vir jou pak gee… Ons sal vir jou bid…’

 

[7] Moenie jou storie oordryf sodat jy kan goed lyk nie.

 

[8] Moenie mense vlei nie.  Om dít te doen is om met ‘n mooi gesig te jok.

 

[9] Moenie op jou CV lieg oor jou bekwaamheid, kwalifikasies, of ondervinding nie.

 

[10] Moenie vir kliënte lieg oor hoe goed die produk is nie.

 

[11] Moenie belangrike inligting terughou nie.  Om dit te doen is om te jok.  Iemand wat bv. ‘n kar verkoop en nie vir die kliënt sê die cambelt is op die koffie nie, oortree die negende gebod.

 

[12] As jy hoor hoe iemand jok, terwyl jy die waarheid ken maar stilbly, dan deel jy in die leuen.

 

[13] Vals lering is ook ‘n leuen.  Moet dan nie vir iemand se verjaarsdag ‘n boek, dagboek, of dagstuk koop waarvan jy nie die inhoud ken nie.

 

Jy moet so betroubaar wees dat dit nie nodig is om te sweer, ‘n eed te maak, jou erewoord te gee, of jou hand op die Bybel te sit nie.  Laat jou ja ja wees en jou nee nee (Matteus 5:33-37).

 

‘n Joodse sakeman in die Vrystaat het gehoor dat iemand iets by hom wou leen.  Hy het eers nee gesê, maar toe hy hoor dat dit een van die Cornelia-Baptiste is, het hy gesê:  ‘O, is hy van die Baptiste?  Nee, dan is die saak reg.  Hy kan dit maar leen.  Die Baptiste is eerlike mense.’  Ons moet ook só ‘n reputasie hê.

 

Is dit soms toelaatbaar om te lieg?  Wat as iemand by jou huis inbreek en vra waar jou vrou en kinders is?  Jy kan die vraag vermy, die gesprek weglei, stilbly, of weier om iets te sê.  Ek is van mening dat dit altyd verkeerd is om te jok.  Die doel heilig nie die middele nie.  Die beginsel wat geld vir steel, geld ook vir jok:

 

“‘n Dief word nie verag as hy steel om sy begeerte te bevredig nie, omdat hy honger het; en as hy uitgevind word, moet hy sewevoudig vergoeding gee; al die goed van sy huis moet hy gee.” (Spreuke 6:30-31).  Ons voel jammer vir die dief wat steel omdat hy honger is.  Tog kan sy sonde nie verskoon word nie.

 

Hoekom moet jy nie lieg nie?  Die duiwel is die vader van die leuen; as jy lieg is jy sy kind (Johannes 8:44, Psalm 58:4).  Leuenaars sal hel toe gaan (Openbaring 21:8, 22:15).  Iemand wie se hart verander is, is ook gevul met die waarheid.  Hy is soos Jesus en praat die waarheid (Johannes 14:6, 1 Petrus 2:22, Efesiërs 4:25).  As jy leuens vertel oor mense dan smeer jy hulle reputasie swart en bring jy hulle in die moeilikheid (Markus 14:56-57, Handelinge 6:13).

 

Die tiende gebod (v.17)

Die tiende gebod is die wortel van die vorige vyf:  “Want uit die hart kom daar slegte gedagtes, moord, egbreuk, hoerery, diewery, valse getuienis, lastertaal.” (Matteus 15:19).  Begeerlikheid was ook deel van die eerste sonde in Genesis 3:6.

 

God wil nie net hê jy moet reg praat of optree nie, maar ook dat jou hart moet reg wees.  As jy dié gebod oortree, sal jy maklik die res oortree.  Jy sal steel, moord pleeg, en egbreuk pleeg om te kry wat jy begeer (sien 2 Samuel 11).  Om iets so sterk te begeer dat jy sal sondig om dit te kry, is om ‘n afgod daarvan te maak (Kolossense 3:5).

 

Moenie ander se goed begeer nie.  Hoe oortree mense hierdie gebod?

 

  • Jy wens iemand gee vir jou sy geld of besittings (Handelinge 24:26).
  • Jy dagdroom oor hoe so-en-so doodgaan, en jy sy ou goed kry of erf. Of jy wens hy kry nuwes, sodat jy sy oues kan kry.
  • Jy dagdroom oor hoe dit moet wees om met __ getroud te wees, en wens hy of sy was jóú huweliksmaat (Matteus 5:28).
  • Jy kla oor grondeise, maar jy self begeer iemand anders se huis of plaas (Miga 2:2).
  • Jy is jaloers op iemand anders se groter gemeente, beter gawes, mooier liggaam, duurder goed, sukses, posisie, guns wat hy met die baas het, bevordering, roem, omstandighede, soet kinders, gelukkige gesin, kinders wat presteer in sport of akademie, klere, nuwe selfoon, mooi horlosie, ens.
  • Jy wens jy wen die LOTTO.

 

Die wêreld versoek ons om materialisties te wees, om alewig nuwe en beter dinge te soek.  Jesus het gewaarsku:  “Pas op en wees op julle hoede vir die hebsug, want iemand se lewe bestaan nie uit die oorvloed van sy besittings nie.” (Lukas 12:15).

 

Hierdie gebod is nie teen rykdom, harde werk, en mooi goed nie (Job 42:12, Spreuke 21:20, Deuteronomium 8:18, 1 Samuel 2:7).  Dit wil ons eerder waarsku teen ‘n gejaag na geld, besittings, of dit wat ander het (1 Timoteus 6:10, Matteus 6:24).  C.S. Lewis het gesê:  ‘The problem is not with nice cars and big houses, but with nicer cars and bigger houses.’  Die tiende gebod wil ons waarsku teen TBN se predikers wat maak asof Jesus bestaan om ons ryk te maak.

 

Om begeerlikheid te oorkom moet jy leer om tevrede te wees met wat jy het (Filippense 4:11-13, 1 Timoteus 6:8, kontrasteer Romeine 7:7-8).  Dank die Here vir dit wat jy het.  As jy ‘n kar het, is jy onder die rykstes in die wêreld.  Wees ook baie vrygewig.  Gee weg eerder as wat jy opgaar.

 

Onthou dat God nie net jou dade sal oordeel nie, maar ook jou geheime begeertes (Romeine 2:16).  Tog is daar vergifnis vir mense wat God se wet oortree (1 Korintiërs 6:9-11).  Jesus het die wet perfek onderhou en die straf gekry asof Hy dit oortree het.  Dit het hy gedoen vir almal wat hulle bekeer en op Hom vertrou.

 

Ek het die eerste keer van kleptomania gehoor toe ek in graad 2 was.  ‘n Kind in my broer se klas het vreeslik gesteel.  Hy het eendag tydens krieket oefening ‘n ander kind se fiets gesteel.  Hulle het hom gevang en geslaan.

 

Dít is hoe die wêreld die oortreding van God se wet sien:  nie as sonde waarvoor jy verantwoordelik is, maar as ‘n siekte waarvoor jy nie kan help nie.  Vir die wêreld lê die oplossing in pille en terapie, en nie in berou, belydenis, of bekering nie.  Volgens hulle moet ons die moordenaar bejammer, is die persoon wat rondslaap verslaaf en onskuldig, is die leuenaar en die persoon wat dobbel siek.

 

Alhoewel geen mediese toetse kan bewys dat dit ‘n siekte is nie, eet ons hierdie teorieë op vir soetkoek.  As hierdie dinge ‘n siekte is, is daar geen hoop dat dié mense ooit kan verander nie.  Indien dit egter sonde is, is daar hoop en vergifnis in die kruis.

 

Dink aan enige lied wat jy onlangs op die radio of op ‘n CD gehoor het.  Waaroor het dit gegaan?  Oor liefde?  Waaskynlik.  Hoekom?  Almal is opsoek na die vervulling wat ware liefde bring.  Tog soek mense dit op die verkeerde plek:  in die arms van iemand wat mooi gebou is, jou laat goed voel, sterk is, of jou sal beskerm.  Vir die wêreld gaan liefde oor emosie, plesier, of ‘n sterk gevoel wat selfgerig is.

 

In die Bybel gaan liefde nie bloot oor ‘n selfgesentreerde plesier of gevoel nie.  Dit gaan eerste oor God en dan oor jou naaste (sien Matteus 22:37-40).  Dit word uitgeleef in die dade en gesindheid wat in die Tien Gebooie beskryf word.

 

[1] Baie van wat ek oor aborsie sê het ek gekry uit Why Pro-Life? van Randy Alcorn

Dink reg oor seks

Marilyn Monroe 2

‘n Paar maande gelede het die regering besin om seks wettig te maak vir 12-jariges.  ‘n Onlangse Beeldopskrif het gesê dat hulle kondome vir 10-jariges wil uitdeel.

 

Die wêreld se idee van seksuele moraliteit is ver verwyderd van wat die Skrif leer.  1 Korintiërs 6:12-20 help ons om reg te dink oor seks.

 

Die Korintiërs se verkeerde denke (v.12-14)

Die Korintiërs sou saamstem met dié gediggies:

 

Free from the law,

O happy condition;

I can sin as I please

And still have remission.[1]

EN

Sex is evil,

sex is sin,

sins are forgiven,

so sex is in.

 

Verse 12-14 maak duidelik dat Paulus nie sou saamstem nie.

 

Jesus het ons skoon gewas, geheilig, en geregverdig (v.11).  Daarom is ons vry.  Met dít in gedagte het die Korintiërs gesê:  ‘Alles is vir my toelaatbaar’ (v.12).  Paulus stem saam, maar sê dat alles jou nie geestelik sal opbou of bevoordeel nie; jy moenie ‘n slaaf wees van enigiets nie (v.12, 10:23).  Ons is vry in Jesus, maar ons moenie ons vryheid as ‘n verskoning gebruik om sonde te doen nie (Galasiërs 5:13, 1 Petrus 2:16).

