‘n Liefdeslied vir Jesus

Psalm 45

Die meeste liede wat jy op die radio hoor gaan oor liefde.  Dit is asof die wêreld daarna soek, maar dit nie kry nie.  En hulle sal dit ook nie kry nie, omdat dit net in die Bruidegom, Messias en Koning van Ps.45 gevind kan word.  Net dié wat met Hom getroud is, kan begin om te verstaan wat ware liefde is.

 

Die seuns van Korag het ‘n lied geskryf wat onder begeleiding van die musiekleier op die Koning se troue gesing moes word (v.1).  Dit moes op die wysie van ‘Lelies’ gesing word, omdat die mense van die dag daarmee bekend was (v.1).

 

Die Psalm se inhoud was bedoel om dié wat dit gesing en gehoor het, te onderrig (v.1).  Maar omdat dit ‘n liefdeslied was, moes hulle dit nie as koue feite geleer het nie (v.1).  ‘n Diep liefde vir die koning moes hulle harte gevul het; dit moes selfs trane in hulle oë gebring het (v.2).

 

Vir die psalmis was dit so (v.2).  Hy kon dit nie meer inhou nie, maar moes met elegante woorde sy emosie op papier gesit het en dit aan die Koning voorgedra het (v.2).

 

Hierdie lied is op verskeie konings se troues gesing, maar uiteindelik is dit in die Messias vervul.  Sekere dele daarvan kan op geen aardse koning toegepas word nie (bv. v.7-8), terwyl daar ander elemente is wat nie vir die Messias geld nie (bv. die prinsesse en bruidsmeisies in v.10, 15).  Die res van die Skrif sal ons help om die Psalm reg te interpreteer en toe te pas.[1]

 

Die Bruidegom (v.3-10)

In ons kultuur wag almal vir die bruid wanneer daar ‘n troue is.  Maar in die ou Joodse kultuur was dit nie so nie, veral nie by die koning se troue nie.  Die fokus was op die koning; dit was sý groot dag.  Mense het hom dikwels as die mooiste en aantreklikste man in die land beskou (1 Sm.9:2, 16:12, 18).

 

By Jesus se eerste koms was Hy nie aantreklik nie (Jes.53:2), maar toe Hy in die hemel verheerlik is was Hy die aantreklikste van almal, die skoonste uit 10 000 (v.3).

 

As Hy gepraat het, was die woorde van sy lippe vol van genade; Hy het bemoedigende en opbouende woorde gepraat (v.3, Sp.22:11).  Die genade in sy woorde het gewys wat in sy hart was, en daarom het God Hom vir ewig geseën (v.3, Mt.12:34).

 

Hy was ‘n Magtige Held op sy perd wat met die swaard sy vyande oorwin het (v.4-5, Ps.24:8, Jes.9:5, 49:2, Heb.4:12, Op.1:16, 6:2, 19:11, 15, 21).  Hy het geveg om waarheid, ootmoed [Eng. ‘meekness’] en geregtigheid te bevorder, en nie omdat Hy bloedlustig was nie (v.5).

 

Sy plan was om valsheid en bedrog in die nek te slaan, om diktators tot ‘n val te bring, en om die leeu van ongeregtigheid dood te skiet (v.5).  Sy sterk regterhand sou hiervoor gesorg het (v.5).  Sy vyande sou vreesbevange gewees het vir die swaard in sy regterhand (v.5, 4).

 

Hy was ook ‘n dodelike skut wat met een skoot sy skerp pyle in hulle harte getref het (v.6).  Al die volke sou voor Hom geval het, totdat Hy al sy vyande aan sy voete onderwerp het (Ps.110:1-2, 5-6).  In al hierdie dinge het Hy sy Koninklike heerlikheid en majesteit gewys (v.4-5, Jud.25).

 

Die rede hoekom Hy sy vyande so maklik oorwin het, is omdat Hy nie net ‘n mens was nie, maar God op die troon (v.7).  En omdat Hy God was, sou Hy en sy troon vir ewig bestaan het (v.7, Dn.2:44, 7:14, Lk.1:33, Heb.1:8-12).  Daar sou geen opvolger tot die troon gewees het nie.  Met sy septer sou Hy vir ewig in geregtigheid regeer het (v.7).  Hy het dit immers liefgehad en goddeloosheid gehaat (v.8, 11:7).

 

Om hierdie rede het God Hom gesalf om die Messias te wees (v.8).[2]  Volgens die psalmis het God vir God gesalf (v.8).  Daar is net een God (Dt.6:4), maar uit v.8 is dit duidelik dat daar meer as een Persoon in die Godheid is (Mt.3:16-17, 28:19, Ef.4:4-6).

 

Toe die Messias sy aardse bediening begin het, het God Hom gesalf en vir sy werk afgesonder (v.8, vgl. 1 Sm.16:13).  Hy het Hom met vreugde-olie gesalf (v.8).  Wat beteken dit?

 

Die olie is simbolies van die Heilige Gees wat Hom vir sy taak bekragtig het (Lk.3:22, 4:18, Jh.1:33, Heb.1:9).  Die vreugde-olie verwys na die Vader se tevredenheid met die Seun, sodat Hy Hom gesalf het om die Messias te wees (v.8, Mt.3:17).  Vir die Vader was Hy ver verhewe bo die res, en was daar niemand anders op die lys van moontlike kandidate nie (v.8).

 

Sy klere het soos parfuum geruik wat van mirre, aalwyn en kassie gemaak is (v.9, vgl. Eks.30:23-24, Sp.7:17).  Mirre was afkomstig van ‘n sekere soort Arabiese balsamboom.  Die boom se geurige rooi-bruin gom is uitgedroog en tot ‘n fyn poeier gemaal.  Ons almal weet wat aalwyn is.  Kassie kom van ‘n geurige boombas af.[3]  Toe die Messias met hierdie geurige mengsel gesalf is, het dit tot op sy skouers afgeloop, sodat Hy lekker geruik het vir sy troudag (v.8-9, vgl. Ps.133:2).

 

Die troue is gehou in paleise wat uitgelê is met ivoor (v.9, vgl. 1 Kon.22:39).  Daar was ook musikante wat met snaarinstrumente by die troue gespeel het (v.9, 33:2, 150:3-4).  Die Koning was wêreld-beroemd, sodat die dogters van konings as eregaste na sy troue toe genooi is (v.10).

 

Die koningin – die kerk volgens Ef.5:32 – het die ereplek aan sy regterhand ingeneem (v.10, vgl. 1 Kon.2:19, Ef.2:6).  Haar trourok is van Ofir se kwaliteit fyngoud gemaak (v.10, Job 28:16, 1 Kon.10:11).  So het sy die Koning se rykdom en heerlikheid weerspieël (2 Kor.3:18).

 

Die Bruid (v.11-18)

Geen fees in ons kultuur is so groot soos ‘n troue nie.  Bittermin mense nooi bv. 150 of 200 mense na hulle verjaarsdae toe.  Ek ken ook nie iemand wat so baie mense na sy of haar huis toe nooi vir Kersfees nie.

 

In die Bybelse kultuur was dit dieselfde, en wanneer Jesus terugkeer sal dit weer so wees.  Ps.45 gee vir ons ‘n idee van hoe groot, ryk en belangrik hierdie fees sal wees.

 

Die Koning het in v.11 vir die koningin gesê dat sy ‘n nuwe lojaliteit gehad het.  Om by Hom te wees, moes sy haar volksgenote en ouerhuis verlaat het (Gn.2:24, 24:58).  Hy moes vir haar belangriker gewees het as haar familie (v.11).

 

As sy dít gedoen het, sou Hy haar skoonheid begeer het (v.12).  Haar toewyding en onderdanige eerbied waardeur sy Hom Here genoem het, was vir Hom belangriker as haar goue rok en uiterlike skoonheid (v.10-12, 95:6, Jes.54:5, 1 Pt.3:3-4, Op.19:7-8, 21:2).

 

Hy was so verhewe, dat ‘n skatryk stad soos Tirus haar skatte aan sy voete kom neerlê het (v.13, Ps.72:10, Jes.49:7, 60:6-7, Mt.2:11, Op.21:24, 26, vgl. Esg.26-28).  Hy het van die skatte vir sy aanstaande gegee, sodat sy haarself daarmee versier het (v.14).  Die prinses van v.14 was oppad om die koningin van v.10 te word.  Haar veelkleurige trourok was met dun goue draad deurweef (v.14-15, 10, vgl. Gn.37:3).

 

Die bruidsmeisies het agterna geloop toe die prinses na die Koning toe gelei is (v.15).  Hulle was bly toe sy by die Koning aangekom het (v.16, Gn.2:22, Jh.3:29, 2 Kor.11:2).  ‘Die Koning sal baie kinders hê; hulle sal saam met Hom oor die land regeer!’ het hulle gesê (v.17, Heb.2:10, 13, Op.5:10).

 

Maar al het hulle so van sy kinders gepraat, sou Hy alleen deur die nasies geprys word en vir ewig onthou word (v.18, 22:31-32, 145:4, Jes.59:21, 1 Kor.11:26, Op.5:9).  Hy was nie net die Messias van die Jode nie, maar van die hele wêreld.

 

As Hy dan moeite gedoen het om sy troue onder die nasies aan te kondig, moet jy moeite doen om dit by te woon.  Moenie op die gratis en ewige feesmaal van die hemel uitmis, omdat jy flou verskonings gehad het vir hoekom jy nie daar kan wees nie (Lk.14:18-20).  Moenie soos sommige mense sê:

 

  • ‘Ek wil my kinders en kleinkinders geniet terwyl hulle nog jonk is, en het nie nou tyd om oor die hemel te dink nie – ek sal dit doen wanneer hulle uit die huis uit is.’
  • ‘Ek het dinge wat ek in die lewe wil bereik, en sal later die hemel oorweeg. Ek wil eers geld maak, my jongmens lewe geniet, die wêred sien en trou.  As ek dit klaar gedoen het, sal ek dink oor wat Jesus gesê het.’
  • ‘My lewensmaat en kinders stel nie belang in geestelike dinge nie. As ek heeltyd oor die Here praat, sal ek hulle verloor.  Dalk moet ek wag dat hulle tot bekering kom, gedoop word, by die kerk aansluit en die Here volg.  Dit sal beter wees as ons dit saam doen, en daarom sal ek ‘n bietjie wag.’
  • ‘Die Here het my kind van my af weggevat. Die kerk het my seergemaak.  Die ds. het my nie besoek toe ek in die hospitaal was nie.  Hoekom moet ek dan die Here dien?’
  • ‘Ek werk 14 ure per dag. Om nog op ‘n Sondag my gesin se tyd te steel en in die kerk te sit werk nie vir my nie.  Wanneer ek die dag aftree sal ek oor die Here en die lewe hierna dink.’

 

Op grond van Jesus se woorde in Lk.14:26, 33 wil ek vir jou sê:  ‘Toemaar, moenie jou tyd mors nie.  As jou lewe, persoonlike gemak, jou huweliksmaat, jou kinders, familie, rykdom, werk, toekomsplanne of enigiets anders vir jou belangriker is as Jesus, moet jy Hom nie volg nie.’

 

Volgens v.11 vereis die Koning sy bruid se totale toewyding.  Hy stel nie belang in ‘n bruid wat in haar hart wens dat daar ‘n ander prins op ‘n wit perd na haar toe sal kom nie.  Hy weier om met self, geld, plesier en die afgode wat in ons harte is, te kompeteer (Jk.4:4-5).

 

As ons egter ons lewens aan Hom wy, sal Hy die volle rykdom van sy liefde aan ons openbaar.  Ons sal sy heerlike skoonheid bewonder en bevoorreg voel dat Hy ons gekies het om sy bruid te wees (v.3, 2 Ts.1:10).  Hy sal sagte woorde vir jou sê om jou te bemoedig in die swaarkry wat jy in hierdie wêreld moet deurmaak (v.3, Jes.50:4, Lk.4:22, Jh.1:14, 16-17, 7:46).

 

Hy sal veg om jou teen Satan en die wêreld se aanvalle te beskerm, en het dit eintlik reeds tot die dood toe gedoen toe Hy aan die kruis gehang het (v.4-6, Jh.12:31, 16:33, 1 Jh.3:8, 5:4).

 

Hy sal jou geestelike armoede in rykdom verander, en die lelike eendjie van jou sonde in ‘n beeldskone en weelderige bruid verander; Hy sal vir jou die waardigheid gee wat jy nie in jouself het nie; Hy sal aan jou ‘n ereplek in sy teenwoordigheid gee, sodat jy nie die lof van mense hoef te soek nie (v.10, 13-15).

