‘n Man na God se hart

Man after God's own heart

Toe ek op hoërskool was moes jy rugby speel en ‘n meisie hê om ‘n man te wees.  As jy in die koor gesing het of tik geneem het, was jy ‘n sissie (die koor gedeelte het verander toe ek in gr. 10 kom).  As jy ‘n student op universiteit is moet jy immoreel wees en drink om ‘n man te wees.  As jy in die sekulêre sektor werk is die kar wat jy ry, op watse landgoed [Eng. estate] jy bly, hoeveel jy drink en of jy ‘n vakansie huis het, deel van wat dit beteken om ‘n man te wees.

 

Volgens die Bybel gaan manlikheid oor iemand se karakter, en nie oor hoe sterk, sportief, aantreklik, onemosioneel of macho jy is nie.  Dawid is ‘n goeie voorbeeld van wat dit beteken om ‘n man te wees.  Volgens 1Sam. 13:14 en Hand. 13:22 was hy ‘n man na God se hart.  Sy naam kom meer as 1100 keer in die Bybel voor (meer as Moses en Abraham s’n saam).  Volgens Rom. 15:4 en 1Kor. 10:11 is dit opgeteken dat ons daaruit kan leer.

 

Wat is positiewe en negatiewe karaktertrekke uit Dawid se lewe, en wat moet ons daaruit leer?

 

Wees toegewyd

Het jy al die plakker gesien wat sê:  ‘Real men follow Jesus’?  Dis waar.  Dawid, die man na God se hart, het die Here gevolg en ‘n in noue verhouding met Hom geleef.  Sy toewyding het soos volg gelyk:

 

[1] Hy het in God geglo; hy is een van die Bybel se geloofshelde (Heb. 11:32).  Sy geloof was nie bloot ‘n intellektuele belydenis van God se bestaan nie, maar ‘n persoonlike verhouding met Hom.  Om in die volle sin van die woord man te wees, moet jy ‘n persoonlike verhouding met Jesus hê.  Hy is immers die volmaakte Man na wie se beeld ons gevorm moet word (Rom. 8:29, 2Kor. 3:18).  Hoe meet jy op?  Staan jy in ‘n lewende en persoonlike verhouding met Hom; is jy ‘n regte man?

 

[2] Hy was ‘n man van gebed.  Volgens Ps. 5:3-4 het hy elke oggend met die Here gepraat.  In tye van beproewing het hy drie keer per dag gebid (Ps. 55:18).  Die meeste van sy Psalms is gebede en sê vir ons hoe sy gebede geklink het.

 

  • Hy was dors vir God en het sy gedagtes met Hom gevul, totdat hy nie anders kon as om Hom te prys nie (Ps. 63:2-7). Lofprysing was deel van sy lewe (bv. Ps. 139, 145).  Uit 150 Psalms het hy 75 geskryf (vgl. die Psalms se opskrifte, Hand. 4:25 en Heb. 4:7).
  • Sonde belydenis was deel van sy gebede. Hy het egbreuk en moord gepleeg (2Sam. 11), en in sy militêre sukses geroem (2Sam. 24).  Maar hy het ook berou gehad, hom bekeer, die Here om vergifnis gesmeek, en die pynlike gevolge van sy sonde gedra (2Sam. 12, 24, Ps. 32, 38, 51).
  • Hy het die Here in sy gebede gedank (2Sam. 22, Ps. 23, 103). Hy was nie soos baie Suid-Afrikaners wat vir reën bid, maar nalaat om dankie te sê wanneer die Here hulle gebede beantwoord nie.
  • Hy het sy behoeftes voor die Here gebring en erken dat hy Hom nodig het (Ps. 141, 143). Hy was nie soos die wêreld wat dink dat dit ‘n teken van swakheid is om te erken jy het hulp nodig nie.  Voordat Dawid ‘n skuif gemaak het, het hy God se hulp gevra (1Sam. 23:2-4, 9-12, 30:7-8, 2Sam. 2:1, 5:19, 23-25).

 

Dawid was soos Jesus, Paulus en Martin Holdt wat baie gebid het.  Hy was nie soos baie mans wat sê dat hulle Christene is, maar nie eers 2 minute per dag bid nie.  Ek wil jou uitdaag om ‘n regte man te wees en meer te bid.  Vra die Here om jou met selfdissipline te help.  Jare gelede het iemand my met konstantheid gehelp.  ‘Selfs as jy verslaap het is dit beter om vir ‘n kort rukkie te bid as wat jy glad nie bid nie,’ is wat hy gesê het.  ‘En as jy konstantheid geleer het, kan jy aan die tyd werk.’