 

Die Korintiërs het ook gesê dat seksuele immoraliteit so biologies en normaal is soos kos vir jou maag.  Soos kos en jou liggaam, gaan seks eendag nie meer wees nie (v.13, Matteus 15:17).  Dan maak dit mos nie saak of jy jou liggaam gebruik om rond te slaap nie, of hoe?  Jare gelede het ‘n student sy pornografie só probeer regverdig.  ‘Ek geniet net God se skepping,’ het hy gesê.

 

Paulus sê dat die liggaam nie vir seks geskep is nie, maar vir God:  Hý sê hoe die liggaam reg gebruik moet word (v.13).  Die liggaam is nie sleg soos wat die Grieke geglo het nie.  Toe ek op skool was het ek saam met ‘n Ou Apostel gewerk.  Sy het gesê dat ‘n mens maar kan drink, rook, vloek, en rondslaap, omdat die liggaam nie belangrik is nie.  God sê egter dat dit belangrik is, en daarom sal Hy weer ons liggame uit die dood uit opwek (v.14, Johannes 6:40).

 

Paulus se regte denke (v.15-20)

Vir 1900 jaar het Christene die Bybel geglo en gesê dat seksuele immoraliteit sonde is.  Eers in die 20ste eeu het sielkunde gesê dat dit ‘n siekte is.  ‘n Vrou het op ‘n Amerikaanse Christelike radiostasie ingebel.  ‘Ek slaap rond met almal; ek wíl graag verander maar voel magteloos,’ het sy gesê.  Die berader het gesê dat haar seksuele gedrag ‘n natuurlike reaksie is op haar passiewe pa en oorbetrokke ma.  Hy het gesê:  ‘Jy is verslaaf.  Jou seksuele neigings sal nie gou verdwyn nie.  Sluit aan by ‘n kerk wat jou leefstyl sal aanvaar, terwyl die wonde wat máák dat jy sondig, genees word.[2]

 

Maar wat van 1 Korintiërs 5-6?

 

‘n Amerikaanse koerant (Orange County Register, 13 Feb.1989) het vertel van ‘n kliniek vir Christen seksverslaafdes.  Dié kliniek was verbonde aan ‘n bekende Protestantse kerk in die area.  Volgens die kliniek is seksuele immoraliteit ‘n siekte.  Hulle het die krag van die Woord ontken en gesê:  ‘Some groups of Christians believe the Bible is all you need.’[3]

 

Om só te dink oor seks is verkeerd.  In v.15-20 help Paulus ons om reg te dink.

 

Jesus is die Hoof van die kerk en ons is die lede van sy liggaam (v.15, 12:27).  Ons moenie sy lede vat en dit een vlees maak met ‘n tempelprostituut nie (v.15-16, Genesis 2:24).  Jy is een gees met Jesus (v.17).  Die res van die Skrif bevestig dit:

 

  • “Daarom moet die man sy vader en sy moeder verlaat en sy vrou aankleef en hulle twee sal een vlees word. Hierdie verborgenheid is groot, maar ek sê dit met die oog op Christus en die gemeente.” (Efesiërs 5:31-32).
  • Jesus het gebid “dat almal een mag wees net soos U, Vader, in My en Ek in U; dat hulle ook in Ons een mag wees, sodat die wêreld kan glo dat U My gestuur het… Ek in hulle en U in My, sodat hulle volkome een kan wees; en dat die wêreld kan weet dat U My gestuur het, en hulle liefgehad het net soos U My liefgehad het.” (Johannes 17:21, 23).
  • “Bly in My, soos Ek in julle. Net soos die loot geen vrug kan dra van homself as dit nie in die wynstok bly nie, so julle ook nie as julle in My nie bly nie. Ek is die wynstok, julle die lote. Wie in My bly, en Ek in hom, hy dra veel vrug; want sonder My kan julle niks doen nie.” (Johannes 15:4-5).
  • “julle is egter nie in die vlees nie, maar in die Gees, as naamlik die Gees van God in julle woon. Maar as iemand die Gees van Christus nie het nie, dié behoort nie aan Hom nie. Maar as Christus in julle is, dan is die liggaam dood vanweë die sonde, maar die gees is lewe vanweë die geregtigheid. En as die Gees van Hom wat Jesus uit die dode opgewek het, in julle woon, dan sal Hy wat Christus uit die dode opgewek het, ook julle sterflike liggame lewend maak deur sy Gees wat in julle woon.” (Romeine 8:9-11).
  • “Ek is met Christus gekruisig, en ék leef nie meer nie, maar Christus leef in my. En wat ek nou in die vlees lewe, leef ek deur die geloof in die Seun van God wat my liefgehad het en Homself vir my oorgegee het.” (Galasiërs 2:20).

 

Omdat die Korintiërs een was met Jesus, moes hulle nie een word met ‘n tempelprostituut nie.  Die Griekse werkwoord in v.18 dui aan dat ons moet aanhou om te vlug vir seksuele sonde.  As jy daarin voortleef sal jy nie God se Koninkryk sien nie (v.9).  Ons moet dié sonde doodmaak en dit nie eers onder ons noem nie (Kolossense 3:5, Efesiërs 5:3).

 

As jy drank misbruik kom die sonde van buite af.  As jy seksueel sondig kom die onreinheid van binne af.  Jy sondig teen jou eie liggaam (v.18).  As jy deur seksuele sonde siek word sondig jy óók teen jou liggaam (Spreuke 5:11).  Jou liggaam is ‘n tempel – die allerheiligste – van die Heilige Gees (v.19, Johannes 2:21).  As jy jou liggaam (God se tempel) gebruik om rond te slaap, is dit asof die hoëpriester ‘n prostituut in die allerheiligste invat en seks het voor die ark!

 

Jou liggaam behoort aan God:  Hy het jou geskep en Hy het jou gered (v.19-20, Romeine 14:7-8).  God het jou gekoop met ‘n prys, met sy eie bloed (v.20, 7:23, Handelinge 20:28, 1 Petrus 1:18-19, Openbaring 5:9).  As Hy jou dan met ‘n prys gekoop het, moet jy nie ‘n prys betaal om met ‘n prostituut te slaap nie (v.20, 7:23, Hd.20:28, 1 Pt.1:18-19, Op.5:9).  God het jou gekoop om sy slaaf te wees, en daarom moet jy nie vir jouself lewe nie, maar vir Hom (v.20, 12).  Verheerlik Hom in jou liggaam (v.20, 10:31, Romeine 12:1).

 

Dink reg oor seks.  God het seks geskep en weet hoe dit reg moet werk.  Moenie onkundig wees oor wat die Skrif sê nie.  Paulus sê oor en oor dat ons die Skrif moet ken:  ‘Weet julle nie?… Weet julle nie?… Weet julle nie?…’ (v.15, 2, 3, 9, 16, 19, 5:6).  Ons moet weet dat God seks ontwerp het vir die huwelik (Genesis 2:24).  Ons moet weet dat seks in die huwelik goed is, en dat seksuele sonde dodelik is (Spreuke 5-7).  Druk jou ore toe vir die wêreld se lering oor seks.

 

[1] Moenie luister vir sielkundiges wat sê jy kan dit nie help nie, omdat dit ‘n siekte is.

 

[2] Moenie vir die regering luister wat kondome wil uitgee om VIGS te vermy nie.  Hulle wil VIGS vermy, maar nie immorele seks wat die VIGS veroorsaak nie.

 

[3] Moenie jou onderwysers of die kirrikulum hierin volg nie.  Ek het in die laer- en hoërskool verkeerde lering hieroor gekry.

 

[4] Moenie dat jou vriende jou leer nie.

 

[5] Moenie wêreldse boeke hieroor lees nie.

 

[6] Pasop vir wat TV, films, koerante en tydskrifte soos die Huisgenoot jou oor seks leer.

 

[7] Pasop ook vir vals leraars.  Die NG-Sinode het ‘n paar jaar gelede plek gemaak vir mense wat wil saambly.

 

Ouers en kerke moet Bybelse lering hieroor gee.  Sê vir jou kinders dat iemand wat met almal slaap nie seksuele vryheid het nie.  Hulle is slawe, voel vuil, het ‘n skuldige gewete, kan maklik seksueel-oordraagbare siektes kry, sal in die skande kom, is selfsugtig en nie lief vir dié met wie hulle slaap nie, steel ander se seksuele reinheid, bring God se frons oor hulleself, en sal hel toe gaan (v.12).  Hebreërs 13:4 sê:  “Laat die huwelik in alle opsigte eerbaar wees en die bed onbesmet; want God sal hoereerders en egbrekers oordeel.”  Openbaring 21:8 sê:  “afgodedienaars… is in die poel wat brand met vuur en swawel:  dit is die tweede dood.”

 

As jy in die huwelik seks het bring dit plesier en sal jy nie seksuele siektes kry nie.  Die Here sal oor jou glimlag.  Jy sal ‘n skoon gewete hê en nie gestraf word nie.  Is dit nie duidelik uit ‘n boek soos Hooglied nie?

 

Sê vir jou kinders hulle moet vlug vir seksuele sonde (v.18).  Iemand het gesê dat die beste hulp teen seksuele sonde ‘n goeie paar hardlooptekkies is.  Moenie dom wees en vra:  ‘Hoe ver kan twee ongetroudes gaan voordat dit sonde is’ nie.  Moenie kyk hoe naby jy aan die sonde kan kom sonder om te val nie, maar probeer eerder om so ver as moontlik daarvan af weg te bly (Spreuke 5:8).  Kap jou hand af en pluk jou oog uit (Matteus 5:29-30).  Raak ontslae van jou internet konneksie of TV as dit jou pla.  Moenie swembad of gym toe gaan as die vroue se klere jou laat struikel nie.

 

Moenie sê:  ‘My liggaam is myne, en ek kan daarmee doen wat ek wil’ nie.  Jou liggaam is nie joune nie, maar God s’n:  verheerlik God daarom in jou liggaam (v.19-20).

 

Sê vir jou kinders dat seksuele sonde baie gevaarlik is.  John Owen het gesê:  ‘You kill sin or sin will kill you.’  Moenie net die dade probeer doodmaak nie, maar maak die sondige begeertes dood in jou hart (Matteus 5:27-28).