 

Alles wat jy nog ooit in hierdie wêreld begeer het, kan nie met daardie dag vergelyk word nie.  Dit sal soos die lekkerste troue wees wat al ooit bygewoon het, en dit sal nie ophou nie.  Dit sal nie ‘n huwelik wees wat op die wankelrige fondasie van Hollywood se romanse gebou is, sodat dit soos húlle s’n in die skeihof eindig nie.  Dit sal eerder gebou wees op die rotsfondasie van Jesus Christus se ewige liefde, karakter, verbond en beloftes.

 

Die groot vraag is of jy daar sal wees?  Sal jy die enigste perfekte Bruidegom ontmoet en vir ewig saam met Hom in sy hemelse paleis woon?  Sal die dapper Koning op sy perd as ‘n vriend of ‘n vyand na jou toe aangery kom?

 

Sal die pyle van sy toorn jou hart penetreer en laat bars, omdat jy nie heiligheid liefgehad het en goddeloosheid gehaat het nie (v.8, 97:10)?  Sal Hy sy skerp swaard deur jou siel dryf, omdat jy vir jouself gelewe het en nie vir Hom wat die asem in jou longe, en elke ander goeie gawe vir jou gegee het nie?

 

Hoekom praat jy nie liewer vandag nog dinge met Hom uit nie?  Hy is baie gawer as wat jy dink, en sy liefde vir jou is baie groter as wat jy besef.  Dit is soos ‘n oseaan waarvan die water verdamp en in reënwolke verander.  Die wind van sy Gees waai dit na jou lewe toe, en veroorsaak dat dit in emmers oor die riviere van jou hart reën (Rm.5:5).

 

Wie kan dan keer dat hierdie riviere van liefde vir Jesus terugvloei na die oseaan van sy liefde toe waar dit begin het?  Jou liefdeslied vir Jesus is eintlik maar net ‘n eggo van die liefdeslied wat Hy eerste gesing het.  “Ons het Hom lief, omdat Hy ons eerste liefgehad het.” (1 Jh.4:19).

 

[1] Al kan ons nie elke detail op die Messias toepas nie, maak ek deurgaans van hoofletters gebruik wanneer ek van die Koning praat.  Die Psalm het immers hoofsaaklik betrekking op die Messias.

[2] Messias beteken ‘gesalfde’.

[3] James Orr, International Standard Bible Encyclopedia, inskrywings onder ‘myrrh’, ‘aloes; lignaloes’ en ‘cassia’.

Advertisements

’n Reaksie op gay huwelike in die NG-Kerk

Gay wedding

Soos jy in laasweek se koerant gesien het, het die onlangse NG-Sinode besluit om gay huwelike te aanvaar. Dr. André Bartlett het die saak voorgestel.  Die Vergadering het dit met 102 teen 88 stemme deurgestem.  ‘n Dag later is die herbewoorde mosie met 114 teen 63 stemme aanvaar.  Hierdie stem het nie net opskudding in die NG-Kerk veroorsaak nie, maar in verskillende Christelike kerke in Suid-Afrika.  Hoe moet ons daarop reageer?  ‘n Deeglikse studie van Romeine 1:26-27 sal vir ons wys hoe.

 

Vroue (v.26)

Verlede Vrydag was ek by ‘n debat tussen James White en Graeme Codrington. In die debat het Codrington gesê Romeine 1:26 verwys nie na lesbianisme nie, omdat dit nie algemeen was in die eerste eeu nie.  Volgens hom het Paulus gepraat van Jode wat dit as ‘n skande beskou het dat vroue nie swanger word nie.  Maar volgens die Romeinse digter Juvenal was lesbian aktiwiteit algemeen in die eerste eeu.[1]  Buitendien sal God nie ‘n samelewing straf, omdat vroue swanger wil word, maar nie kan nie.  In v.26 praat Paulus ongetwyfeld van lesbianisme wat in God se oë ‘n skandelike sonde is.

 

Mense is goddeloos en onderdruk God se waarheid (v.18-19). Hulle sien sy heerlikheid in die skepping, maar wil Hom nie eer of dank nie (v.20-21).  Hulle aanbid die skepping eerder as die Skepper (v.22-23).  Dáárom gee God hulle oor aan seksuele sonde (v.24), homoseksuele sonde (v.26-27), en onderstebo denke, sodat hulle allerhande sondes doen en goedkeur (v.28-32).  Mense wat die ware God vir vals gode verruil (v.23) en die waarheid vir die leuen (v.25), sal die natuurlike omgang met die teenoorgestelde geslag verruil vir dit wat teen-natuurlik is (v.26-27).  As jy dus die Skepper-skepping orde omruil (v.23, 25), sal jy die man-vrou orde van Genesis 1-2 omruil (v.26-27).  Enige samelewing wat dít doen wys daardeur dat hulle onder God se oordeel is (v.26, vgl. Genesis 19).  God gee hulle oor aan skandelike drange, sodat hulle hul luste bevredig en hulleself vernietig (v.26-27).  Hulle is soos ‘n trok wat afdraende ry sonder remme.

 

Codrington het by die debat gesê ‘skandelike drange’ verwys na dit wat skandelik was vir die Joodse kultuur. Maar hoekom gee God mense oor en straf Hy hulle vir iets wat teen die kultuur is, maar nie teen die Skrif nie (v.18, 26)?  Codrington het ook gesê dat die dade van v.26 skandelik is, maar nie sondig nie.  Hy is verkeerd, want Paulus koppel ‘skandelik’ aan ‘drange of hartstogte’.  Die Grieks vir drange (pathos) word altyd in die Nuwe Testament gebruik in die konteks van seksuele sonde (v.26, Kolossense 3:5, 1 Tessalonisense 4:5).

 

Volgens Paulus is homoseksuele drange en dade teen die natuur (v.26-27, vgl. Genesis 1:26-27, 2:18-25, Matteus 19:4-6). Volgens party sê Paulus eintlik dat mense wat gay gebore is, nie heteroseksueel moet wees, of andersom nie.  Met ander woorde, jy moenie anders wil wees as wat God jou gemaak het nie.  Maar Paulus sê nie dat gays teen húlle natuur optree nie, maar eenvoudig teen die natuur.  Homoseksualiteit is onnatuurlik.  Twee mense van dieselfde geslag se liggame pas nie biologies bymekaar nie, en hulle kan ook nie kinders kry nie (Genesis 1:28).  Daar is ook geen wetenskaplike bewys dat gays so gebore is nie.[2]  As mense so gebore is, kan hulle nie verander nie.  Tog wys die Skrif en ervaring dat hulle kan (1 Korintiërs 6:11).

 

Daar is mense wat Matteus 19:12 aanhaal om te wys gays is so gebore: “Want daar is persone wat onbekwaam is om te trou, wat van die moederskoot af so gebore is, en daar is persone wat deur die mense onbekwaam gemaak is, en daar is persone wat hulleself onbekwaam gemaak het ter wille van die koninkryk van die hemele.  Wie dit kan vat, laat hom dit vat.”

 

Jesus praat nie hier van gays nie. Hy praat oor die huwelik, egskeiding, hertrou, en enkelskap.  Hy sê dat enkelskap, nie homoseksualiteit nie, die enigste alternatief is vir die huwelik tussen ‘n man en ‘n vrou.  Party mense is enkel omdat hulle so gebore is:  misvormd, gestremd, of geen begeerte om te trou nie.  Ander is enkel omdat hulle ontman is (Jesaja 56).  Ander kies om enkel te bly vir die Koninkryk (1 Korintiërs 7:32).  Die vers het niks te doen met gays, asof party so gebore is, ander so gemaak is, en ander dit kies vir die Koninkryk nie.

 

Mans (v.27)

Kobus en Alan is deel van ‘n Bybelskool. Albei sit ure in om voor te berei vir hulle klasse, maar hulle interpretasies van sekere verse verskil lynreg.  Hoekom verskil hulle?

 

Kobus is ‘n gelowige. Hy glo die Bybel is God se woorde, weerspreek homself nie, is onfeilbaar, foutloos, geïnspireer, die finale gesag vir geloof en lewe, verander nie saam met die tyd of kultuur nie, is die standaard vir alle waarheid, akkuraat in alles wat dit leer (profesie, wetenskap, geskiedenis), algenoegsaam vir lewe en godsaligheid.

 

Voor hy die Skrif bestudeer ondersoek hy sy hart, bely hy die sonde wat die Heilige Gees bedroef, en bid hy volgens Psalm 119:18 vir insig. Hy kyk na die letterlike betekenis van woorde en sinne, bestudeer die agtergrond, kyk na die onmiddellike en breë konteks, vergelyk dit met die res van die Skrif, kyk hoe heilige manne deur die kerk se geskiedenis dit verstaan het, en soek hoe hy dit kan gehoorsaam.  Vir hom moet die betekenis uit die teks self kom (eksegese).

 

Alan glo die Bybel is nie altyd akkuraat nie, weerspreek homself, is nie algenoegsaam nie, is soms outyds en moet aanpas by die tye, is vol van mense se opinies, en is nie die enigste gesag vir geloof en lewe nie. Hy benader die Skrif akademies, buig hom nie neer voor God se Woord nie, maar sit soms in oordeel daaroor, en sê dit is verkeerd op plekke.  Hy is nie ernstig oor ‘n heilige lewe nie, en probeer selfs om sonde uit die Bybel te regverdig.  Hy glo wat die kultuur sê, en wil die Skrif daarby aanpas.

 

Hy verwerp die interpretasie van die kerk deur die geskiedenis, en heg meer waarde aan die interpretasie van mense wat krities is oor die Bybel. Hy bestudeer die Skrif om slim te word, en nie om dit te gehoorsaam nie.  Hy is nie gepla oor eksegese soos Kobus nie.  Hy het klaar besluit wat hy glo, en probeer om die Skrif daarby aan te pas.  Hy lees sy vooropgestelde idees in die teks in (eisegese).  Alan se metode van Skrif-interpretasie is die metode van mense wat pro-gay is.

 

Hoe móét ons dan v.27 interpreteer?

 

Soos die vroue, het die mans die natuurlike omgang verruil vir dit wat teen-natuurlik is, en met begeerte gebrand vir mekaar (v.27). Hierdie vers wys dat God nie net gay dade verdoem nie, maar ook gay aangetrokkenheid of drange (v.26-27).  Gay oriëntasie of neigings is ‘n mite.  Mense sê:  ‘Ek kan nie onthou dat ek ooit gekies het om gay te wees nie.’  Sonde werk op ‘n baie dieper vlak as die mens se wil.  Dit werk in ons wese en harte.  Ek kan nie onthou dat ek ooit gekies het om hoogmoedig te wees of mense te vrees nie, en tog sê die Skrif dis sonde.  Geen gay persoon is per ongeluk wellustig, kyk per ongeluk na gay porn, of klim per ongeluk saam met iemand in die bed nie.  Hulle kies om God se skeppingsorde te verruil (v.26-27).

 

By die debat het Codrington gesê v.27 praat van gay dade met seuns, van gay prostitusie in afgodstempels. Dit is ‘n skoot in die donker, want die teks sê niks van ‘n afgodstempel, prostitute, of jong seuns nie.  Mense wat pro-gay is sê:  ‘Paulus basseer v.27 op Levitikus 18:20 wat gay dade in die konteks van afgodery verbied.  Liefdevolle gay verhoudings is nie verkeerd nie.’  Maar wat van die ander sondes in Levitikus 18?  Is egbreuk, bestialiteit, en bloedskande net verkeerd in die konteks van afgodery, maar aanvaarbaar as jy dit by jou huis doen?  Paulus is nie net teen gay prostitusie, verkragting, en molestering nie.  Hy sê dat die mans brandende luste vir mekaar het (v.27).  Duidelik is alle gay drange en dade skandelik (v.26-27).

 

As ‘n natuurlike gevolg van hulle skandelike dade, ontvang hulle in hul liggame die gepaste straf vir hulle dade (v.27). Paulus verwys moontlik na siektes soos VIGS of ander seksueel-oordraagbare siektes.  Die straf pas by die oortreding.  Die oortreding was seksueel, en daarom is die straf ook seksueel.  Hulle maai wat hulle gesaai het (Galasiërs 6:7-8).

 

Codrington het gewys dat hulle gestraf word vir hulle dwaling, nie vir hulle sonde nie.  Sy punt was om te wys dat die dade van v.27 nie sondig is nie.  Maar die Skrif gebruik die Griekse woord vir ‘dwaling’ (planēs) met verwysing na die ‘dwaalweg van sonde’ (Jakobus 5:20, 2 Petrus 2:18, Judas 11).