 

Bid soos Dawid.  Begin met lofprysing:  prys die Here vir wie Hy is.  Bely ook jou sonde.  Moenie dat dit soos vuil skottelgoed ophoop nie, maar bely dit elke dag (Matt. 6:12).  Sê dankie dat die Here jou gered het, asook vir wat Hy in jou lewe doen (sy daaglikse sorg, beskerming, genade, ens.).  Lê ook jou en ander mense se behoeftes aan sy voete neer.  Erken dat jy Hom nodig het, en dat jy nie sonder Hom kan lewe nie (Joh. 15:5, Hand. 17:25).

 

[3] Hy het die Woord liefgehad.  Ps. 19:8-15 wys dat dit sy lewe was.  Hy het dit nie net geken nie, maar gedoen (1 Kon. 3:14, Hand. 13:22).  Met sy hele hart was hy getrou, regverdig, opreg, en ‘n man van integriteit  (2Sam. 8:15, 1Kon. 3:6).  Sý lewe was die standaard waarvolgens God ander konings se gehoorsaamheid gemeet het (1Kon. 9:4, 11:4, 6, 34, 14:8, 15:3, 5, 11, 2Kon. 14:3, 16:2, 18:3, 22:2, 2Kron. 17:3).

 

Om soos Dawid te lewe moet jy daarna streef om die Skrif beter te ken en te doen.  Wees uiterlik netjies, maar werk ook daaraan om innerlik ‘n man van karakter te wees.  God kyk immers meer na die hart as na jou uiterlike voorkoms (1Sam. 16:7, 12, 18).  Koop vir jou ‘n ESV Study Bible, kry ‘n Bybellees program op die internet, en laai tonne van Stuart Olyott, John Piper, John MacArthur, R.C. Sproul, Voddie Baucham, D.A. Carson, Conrad Mbewe se preke af.  Maak ook seker dat jy goeie boeke lees:  Martyn-Lloyd Jones, Charles Spurgeon, Iain Murray, Randy Alcorn, Jerry Bridges, Paul Tripp en meer.

 

[4] Hy het God se huis en sy mense liefgehad.  Hy wou in die tempel wees om die Here saam met ander gelowiges te prys (Ps. 16:3, 23:6, 26:8, 27:4, 122:1).  A.g.v. sy groot liefde vir God se huis, het hy mildelik daartoe bygedra (1Kron. 22:14, 29:2, 4).

 

Is jy soos Dawid?  Is Christus en sy gemeente jou lewe?  Is jy gereeld by die gemeentelike samekomste, omdat jy die Here saam met jou broers en susters wil aanbid (Heb. 10:24-25)?  Gee jy vir God se werk en vir die uitbreiding van sy Koninkryk in Tembisa, Peru, Zimbabwe en op ander plekke?

 

Wees dapper

Wat is die verbod wat die meeste in die Bybel voorkom?  Moenie bang wees nie.  Wees dapper.  Om dapper te wees beteken nie dat daar geen vrese in jou lewe is nie, maar dat jy hulle oorkom.  Jy is nie so dom dat jy die gevaar uitsoek nie, maar wanneer dit oor jou pad kom vertrou jy die Here om jou te help.  Dit is wat dapperheid beteken.

 

Dawid was so:  “…’n dapper held en ‘n krysman… en die Here is met hom.” (1Sam. 16:18).  Toe almal Goliat gevrees het, het Dawid sy slingervel gevat en die gewapende reus doodgemaak (1Sam. 17:48-51).  Hy was dapper, omdat hy geweet het die Here is met hom (1Sam. 18:14, 28, 2Sam. 5:10, 8:6, 14).

 

As jy gered is en jou sonde vergewe is, is die Here met jou (Matt. 1:23, 28:20, Heb. 13:5).  Dus hoef jy nie bang te wees nie.  Met God se krag en die vlymskerp swaard van sy Woord, kan jy die sterkste vyande in jou lewe doodmaak:  onsekerheid oor jou en jou gesin se toekoms, vrees vir die dood, Satan se versoekings om onrein te wees, ongedissiplineerde gedagtes, sondige gewoontes soos dronkenskap en pornografie, ‘n los tong, finansiële stres, passiewe geestelike leierskap in jou huis, vrees vir verwerping, ens.

 

Dalk het die duiwel, jou eie sonde en jou omstandighede jou teen die grond geslaan.  Moenie bly lê, of in ‘n hoek sit en jouself bejammer nie.  Staan op.  Vra die Here om jou te help.  Tel jou swaard op en stry die goeie stryd.