 

  • Is jy seksueel losbandig, maar dit pla jou nie? As jy so leef sal jy nie hemel toe gaan nie (v.9-10).
  • Pla hierdie preek jou gewete? Jou sonde kan vergewe word (v.11). Jesus het die straf vir ons sonde op Homself geneem aan die kruis en weer opgestaan uit die dood. Glo en vertrou op Hom; gaan heen en sondig nie meer nie (Johannes 8:11).
  • Is jy gered? Het jy in dié strik getrap, maar jy is nie regtig gepla nie? Die swaar hand van God se tugtiging sal oor jou kom (hfst.5).
  • Is jy ‘n geredde persoon wat só gesondig het? Pla jou sonde jou baie? Bely en laat staan jou sonde en God sal jou vergewe (v.18, 1 Johannes 1:9).

 

Hoekom moet jy reg dink oor seks?  Wie wil nié reg dink oor ‘n saak wat ewige gevolge het nie (v.9-10)?

 

Charlie werk op ‘n plaas in Limpopo.  Hy werk hard, is getrou en lojaal, en het respek vir sy baas en mede-werkers… totdat die baas hom voorman gemaak het.  Skielik het hy hoogmoedig geword.  Hy het begin baasspeel, drink, werk mis, terugpraat met die baas, en die werkers geslaan.  Sy baas het hom ernstig gewaarsku en weer ‘n gewone werker gemaak.  Hy was weer die ou Charlie:  getrou, lojaal, hardwerkend, en vol respek.

 

Charlie was ‘n goeie werker maar ‘n slegte baas.  So is dit met seks:  seks is ‘n goeie slaaf (in die huwelik), maar ‘n slegte meester (buite die huwelik).  Dít is hoe ons moet dink oor seks.

[1] David E. Garland, 1 Corinthians: Baker Exegetical Commentary on the New Testament, p.222

[2] John MacArthur, How to Counsel Biblically, p.15

[3] Ibid, p.17

Die Tien Gebooie: Hoe om God lief te hê

Moses receiving Ten Commandments

Ek het op ‘n DVD gesien hoe ‘n evangelis mense in die straat vra hoeveel van die Tien Gebooie hulle ken.  Die meeste kon skaars drie noem en het selfs ander bygevoeg wat nie deel is van die Tien Gebooie nie (hoeveel kan jy opnoem?).  Toe die evangelis vra hoeveel biere die mense kon opnoem, het hulle glad nie gehuiwer nie.

 

Jy weet natuurlik dat die Tien Gebooie net ‘n opsomming van die 613 wette van die Ou Testament is.  Die Tien Gebooie self kan in twee sinne opsom word (Matteus 22:36-40):  die eerste vier gebooie leer vir ons hoe om God lief te hê, terwyl die laaste ses vir ons wys hoe om ons naaste lief te hê.  Vandaar my tema vir die eerste vier gebooie:  Hoe om God lief te hê.

 

Inleiding (v.1-2)

By 2005 se School of Preaching het Dale Ralph Davis die volgende storie vertel.  Die kommuniste in die ou Soviet Unie het talle mense in die tronk gestop, omdat hulle die wet ‘oortree’ het.  ‘n Tipiese gesprek tussen Russiese soldate en die gevangenes sou so iets geklink het:

 

Soldaat:                   Teken hier!

Gevangene:            Maar hoe het ek die wet oortree?

Soldaat:                   Jy het oortree – teken!

Gevangene:            Kan ek die wet sien?

Soldaat:                   Jy hoef nie die wet te sien nie!

Gevangene:            Ek wil graag die wet sien.

Soldaat:                   Ons het nie die wet nie!

Gevangene:            Vra asseblief vir jou kommandant ek wil die wet sien.

Soldaat:                   Hy het ook nie die wet nie!

 

Die wet was in die tsar of president se kop.  Dit is erg as jy nie weet wat die wet vereis nie.  So het heidene in die antieke wêreld nie geweet wat die gode wil hê nie.  Hulle het in vrees gelewe en nooit geweet of die gode tevrede is of nie.  Die Tien Gebooie is dus nie ‘n straf nie maar ‘n genade, want daarin maak God sy wil bekend:  ons weet wat Hy van ons verwag.

 

Die Tien Gebooie verskil van enige ander deel in die Bybel.  Elke teks in die Bybel is onder inspirasie van die Heilige Gees deur mense geskryf.  Net die Tien Gebooie is direk van die berg af gespreek (v.1, 19, vgl. Johannes 1:1).  God het dit met sy eie vinger op kliptafels geskryf (31:18).

 

Die Hebreeus praat van die Tien Gebooie as ‘Tien woorde’ (Deuteronomium 4:13).  God het dit in tien wette opgesom sodat die volk dit maklik kon onthou.  Voor God die gebooie gee sê Hy vir ons wie Hy is (v.2).  Elke gebod wys vir ons iets van wie God is.

 

Gebod 1:                 God is die enigste God.

Gebod 2:                 God is jaloers oor sy eer.

Gebod 3:                 God is heilig en sal nie dat mense sy Naam laster nie.

Gebod 4:                 God is die Skepper wat sy skeppingswerk voltooi het.

Gebod 5:                 God is die Oppergesag wat gesagsfigure oor ons stel.

Gebod 6:                 God is die bron van lewe; moet daarom nie moord pleeg nie.

Gebod 7:                 God is rein; moet daarom nie egbreuk pleeg nie.

Gebod 8:                 God is die gewer van alles; moet daarom nie steel nie.

Gebod 9:                 God is Waarheid; moet daarom nie lieg nie.

Gebod 10:               God is goed; wees daarom tevrede met wat jy het.

 

God sê:  “Ek is die HERE” (v.2).  In 3:14 het God gesê:  EK IS wat EK IS.  Hy is soewerein, selfstandig, ewig, en onveranderlik.  Hy sê:  “Ek is die HERE jou God”(v.2).  Hy het vir Israel geskep en hulle uit Egipte gered, en daarom is Hy hulle God (v.2).  Israel sou nie deur wetsonderhouding gered of geheilig word nie.  God het die Tien Gebooie aan ‘n verloste volk gegee (v.2).  Israel moes vir die wêreld wys hoe ‘n verloste volk lewe (v.2).  Glo dit of nie, maar die genade van verlossing kom voor die wet (v.2)!  Natuurlik kon Israel en ons nie die wet perfek nakom nie, en daarom moes Jesus kom om die wet perfek te onderhou, asook om die straf te kry vir ons wetsoortreding.

 

Sorg dat jy die orde van wet en genade reg het.  Moenie die wet voor genade sit, asof jy deur wetsonderhouding genade kan verdien nie.  Ons voel maklik goed of dink dat God aan ons guns sal bewys (vir ons ‘n kind, huweliksmaat, werk, geld, ‘n groeiende kerk, of hulp met ons probleme sal gee) as ons vir ‘n paar weke nie gevloek het, kwaad was, gesteel het, leuens vertel het, slegte gedagtes gehad het, pornografie gekyk het nie; as ons reg gedoen het, die Bybel gelees en gebid het, of getrou kerk toe gekom het.

 

Dalk wil jy God se genade en vergifnis wen deur vir ure jou sondes te bely, te vas, baie hoofstukke in die Bybel te lees, of eers vir ‘n ruk reg te leef en die wet uit te voer.  ‘n Tyd gelede het ek teen die Here gesondig.  Ek was moedeloos.  Ek wou baie graag die Here se guns terugwen.  Ek het besef dat ek dit nie kan doen nie.  Ek moes eenvoudig my sonde bely en my daarvan bekeer.  Slegs Jesus se offer is aanneemlik voor God.  Dáárin moes ek skuil.  Sodra jy genade verdien is dit nie meer genade nie, maar werke.

 

Vir die ongelowige kom die wet voor genade.  In sý geval is die wet gegee om vir hom te wys hoe sondig hy is (1 Timoteus 1:8-10).  Hopelik sal hy dan vra om gered te word.  Vir die gelowige kom genade voor die wet.  Verlossing is ‘n gratis geskenk.  Noudat ons gered is skryf God sy wet op ons harte (Hebreërs 8:10).  Deur die krag van die Gees kán ons die wet onderhou; Hy máák dat ons daarvolgens lewe (Esegiël 36:27).  Kan enige mens wat volgens die wet begin lewe daardeur heilig word?  Tog werk die Gees in gelowiges en lei Hý hulle om daarvolgens te lewe (Romeine 8:4, Galasiërs 5:23).

 

Moenie die wet vóór genade sit nie.  Maar moet ook nie vergeet om die wet ná genade te sit nie.  Moenie wetteloos wees nie (Romeine 6:1-2).  Wie waarlik gered is sal die wet liefhê en daarvolgens wíl lewe.

 

Wat sal gebeur as jy die orde van die wet en genade omruil?  Jy sal in vrees lewe en nooit seker wees of jy genoeg gedoen het om God se guns te wen nie.  Jy sal trots raak as jy dink dat jy genoeg gedoen het.  Jy sal ‘n vals hoop hê wat op sand gebou is.  Jy sal in jou eie krag probeer om die sonde te oorwin, en uiteindelik moedeloos wees:

 

“As julle dan saam met Christus die eerste beginsels van die wêreld afgesterf het, waarom is julle, asof julle nog in die wêreld lewe, onderworpe aan insettinge soos:  raak nie, smaak nie, roer nie aan nie?—almal dinge wat deur die gebruik bestem is om te vergaan—volgens die gebooie en leringe van mense, wat, alhoewel dit ‘n skyn van wysheid het, in eiesinnige godsdiens en nederigheid en in gestrengheid teen die liggaam, geen waarde het nie, maar strek tot versadiging van die vlees.” (Kolossense 2:20-23).