 

Hoe moet ons dan reg reageer op die kwessie van gay huwelike in die NG-Kerk? Moenie ‘n blinde oog gooi en maak of dit niks met jou te doen het nie.  Dit het alles met jou te doen.  Hier is vyf redes hoekom ek so sê:

 

[1] Baie van ons het familie, vriende, en kollegas in die NG-Kerk. Help hulle om nie saam met die stroom te gaan nie (Eksodus 23:2).  Wys vir hulle dat die Kerk se interpretasie van die Skrif nie stand hou onder die normale lees van die teks, deeglike eksegese, die interpretasie wat deur die geskiedenis gehandhaaf is nie.

 

Besef ook dat nie almal in die NG-Kerk ‘ja’ gestem het nie. Raai hulle aan om nie in ‘n gemeente te bly wat teen die besluit is, maar nogsteeds hande vat met pro-gay leraars en kerke nie.  As die NG-Kerk gered kan word, moet hulle saam met ander toegewyde Christene ‘n poging aanwend om dit te doen.  Hulle moet by die fakulteit begin en van die nie-behoudende en liberale dosente ontslae raak.

 

As dit ‘n verlore situasie is, moet hulle die Kerk verlaat (2 Korintiërs 6:17) en ‘n gemeente soek wat die Skrif verantwoordelik preek, heilig is, nie mense vrees nie, en gays liefhet en die evangelie van verlossing met hulle sal deel. God ken sy skape en sal hulle uit die vyand se hande red (Johannes 10:27-29, Esegiël 34:10, 22, 13:22-23).

 

[2] Dalk het jy ‘n gay kind, familielid, kollega, of vriend. Wat sal jy sê as hulle jou oor die NG-Kerk se besluit vra?  As jy Jesus liefhet kan jy nie huiwerig ‘ja’ sê, omdat jy nie jou kind wil verloor nie.  Jesus wil hê jy moet Hom meer liefhê as jou familie (Matteus 10:37, Lukas 14:26).  Wees gaaf met jou gay geliefdes, maar moenie hulle sonde goedkeur met jou woorde, dade, of stilte nie.  Moenie vir jou lesbian dogter en haar meisie ‘n kamer in jou huis gereed maak nie.  As jy hulle sonde goedkeur, sal God hulle bloed van jóú hande eis (Esegiël 3:18).

 

Dalk is jy bang jy verloor jou kind as jy vir hom of haar die waarheid vertel. Maar as jy niks sê nie, sal jy vir ewig jou kind verloor in die hel (1 Korintiërs 6:9-10).  As jy die evangelie deel kan jy jou kind se lewe red (v.16, 1 Korintiërs 6:11).  Vir verdere hulp in die saak kan jy my preek op die blog hieroor lees by https://baptistekerkkemptonpark.wordpress.com/2013/11/16/n-oplossing-vir-homoseksualeit/

 

[3] Die NG-Kerk was vir baie jare die gesig van konserwatiewe Christenskap in Suid-Afrika. Ongelowiges in ons land beskou die NG-Kerk se opinie as die Christen-kerk s’n.  As hulle gesê het:  ‘Ons glo nie wat die Bybel oor gays sê nie,’ kon jy dalk nog stilgebly het.  Maar as hulle die Skrif verdraai, móét ons reageer en opstaan vir die waarheid.  Mense moet weet jy kan nie homoseksualiteit uit die Skrif regverdig nie.  Vir nóg argumente kan jy my preek soek met dié titel:  Sê Bybel REGTIG homoseksualiteit is sonde? (sien die link onder voetnota 2).

 

[4] Gays sal lidmate van ons kerk wil word, by ons Teologiese Seminarium wil studeer, en vra of jou ds. hulle sal trou. Jy en buitestaanders moet weet wat ons glo.  Ons glo dat Christene nie in sonde volhard nie.  Ons glo homoseksualiteit is sonde.  Ons glo net Christene kan lidmate van die kerk wees.  Daarom glo ons dat gays nie lidmate kan wees nie.  Ons glo predikante moet gered wees, heilig leef, en seksueel rein wees (1 Timoteus 3:2).  Ons glo dat mense wat in homoseksualiteit of enige ander sonde volhard nie gered is nie (1 Korintiërs 6:9).  Daarom glo ons gays kan nie predikante wees nie.

 

[5] Pro-gay kerke sal ons valslik beskuldig en sê ons haat gays. Soos alle sondaars is gays baie welkom om ons eredienste by te woon, sodat hulle die Woord kan hoor.  Soos alle sondaars sal ons gays vriendelik en met liefde behandel.  Ons sal vir hulle sê:

 

  • Ons was ook hopelose sondaars net soos julle, en het God se straf verdien.
  • Jesus het die straf vir homoseksualiteit en ander sondes op Homself geneem aan die kruis.
  • Jesus skenk graag bekering en vergifnis vir gays en sondaars van elke soort (1 Korintiërs 6:11).
  • Die evangelie is die krag van God om ook sondes soos homoseksualiteit te oorkom (v.16, Titus 2:11-12).
  • God se genade is groter as ons sonde – daar is hoop in Jesus (Romeine 5:20).

 

Hoekom moet ons reg reageer op die saak van gay huwelike in die NG-Kerk? Want as ons die Skrif verdraai, het dit ewige gevolge.  Ons doen dit tot ons eie ondergang (2 Petrus 3:16).

 

Wanneer mense gesond is, dink hulle nie ernstig oor die lewe nie. Maar as hulle ernstig siek word, dink hulle diep na oor die lewe, hulle sonde, God, die hemel, die hel.  Die gay kwessie in die NG-Kerk is so ‘n tyd.  Mense wat voorheen nie ernstig gedink het oor God, die Bybel, sonde, die hemel, en die hel nie, sal nou daaroor dink.

 

Twee jaar gelede het ek oor homoseksualiteit gepreek. Tussen 15 en 30 mense het elke maand my preek op die blog opgesoek.  Nadat die NG-Kerk laasweek oor die saak besluit het, het meer as 250 mense oor ‘n tydperk van sewe dae die preek opgesoek.  Mense is verward en het vrae oor die kwessie.  Ons moet gereed wees om vir hulle ‘n antwoord te gee oor die hoop wat in ons is (1 Petrus 3:15).

[1] Satire 6. Aangehaal in Alvin Schmidt, How Christianity Changed the World, p.89

[2] Sien Edward T. Welch, Blame it on the Brain?, pp.165-171; James Kennedy & Jerry Newcombe, What’s wrong with same-sex marriage, pp.97-110.  Ek gebruik van Welch en Kennedy se argumente in my preek by https://baptistekerkkemptonpark.wordpress.com/2013/11/01/se-die-bybel-regtig-homoseksualiteit-is-sonde/

’n Tyd om enkel te wees

Bored woman

George Whitefield is my gunsteling prediker (Charles Spurgeon kom bitter naby).  Soos enige van ons helde het hy kleivoete gehad.  Sy vriend, Howell Harris, het baie van ‘n sekere weduwee, Elizabeth James gehou.  Die gevoel was wedersyds.  Harris wou egter uitsluitlik op sy verhouding met God fokus, en het besluit om nie te trou nie.  Hy wou haar aan Whitefield voorstel.  Na sy hom ontmoet het, het mev. James ‘n stryd in haar hart gehad.

 

Na ‘n worstelstryd het sy besluit om met Whitefield te trou (sy het eers 10 jaar later haar gevoelens vir Harris oorkom!).  Harris het haar by die kansel aan Whitefield afgegee.  Direk ná die sermonie het die groepie verder gereis, en het Whitefield gepreek.  Whitefield en sy nuwe vrou het geen wittebrood gehad nie.  Hy het vir ‘n volle week twee keer per dag gepreek. Daarna het hy alleen vir ‘n maand lank op ‘n preektoer na Birstol, Gloucester, en London vertrek.  Op Kersdag het hy teruggekeer huistoe, en toe weer op 26 Desember ‘n preektoer na Bristol en London onderneem.  Whitefield het hom voorgeneem dat sy huwelik geensins sy bediening sou verhinder nie.[1]

 

Whitefield het reg gedink oor die bediening, maar verkeerd oor die huwelik.  Hy het nie sy bruid in ag geneem nie.  Na my mening het Harris ‘n beter besluit as Whitefield geneem.  In omstandighede soos Whitefield s’n, sou dit beter gewees het om enkel te bly (1 Korintiërs 7:25-40).

 

Vervolging (v.25-27)

‘When the high seas are raging it is no time for changing ships.’[2] (Leon Morris).  ‘A man who is a hero in himself becomes a coward when he thinks of his widowed wife and his orphaned children.’[3] (Lightfoot).

 

Jy wil nie jou gesin deur vervolging of honger sit as jy dit kan help nie.  In sulke tye het ouers hulle kinders geëet (Deuteronomium 28:53-57).  Jesus het gesê:  “Maar wee die vroue wat swanger is en die wat nog soog, in daardie dae.” (Matteus 24:19).  In sulke tye is enkelskap beter.

 

In v.1-16 het Paulus hoofsaaklik met die getroudes gepraat.  In v.25-40 praat hy hoofsaaklik met mense wat enkel is.  Paulus haal nou wel nie vir Jesus aan nie (vgl. v.10), maar in dié saak praat hy as iemand wat deur die Gees betroubaar is (v.25, 40), as een wat barmhartigheid ontvang het (v.25).

 

Paulus se raad is dít:  bly soos jy is, veral omdat moeilike tye oppad kom (v.26).  Die moeilike tye verwys dalk na die hongersnood wat in keiser Claudius se tyd gekom het (Handelinge 11:28), of na die vervolging onder keiser Nero.

 

So, is jy deur verlowing of in die huwelik gebind?  Moenie skei nie (v.27, Matteus 1:19, 19:6).  Is jy reeds geskei of nie verloof nie, en daarom los van ‘n maat?  Moenie ‘n maat soek nie (v.27).  Hoekom nie?  Want daar is swaar tye wat kom (v.26).

 

Hoe moet ons vandag v.26 toepas?

 

[1] Bly enkel as jy vir ses maande op ‘n keer in die buiteland is vir werk.  Hoekom wil jy trou as jy nooit by die huis gaan wees nie?

 

[2] Bly enkel as jy ‘n sendeling wil word na ‘n land waar die vervolging van Christene erg is (Matteus 19:12).

 

[3] Bly enkel as Suid-Afrika soos Zimbabwe word, as daar nie kos is nie.

 

[4] Bly enkel as vervolging in ons land uitbreek.

 

As jy wél in sulke omstandighede trou is dit nie sonde nie (v.28, 9).  As jy in dié omstandighede beter sal vaar met ‘n maat, trou.  Oor die algemeen sal die las ligter wees as jy in sulke tye enkel bly.

 

Vlees (v.28)

Toe ek studeer het, het ‘n getroude vriend eendag vir hom ‘n Caramello beer gekoop.  Hy het dit alleen geëet en die papier in kar gelos.  Toe sy vrou die papier sien was sy kwaad.  Hoe kon haar man sjokolade eet sonder haar?  As my vriend enkel was kon hy tien Caramello’s geëet het sonder om probleme op te tel (hy sou wel gewig opgetel het J).  ‘n Getroude persoon moet altyd sy of haar maat in ag neem.

 

‘n Enkel- of geskeide persoon wat in die v.26-bootjie is, sondig nie as hy of sy trou nie (v.28, vgl. 9, 15, Matteus 19:9).  As jy egter enkel bly en nie met ‘n ander sondaar saamgedruk word in ‘n lewe waar jy skielik alles moet deel nie, spaar dit jou van die sorge wat die vlees bring (v.28).

 

As jy dan enkel is moet jy nie dink om te trou sal al jou sorge oplos nie:  jou seksdrang, eensaamheid, jou eie kinders hê, ens.  Die huwelik bring nuwe uitdagings:  skoonfamilie, konflik, verdeling van jou tyd, huis, kos, bed, geld, lewe, en meer.  Onthou dit, want as jy eers getroud is kan jy nie sommer weer skei nie (Matteus 19:6).

 

Verganklikheid (v.29-31)

Dave maak gereed om Mt. Everest te klim.  In sy rugsak pak hy twee van alles, asook sy gunsteling boeke, lekkernye, sy eie kussing, sy laptop sodat hy op Facebook kan gaan, sy grootlens kamera vir fotos, en sy verkyker.  Toe hy begin klim, het hy gou besef dat sy rugsak te swaar is.  Hy het baie van sy bagasie by die basis gelos, en die res in die sneeu op die berg gelos.  Die les is duidelik:  pelgrims pak lig.  So is dit in hierdie wêreld.  Te veel bagasie sal jou terughou.