 

Die eerste gebod (v.3)

Ek onthou hoe ek in 2008 gebid het dat God my sal help om die eerste gebod te verstaan.  Ek was oortuig dat ek dié gebod nie oortree het nie.  Kort na ek gebid het, het ek ingeskryf vir ‘n beradingskursus.  Daar was een hele klas wat oor dié onderwerp gehandel het.  Ek het besef dat elke sonde voortvloei uit ‘n oortreding van die eerste gebod.

 

Die eerste gebod sê dat ons naas Jahwe geen ander gode mag hê nie.  Ons kan dus nie soos die Assiriërs vir Jahwe en die afgode dien nie (2 Konings 17:33), of soos die Hindus vir Jesus en die afgode dien nie.  Ons mag geen gode voor die Here hê nie.  Jahwe moes vir Israel nr. 1 wees bo hulleself, die gode van Egipte (12:12), of enigiets en –iemand anders.  Vers 3 sê nie daar is ander gode nie (Jesaja 44:6).  Die verbod word gegee omdat die mens alewig in sy hart besig is om nuwe gode uit te dink.

 

Moenie afgode aanbid nie.  Jy kan passievol wees oor iets, sonder dat dit vir jou ‘n afgod is.  Hoe weet wanneer iets vir jou ‘n afgod is?  As jy iets so erg wil hê dat jy die wet sal breek om dit te kry of die wet breek as jy dit nie kan kry nie, is dit vir jou ‘n afgod.  Kolossense 3:5 sê gierigheid is afgodery.  ‘n Paar voorbeelde sal jou help om beter te verstaan:

 

  • Geld is vir jou ‘n afgod as jy steel, kliënte belieg, vir SARS kroek om dit te kry.
  • Gemak en jou reputasie is vir jou ‘n afgod as jy moord pleeg, bitter is, ander slegsê, mense uitskuif as hulle dit bedreig.
  • Seks en plesier is vir jou ‘n afgod as jy egbreuk pleeg en wellustig is om dit te kry.
  • ‘n Mooi liggaam, geld en besittings is vir jou ‘n afgod as jy jaloers is op ander wat dit het.
  • Voorspoed, geld, en geluk is vir jou ‘n afgod as jy ‘n ander god aanbid of ‘n vals een skep om dit te kry. Prosperity predikers doen dit deur ‘n vals Jesus te skep wat bestaan om jou ryk te maak.
  • Geld, gemak, gesondheid, besittings, en ___ is vir jou ‘n afgod as jy God se Naam laster, weier om kerk toe te gaan om Hom te aanbid, kwaad is vir Hom as Hy dit nie vir jou gee nie.
  • Plesier, vriende, meisies en kêrels is vir jou ‘n afgod as jy disrespek toon aan jou ouers as hulle ‘nee’ sê vir hierdie dinge.

 

Hoekom moet jy nie ander gode aanbid nie?  As jy dít doen sal jy baie sorge en probleme hê, en uiteindelik in die hel beland (Psalm 16:4, Openbaring 21:8).

 

Die tweede gebod (v.4-6)

Mark Dever vertel hoe hy by ‘n doktorale seminaar ‘n lesing oor ‘the Doctrine of God’ moes aanbied.  Ná sy praatjie het ‘n man gesê:  ‘I like to think about God as…’  Toe die man 10 minute later klaar is, het Dever gesê:  ‘Bill, thanks for telling us so much about yourself… but this is a seminar about the doctrine of God.  What you’ve just did, is tell us about yourself:  you like to think about God like this or that.  We want to know in fact what God is like; not what your preference is of what God is like.’  Dit is presies waarteen die tweede gebod waarsku.

 

Die eerste gebod sê dat ons nie vals gode mag aanbid nie.  Die tweede gebod sê dat ons die ware God nie op ‘n vals wyse mag voorstel nie.  Die Amish is verkeerd om te dink dat die tweede gebod enige kunswerk verbied.  Jy mag ‘n olifant uit seepsteen kerf en die Alpe skilder.  Jy mag egter nie sulke beelde maak en sê dat die onsienlike God so lyk nie (v.4-5).  Aäron het ‘n goue kalf gemaak en gesê dat dit die Here voorstel (32:4-5).  God is heilig en uniek; Hy is ‘n ewige Gees.  Daarom moet ons Hom nie afbring tot op die vlak van ‘n skepsel nie:

 

“En die HERE het met julle uit die vuur gespreek; julle het ‘n stem van woorde gehoor, maar geen verskyning gesien nie—net ‘n stem was daar… Neem julle dan terdeë in ag ter wille van julle siele—want julle het géén verskyning gesien op die dag dat die HERE by Horeb uit die vuur met julle gespreek het nie—sodat julle nie verderflik handel deurdat julle vir julle ‘n gesnede beeld, ‘n gelykenis van enige afgodsbeeld, maak nie: ‘n afbeelding van man of vrou, ‘n afbeelding van enige dier wat op die aarde is, ‘n afbeelding van enige gevleuelde voël wat in die lug vlieg, ‘n afbeelding van enigiets wat op die aarde kruip, ‘n afbeelding van enige vis wat in die water onder die aarde is” (Deuteronomium 4:12, 15-18).

 

Ons is na sý beeld gemaak, en daarom moet ons Hom nie na óns beeld wil maak nie:  “As ons dan die geslag van God is, moet ons nie dink dat die godheid aan goud of silwer of steen, die beeldwerk van menslike kuns en uitvinding, gelyk is nie.” (Handelinge 17:29).

 

Soos ‘n bruidegom jaloers is oor sy bruid en haar nie met ander deel nie, sal God ons nie met ander gode deel nie (v.5, vgl. 34:14, Nahum 1:2).  As ‘n pa afgode aanbid, sal hy sy nageslag leer om dieselfde te doen.  Indien hulle sy voorbeeld volg en die Here haat, sál Hy hulle straf (v.5, 34:7).  Die teks sê nie dat kinders vir hulle ouers se sondes gestraf word nie (v.6, Deuteronomium 24:16, Esegiël 18:20), maar eerder dat die pa se voorbeeld sy kinders beïnvloed, en dat sy sonde nadelige gevolge vir hulle mag inhou.  Lees gerus 1 Konings 12 en verder.  Jy sal verbaas wees hoe baie konings Jerobeam die seun van Nebat se oortreding van die tweede gebod nagevolg het.

 

God se liefde is groter as sy toorn.  Sy troue liefde duur tot in die duisendste geslag vir dié wat hulle liefde vir God bewys deur sy gebooie te gehoorsaam (v.6, vgl. Johannes 14:15).

 

Hoe moet ons die tweede gebod toepas?

 

[1] Moenie ‘n god van jou eie verbeelding skep nie.  Die ware God is die Een wat Homself geopenbaar het in die skepping, die Skrif, en in Jesus.  Moenie hierdie openbaring verwerp en sê:  ‘Ek weet die Bybel sê ___, maar die God wat ek aanbid sal nie…’  Jy het sopas ‘n god van jou eie verbeelding geskep.

 

[2] Moenie dink dat die Vader anders is as Jesus, sodat jy die God van die Ou- en Nuwe Testament teen mekaar afspeel nie.  Wie Jesus gesien het, het die Vader gesien (Johannes 14:9).

 

[3] Moet ook nie aan God dink as iemand wat jóú toestemming nodig het voor Hy jou kan red, wat jou nie kan help totdat jý die woord uitgespreek het, wat jou met ‘n vloek straf vir jou voorvaders se sonde, wat jou ryk sal maak as jy Hom volg nie.  Die afgod van TBN is nie die God van die Bybel nie.

 

[4] Moenie aan God dink as ‘n ou man met ‘n lang wit baard nie.  God is ‘n Gees en nie die figuur van die Kinderbybel nie.

 

[5] Moenie ‘geluk’ en geestelike versterking vind in beelde, prente, of juwele van Jesus en die kruis nie.

 

As jy die tweede gebod breek is dit nie lank voor jy die eerste een sal oortree nie.

 

Die derde gebod (v.7)

‘n Seuntjie in Australië het vir sy ouers vertel van ‘n man wat by hulle skool kom praat het.  ‘Wat het hy gesê?’ het sy ouers gevra.  ‘Hy het gevloek; hy het Jesus Christus gesê,’ het hy geantwoord.  Hierdie jong seun het nie geweet dat Jesus ‘n Persoon is nie.

 

My Amerikaanse vriend het my vertel hoe die Tsonga seuns in sy jeug Jesus se Naam in Afrikaans laster as hulle sokker speel.  Hy wou weet of hy hulle hieroor moes aanspreek.  Wat sou jy sê?  Ek is seker jy sou wou hê ‘n Tsonga moes vir jou sê as jy Jesus se Naam in sý taal laster.  Is dit nie ons plig om vir mense te sê hulle moenie die Here se Naam laster nie?  As jy God liefhet sal jy nie onaangeraak luister hoe iemand jou Here se Naam vloek nie.

 

God se Naam openbaar sy karakter (3:14-15).  Hy maak sy Naam en karakter bekend in die Skrif en in Jesus.  Ons moet sy Naam nie goedkoop maak, vloek, of as ‘n alledaagse woord of kombuistaal gebruik nie.  Mense gebruik soms die Here se Naam ydelik en sê dan:  ‘Ek het niks daarmee bedoel nie.’  Presies!

 

Hoe oortree mense vandag die derde gebod?

 

[1] Mense gebruik sy Naam as ‘n vloekwoord en kyk hoe ander dit doen op TV.  In Levitikus 24:10-16 het ‘n man met ‘n ander een baklei en die Here se Naam gevloek.  Hy het die doodstraf gekry.

 

[2] Mense breek die beloftes wat hulle in die Here se Naam gesweer het (sien Levitikus 19:12).  Hulle belowe om lewenslank getroud te wees, maar skei.  Hulle belowe trou as hulle hul kinders toewy of lidmate word, maar breek dan hulle beloftes (Jeremia 34:15-16).  Baie mense – selfs kinders – sê:  ‘Ek sweer; ek sit my hand op die Bybel,’ maar weet dat hulle ‘n leuen vertel.  Mense maak ‘n eed in die Here se Naam, maar kom dit nie na nie (‘Here, ek belowe om vir U te werk as U my kind gesond maak’).  Die Skrif sê:

 

“As jy ‘n gelofte aan God gedoen het, stel nie uit om dit te betaal nie, want daar is geen welgevalle in dwase nie.  Betaal wat jy belowe.  Dit is beter dat jy nie belowe nie as dat jy belowe en nie betaal nie.” (Prediker 5:3-4).