 

Ons tyd op aarde is min, veral in vervolging (v.29, 26).  Fokus op die Here asof jy ongetroud is (v.29, 32-34).  Kyk verby die tydelike trane, vreugde, en besittings van hierdie wêreld, en fokus op Jesus en die ewigheid (v.30-31).  Die Skrif sê immers:

 

  • “Salig is julle, armes, want aan julle behoort die koninkryk van God. Salig is julle wat nou honger het, want julle sal versadig word. Salig is julle wat nou ween, want julle sal lag… Maar wee julle, rykes, want julle het jul troos weg. Wee julle wat vol is, want julle sal honger ly. Wee julle wat nou lag, want julle sal treur en ween.” (Lukas 6:20-21, 24-25).
  • “Moenie vir julle skatte bymekaarmaak op die aarde, waar mot en roes verniel en waar diewe inbreek en steel nie; maar maak vir julle skatte bymekaar in die hemel, waar geen mot of roes verniel nie en waar diewe nie inbreek en steel nie” (Matteus 6:19-20).
  • “Maar die dag van die Here sal kom soos ‘n dief in die nag, waarin die hemele met gedruis sal verbygaan en die elemente sal brand en vergaan, en die aarde en die werke wat daarop is, sal verbrand… Maar ons verwag volgens sy belofte nuwe hemele en ‘n nuwe aarde waarin geregtigheid woon.” (2 Petrus 3:10, 13).
  • “En die wêreld gaan verby en sy begeerlikheid, maar hy wat die wil van God doen, bly vir ewig.” (1 Johannes 2:17).

 

Pak lig.  Dit geld ook vir enkel mense.  Die lewe is kort.  Twee weke gelede het ek gelees van ‘n man wat in April getrou het, en twee maande later dood is aan kanker.  Moenie vir die hier-en-nou of vir jou huweliksmaat lewe nie.  Ignoreer Afrikaanse liefdesliede wat sê:  ‘Ek lewe net vir jou, jy lewe net vir my, oooh…’

 

Indien jy wel besluit om te trou moet jy ‘n Efesiërs 5-fokus hê.  Wees lief vir jou vrou soos wat Christus die kerk liefhet.  Respekteer jou man soos wat die kerk aan Jesus onderdanig is.  Fokus op jou siel, jou maat se siel en die ewigheid.  Moenie op ‘n tydelike en aardse huwelik fokus nie.

 

Enkel en getroude persoon:  is jy gereed vir die ewigheid?  Is jy gereed om geoordeel te word?  Is jy gereed om vir ewig in die hemel te lewe of in die hel te sterf?  Is jou sondes vergewe of sal jy daarin sterf?  Het jy jou van jou sonde bekeer of leef jy soos jý wil en nie soos Gód sê nie?  Maak jy staat op jou godsdiens, jou gebede, jou kerkbywoning, jou tiendes, jou goeie werke, jou ouers, jou doop om hemel toe te gaan?  Hoop jy maar vir die beste?  Of maak jy deur geloof staat op Jesus se lewe, kruisdood, opstanding, en op niks anders nie?  Pak lig en maak gereed om jou God te ontmoet.  Voor jy weet is hierdie wêreld en alles daarin tot niet.

 

Fokus (v.32-35)

‘n Man wat ek ken het onlangs uit die sendingveld bedank, omdat hy baie min by sy vrou en kinders is.  ‘n Man in William Tyndale se tyd het Jesus verloën toe die soldate gedreig het om sy vrou dood te maak.  Hy het later sy sonde bely en homself oorgegee om verbrand te word.

 

As jy getroud is kan jou aandag maklik verdeeld raak tussen Jesus en jou huweliksmaat.  Dis die punt van v.32-35.

 

Die vervolgde persoon wat geskei of enkel is, het nie die ekstra angs om sy of haar maat te behaag nie, maar kan geheel en al op die Here en ‘n heilige lewe fokus (v.32, 34a, 26).  ‘n Vervolgde persoon wat getroud is, kan op die Here fokus, maar sal ook angstig wees oor sy of haar maat se veiligheid (v.33-34).

 

Paulus beveel nie enkelskap aan om gelowiges te benadeel nie.  Hy soek eerder mense se voordeel, sodat hulle geheel en al op die Here sal fokus (v.35).  Hy wil nie hê dat ons ooit vir Jesus moet sê:  “Ek het ‘n vrou getrou en daarom kan ek nie kom nie.” (Lukas 14:20).

 

As jy enkel bly hoef jy nie twee keer te dink oor:

 

  • ‘n Gevaarlike sendingveld. My sendeling-vriend en sy gesin bly in ‘n Shangaan village. Hulle is onlangs in hulle huis aangeval. Vir beter evangelisasie doeleindes wou hy in die village aanbly, maar moes hy sy vrou en kinders se veiligheid en vrese in ag neem, en dorp toe trek.
  • Lang ure in gebed (1 Timoteus 5:5).
  • ‘n Halwe dag van straat evangelisasie.
  • ‘n Uur of twee by ‘n Woensdagaand Bybelstudie (jy het nie kinders wat vroeg in die bed moet wees, omdat hulle die volgende dag skool het nie).
  • ‘n Groot deel van jou salaris gee vir sending.

 

Kan jy die Here beter dien deur enkel te bly of deur te trou?  Doen dít.  Oor die algemeen kan ‘n enkel gelowige makliker op die Here fokus.

 

Vaders (v.36-38)

‘n Paar jaar gelede was my jongste suster verloof.  ‘Hy is nie die regte man nie,’ het my ouers gesê.  Sy het die verlowing verbreek, lang trane gehuil, en gedink dis die einde van die wêreld.  Vir my huidige swaer was dit die begin van die wêreld.  My punt is eenvoudig dit:  party mense is enkel as gevolg van hulle ouers se besluit.  Dis wat Paulus in v.36-38 leer.

 

Na my mening verwys ‘sy maagd’ in v.36-37 na die pa se dogter, en nie na die jong man se verloofde nie (in Paulus se tyd het die pa sy dogter se troue gereël, vgl. Genesis 34:6).  Gestel die pa wil hê sy dogter moet enkel bly om meer toegewyd aan God te lewe (v.36, 35), maar sy is in die blomtyd van haar lewe en wil graag trou (v.35-36, 9)?  As die pa sy voorneme verbreek en haar weggee om te trou, is dit nie sonde nie (v.36).  Indien sy dogter se begeerte vir ‘n maat nie so sterk is nie en hy by sy besluit bly, is dit beter (v.37-38) – veral in die lig van probleme wat op die horison is (v.26).

 

Om ouers te vra is nie bloot ‘n formaliteit nie.  Totdat sy trou (nie tot sy 21 is nie!) is die pa die hoof van sy dogter (v.36-37).  Soos God Eva vir Adam gegee het (Genesis 2:22, 24), moet pa’s hulle dogters in die huwelik weg gee (Eksodus 22:16-17).  Volgens Jesus is dít hoe dit sal wees totdat Hy weer kom (Matteus 22:30, 24:38-39).

 

Moenie jou pa inlig dat jy trou nie:  die man moet toestemming vra.  Ouers moet hulle kinders help om goeie maats te kies.  ‘n Pa moenie te hard wees of moeilik raak as sy dogter die regte man ontmoet het nie:  laat sy trou (v.36).

 

Verlies (v.39-40)

Op 5 November 1858 het sendeling John Paton op Tanna-eiland aangeland.  Op 12 Februarie 1859 het hy en sy vrou Mary ‘n baba seun gehad.  Op 3 Maart 1859 het Mary gesterf, en op 20 Maart sy baba seun.  Paton het hulle met sy eie hande begrawe.  Hy het in sy dagboek geskryf:  ‘But for Jesus… I must have gone mad and died beside that lonely grave!’[4]  Ook vir dié rede is die enkel persoon beter af.

 

As jy trou is dit lewenslank (v.39).  Behalwe vir die uitsonderings in v.15 en Matteus 19:9, kan jy net hertrou as jou maat dood is (v.39).  In dié geval kan jy volgens jou voorkeur hertrou.  Jy hoef nie vir ‘n stem te wag om te sê met wie jy moet trou nie.  Trou met wie jy wil, maar net in die Here:  met ander woorde, net met ‘n ander Christen (v.39, 2 Korintiërs 6:14).  Onthou tog dat die maat met wie jy hertrou óók kan sterf (v.39).  Op grond van die redes in v.26, 32-35 sal jy ook gelukkiger wees as jy enkel bly.  Paulus se lering oor enkelskap is nou wel sy opinie, maar dis ‘n geïnspireerde opinie (v.40).

 

Is jy enkel?  Dink aan v.39 voor jy trou.  ‘n Mens se huweliksmaat is nader aan jou as enigiemand anders (Genesis 2:24).  Die dood is erg, veral as jy vir baie jare getroud was en ‘n diep liefde vir mekaar gehad het.  Skielik is jy eensaam.  Mense mis veral hulle maats oor kerstyd, met verjaarsdae, as hulle kinders trou, as hulle agter-kleinkinders gebore word.  As gevolg hiervan is dit goed om enkel te wees.  As jy weier om oor die dood te dink is jy onrealisties.

 

As jy iets beklemtoon staan jy gevaar om misverstaan te word.  Mense oorbeklemtoon maklik wat jy gesê het, en dink jy is dwars of teen iets.  ‘n Predikant in Alberton het gesê dat sekere verse oor die ‘wederkoms’ eintlik nie na wederkoms verwys nie, maar na verwoesting van Jerusalem in 70 n.C.  Mense het sy beklemtoning verdraai en gesê hy glo nie in die wederkoms nie.

 

Dieselfde is waar van dié preek.  Mense kan maklik dink ek sê om te trou is sleg.  Enkel mense kan dink ek is ongelukkig getroud, en wil hulle afsit om dieselfde fout te maak.  Mense wat só dink mis die punt.  Ek hoop jy sien dat Paulus se punt ook mý punt is:  daar is ‘n tyd om enkelskap te oorweeg (v.25-40).  Besluit self wat jou gawe is (v.7) en doen dan wat jy wil.  As jy binne God se wil is, is die huwelik en enkelskap ewe goed.

[1] Arnold Dallimore, George Whitefield vol.2, pp.101-113

[2] Leon Morris, 1 Corinthians: Tydnale New Testament Commentaries, p.113

[3] Ibid, p.115

[4] John G. Paton:  Missionary to the New Hebrides, pp.79-80

Bly soos jy is

Happy old couple

Ek ken ‘n man wat besig was om te skei toe hy in ‘n verhouding betrokke geraak het.  Hy en die vrou het toe getrou.  Kort daarna het die vrou tot bekering gekom.  Hulle is nou al vir ‘n paar jaar getroud en die man is nog ongered.  Wat verwag God van ‘n vrou in só ‘n huwelik?  Die beginsel wat vir haar en baie ander situasies geld, word opgesom in 1 Korintiërs 7:17-24.

 

Godsdiens (v.17-19)

Twee jaar gelede het mnr. X tot bekering gekom en my kom sien.  Hy wou met mag en mening sy werk los om teologie te studeer.  Omtrent 8 jaar gelede het ‘n man ons kerk besoek.  My vriend het gepreek.  Die man was baie diep geraak en het die volgende dag al sy goed weggegee.  Hy wou met ‘n groot aliminium kruis deur Suid-Afrika loop en Bybels uitdeel.

 

Volgens Paulus is dié optrede te radikaal.  Ons moenie so wees nie.

 

Die algemene reël vir getroudes, enkel mense, geskeides, slawe, besnedes, onbesnedes is dít:  bly soos wat jy was toe God jou tot bekering geroep het (v.17, 20, 24).  Hierdie reël geld altyd en op alle plekke, nie net vir Christene in Korinte nie (v.17, vgl. 4:17, 11:16, 14:33).

 

Moenie dink veranderde omstandighede is meer geestelik, of om dieselfde te bly is minder geestelik nie.  As God vir jou die geleentheid gee om jou omstandighede te verander, kan jy dit doen (v.21, 9, 15, 27-28, 39).  Maar as jou omstandighede nie verander nie moet jy daarmee tevrede wees (v.7, 12-14, 27-28, 39).

 

Paulus gee ‘n voorbeeld van wat hy bedoel.  Jode wat met hulle bekering besny was moenie dink dit maak hulle ongeestelik nie.  Hulle moenie hulle besnydenis ongedaan wil maak deur ‘n operasie nie.  Heidene wat tot bekering kom moenie dink die besnydenis red, sodat hulle besny word nie (v.18, vgl. Handelinge 15:1, 5).  Vir God maak dit nie saak of jy besny is of nie.  Nie een van die twee maak jou meer of minder aanneemlik voor Hom nie.  Wat vir God saakmaak is dat jy ‘n nuwe hart het en dit wys deur jou gehoorsame dade (v.19, Galasiërs 5:6, 6:15, Romeine 2:25-29, Kolossense 3:11, Johannes 14:15, 1 Johannes 2:3).

 

Status (v.20-24)

Ek het vroeër vanjaar die lewensverhaal van Ernest C. Reisinger gelees.  Ek het al voorheen van hom gehoor, maar niks oor hom geweet nie.  Van wat ek gehoor het, was ek onder die indruk dat hy ‘n predikant was.  Soos wat ek gelees het, het ek die hele tyd gewag dat hy ‘n predikant moet word, maar dit het nie gebeur nie.

 

Reisinger het eers sy eie konstruksie maatskappy besit en op die kantlyn met beeste geskou.  Hy het ‘n multi-miljoenêr geword.  Terwyl hy in dié sektor gewerk het, het hy kerke geplant, gepreek, as spreker by die Banner of Truth predikantekonferensie opgetree, teologiese boeke versprei, saam met broers gebid, kerke, predikante, en individue beïnvloed.  Eers toe hy 47 was het hy ‘n predikant geword.  Reisinger se invloed as ‘n gewone man in die bank het my diep beïndruk.

 

Ons buurman in Louis Trichardt was ‘n eenvoudige man.  Het het net ‘n standerd 6 (graad 8) gehad en in ‘n ‘brick yard’ gewerk.  Hy het nie ‘n kar gehad nie.  Hy was lief vir God en sy Woord.  Hy het sy Bybel goed geken en Sondagskool gegee.  Deur te bly soos hy was het hy ander beïnvloed.

 

Dié twee stories illustreer Paulus se punt.  Die Bybel sê nie dat jy nooit jou omstandighede of beroep mag verander nie.  Die punt is eerder dít:  bly soos jy is; met God se hulp kan jy dáár ‘n invloed hê.

 

In v.20 herhaal Paulus hierdie beginsel.  Sy volgende voorbeeld kom uit die slawe wêreld.  ‘n Slaaf wat tot bekering kom moet hom nie oor sy sosiale status bekommer of dink dis ongeestelik nie (v.21).  Wat tel is jou verhouding met God, nie jou sosiale status nie (1:26-31).  ‘n Christen-slaaf is vryer as die vryste heiden; ‘n vry Christen is meer gebonde as enige slaaf in die wêreld (v.22, vgl. 1 Petrus 2:16).  Die Skrif sê mos:

 

“En julle sal die waarheid ken, en die waarheid sal julle vrymaak… As die Seun julle dan vrygemaak het, sal julle waarlik vry wees.” (Johannes 8:32, 36).  En:  “julle dien die Here Christus.” (Kolossense 3:24).  Charles Spurgeon het gesê:  ‘If Christ has called you to be his slave, why would you stoop to be a king?’

 

As jy die geleentheid het om vry te raak, vat dit (v.21).  As jy egter nié die kans het nie, wees daarme tevrede en verheerlik die Here waar jy is (v.21, vgl. Kolossense 3:22-24).  God sal vir jou krag gee om jou omstandighede te dra (v.24).

 

Jesus het ons met ‘n prys gekoop – met sy bloed – en daarom is jy sý slaaf (v.23, 6:20, 1 Petrus 1:18-19, vgl. Levitikus 25:42, 55).  Moet dan nie ‘n slaaf van mense wees nie.  Moenie bang wees vir mense vrees en hulle opinies nie (v.23, Spreuke 29:25).  Om ‘n slaaf te wees op aarde is aanvaarbaar (v.21).  Om ‘n slaaf te wees van mense se opinies is nie (v.23).

 

Om die beginsel te beklemtoon sê Paulus vir ‘n derde keer:  bly soos wat jy was toe God jou geroep het (v.24).  ‘Bly daar met God,’ sê Paulus in v.24.  Wat beteken dit?  Jy moet in jou omstandighede bly om God te verheerlik, en daarin volhard met die krag wat Hy gee.  Jy kan in alle omstandighede gemeenskap met die Here hê (v.24).

 

Daar is wel uitsonderings waarin jy jou omstandighede kan verander (v.21, 15).  Die algemene reël bly egter staan:  ‘Bly soos jy is.  Moenie vlug nie, maar skyn jou lig.  Die feit dat jy in die wêreld is beteken nie jy hoef van die wêreld te wees nie.’ (5:10, Matteus 5:16, Johannes 17:15).

 

Hoe kan ons dié beginsel in ons dag toepas?

 

[1] Getroudes

Dalk het jy vir verkeerde redes geskei en hertrou.  Moenie van jou nuwe maat skei en na jou eerste maat toe teruggaan nie.  Is jou maat ongered?  Moenie wil skei en sê:  ‘Ek het ‘n fout gemaak en met die verkeerde een getrou’ nie.  Paulus het reeds in v.12-14 hieroor gepraat.  Daar is wel die uitsondering dat jy kan skei as die ongelowige party wil (v.15).  ‘Hoe weet jy of jy met die regte persoon getroud is?  Kyk na die naam op jou huweliksertifikaat.’ (John Piper).  Dalk dink jy om te skei sal vir jou vryheid gee, of dat jy gelukkiger sal wees as jy skei.  Dis nie waar nie.  Jy sal nooit gelukkig wees as jy buite God se wil is nie.

 

[2] Geskeides en enkel persone 

Moenie haastig wees om te trou, omdat jy tot bekering gekom het en gehoor het dis sonde om saam te bly nie.  Is jy of die ander persoon om verkeerde redes geskei?  As jy sommer net trou pleeg jy dalk egbreuk.  In Lukas 16:18 staan daar:  “Elkeen wat van sy vrou skei en ‘n ander een trou, pleeg egbreuk; en elkeen wat trou met die vrou wat van haar man geskei is, pleeg egbreuk.”  As jou eks-maat nog ongetroud is, moet jy met moet hom of haar versoen raak (v.11).  Is die persoon met wie jy wil trou gered?  Indien nie, mag jy nie met hom of haar trou nie (v.39).

 

Om getroud te raak moenie jou hoogste prioriteit wees nie; om God te verheerlik moet.  Bly soos jy is.  As jou ongelowige maat jou gelos het kan jy weer trou (v.15).  As jy enkel is en met begeerte brand kan jy trou (v.9).  As jy geskei is omdat jou maat egbreuk gepleeg het kan jy weer trou (Matteus 19:9).  As jy ongered was toe jy geskei het kan jy vir jou ‘n Christen maat soek (v.39, 2 Korintiërs 5:17).

 

Wat het gelei tot jou egskeiding?  Dra jy skuld?  Werk eers aan dié tekorte voordat jy weer trou.  As jy dit nié doen nie, sal jy baie maklik dieselfde foute in jou tweede huwelik maak.

 

[3] Mense wat kollegas het met meer as een vrou

Sam werk saam met jou.  Hy het drie vroue.  Hy het onlangs tot bekering gekom.  Hy vra vir jou:  ‘Wat nou?’  Hoe help jy hom?  Moet hy sy eerste vrou hou en van die ander twee skei?  Moet hy met die Christen vrou getroud bly en van die ander skei?  Moet hy al sy vroue hou?

 

In die lig van v.17, 20, 24, dink ek die laaste opsie is die regte een:  hy moet bly soos hy is.  Sy geval is dieselfde as ‘n man wat egbreuk pleeg en dan met die vrou trou:  hy moet sy sonde bely, maar hy moenie van haar skei nie.  Hy moet egter net met sy eerste vrou slaap.  Hy moet steeds vir die ander vroue en kinders sorg (1 Timoteus 5:8).  As hy tog van sy tweede en derde vrou skei (of hulle van hom), is dit toelaatbaar:  “Maar Ek sê vir julle, elkeen wat van sy vrou skei, behalwe oor hoerery, en ‘n ander een trou, pleeg egbreuk; en die wat die geskeie vrou trou, pleeg egbreuk.” (Matteus 19:9).

 

Sam kan ‘n lidmaat van die kerk word, maar hy mag nie ‘n ouderling word nie.  ‘n Ouderling moet immers die man van een vrou wees (1 Timoteus 3:2).

 

[4] Werkende mense

Moet jy jou werk los as jy ‘n Christen word?  As jou werk sondig is moet jy dit los.  Jy kan nie aanhou om met te dwelms handel, of in ‘n vuil klub of aborsie kliniek te werk nie.

 

Indien jou werk nie sondig is nie, moet jy nie bedank omdat jy ‘n Christen geword het, en bang is die ongelowiges ‘besmet’ jou nie.  Alles in die lewe is God s’n.  Verheerlik Hom deur jou getuienis en kwaliteit werk.  Werk asof jy vir die Here werk (Kolossense 3:23).  Moenie jou werk los omdat dit ongeestelik is, en jy as predikant of sendeling vir die Here wil werk nie.

 

Moenie dadelik jou werk bedank omdat dit volgens jou ongeestelik is om ‘n politikus of sielkundige te wees nie, of om vir die regering te werk nie.  Moenie dadelik uit die video winkel, bottelstoor, SAB, die gym, of die filmbedryf bedank nie.  Laat eerder jou lig skyn terwyl jy daar werk.  Dalk gee die Here later vir jou die kans om iets anders te doen (v.21).

 

[5] Mense met ongeredde vriende

Jy hoef nie dadelik jou ongeredde vriende te los, omdat jy nou ‘n Christen is nie.  Probeer om die kanaal oop te hou, sodat jy hulle vir die Here kan wen.  Moet egter nie saam met hulle sondig nie.

 

[6] Ongeredde mense

Het jy al die Here se roepstem gehoor?  Het jy jou al van jou sonde bekeer?  Hoor dan vandag sy roepstem in die evangelie.  Jy is ‘n slaaf van jou sonde.  God is kwaad vir jou.  Jy verdien sy straf.  Hy is ook lief vir jou en het aarde toe gekom om sondaars te red.  Hy het die wet perfek onderhou namens dié wat in Hom glo.  Hy het die straf vir ons sondes op Homself geneem aan die kruis.  Hy het uit die dood opgestaan en gee die ewige lewe vir almal wat hulle bekeer en op Hom vertrou.  Bekeer jou en glo in Jesus as jy dit nog nie gedoen het nie.

 

Hoekom moet jy bly soos jy is?  As jy buite God se wil probeer om jou omstandighede te verander, sal jy nie gelukkig wees nie.  God sal vir jou krag gee om getroud, enkel, of geskei te bly; om gelukkig te wees in die sekulêre sektor (v.24).

 

Ons kultuur sê:  ‘As ek net my omstandighede kan verander sal dinge beter gaan.’  Te veel mense dink:  ‘As ek net kan trou, met iemand anders getroud wees, enkel kan wees, ‘n ander werk het, aftree, sal ek gelukkiger wees.’

 

Ek ken ‘n vrou wat onlangs so ‘n skuif gemaak het, en nogsteeds ongelukkig is.  Nou wil sy weer ‘n skuif maak.  Ons moet besef dat ons geluk in die Here lê, en nie in ons omstandighede nie.  Daarom kan jy bly soos jy is en nogsteeds gelukkig wees.

Christene en egskeiding

Broken marriage

Ons het omtrent 75 lidmate, waarvan 16 (21%) al geskei was.  Dieselfde is seker waar in baie kerke.  Daarom is 1 Korintiërs 7:10-16 se lering oor Christene en egskeiding baie relevant.

 

Reëls as jy met ‘n gelowige getroud is (v.10-11)

Jy het seker al die ou illustrasie van egskeiding gehoor?  Egskeiding is soos iemand wat twee papiere aanmekaar plak en die gom laat droog word.  As jy die twee uitmekaar skeur, is daar stukke van beide papiere wat aan die ander kant vassit.

 

Jy verloor iets van jouself as jy skei.  Mense wat geskei is sal vir jou sê:  ‘Dit voel of iemand dood is.’  God se reëls vir egskeiding is nie gegee om plesier te verhoed nie, maar pyn.  Dít is onder andere die rede vir die reëls in v.10-11.

 

Paulus praat hier met getroude gelowiges (v.10-11).  In v.12-16 sal hy sy fokus verskuif na gelowiges wat aan ‘n ongelyke juk trek.  In v.10 sê hy dat die Here, en nie hy nie, die volgende opdrag gee.  Sy bedoeling is dat Jesus in Matteus 19 lering oor dié onderwerp gegee het.  In v.10-11 haal hy dus vir Jesus aan.

 

Die opdrag is dat die vrou nie van haar man moet skei nie (v.10, Maleagi 2:16, Matteus 19:3-9).  Die Griekse woord wat in v.10 met ‘skei’ vertaal word, verwys nie na mense wat ‘van-bed-en-tafel’ geskei is nie, maar na egskeiding.  Ons weet dit omdat v.11 sê die persoon is ‘ongetroud,’ en omdat dieselfde woord in Matteus 19:6 van egskeiding gebruik word.  Ek sê dit, omdat daar mense is wat moderne ‘separation’ uit dié vers probeer regverdig.