 

Dalk maak iemand beswaar en sê:  ‘Ek weet ek het belowe, maar my belofte was nie in die Here se Naam nie.’  Jy redeneer soos die Fariseërs.  God is orals, en daarom is elke belofte ‘n belofte in sy Naam (Matteus 5:33-37).

 

[3] Mense wat sê hulle is Christene maar goddeloos leef, gee vir ongelowiges kans om die Here se Naam te laster.

 

  • “Want, soos geskrywe is, die Naam van God word om julle ontwil onder die heidene gelaster.” (Romeine 2:24).
  • “Almal wat diensknegte is onder ‘n juk, moet hulle eie here alle eer waardig ag, sodat die Naam van God en die leer nie belaster mag word nie.” (1 Timoteus 6:1). As jy disrespekvol is met jou baas sal mense God se Naam laster.
  • Ouer vroue moet die jonges leer “om versigtig te wees, hulle mans en kinders lief te hê, ingetoë te wees, kuis, huislik, goed, aan hul eie mans onderdanig, sodat die woord van God nie belaster word nie.” (Titus 2:4-5).
  • Salomo sê dat ‘n gelowige wat steel die wêreld uitnooi om God se Naam te laster (Spreuke 30:9).
  • “die man en sy vader gaan na [slaap met] dieselfde jongedogter om my heilige Naam te ontheilig.”(Amos 2:7).
  • Ná Dawid se moord en egbreuk het Natan vir hom gesê: “Maar omdat u die vyande van die HERE deur hierdie saak aanleiding gegee het om grootliks te laster” (2 Samuel 12:14).

 

[4] Mense gebruik God se Naam om vals lering te preek.  Die vals profetesse in Esegiël 13:19 en vals leraars in 1 Timoteus 1:20 het die Here se Naam op dié manier ydelik gebruik.  As jy na hulle lering luister deel jy in hulle sonde.

 

[5] Mense sê hulle is Christene, maar lewe nie volgens die Christen-naam nie.  So misbruik hulle die Christus se Naam.  “Hou dan my gebooie en doen dit.  Ek is die HERE.  En ontheilig my heilige Naam nie, sodat Ek geheilig kan word onder die kinders van Israel.  Ek is die HERE wat julle heilig” (Levitikus 22:31-32).  “Hulle bely dat hulle God ken, maar hulle verloën Hom deur die werke, omdat hulle gruwelik en ongehoorsaam is en ongeskik vir elke goeie werk.” (Titus 1:16).

 

[6] ‘n Christen wat die Here se Naam verloën en onder druk sê dat hy nie vir Jesus ken nie, gebruik dit ook ydelik (Handelinge 26:11).

 

[7] Wanneer die Here iemand straf, lig hy sy vuis teen die hemel en laster hy God se Naam (Openbaring 16:9).

 

[8] Die Fariseërs het gesê dat Jesus teen God laster, omdat hy gesê het dat Hy self God is (Johannes 10:33).  Ons weet dat Jesus waarlik God is.  Maar as TBN se predikers sê dat hulle en hul hoorders gode is (‘the little gods doctrine’), is hulle besig om die Here se Naam te laster.

 

Ons moet bid dat God se Naam geheilig word (Matteus 6:9).  Ons moet bid vir ‘n nuwe hart en heilig lewe, sodat God se Naam in ons geheilig mag word (Esegiël 36:20-27).

 

Hoekom moet ons nie die Here se Naam laster nie?  Die Here sal jou verseker straf (v.7).  Jou optrede verdien die dood:  “En wie die Naam van die HERE laster, moet sekerlik gedood word; die hele vergadering moet hom sekerlik stenig.  Die vreemdeling net soos die kind van die land as hy die NAAM laster, moet hy gedood word.” (Levitikus 24:16).

 

Die vierde gebod (v.8-11)

J.W. Albertse was ons gemeente se eerste leraar.  Hy het die gemeente reeds in sy studentejare bedien, en in dié tyd koppe gestamp met Seminarium se eerste rektor, Dr. J.D. Odendaal.  Die Uitvoerende Komitee van die ABK, asook die Seminarium het vir Albertse aangevat oor sy onbybelse beskouing van die Sabbat.  Hy moes sy siening verloën, ‘n boek oor die Bybelse beskouing van die Sabbat lees en aanvaar, en sy dwaling voor sy mede-studente bely.[1]

 

Die Bybelse lering van die Sabbat is een waaroor baie al in die geskiedenis verskil het.  Party kerke, soos die Sewendedag Adventiste en baie in die Hebrew Roots Movement, wil jou uit die hemel uitsluit as jy die Sabbat nie streng volgens húlle reëls navolg nie.  Ander gooi weer die Sabbat weg en sê dinge soos:  ‘Ek glo al nege van die Tien Gebooie.’  Ons moet die balans vind.

 

Die volk moes die Sabbat nie dieselfde hou as die ander ses dae van die week nie.  Die dag moes spesiaal, heilig, en afgesonder wees (v.8, Jesaja 58:13).  God het eerste gesê dat hulle ses dae moes werk (v.9).  Ja, om ses dae te werk is ‘n opdrag (2 Tessalonisense 3:10).  Op een dag moes hulle rus en die dag aan God wy om Hom te aanbid (v.10).  Hulle moes ook hulle kinders, slawe, vee, en die uitlanders in hulle stede laat rus (v.10).  Nóg verse oor die Sabbat sê:

 

  • “Ses dae moet jy jou werk verrig, maar op die sewende dag moet jy rus, dat jou os en jou esel kan uitrus en die seun van jou slavin en die vreemdeling kan asem skep.”(23:12).
  • “Verder het die HERE met Moses gespreek en gesê: Spreek jy met die kinders van Israel en sê: Julle moet sekerlik my sabbatte onderhou, want dit is ‘n teken tussen My en julle in julle geslagte, sodat die mense kan weet dat Ek die HERE is wat julle heilig. Onderhou dan die sabbat, want dit moet vir julle heilig wees. Hy wat dit ontheilig, moet sekerlik gedood word; want elkeen wat daarop werk verrig, dié siel moet uitgeroei word onder sy volksgenote uit. Ses dae lank kan werk verrig word, maar op die sewende dag moet dit wees ‘n dag van volkome rus, heilig aan die HERE. Elkeen wat op die sabbatdag werk doen, moet sekerlik gedood word. En die kinders van Israel moet die sabbat onderhou deur die sabbat te vier in hulle geslagte as ‘n ewige verbond.” (31:12-16).
  • “Ses dae moet jy arbei, maar op die sewende dag moet jy rus. In die ploegtyd en in die oestyd moet jy rus.” (34:21).
  • “Ses dae lank kan daar werk verrig word, maar op die sewende dag moet daar vir julle ‘n heiligheid, ‘n dag van volkome rus wees tot eer van die HERE. Elkeen wat daarop werk verrig, moet gedood word. Julle mag op die sabbat geen vuur aansteek in enigeen van julle woonplekke nie.” (35:1-2).

 

God het die doodstraf vereis vir Sabbatsoortreding (Numeri 15:32-36).  God was streng omdat Hy geweet het dat mense maklik ‘n afgod maak van geld, en dat sy volk nie sou rus nie.  Die werk-ses-dae-rus-een siklus kom van Genesis 2:2-3 af, toe God die aarde in ses dae gemaak het en gerus het op die sewende dag (v.11).

 

Ons moet die Sabbat reg verstaan en onderhou.  Hoekom hou ons nie die Sabbat op Saterdae nie?  ‘n Adventis het my siening oor die Sabbat aangevat en gesê dat dié dag nie in Eksodus 20 ingestel is nie, maar in Genesis 2:  ‘Die wet kan dalk nog verander word, maar ‘n skeppingsinstelling nie.’  Maar iets groter as die skepping het gekom:  ‘n nuwe skepping; ‘n herskepping deur Jesus wat gekruisig is en opgestaan het op die eerste dag van die week (2 Korintiërs 5:17).  Jesus is Here van die Sabbat en kan die dag verander as Hy wil (Markus 2:28).

 

Die Sabbat was buitendien net ‘n skadu van die volheid en ewige rus wat ons in Jesus vind:  “Laat niemand julle dan oordeel in spys of in drank of met betrekking tot ‘n fees of nuwemaan of sabbat nie, wat ‘n skaduwee is van die toekomstige dinge; maar die liggaam behoort aan Christus.” (Kolossense 2:16-17).

 

In die konteks van die Sabbat in Matteus 12:1, sê Jesus dat Hy rus bring vir ons siele (Matteus 11:28).  Oor die hemel sê Johannes:  “Skryf salig is van nou af die dode wat in die Here sterwe.  Ja, sê die Gees, sodat hulle kan rus van hul arbeid, en hulle werke volg met hulle.” (Openbaring 14:13).

 

Deur geloof gaan ons hierdie rus in (Hebreërs 4:3-4).  Die nuwe dag is nie meer die sewende dag nie, maar die dag waarin ons verlossing voltooi is, die dag van Jesus se opstanding (Hebreërs 4:8-10, Psalm 118:22-24).  Daarom het die vroeë kerk op Sondae bymekaar gekom om te aanbid (Handelinge 20:7, 1 1 Korintiërs 16:1-2).  Openbaring 1:10 noem Sondag ‘die Here se Dag’.

 

God het ons geheilig.  Om ons daaraan te herinner het Hy ‘n dag geheilig waarin ons Hom moet aanbid:  “Julle moet sekerlik my sabbatte onderhou, want dit is ‘n teken tussen My en julle in julle geslagte, sodat die mense kan weet dat Ek die HERE is wat julle heilig.” (31:13).  Onthou jou Skepper en prys Hom dat Hy jou verlos het (v.11, Deuteronomium 5:15).