 

As die vrou reeds geskei was toe sy Paulus se brief gelees het, moes sy ongetroud bly of met haar man versoen raak:  ongetroud as hy reeds met iemand anders getrou het; versoen as hy nog ongetroud was (v.11).  Paulus sê dat die man ook nie sy vrou met ‘n skeibrief moes wegstuur nie (v.11).  Die enigste gronde vir skei en hertrou onder gelowiges vind ons in Matteus 19:9:  seksuele sonde.

 

Reëls as jy met ‘n ongelowige getroud is (v.12-16)

Baie van julle het die Christelike film, Fireproof gesien.  Die film gaan oor ‘n huwelik wat op die rotse is.  God het die man se lewe verander, sodat die vrou deur sy getuienis tot bekering gekom het.

 

Hoeveel huwelike ken jy waarin een maat tot bekering gekom het, en die ander een deur sy of haar getuienis gered is?  Een predikant het geglo dat sy vrou gered is.  Sestien jaar later het hulle besef dat sy nie gered is nie, en het sy tot bekering gekom.  Dieselfde het onlangs gebeur met ‘n man in ‘n plaaslike Baptistekerk.  Dít is Paulus se les in v.12-14.

 

Paulus praat nou met die res.  Hy verwys hier na Christene wat met ongelowiges getroud is.  Paulus keur nie gemengde huwelike goed nie (v.39).  Die Christene in dié vers was seker ongered toe hulle getroud is, en het intussen tot bekering gekom.

 

Paulus sê nou dat hy, nie die Here nie, die volgende lering gee.  Hy bedoel nie dat hy net sy opinie gee nie.  Nee, sy lering is gesaghebbend (v.40).  Wat hy bedoel is dat hy nie nou vir Jesus aanhaal soos wat hy in v.10-11 gedoen het nie.  Jesus het vir Jode gepreek en dus nooit gesê wat in ‘n geval gebeur waar ‘n gelowige met ‘n heiden getroud is nie.  Paulus is die apostel na die heidene en sal dus nou lering hieroor gee (v.12).

 

As die ongelowige party heelhartig instem (Gk.) om met die gelowige saam te leef, dan moet die gelowige nie skei nie.  Só ‘n ongelowige is die tipe wat nie sy of haar Christen-huweliksmaat sal verbied om kerk toe te gaan, Bybel te lees, of te bid nie (v.12-13).  In baie gevalle sal die ongelowige hierdie dinge saam met die gelowige doen.

 

Hoekom moet die gelowige nie van só ‘n ongelowige skei nie?  Die Christen mag dalk bang wees dat eenheid met ‘n ongelowige hom (haar) of sy (haar) kinders geestelik sal besmet.  Paulus sê egter dat die teenoorgestelde kan gebeur.  Ter wille van die gelowige sonder God die Christen se ongelowige maat en kinders af,[1] sodat hy (sy) hulle vir Jesus kan wen (v.14, 1 Petrus 3:1, Maleagi 2:15).

 

Ek was eenkeer moedeloos en depressief.  My vriend het my gebel en ek het my sorge met hom gedeel.  Hy het sê:  ‘So, jy gaan deur hiérdie pyn en my vrou het my gelos.’  Wat!?  Ek het amper op my rug geval toe hy dit vir my sê.

 

Wat gebeur het is dit:  hy het by die huis gekom, en gesien dat sy vrou die goed gepak het en getrek het.  Wat was haar rede?  Sy wou nie met ‘n predikant getroud wees nie.  Na ‘n baie moeilike tyd het my vriend ‘n goeie Christen vrou ontmoet.  Vandag is hy dol gelukkig getroud.  Dít is die toegewing waarvan Paulus praat in v.15.

 

In v.1-4 praat Paulus oor seks in die huwelik, en in v.5 gee hy ‘n uitsondering op die reël.  In v.6-8 praat hy oor enkelskap, en in v.9 gee hy ‘n uitsondering op die reël.  In v.10-14 praat hy oor egskeiding, en in v.15 gee hy ‘n uitsondering op die reël.

 

Wat is die uitsondering?  God laat egskeiding toe as die ongelowige party wil skei, omdat hy of sy vir Jesus haat.  In só ‘n geval moet die gelowige nie weier om die skeibrief te teken nie (v.15).  As jy weier sal die ongelowige altyd deel van jou lewe wees.  Daar sal dan altyd trane, vrees, en bakleiery vir jou en jou kinders wees.  Dit hoort nie so nie, want God het jou tot vrede geroep (v.15).  Daarom laat Hy toe dat jy vry is van die huweliksband en weer kan trou (v.15, vgl. Romeine 7:1-3).

 

Dalk dink jy:  ‘Ek wil nie die skeibrief teken nie, want dalk kan ek my maat vir die Here wen?’  Hoe weet jy of jy dit sal regkry (v.16)?  Gaan jy vir altyd aan die onstuimige huwelik vashou vir ingeval jou maat dalk gered word (v.16)?

 

Volg die Skrif se reëls vir egskeiding.  Elke senario is nie in die Skrif nie, maar die beginsels is duidelik.  Volg die Skrif en nie die wêreld se raad wat jy in boeke en tydskrifte lees, of by sielkundiges hoor nie.  Volgens die wêreld is egskeiding normaal.  Hoeveel kinders by die skool se ouers is nie geskei nie?  Baie wêreldberoemdes, dominees, en kerkmense is ook geskei.  Hollywood, kollegas, familie, en vriende hits jou aan om vir enige rede te skei.

 

God haat egskeiding en beskou dit as ‘n aaklige sonde.  Tog het die Here twee uitsonderings gemaak:  enige vorm van seksuele sonde (Matteus 19:9), en die ongelowige party wat wil skei (v.15).

 

Maar wat van die volgende gevalle:

 

[1] Pornografie:  Jesus sê mos dat wellus gelyk aan egbreuk is (Matteus 5:27-28)?  Antwoord:  Jesus sê dat woede gelyk aan moord is, en tog stuur ons nie iemand tronk toe omdat hy bitter is nie (Matteus 5:21-22).  Net so is wellus nie ‘n grondige rede vir egskeiding nie.

 

[2] Misdade wat die doodstraf verdien, waarvoor iemand lewenslank in die tronk sit (bv. moord)?  Antwoord:  Vir alle praktiese doeleindes het dié persoon sy of haar maat versaak, en is die gelowige vry om weer te trou (v.15).

 

[3] Drank, dwelms, dobbel, aanranding?  Antwoord:  Party keer is hierdie gevalle van praktiese versaking (v.15).  Ons moet aan die regering onderdanig wees (Matteus 10:23), maar as ons lewe in gevaar is moet ons vlug (Romeine 13:10).  Net so moet ‘n vrou aan haar man onderdanig wees, maar as lewe in gevaar is moet sy vlug.  As die Christen se lewe nie bedreig word nie, moet hy (sy) nie die huwelik opgee nie, maar die ongelowige deur sy (haar) heilige optrede wen (1 Petrus 3:1-2).

 

[4] Die ongelowige loop, maar skei nie formeel nie?  Antwoord:  Die ongelowige het die huwelik versaak (v.15).  Die gelowige kan die papierwerk afhandel.

 

[5] Die ongelowige wil getroud bly, maar kom nie tot bekering nie?  Antwoord:  Die gelowige mag nie skei nie (v.12-14).

 

[6] Die vonk in jou huwelik is weg?  Jy voel dat jy en jou maat nie meer ‘compatible’ is nie (soos wat die Afrikaanse sangeres, Nianell onlangs gesê het)?  Antwoord:  Dit is geen gronde vir egskeiding nie.  Die huwelik is nie gebou op ‘n vonk nie, maar op ‘n belofte wat jy aan God en jou maat maak.  Volgens v.39 is enige twee gelowiges ‘compatible’.

 

[7] Jy en jou maat het nie meer ‘n sekslewe nie?  Antwoord:  ‘n Skoolvriend was vir vier maande getroud.  Sy vrou het gesê dat sy net seks wil hê om kinders te kry.  Hy het haar geskei.  Was hy reg?  Nee.  Hy en sy vrou moes eerder hulp gesoek het.  Indien jou maat nie met jou wil slaap nie, maar seks op ander plekke soek, het jy gronde om te skei (v.5, Matteus 19:9).

 

[8] Jy het op onbybelse gronde geskei en weer getrou (Bybelse gronde vind ons in v.15, 39, Matteus 19:9), en volgens die Bybel is jy skuldig aan egbreuk (Lukas 16:18)?  Moet jy van jou nuwe huweliksmaat skei?  Antwoord:  Nee.  “Is jy aan ‘n vrou verbonde, moenie losmaking soek nie” (v.27).  Bely jou sonde en werk hard om van jou nuwe huwelik ‘n sukses te maak.

 

[9] Jou maat is baie siek, het gestremd geraak, is erg depressief?  Antwoord:  Jou belofte voor die kansel was:  ‘In voorspoed en in teëspoed, in siekte en gesondheid, tot die dood ons skei.’

 

Doen alles in jou vermoeë om egskeiding te verhoed, om jou vriende en kinders af te raai.  Egskeiding is slegs toelaatbaar vir die toegewings in v.15 en Matteus 19:9.  Gee jou tyd en krag om te werk aan jou huwelik, om ‘n vriendskap met jou maat te bou.  Soek wat die Bybel oor die huwelik sê, lees goeie boeke hieroor, en bid ernstig hiervoor.

 

Dalk het jy op onbybelse gronde geskei.  In Jesus is daar vergifnis vir jou.  Probeer om met jou eks-maat versoen te raak (v.11).  As jou maat reeds dood is kan jy met ‘n gelowige trou (v.39).  Indien jy met jou maat versoen wou raak, maar hy of sy reeds hertrou het, lyk dit uit v.11, 8-9, 27-28 of jy met iemand anders mag trou.

 

Hoekom moet jy die Skrif se reëls oor egskeiding volg?  As jy vir jou eie redes skei, sal dit groot pyn en hartseer vir jouself en ander veroorsaak.  Daarby sal God jou nog straf ook.  Jesus se Naam en getuienis sal ook skade ly (sien Efesiërs 5:22-33).

 

Een studie het gesê dat die skeisyfer onder evangeliese Christene net so hoog, indien nie hoër is, as die skeisyfer onder ongelowiges nie.  Ek glo dit nie vir ‘n oomblik nie.

 

Baie ongelowiges trou nie meer nie.  As hulle dus opbreek, tel dit nie as egskeiding nie.  Verder is evangeliese kerke deesdae gelaai met ongelowige lidmate:  die skeisyfer onder nominale Christene tel nie vir ware Christene nie.  Die syfer mag dalk ook Christene se egskeidings voor hulle bekering insluit, en tel dus nie.

 

Christene is nuwe skepsels:  die ou dinge het verbygegaan en alles het nuut geword (2 Korintiërs 5:17).  Ook wat egskeiding betref is hulle oortuigings en optrede nuut.

[1] Hierdie vers het niks met die kinderdoop te doen nie.  As jy dít sê moet jy konsekwent wees en die ongelowige huweliksmaat ook doop.

Hoe om te oorleef in ’n seksmal samelewing

Wedding rings

Wat het mooi vroue te doen met hamburgers en vinnige karre?  Niks.  Tog is ons samelewing so behep met seks, dat hamburgers en karre só geadverteer word.  Hopelik kyk jy nie na vuil TV programme of tydskrifte nie.  Maar hoe oorleef jy as dié goed vir jou gewys word in die koerant of in advertensies tussen programme, op Facebook, en langs die snelweg?  1 Korintiërs 7:1-9 sal vir jou wys hoe.

 

Geniet die voordele van die huwelik (v.1-5, 9)

Vir sy verjaarsdag maak Jerry se vrou vir hom ‘n vyfgang maaltyd:

 

Kreefkelkie

Biltong en feta sop

Lam skenkel met gebakte aartappels

Mediterreense groente en haloumi slaai

Deense roomys met neute en ryk Swiss sjokoladesous

Jerry se gunsteling kase en sout biskuitjies

 

Na ete probeer Jerry se kinders om hom te versoek met suurwurms, marshmallows, spookasem, en suigstokkies.  Hulle misluk.

 

So is dit met seks:  as jy versadig word by die huis, is die kanse minder dat jy die wêreld se besmette brakwater sal drink.

 

Die Korintiërs het vir Paulus ‘n brief geskryf, waarin hulle ‘n klomp vrae gevra het (v.1, 8:1, 12:1).  In hfst.7 antwoord Paulus hulle vrae oor die huwelik, enkelskap, egskeiding, en hertrou.