 

Beskou die Sabbat as ‘n geskenk en nie as ‘n straf nie (Markus 2:27).  Moenie jou gewone werk doen of angstig wees dat jy nie deur die maand sal kom nie.  Glo dat die Here vir jou sewe dae se salaris sal gee vir net ses dae se werk (16:22-26).  Gebruik die dag om saam met ander gelowiges te vergader, jou siel, brein en liggaam te rus, te ontspan en te speel, tyd met jou familie deur te bring.  Laat die mense wat vir jou werk die dag af kry (v.10).

 

Gebruik die dag om goed te doen aan ander en werk as die nood druk (sien Markus 2:23-24, 3:4, Lukas 13:14-16, 14:5, Johannes 5:10, 16-17, 9:16).  Dokters, verpleegsters, en polisie moet noodgedwonge werk.  Predikante moet preek en goed doen aan ander se siele.  Jy moet kos kook om vir jou gesin te sorg.

 

Hoekom moet ons die Sabbatsgebod reg verstaan en toepas?  Om goed te werk moet jy rus en jou byl se lem slyp (Prediker 10:10).  As ons weekliks rus:

 

  • Minder mense sal oorwerk wees en uitbrand.
  • Minder mense sal stres, depressief raak, en angstig wees. Gevolglik sal jy ook beter slaap.
  • Minder mense sal psigosomatiese siektes hê. Talle siektes word deur stres veroorsaak. As gevolg hiervan spandeer mense duisende rande op dokters en pille.
  • Minder huwelike sal in die skeihof eindig. As kinders hulle ouers op Sondae sien sal hulle gelukkiger wees en nie so maklik rebelleer nie. So sal mense ook minder geld op beraders hoef uit te gee.
  • Jy sal minder geïrriteerd wees; jy sal minder met ander baklei.
  • Mense sal nie so maklik vasgevang raak in die mal gejaag na geld nie.
  • Jy sal die geld spaar wat jy sou uitgee op ekstra petrol, bande, slytasie op jou kar, ‘n ‘babysitter’, en ekstra vakansie omdat jy moeg is. Het jy al daaraan gedink dat God vir jou 52 dae ‘n jaar af gee?
  • Jy sal jou werk beter doen, omdat jou liggaam en brein gerus het.
  • Minder mense sal sê: ‘Ek kan dit nie meer vat nie!’ en selfmoord probeer pleeg.

 

Baie keer sê mense dat hulle nie tyd het om die Skrif te lees, te bid, by die siekes uit te kom, of evangelisasie te doen nie.  Maar as hulle die Here se dag reg gehou het, sou hulle tyd gehad het.

 

John Paton was ‘n sendeling op die eiland Aniwa.  So beskryf hy ‘n tipiese Sondag op die eiland:

 

[1] Ontbyt as die dag breek.

[2] ‘n Een uur erediens as die son opkom.

[3] ‘n Twintig minute breek.

[4] ‘n Tweede erediens.

[5] Lidmaatskapklas deur die Westminster Shorter Catechism, terwyl die res met ‘n biduur besig is.

[6] ‘n Uur se teetyd en ete.

[7] ‘n Halfuur hersiening oor die lidmaatskapklas.  Paton se vrou leer die ander vroue.  ‘n Paar ouderlinge leer die res van die gemeente in groepe.

[8] Kerk sluit om 13:00.

[9] Die gemeente gaan in twee groepe uit om die mense van die eiland te evangeliseer.

[10] ‘n Biduur as die son sak.  Hulle sing vyf of ses gesange en gee dan kans vir vyf of ses gebede.  So hou hulle aan vir ‘n paar rondtes.

[11] Die jong mense vergader in ‘n huis om te sing en die Skrif te lees.  Vrae word gevra oor die dag se lering.

[12] Om 21:00 sluit hulle die dag af.[2]

 

Vandag is die meeste mense tevrede om die Here te aanbid vir een uur op ‘n Sondag (vir party is selfs dít te veel!).  Om die Here se Dag te vier soos Paton dit gedoen het, is iets van die verlede.  Dit sal goed wees om dit te herwin.

 

‘n Tuinskêr of graad 1 se papierskêr werk vir die doel waarvoor dit gemaak is.  Tog sal jy nie tevrede wees as die dokter sy snymes verloor, en sommer een van dié skêre gebruik om jou vrou se keisersnee mee te doen nie.  Net so is die Tien Gebooie goed as ons dit gebruik waarvoor dit bedoel is:  nie om daardeur gered te word nie, maar om sonde uit te wys in ongelowiges, en om vir gelowiges te leer hoe om God en hulle naaste lief te hê.

[1] J.D. Odendaal, So het God ons Skredes Gelei, p.254

[2] John G. Paton:  Missionary to the New Hebrides, pp.378-379

Vergete voorregte

Forgotten treasure

Gert sukkel om deur die maand te kom en weet nie waar hy die res van maand se kos, petrol- en huurgeld gaan kry nie.  Skielik onthou hy van sy e-bucks kaart wat al vir ‘n paar jaar opgeloop het.  Daar is R15 000 op die kaart.  Hy het skoon van dié voorreg vergeet.  So is dit met ons.  Ons vergeet dikwels watse voorregte ons in Jesus het, en laat na om dit te gebruik.  Daarom is dit nodig vir ‘n herinnering soos Hebreërs 10:19-25.

Omdat Jesus… (v.19-21)

Archie en Chris was boemelaars wat na ons kerk toe gekom het.  My vriend het beide van hulle gehelp om ‘n werk te kry.  Chris het selfs ‘n kar en ‘n woonstel gekry.  Na ‘n paar maande het hulle alles net so gelos, weer begin drink, en teruggegaan straat toe.  Baie gelowiges is so.  Jesus gee vir hulle nuwe lewe, vergifnis, die gemeenskap van gelowiges, en ‘n oop weg deur die Woord en gebed.  Tog minag en versaak hulle dié voorregte.

Jesus het ons sonde weggevat (v.1-18).  Daarom kan ons sonder vrees en met vrymoedigheid in die heiligdom ingaan (v.19, 4:16).  In die Ou Testament kon net hoëpriester een keer per jaar in die heiligdom ingaan (9:3, 7).  Toe Jesus dood is het sy Vader die tempelgordyn geskeur, en daarom het ons nou vrye toegang tot God (6:19, Matteus 27:51).  Ons kom nie meer op die ou weg van offers na God toe nie.  Deur sy bloed het Jesus ‘n nuwe weg vir ons oopgemaak.  Hy self is die weg wat na die lewe toe lei (v.19-20,  Johannes 10:9, 14:6).  Jesus is nie net die offer nie, maar ook die groot priester en Hoof oor die huis van God, die kerk (v.21, 4:14, Efesiërs 1:22, 1 Timoteus 3:15).

Laat ons… (v.22-25)

Henk is 34.  Hy is lojaal en werk hard, maar verdien R4000 per maand en het nie ‘n kar nie.  Sy pa is ‘n biljoenêr en is baie lief vir hom.  Hy sê:  ‘Henk, kry my Maandag by die bank en daarna by die Mercedes garage.  Ek wil vir jou ‘n bankrekening oopmaak en R100 000 per maand gee.  Ek sal ook vir jou ‘n C-Klas Mercedes koop.’  Henk voel skaam om sy pa se aanbod aan te neem.  Hy daag dus nie op by die bank of die Mercedes garage nie.  Sy pa herhaal gedurig die aanbod, maar Henk hou aan wegbly.

Is jy so met God?  Hy is jou Vader en bied aanhoudend alles vir jou aan in Jesus, maar jy gryp dit nie aan met beide hande nie?  Dis om dié rede wat ons mekaar gedurig moet herinner aan die drie opdragte in v.22-25.

Omdat ons ‘n soenoffer en Hoëpriester het (v.19-21), laat ons vrymoedig tot God nader (v.22), aanhou om dit te doen (v.23), en mekaar gereeld herinner om dit te doen (v.24-25).  Moenie bang wees, sodat jy op ‘n afstand bly staan nie (Eksodus 20:18).  Deur geloof in Jesus is elke gelowige ‘n priester en kan ons vrymoedig tot God nader (v.22, Efesiërs 2:13).

Kom met ‘n rein en opregte hart:  jou gewete met Jesus se bloed besprinkel en jou liggaam gewas met rein water (v.22).  Hierdie beeld kom uit die Ou Testament.  Toe Moses die priesters vir diens afgesonder het, het hy bloed op hulle gesprinkel en hulle met rein water gewas (Levitikus 8:6, 30).  Let ook op dat water en bloed uit Jesus se sy gevloei het toe Hy dood is (Johannes 19:34).  Die bloed waarmee Hy ons besprinkel, verwys na sy eie bloed (v.22, 19, vgl. 9:14, Petrus 1:2).  Die water verwys na die innerlike reiniging van die Gees deur weergeboorte.  Die Skrif sê:

  • “Jesus antwoord:  Voorwaar, voorwaar Ek sê vir jou, as iemand nie gebore word uit water en Gees nie, kan hy in die koninkryk van God nie ingaan nie.” (Johannes 3:5).
  • “Dan sal Ek skoon water op julle giet, sodat julle rein kan word; van al jul onreinhede en van al jul drekgode sal Ek julle reinig.  En Ek sal julle ‘n nuwe hart gee en ‘n nuwe gees in jul binneste gee; en Ek sal die hart van klip uit julle vlees wegneem en julle ‘n hart van vlees gee.  En Ek sal my Gees in jul binneste gee en sal maak dat julle in my insettinge wandel en my verordeninge onderhou en doen.” (Esegiël 36:25-27).
  • “Hy [het] ons gered deur die bad van die wedergeboorte en die vernuwing deur die Heilige Gees” (Titus 3:5).
  • Efesiërs 5:26 sê dat Jesus die kerk “gereinig het met die waterbad deur die woord”.
  • “julle het jul laat afwas, maar julle is geheilig, maar julle is geregverdig in die Naam van die Here Jesus en deur die Gees van onse God.” (1 Korintiërs 6:11).