 

Sommige van die Korintiërs het met prostitute geslaap (6:15).  As gevolg van die immoraliteit wat in Korinte geheers het, het ander gesê dat die huwelik en seks ongeestelik is (v.1, 1 Timoteus 4:3).  In die verse wat volg antwoord Paulus hierdie beswaar.

 

Soos die Korintiërs moet ons nie toegee aan die wêreld se versoekings om seksueel losbandig te wees nie.  Hoe doen ‘n mens dit?  Moenie saam met iemand in die bed spring of by hulle intrek nie.  Trou as jou drang te groot is (v.1-2, 9).  Moenie soos baie jong mans wees wat nie wil ‘commit’ nie, wat eers oorsee wil gaan vir 5 jaar, eers op 32 wil trou, vir 3 jaar verloof wil wees nie.  Laat asseblief jou dogter toe om te trou as sy die regte man ontmoet het.  Moenie vir haar sê:  ‘Jy moet eers vir 4 jaar gaan studeer’ nie (v.36).

 

Jou seksuele begeerte is natuurlik.  Ja, om te trou omdat jy van begeerte brand is nie die beste motief nie.  Maar dit is beter om te trou as om van begeerte te brand (v.9).  Paulus sê nie die huwelik is beter as enkelskap nie, maar dat dit beter is as om te brand.

 

Maar trou op sy eie is nie genoeg om seksuele versoeking te weerstaan nie.  ‘n Sekere Ruth Smythers, vrou van ds. L.D. Smythers, het in 1894 die volgende oor seks geskryf in Instruction and Advice for the Young Bride:

 

‘One cardinal rule of marriage should never be forgotten:  GIVE LITTLE, GIVE SELDOM, AND ABOVE ALL, GIVE GRUDGINGLY… Most men, if not denied, would demand sex almost every day.  The wise bride will permit a maximum of two brief sexual experiences weekly during the first months of marriage.  As time goes by she should make every effort to reduce this frequency.  Feigned illness, sleepiness and headaches are among the wife’s best friends in this matter.  Arguments, nagging, scolding and bickering also prove very effective if used in the late evening about one hour before the husband would normally commence his seduction

 

Clever wives are on the alert for new and better methods of denying and discouraging the amorous overtures of the husband.  A good wife should expect to have reduced sexual contacts to once a week by the end of the first year of marriage and to once a month by the end of the fifth year of marriage.  By their tenth anniversary many wives have managed to complete their child bearing and have achieved the ultimate goal of terminating all sexual contacts with the husband.  By this time, she can depend upon his love for the children and social pressures to hold the husband in the home.’[1]

 

‘n Man wie se vrou gereeld moeg is, hoofpyn het, nie lus is nie, en sê:  ‘Wag tot môre,’ sal seks soek by sy sekretaresse, ‘n prostituut, of in pornografie.  ‘n Vrou wie se man haar nie liefhet en koester nie, wat gedurig saam met die manne rugby kyk terwyl sy alleen by die huis is met die kinders, wat gereeld vir lang tye weg is vir besigheid, sal seks soek by ‘n man wat haar spesiaal laat voel, in romantiese boeke en films, in ‘n emosionele band met iemand, in pornografie, in haar dagdrome oor ‘n prins op ‘n wit perd.

 

Moet daarom nie die verskuldigde huweliksregte van mekaar af terughou nie (v.3).  Jou liggaam is nie jou eie nie, maar God s’n en jou huweliksmaat s’n (v.4, 6:19-20).  Immorele seks is soos ‘n bloedsuier wat altyd meer wil hê.  Seks in ‘n Christelike huwelik gaan nie oor wat jy kan kry nie, maar wat jy kan gee (v.4).

 

Die dag toe jy getrou het, het jy jouself weggegee.  Dus kan jy nie lewe asof jou liggaam jóúne is nie (v.4).  Jy kan nie seks gebruik om jou maat mee te straf of te manipuleer nie (‘Jy moet eers __ anders kry jy niks’).  Omdat jou liggaam nie jou eie is nie, kan jy ook nie jouself bevredig nie (v.4).

 

Is jy ongetroud?  Jy het nie mag oor iemand anders se liggaam, of hulle oor joune nie.  Seks is bedoel vir die huwelik (v.4, Hebreërs 13:4).

 

Die algemene reël is dat jy nie seks in die huwelik moet weerhou nie.  Tog is daar uitsonderings:  [1] Jy en jou maat moet instem om vir kort tydjie (nie vir maande of jare nie) seks te weerhou, sodat julle ekstra tyd kan gee aan vas en gebed (v.5, Eksodus 19:15, Prediker 3:5).  [2] Soms dwing oorlog of soortgelyke omstandighede ‘n mens om seks vir ‘n tyd lank op te gee (Deuteronomium 24:5, 1 Samuel 21:4-5).

 

Ná die bepaalde tyd moet die man en vrou weer bymekaar kom, anders sal Satan hulle gebrek aan selfbeheersing gebruik om hulle te versoek tot wellus en egbreuk (v.5, 2).  Goeie en gereelde seks is normaal.  Om een keer per jaar seks te hê is abnormaal en gevaarlik (v.5).  Soek hulp as jý in dié situasie is.  As jy aan seksuele sonde toegee sal jy dalk hel toe gaan (6:9-10, Hebreërs 13:4).

 

Geniet die voordele van enkelskap (v.6-8)

Voor hy getrou het, het my vriend ‘n stryd gehad.  Hy het geweet dat enkelskap voordele het wat hy sou moes opgee as hy getrou het.  Dit sou byvoorbeeld makliker gewees het om as enkel man na ‘n vervolgde land toe te gaan vir sendingwerk.  Dis juis om sulke redes wat Paulus enkelskap aanmoedig in v.6-8.

 

Paulus sê nie dat enkel mense móét trou nie, maar dat dit God se gawe of vergunning is om ons te help in ‘n seksmal samelewing (v.6, 1-5).  Dit sou goed gewees het as die Korintiërs enkel kon bly soos Paulus; as hulle kon oorleef sonder seks en die huwelik.  Paulus weet egter dat nie almal hierdie gawe het nie (v.7, Matteus 19:11-12).  Sommige het die gawe gekry om te trou en sal sukkel om enkel te wees.  Ander het die gawe gekry om enkel te wees en sal moeilik ‘n huis, lewe, en liggaam deel met iemand anders (v.7).

 

In v.8 praat Paulus met dié wat nie huweliksmaats het nie:  weduwees en ongetroudes.  Volgens v.10-11, 34 verwys ongetroudes na mense wat nog nooit getroud was nie, asook na mense wat geskei is.  Om enkel te wees is goed.  So iemand is nie slegter af as iemand wat getroud is nie.  As jy enkel is hoef nie jy oor ‘n maat en kinders besorg te wees as daar vervolging kom nie (v.26-28).  Jou aandag is ook nie verdeeld tussen die Here en jou gesin nie (v.32-35).  Paulus self was waarskynlik getroud en ken die voordele van die getroude, sowel as die enkel lewe (v.8, Handelinge 26:5, 10[2]).

 

Is jy enkel?  Geniet die voordele van enkelskap solank jy dit het.  Moenie dink jy mis uit op die goeie lewe, of dink jy is ongetroud omdat daar iets fout is met jou nie (‘Ek is te kort, te lank, te dom, te vet, te maer, te weird, te oud’).  Glo eerder dat jy nou enkel is, omdat God in sy soewereine keuse so besluit het (v.7).  Kan God sy Seun vir jou gee, maar nie ‘n huweliksmaat nie (Romeine 8:32)?

 

Moenie jouself bejammer, depressief en hopeloos raak, bitter wees teen God, ‘n fantasie wêreld skep deur films, sitcoms, en boeke, of wag vir ‘n prins op sy wit perd wat al jou probleme sal oplos nie.  Moenie enkelskap sien as ‘n straf nie, maar as ‘n gawe van God wat jou wil bevoordeel om Hom beter te dien (v.7, 32-35).  Moet daarom nie rondsit en wag vir die regte een nie.  Raak betrokke in die kerk, dien, bou goeie vriendskappe, groei geestelik, en leer by ouer gelowiges oor die huwelik.

 

As jy enkel is en graag wíl trou het ek vir jou ‘n paar wenke:

 

[1] Moenie jou idees oor die huwelik kry in tydskrifte nie, maar in die Skrif.

 

[2] Lees my preek, Opsoek na die regte huweliksmaat op die blog.  Dalk wil jy die huwelikseminaar bywoon wat volgende week begin.

 

[3] Moenie met romanse speel en dink jy kan jou hormone beheer en stop voor jy seks het nie.  Los sulke dinge vir die huwelik.  Werk eerder aan ‘n goeie vriendskap.

 

[4] Moenie te lank wag om te trou as jy die regte lewensmaat ontmoet het nie.

 

[5] Dink reg oor internet ‘dating’.  Dis nie dat internet ‘dating’ noodwendig verkeerd is nie, maar daar is ‘n paar waarskuwings.

 

  • Mense kan vir jou jok en die beste voet voorsit.
  • Die vrou kan ook op die internet rondsnoep om ‘n maat te soek. So neem sy ‘n manlike rol in en word sy die jagter.
  • Jy kan selfgefokus raak en kyk wat jy wil , eerder as om die regte maat te wees.
  • Niemand kan sien hoe die verhouding ontwikkel nie. Baie dikwels is ‘n geheime verhouding ‘n gevaarlike verhouding (Spreuke 18:1).
  • Jy kan twee, drie of meer persone gelyk ‘date’.
  • Die fokus is verkeerd om: romanse voor vriendskap.
  • Iemand kan ‘n ongeredde kerkmens wees, en tog ‘Christen’ sê op sy status.

 

[7] Verliefdheid is ‘n emosie.  Liefde is om op te offer en ander bo jouself te stel.  Moenie die twee verwar nie.

 

[8] Moenie hoër standaarde as God hê, sodat jy weier om te trou as iemand nie aan jóú standaarde voldoen nie (hy moet lank wees…sy moet van sport hou).  Aan die ander kant moet jy nie die duidelike standaarde van die Bybel prysgee of kompromeer nie.

 

[9] Moenie met ‘n ongelowige trou nie (v.39).

 

[10] Moenie met iemand slaap, omdat jy dink jou biologiese klok loop uit en jy graag ‘n kind wil hê nie.  God kan vir jou ‘n kind gee as jy 90 of 100 is (Genesis 17:7, 21:2, 5, vgl. Lukas 1:36-37).

 

Hoekom moet jy die voordele van enkelskap geniet terwyl jy dit het?  As jy eers getrou het, kan jy nie sommer uit die huwelik nie.

 

Watse boek in die Bybel word die minste uit gepreek?  Het jy al ooit ‘n reeks preke uit Hooglied gehoor?  Sal jy skaam, ongemaklik, of kwaad wees as jou ds. ‘n reeks uit Hooglied preek?  Lees jy dit ooit in jou stiltetyd?  Tog is tekste soos Hooglied en 1 Korintiërs 7 (gesonde seks in die huwelik) God se oplossing vir Christene in ‘n seksmal samelewing.

 

Die wêreld blêr hulle gemors in Christene en hulle kinders se ore, terwyl kerk met die waarheid sit, maar hulle hande vou, hulle lippe styf trek, en sê:  ‘Ons praat nie oor sulke goed in die kerk nie.’  Gevolglik is daar gedurig skandes in die kerk.  Die kanse dat ons kinders in só ‘n samelewing oorleef sonder om besmet te word is klein, tensy ons ons hande uit ons sakke haal, ons Bybels oopmaak, en hulle reg leer.

[1] C.J. Mahaney, Sex, Romance and the Glory of God, pp.105-107

[2] Paulus was op die Joodse Raad.  Om deel te wees van die Raad moes jy getroud wees.  Het hy sy vrou in die dood verloor, of dalk deur egskeiding toe hy ‘n Christen geword het (v.15)?

Dink reg oor seks

Marilyn Monroe 2

‘n Paar maande gelede het die regering besin om seks wettig te maak vir 12-jariges.  ‘n Onlangse Beeldopskrif het gesê dat hulle kondome vir 10-jariges wil uitdeel.

 

Die wêreld se idee van seksuele moraliteit is ver verwyderd van wat die Skrif leer.  1 Korintiërs 6:12-20 help ons om reg te dink oor seks.

 

Die Korintiërs se verkeerde denke (v.12-14)

Die Korintiërs sou saamstem met dié gediggies:

 

Free from the law,

O happy condition;

I can sin as I please

And still have remission.[1]

EN

Sex is evil,

sex is sin,

sins are forgiven,

so sex is in.

 

Verse 12-14 maak duidelik dat Paulus nie sou saamstem nie.