Weergeboorte word uitgebeeld in die doop.  Daarom sê v.22 ons liggaam is gewas met rein water.  “En nou, waarom versuim jy?  Staan op, laat jou doop en jou sondes afwas, terwyl jy die Naam van die Here aanroep.”(Handelinge 22:16).  In die eerste eeu is Christene onmiddellik na hulle bekering gedoop, en nie jare daarna nie.  As ‘n Christen dus in die doopwater tot God geroep het, het God Hom geantwoord, sy sondes vergewe, sy gewete gereinig.  Daarom sê Petrus dat “die doop, ons nou ook red, nie as ‘n aflegging van die vuilheid van die vlees nie, maar as ‘n bede tot God om ‘n goeie gewete—deur die opstanding van Jesus Christus” (1 Petrus 3:21).

Hou vas aan die hoop van die hemel.  Moenie begin twyfel nie, maar glo dat God getrou is en sy beloftes sal hou (v.23, 4:14, Titus 1:2).  Spoor mekaar aan tot liefde en goeie dade (v.24, 3:13, Titus 3:8).  Moenie die samekomste van die gemeente misloop soos sommige die gewoonte het nie, want dit is juis dáár wat ons mekaar aanmoedig om nie op te gee nie (v.25).  Die vroeë Christene het hulleself aan dié samekomste toegewy (Handelinge 2:42).  Jesus self het dit ‘n gewoonte gemaak om weekliks in die sinagoge te wees (Lukas 4:16).  As ons gedurig aan die oordeelsdag dink, sal ons mekaar aanspoor om nie van die kerk af weg te bly nie, maar om te volhard (v.25).

Kom deur die oop gordyn.  Hoekom sal jy buite die hemel bly as die weg oop is?  Kom in deur geloof in Jesus en die evangelie.  Jesus is ‘n heilige God.  Jy is ‘n onheilige sondaar.  Hy sal jou nooit in sy teenwoordigheid toelaat nie.  Jou sonde moet eers vergewe word; jou hart moet skoongewas word.  Om dié rede het Jesus die perfekte lewe geleef wat jy nie kon nie, en die straf gekry wat jy verdien het.  Hy het uit die dood uit opgestaan.  Om ‘n opregte hart en skoon gewete te hê moet jy jou sondes bely, jou daarvan bekeer, en in Jesus glo.  Wys dan ook deur die ‘skoon water’ van die doop dat jou hart gereinig is.

Is jy ‘n ou gelowige wat geestelik verflou het?  Het jy vergeet van die voorreg van jou hemelse hoop, sodat jy nie meer baie aan die hemel dink nie?  Het jy vir geld en die plesier van hierdie wêreld begin lewe?  Het jy begin twyfel?  Hou vas aan die hoop, volhard tot die einde, en glo God se beloftes.  Moenie nóú uitsak en alles verloor nie.  “Wees op julle hoede, dat ons nie verloor wat ons deur arbeid verkry het nie, maar ‘n volle loon ontvang.” (2 Johannes 8).

Elke Ou Testament gelowige en priester sou bly gewees het as hulle enige tyd in God se teenwoordigheid kon inkom.  Jy kán enige tyd na God toe kom, maar bly maklik weg deurdat jy biddeloos is, nie jou Bybel lees nie, en ontrou is om kerk toe te kom.  Moenie so lewe nie, maar bekeer jou.  Jesus begeer dat jy na Hom toe moet kom.  In Openbaring 3:20 het Hy vir Christene – vir ‘n kerk! – gesê:  “Kyk, Ek staan by die deur en Ek klop.  As iemand my stem hoor en die deur oopmaak, sal Ek ingaan na hom toe en saam met hom maaltyd hou, en hy met My.”  Moenie vergeet dat dit ‘n voorreg is om deel te wees van ‘n gemeente; om deel te hê aan die Woord, die nagmaal, die doop, lofprysing, goeie werke, liefde, en nog meer nie.

Moenie in die slegte gewoonte verval om van die samekomste af weg te bly nie.  Dit wil ek veral vir die nuwe lidmate sê.  Vir die oues sê ek:  party van julle het in die gewoonte verval om weg te bly.  Breek met dié gewoonte en vernuwe jou toewyding aan Jesus, sy Woord en sy liggaam.  Dink jy Jesus sal tevrede op die oordeelsdag as jy min liefde gehad het vir die kerk waarvoor Hy sy bloed gestort het (Efesiërs 5:25, Handelinge 20:28)?

Hoekom moet jy deur die geskeurde tempelgordyn ingaan?  Om ‘n geskenk van jou vriend te weier is ondankbaar en ongeskik (sien Lukas 14:16-24).

Ted is ‘n semi-professionele tennisspeler in Amerika.  Reeds toe hy in sy mid-20’s was het hy $1 miljoen in die bank gehad.  Hy was suinig met sy geld en wou dit nie mors nie.  Hy het op die strand geslaap, ‘n ou fiets gekoop, en elke dag noodles en brood geëet.  Party ryk mense leef asof hulle arm is:  “another pretends to be poor, yet has great wealth.” (Spreuke 13:7b, ESV).  In Jesus is die rykdom van die hemel joune (Efesiërs 1:3, 1 Korintiërs 3:21-23).  Moenie die voorreg van geestelike rykdom vergeet en leef asof jy arm is nie.

Christene se vuil wasgoed in die hof

Dirty laundry

Om iemand se ‘vuil wasgoed uit te hang’ beteken dat jy hulle skandes voor almal noem.  Ongelowiges hou daarvan om dit te doen, asook om te kyk hoe ánder dit doen.  Jy kan byna sien hoe hulle hul kampstoele uitpak soos by ‘n krieketwedstryd, om te kyk hoe Saartjie haar man se vuil wasgoed op die draad hang.  Hierdie tipe optrede hoort nie by Christene nie.  Dit is Paulus se punt in 1 Korintiërs 6:1-11.

Dis onnodig (v.1-6)

Robin Stransham-Ford is in September 2013 met terminale prostaat kanker gediagnoseer.  Die afgelope week het hy die hof se toestemming gevra dat sy dokter hom kan help om sy lewe te beeïndig.  Die hof het sy versoek toegestaan.  Hy is egter dood voordat hy die uitslag gehoor het.

Die wêreld se moraliteit verskil van die Bybel s’n.  Jesus se kerk het die Woord en die Gees, en kan dus beter oor morele sake oordeel as die wêreld.  As ons dan bekwaam genoeg is om ons eie sake te hanteer, durf ons nie ‘n mede-gelowige hof toe sleep nie; ons moet hom eerder voor die kerk bring (v.1, Matteus 18:17).

As gelowiges oor die wêreld en bose engele sal oordeel (Daniël 7:22), is ons mos instaat om in hierdie lewe oor ‘klein’ kerksake te oordeel, of hoe (v.2-3, 5:12)?  Dit is onnodig om die kerk se sake voor wêreldse regters te bring (v.4).  Christene in Korinte het daarin geroem dat hulle wys is (4:10).  Maar wat het van hulle ‘wysheid’ geword in dié saak?  Paulus het gesê dis ‘n skande dat hulle nie wys genoeg was om die twis in hulle midde op te los nie, en dat hulle die saak in wêreldse howe moes uitbaklei (v.5).  Is dit reg dat broers mekaar dagvaar; dat broers onenig is, sodat Jesus se Naam deur die wêreld belaster word (v.6, Johannes 13:34-35)?

Volgens v.1-6 moet ons sake teen ander gelowiges in die kerk oplos, en nie in die hof nie.  Dis nie dat Paulus teen die regering, wetgewing, regters, of howe is nie (Romeine 13:1-7).  Sy punt is egter dat ons nie ander Christene voor die hof moet daag nie.

Wat moet jy doen as ‘n mede-gelowige met jou kontrak breek, nie sy skuld of huurgeld betaal nie, jou slaan, jou seksueel teister, jou kul met ‘n dud produk?  Moenie dadelik vir jou baas, die hoof, die unie, die beheerliggaam, die departement, of die arbeidshof sê nie.  Probeer dit eers in die kerk uitsorteer.  Praat alleen met die persoon.  As hy nie luister nie, kan jy een of twee ander gelowiges saamvat om hom te probeer oorreed.  As hy nogsteeds nie luister nie, moet die leiers dit vir die kerk sê.  As hy nie vir die kerk wil luister nie, moet hy uit die gemeente verwyder word – beskou hom as ‘n ongelowige (Matteus 18:15-17).

As die kerk hom as ‘n ongelowige beskou, kan jy hom hof toe vat.  Óf jy kan besluit om onreg te ly soos v.7 sê.  Jy kan byvoorbeeld besluit om die R10 000 wat hy jou skuld, af te skryf en die hele aangeleentheid aan die Here oor te laat:  “Laat jou weg aan die HERE oor en vertrou op Hom, en Hy sal dit uitvoer; en Hy sal jou geregtigheid laat voortkom soos die lig en jou reg soos die middag.” (Psalm 37:5-6).

Is die persoon wat jou te na gekom het ‘n gelowige van ‘n ander gemeente?  Gaan sê vir sy kerk se leiers wat gebeur het.  As hulle niks daaraan wil doen nie, kan jy vir jou eie kerk vra om te help.  Indien die persoon vir niemand wil luister nie en met sy sonde voortgaan, kan jy hom as ‘n ongelowige beskou (Matteus 18:17b).  Daarna kan jy hom hof toe vat, want nou is dit nie twee gelowiges wat voor die hof verskyn nie, maar ‘n gelowige en ‘n ongelowige.  Dieselfde reël geld vir ‘n gelowige in jou eie gemeente.

Wat as ‘n ander Christen ‘n kriminele daad (bv. verkragting) teen jou gepleeg het?  Die kerk moet so iemand dadelik as ‘n ongelowige bestempel en van die gemeente afsny (hfst.5).  Rapporteer dit dan ook dadelik by die polisie en vat die ‘ongelowige’ hof toe.

Hoekom moet ons nie dadelik hof toe gaan met kerksake nie?  Die teks maak duidelik dat die kerk bekwaam genoeg is om die saak op te los.  Buitendien ly Jesus en die kerk se Naam skade as jy ander Christene se vuil wasgoed in die hof uithang.

Dis onchristelik (v.7-8)

Jare gelede het ‘n man vir wyle Martin Holdt sleg te na gekom.  Dit was so erg dat ‘n prokureur in die kerk gesê het hy kan die man kaal uittrek.  Sy vrou het egter vir hom gesê:  ‘Martin, if you do that you are ungodly!’  Sy was reg (v.7-8).

Volgens Paulus maak dit nie saak wie die hofsaak wen nie.  As jy enigsins ‘n ander gelowige dagvaar, het jy klaar verloor:  jou geloofwaardigheid as ‘n Christen (v.7).  Die persoon wat oortree en die een wat hom hof toe sleep is ewe skuldig (v.8).  Dit is beter dat jy onreg ly as wat jy onreg pleeg (v.7-8).

Jesus het gesê:  “Maar Ek sê vir julle dat julle ‘n slegte mens nie moet weerstaan nie; maar as iemand jou op jou regterwang slaan, draai ook die ander een na hom toe.  En hy wat met jou na die gereg wil gaan en jou onderkleed wil neem, laat hom ook die bo-kleed kry.” (Matteus 5:39-40).  Jesus het sy eie lering toegepas:  “wat, toe Hy uitgeskel is, nie terug uitgeskel het nie; toe Hy gely het, nie gedreig het nie, maar dit oorgegee het aan Hom wat regverdig oordeel” (1 Petrus 2:23).  Om jou broer te dagvaar is eenvoudig onchristelik.

Moet dan nie jou broer voor die hof daag nie.  Hier wil ek klem lê op een saak:  egskeiding.  Hoeveel Christene wat in die skeihof staan dink aan 1 Korintiërs 6:1-8?  Daar is twee Bybelse gronde vir egskeiding:  seksuele sonde en die ongelowige wat die huwelik versaak (7:15, Matteus 19:9).  In geval nr. 1 gee God vir die persoon toestemming om te skei.  In geval nr. 2 vat die ongelowige jóú hof toe.  Christene het nie die reg om vir ander gevalle in die skeihof te staan nie.  Jou huwelik mag moeilik wees, maar as jy die Here vertrou sal Hy vir jou die krag en genade gee om staande te bly (1 Petrus 3:1-7).

Hoekom moet ons mekaar nie dagvaar nie?  Dit is veel beter om te glo dat God in beheer is van die sonde wat ander teen jou pleeg, as om jou broer te dagvaar en geestelik skade te ly.[1]

Dis onvanpas (v.9-11)

Koos is 32 jaar oud en bly nog by sy ma.  Sy ma sit sy klere uit vir die volgende dag en pak vir hom broodjies werk toe.  Hy vra vir sy laatlam sussie om ‘n meisie se nommer te kry en vir haar te sê hy stel belang in haar.  Oor naweke sny sy pa die gras en sy ma was die vloere, terwyl hy op sy rekenaar speel.  Hy weet nie eers hoe om ‘n eier te bak nie.  Sy ma moet hom by die werk aflaai, want hy het nie ‘n lisensie nie.  Sy ma maak sy bed op en gooi die vuil wasgoed wat onder sy bed lê, in die was.

Sulke optrede verwag jy van ‘n 7-jarige; nie van ‘n volwasse man nie.  Net so verwag ons ‘n sondige leefwyse van ongelowiges, en nie van Christene nie.  Moenie jou broers se vuil wasgoed in hof uithang nie, en moet dit ook nie onder die bed inskop nie.  Los dit eerder op deur kerktug.

Jy kan jouself maklik mislei om te dink jy kan in sonde voortleef, en nogsteeds hemel toe gaan.  Moet jouself nie só mislei nie!  Die onregverdiges sal nie die koninkryk van God erf nie.  ‘n ‘Onregverdige’ verwys na iemand wie se lewe gekenmerk word deur seks voor die huwelik, afgodery (enigiets wat vir jou belangriker is as Jesus), egbreuk, homoseksualiteit[2], diefstal, gierigheid, dronkenskap, verbale mishandeling, indirekte diefstal – met ander woorde om mense in te doen of uit te buit (v.9-10).  Verskeie tekste sê dat sulke mense nie in die hemel sal wees nie:

“En die werke van die vlees is openbaar, naamlik owerspel, hoerery, onreinheid, ongebondenheid; afgodery, towery, vyandskap, twis, jaloersheid, toornigheid, naywer, tweedrag, partyskap; afguns, moord, dronkenskap, brassery en dergelike dinge, waarvan ek julle vooraf sê, soos ek al vroeër gesê het, dat die wat sulke dinge doen, die koninkryk van God nie sal beërwe nie.” (Galasiërs 5:19-21).

“Want dit moet julle weet dat geen hoereerder of onreine of gierigaard, wat ‘n afgodedienaar is, ‘n erfdeel het in die koninkryk van Christus en van God nie.” (Efesiërs 5:5).

“Maar wat die vreesagtiges aangaan en die ongelowiges en gruwelikes en moordenaars en hoereerders en towenaars en afgodedienaars en al die leuenaars hulle deel is in die poel wat brand met vuur en swawel: dit is die tweede dood.” (Openbaring 21:8).

“Maar buite is die honde en die towenaars en die hoereerders en die moordenaars en die afgodedienaars en elkeen wat leuens liefhet en doen.” (Openbaring 22:15).

Voor hulle bekering was baie van die Korintiërs so (v.11).  Dieelfde is waar van ons.  Die Bybel beskryf ons vorige lewe so:

  • Ons het afgode gedien (12:2).
  • Ons het gedink en gedoen wat ons wil en die wêreld gevolg (Efesiërs 2:2-3).
  • Ons het korrupte en perverse begeertes gehad (Efesiërs 4:22).
  • Ons het dinge in die geheim gedoen, en het gedink niemand sal uitvind nie (5:8).
  • Ons het rondgeslaap, ander se goed begeer, vuil gedagtes gehad, geld gejaag, ‘n kort humeur gehad, bose planne uitgedink, geskinder, gevloek (Kolossense 3:7).
  • Ons was dwaas, ongehoorsaam, verslaaf, jaloers, en het mekaar gehaat (Titus 3:3).

Maar nou is ons harte gewas, en ons het dit uitgebeeld in die doop (v.11, vgl. Titus 3:5, Efesiërs 5:26, Hebreërs 10:22, Handelinge 22:16).  God het ons vir Homself afgesonder (geheilig) en geregverdig.  Dit het Hy deur die Heilige Gees gedoen op grond van Jesus se lewe, kruisdood en opstanding (v.11).  Daarom pas nie die dagvaardiging óf die sonde wat voor die hof kom, by ‘n Christen nie.  Jy is skoongewas:  leef so.

Moenie teen jou broer sondig nie.  Moenie aan jou eie plesier dink en sy of haar maagdelikheid steel nie.  Moenie egbreuk pleeg en jou huweliksmaat se hart breek nie.  Moenie vieslike homoseksuele gemeenskap begeer nie.  Moenie jou broer se besittings steel nie.  Moenie jaloers wees, sodat jy ‘n ander Christen se goed begeer nie.  Moenie dronk word, sodat jou huweliksmaat en kinders bang word of skaam kry nie.  Moenie ander Christene se reputasie beskadig, omdat jy van hulle slegpraat nie.  Moenie jou broer kul of uitbuit as hy iets by jou koop nie.  Moenie die naasteliefde op enige ander wyse nalaat nie.

Hoekom moet jy nie teen jou broer sondig nie?  As jy so leef sal jy nié hemel toe gaan nie.  Jy flous jouself as jy so leef en dink jy ken die Here.  Is jy gewas?  Leef dan so.  As jy nié so lewe nie is daar nog hoop dat jy gered kan word.  Volgens v.11 was sommige van die Korintiërs so.  Ja, selfs dronklappe en homoseksueles kán verander!  God haat jou sonde en sal dit oordeel.  Solank as wat jy dit ontken of verskoon is daar nie hoop nie.  Jesus het die straf vir jou sonde op Homself geneem aan die kruis.  Hy is begrawe en het uit die dood uit opgestaan.  As jy dít glo, jou sonde haat, en op Hom vertrou, sal Hy jou red.  In jou eie krag kan jy nie jou sonde los nie.  Net Jesus en sy Gees kan jou hart verander (v.11).

In die onlangse twee uitgawes van ons plaaslike koerant (die Kempton Express), het verskillende vroue briewe teen kerke en predikante geskryf.  Beide vroue het ander se vuil wasgoed vir die wêreld uitgehang.  Hulle bely dat hulle Christene is.  Dit is jammer dat hulle nie 1 Korintiërs 6 gevolg het nie; dat hulle nie die predikant gaan sien het, die leiers ingeroep het, en die saak voor die kerk gebring het nie.  As dít nie gewerk het nie, is dit jammer dat hulle God, die Bybel, alle predikante en kerke onder dieselfde kam skeer.  Dit is jammer dat hulle nie maar die onreg verdra het nie (v.7).

Die feit dat hulle 1 Korintiërs 6 minag laat ‘n mens wonder of hulle regtig Christene is.  Toe Moreleta NG-Kerk ‘n paar jaar gelede ‘n homoseksuele musikant uit die kerk verwyder het, het hy hulle voor die hof gedaag.  Martin Holdt het toe ‘n brief in Die Beeld geskryf en gesê dat ‘n ware Christen nie sy neus sou optrek vir 1 Korintiërs 6:1-11 nie.

[1] Dié insig het ek gerkry uit John MacArthur se Study Bible

[2] Die Griekse woorde wat hier gebruik word beteken letterlik ‘sag’ en ‘manlike bed’.  Dit verwys na die twee partye wat die ‘manlike’ en ‘vroulike’ rol in die homoseksuele verhouding inneem.