 

Jesus het ons skoon gewas, geheilig, en geregverdig (v.11).  Daarom is ons vry.  Met dít in gedagte het die Korintiërs gesê:  ‘Alles is vir my toelaatbaar’ (v.12).  Paulus stem saam, maar sê dat alles jou nie geestelik sal opbou of bevoordeel nie; jy moenie ‘n slaaf wees van enigiets nie (v.12, 10:23).  Ons is vry in Jesus, maar ons moenie ons vryheid as ‘n verskoning gebruik om sonde te doen nie (Galasiërs 5:13, 1 Petrus 2:16).

 

Die Korintiërs het ook gesê dat seksuele immoraliteit so biologies en normaal is soos kos vir jou maag.  Soos kos en jou liggaam, gaan seks eendag nie meer wees nie (v.13, Matteus 15:17).  Dan maak dit mos nie saak of jy jou liggaam gebruik om rond te slaap nie, of hoe?  Jare gelede het ‘n student sy pornografie só probeer regverdig.  ‘Ek geniet net God se skepping,’ het hy gesê.

 

Paulus sê dat die liggaam nie vir seks geskep is nie, maar vir God:  Hý sê hoe die liggaam reg gebruik moet word (v.13).  Die liggaam is nie sleg soos wat die Grieke geglo het nie.  Toe ek op skool was het ek saam met ‘n Ou Apostel gewerk.  Sy het gesê dat ‘n mens maar kan drink, rook, vloek, en rondslaap, omdat die liggaam nie belangrik is nie.  God sê egter dat dit belangrik is, en daarom sal Hy weer ons liggame uit die dood uit opwek (v.14, Johannes 6:40).

 

Paulus se regte denke (v.15-20)

Vir 1900 jaar het Christene die Bybel geglo en gesê dat seksuele immoraliteit sonde is.  Eers in die 20ste eeu het sielkunde gesê dat dit ‘n siekte is.  ‘n Vrou het op ‘n Amerikaanse Christelike radiostasie ingebel.  ‘Ek slaap rond met almal; ek wíl graag verander maar voel magteloos,’ het sy gesê.  Die berader het gesê dat haar seksuele gedrag ‘n natuurlike reaksie is op haar passiewe pa en oorbetrokke ma.  Hy het gesê:  ‘Jy is verslaaf.  Jou seksuele neigings sal nie gou verdwyn nie.  Sluit aan by ‘n kerk wat jou leefstyl sal aanvaar, terwyl die wonde wat máák dat jy sondig, genees word.[2]

 

Maar wat van 1 Korintiërs 5-6?

 

‘n Amerikaanse koerant (Orange County Register, 13 Feb.1989) het vertel van ‘n kliniek vir Christen seksverslaafdes.  Dié kliniek was verbonde aan ‘n bekende Protestantse kerk in die area.  Volgens die kliniek is seksuele immoraliteit ‘n siekte.  Hulle het die krag van die Woord ontken en gesê:  ‘Some groups of Christians believe the Bible is all you need.’[3]

 

Om só te dink oor seks is verkeerd.  In v.15-20 help Paulus ons om reg te dink.

 

Jesus is die Hoof van die kerk en ons is die lede van sy liggaam (v.15, 12:27).  Ons moenie sy lede vat en dit een vlees maak met ‘n tempelprostituut nie (v.15-16, Genesis 2:24).  Jy is een gees met Jesus (v.17).  Die res van die Skrif bevestig dit:

 

  • “Daarom moet die man sy vader en sy moeder verlaat en sy vrou aankleef en hulle twee sal een vlees word. Hierdie verborgenheid is groot, maar ek sê dit met die oog op Christus en die gemeente.” (Efesiërs 5:31-32).
  • Jesus het gebid “dat almal een mag wees net soos U, Vader, in My en Ek in U; dat hulle ook in Ons een mag wees, sodat die wêreld kan glo dat U My gestuur het… Ek in hulle en U in My, sodat hulle volkome een kan wees; en dat die wêreld kan weet dat U My gestuur het, en hulle liefgehad het net soos U My liefgehad het.” (Johannes 17:21, 23).
  • “Bly in My, soos Ek in julle. Net soos die loot geen vrug kan dra van homself as dit nie in die wynstok bly nie, so julle ook nie as julle in My nie bly nie. Ek is die wynstok, julle die lote. Wie in My bly, en Ek in hom, hy dra veel vrug; want sonder My kan julle niks doen nie.” (Johannes 15:4-5).
  • “julle is egter nie in die vlees nie, maar in die Gees, as naamlik die Gees van God in julle woon. Maar as iemand die Gees van Christus nie het nie, dié behoort nie aan Hom nie. Maar as Christus in julle is, dan is die liggaam dood vanweë die sonde, maar die gees is lewe vanweë die geregtigheid. En as die Gees van Hom wat Jesus uit die dode opgewek het, in julle woon, dan sal Hy wat Christus uit die dode opgewek het, ook julle sterflike liggame lewend maak deur sy Gees wat in julle woon.” (Romeine 8:9-11).
  • “Ek is met Christus gekruisig, en ék leef nie meer nie, maar Christus leef in my. En wat ek nou in die vlees lewe, leef ek deur die geloof in die Seun van God wat my liefgehad het en Homself vir my oorgegee het.” (Galasiërs 2:20).

 

Omdat die Korintiërs een was met Jesus, moes hulle nie een word met ‘n tempelprostituut nie.  Die Griekse werkwoord in v.18 dui aan dat ons moet aanhou om te vlug vir seksuele sonde.  As jy daarin voortleef sal jy nie God se Koninkryk sien nie (v.9).  Ons moet dié sonde doodmaak en dit nie eers onder ons noem nie (Kolossense 3:5, Efesiërs 5:3).

 

As jy drank misbruik kom die sonde van buite af.  As jy seksueel sondig kom die onreinheid van binne af.  Jy sondig teen jou eie liggaam (v.18).  As jy deur seksuele sonde siek word sondig jy óók teen jou liggaam (Spreuke 5:11).  Jou liggaam is ‘n tempel – die allerheiligste – van die Heilige Gees (v.19, Johannes 2:21).  As jy jou liggaam (God se tempel) gebruik om rond te slaap, is dit asof die hoëpriester ‘n prostituut in die allerheiligste invat en seks het voor die ark!

 

Jou liggaam behoort aan God:  Hy het jou geskep en Hy het jou gered (v.19-20, Romeine 14:7-8).  God het jou gekoop met ‘n prys, met sy eie bloed (v.20, 7:23, Handelinge 20:28, 1 Petrus 1:18-19, Openbaring 5:9).  As Hy jou dan met ‘n prys gekoop het, moet jy nie ‘n prys betaal om met ‘n prostituut te slaap nie (v.20, 7:23, Hd.20:28, 1 Pt.1:18-19, Op.5:9).  God het jou gekoop om sy slaaf te wees, en daarom moet jy nie vir jouself lewe nie, maar vir Hom (v.20, 12).  Verheerlik Hom in jou liggaam (v.20, 10:31, Romeine 12:1).

 

Dink reg oor seks.  God het seks geskep en weet hoe dit reg moet werk.  Moenie onkundig wees oor wat die Skrif sê nie.  Paulus sê oor en oor dat ons die Skrif moet ken:  ‘Weet julle nie?… Weet julle nie?… Weet julle nie?…’ (v.15, 2, 3, 9, 16, 19, 5:6).  Ons moet weet dat God seks ontwerp het vir die huwelik (Genesis 2:24).  Ons moet weet dat seks in die huwelik goed is, en dat seksuele sonde dodelik is (Spreuke 5-7).  Druk jou ore toe vir die wêreld se lering oor seks.

 

[1] Moenie luister vir sielkundiges wat sê jy kan dit nie help nie, omdat dit ‘n siekte is.

 

[2] Moenie vir die regering luister wat kondome wil uitgee om VIGS te vermy nie.  Hulle wil VIGS vermy, maar nie immorele seks wat die VIGS veroorsaak nie.

 

[3] Moenie jou onderwysers of die kirrikulum hierin volg nie.  Ek het in die laer- en hoërskool verkeerde lering hieroor gekry.

 

[4] Moenie dat jou vriende jou leer nie.

 

[5] Moenie wêreldse boeke hieroor lees nie.

 

[6] Pasop vir wat TV, films, koerante en tydskrifte soos die Huisgenoot jou oor seks leer.

 

[7] Pasop ook vir vals leraars.  Die NG-Sinode het ‘n paar jaar gelede plek gemaak vir mense wat wil saambly.

 

Ouers en kerke moet Bybelse lering hieroor gee.  Sê vir jou kinders dat iemand wat met almal slaap nie seksuele vryheid het nie.  Hulle is slawe, voel vuil, het ‘n skuldige gewete, kan maklik seksueel-oordraagbare siektes kry, sal in die skande kom, is selfsugtig en nie lief vir dié met wie hulle slaap nie, steel ander se seksuele reinheid, bring God se frons oor hulleself, en sal hel toe gaan (v.12).  Hebreërs 13:4 sê:  “Laat die huwelik in alle opsigte eerbaar wees en die bed onbesmet; want God sal hoereerders en egbrekers oordeel.”  Openbaring 21:8 sê:  “afgodedienaars… is in die poel wat brand met vuur en swawel:  dit is die tweede dood.”

 

As jy in die huwelik seks het bring dit plesier en sal jy nie seksuele siektes kry nie.  Die Here sal oor jou glimlag.  Jy sal ‘n skoon gewete hê en nie gestraf word nie.  Is dit nie duidelik uit ‘n boek soos Hooglied nie?

 

Sê vir jou kinders hulle moet vlug vir seksuele sonde (v.18).  Iemand het gesê dat die beste hulp teen seksuele sonde ‘n goeie paar hardlooptekkies is.  Moenie dom wees en vra:  ‘Hoe ver kan twee ongetroudes gaan voordat dit sonde is’ nie.  Moenie kyk hoe naby jy aan die sonde kan kom sonder om te val nie, maar probeer eerder om so ver as moontlik daarvan af weg te bly (Spreuke 5:8).  Kap jou hand af en pluk jou oog uit (Matteus 5:29-30).  Raak ontslae van jou internet konneksie of TV as dit jou pla.  Moenie swembad of gym toe gaan as die vroue se klere jou laat struikel nie.

 

Moenie sê:  ‘My liggaam is myne, en ek kan daarmee doen wat ek wil’ nie.  Jou liggaam is nie joune nie, maar God s’n:  verheerlik God daarom in jou liggaam (v.19-20).

 

Sê vir jou kinders dat seksuele sonde baie gevaarlik is.  John Owen het gesê:  ‘You kill sin or sin will kill you.’  Moenie net die dade probeer doodmaak nie, maar maak die sondige begeertes dood in jou hart (Matteus 5:27-28).

 

  • Is jy seksueel losbandig, maar dit pla jou nie? As jy so leef sal jy nie hemel toe gaan nie (v.9-10).
  • Pla hierdie preek jou gewete? Jou sonde kan vergewe word (v.11). Jesus het die straf vir ons sonde op Homself geneem aan die kruis en weer opgestaan uit die dood. Glo en vertrou op Hom; gaan heen en sondig nie meer nie (Johannes 8:11).
  • Is jy gered? Het jy in dié strik getrap, maar jy is nie regtig gepla nie? Die swaar hand van God se tugtiging sal oor jou kom (hfst.5).
  • Is jy ‘n geredde persoon wat só gesondig het? Pla jou sonde jou baie? Bely en laat staan jou sonde en God sal jou vergewe (v.18, 1 Johannes 1:9).

 

Hoekom moet jy reg dink oor seks?  Wie wil nié reg dink oor ‘n saak wat ewige gevolge het nie (v.9-10)?

 

Charlie werk op ‘n plaas in Limpopo.  Hy werk hard, is getrou en lojaal, en het respek vir sy baas en mede-werkers… totdat die baas hom voorman gemaak het.  Skielik het hy hoogmoedig geword.  Hy het begin baasspeel, drink, werk mis, terugpraat met die baas, en die werkers geslaan.  Sy baas het hom ernstig gewaarsku en weer ‘n gewone werker gemaak.  Hy was weer die ou Charlie:  getrou, lojaal, hardwerkend, en vol respek.

 

Charlie was ‘n goeie werker maar ‘n slegte baas.  So is dit met seks:  seks is ‘n goeie slaaf (in die huwelik), maar ‘n slegte meester (buite die huwelik).  Dít is hoe ons moet dink oor seks.

[1] David E. Garland, 1 Corinthians: Baker Exegetical Commentary on the New Testament, p.222

[2] John MacArthur, How to Counsel Biblically, p.15

[3] Ibid, p.17