 

  • “die sonde lê en loer voor die deur, en sy begeerte is na jou; maar jy moet daaroor heers.” (Gen. 4:7).
  • “wees nie traag in die ywer nie; wees vurig van gees; dien die Here.” (Rom. 12:11).
  • “Ek hardloop dan soos een wat nie onseker is nie; ek slaan met die vuis soos een wat nie in die lug slaan nie. Maar ek kasty my liggaam en maak dit diensbaar, dat ek nie miskien, terwyl ek vir ander gepreek het, self verwerplik sou wees nie.” (1Kor. 9:26-27).
  • “Waak, staan in die geloof, wees manlik, wees sterk. Laat alles by julle in liefde geskied.” (1Kor. 16:13-14).
  • “oefen jou in die godsaligheid” (1Tim. 4:7).
  • “Maar jy, man van God, vlug van hierdie dinge weg, en jaag ná die geregtigheid, godsaligheid, geloof, liefde, lydsaamheid, sagmoedigheid. Stry die goeie stryd van die geloof, gryp na die ewige lewe…” (1Tim. 6:11-12).
  • “Want God het ons nie ‘n gees van vreesagtigheid gegee nie, maar van krag en liefde en selfbeheersing.” (2Tim. 1:7).
  • “Ek het die goeie stryd gestry; ek het die wedloop voleindig; ek het die geloof behou.” (2Tim. 4:7).
  • “onthou [julle] van vleeslike begeertes wat stryd voer teen die siel” (1Pet. 2:11).

 

Moenie soos ‘n bangbroek van jou moeilike omstandighede af wegvlug, of vir beter dae wag nie.  Wees ‘n man.  Staan op.  Ruk jouself reg.  Skud die stof van jou klere af.  Moenie bang wees vir ‘n bietjie seerkry nie.  As mans deur die geskiedenis vir hulle vryheid geveg het, kan jy sekerlik jou swaard optel en vir jou Koning, sy eer en sy Koninkryk veg.  As jy dapper is sal jy ander beïnvloed om in jou voetspore te volg (2Sam. 21:22, 23:8-39).

 

Wees sagmoedig

Dit is maklik om ander mense te beheer, maar moeilik om jouself te beheer.  ‘n Sagmoedige man is iemand wat geleer het om homself te beheer.  Sy sagmoedigheid is nie ‘n teken van swakheid nie, maar van sterkte.  Hy is soos ‘n olifant wat dik stompe met sy slurp kan optel, maar dit gebruik om ‘n fyn blaartjie te pluk; hy is soos ‘n gimnas wat sy krag beheer om stadig in ‘n Maltese kruis in te sak.

 

Jesus en Moses was so (Matt. 11:29, 12:20, 2Kor. 10:1, Num. 12:3).  Dawid ook.  Toe Simeï hom vloek en Saul hom vervolg, het hy hulle nie teruggekry nie.  Hy het dit in die Here se hande gelos om wraak te neem (1Sam. 24, 26, 2Sam. 16, Rom. 12:19).[1]

 

Ons moet so wees.  Wees sagmoedig met jou vrou en kinders (1Pet. 3:7, Ef. 5:25, 29, Kol. 3:19).  Moenie so streng wees dat jou vrou bang is om haar opinie te gee, of jou kinders vrees jy sal uitvind hulle het ‘n toets gedruip nie.  Dalk is jy té streng en moet jy leer om meer sagmoedig te wees.  As jou vrou of kinders gesondig het, moet jy hulle nie verkleineer nie maar met ‘n sagmoedige gesindheid reghelp, en onthou dat jy self ook God se genade nodig het (Gal. 6:1-2).

 

Wees nederig

In een van my vrou se beradingklasse het die dosent gesê:  ‘Mans, niks is belangriker in jou huwelik as nederigheid nie.’  Ons sien dit miskien nie in Dawid se huwelik nie, maar in sy lewe is dit duidelik sigbaar.  In 1Sam. 25:32, 34-35 het hy bv. ‘n vrou se raad gevolg en nie gedink hy weet alles nie.  Sommige mans dink dat dit benede hulle is om so iets te doen.  Maar die man wat homself verneder om sy vrou se insette te vra, is beter af as die man wat dink dat hy haar nie nodig het nie (Gen. 2:18).

 

Dawid was ook nederig genoeg om sy vyande lief te hê en te vergewe.  Hy het vir Simeï vergewe (2Sam. 16, 19).  Hy het getreur toe Saul en Absalom – sy vyande – dood is (2Sam. 1, 18).  Beide Abner en Isboset was aan Saul se kant.  Maar toe hulle dood is, was Dawid hartseer en het hy hulle moordenaars bestraf (2Sam. 3-4).

 

Sal Dawid sy vyande liefhê en vergewe, en kan jy nie eers met jou vrou oor die weg kom nie?  Dit wys iets van die hoogmoed wat daar nog in jou hart is.  Jy dink te veel van jouself.  As jy nederig was sou dit jou nie so gepla het dat mense nie volgens jóú pype dans nie.  Maar nou raak jy kwaad en baklei jy, omdat jy vir jouself te belangrik is (Jak. 4:1-2).  Jy kan dit nie glo dat jou vrou so arrogant is om jóú wil te kruis nie.  ‘Hoekom wil sy altyd dinge op háár manier gedoen hê?’ wonder jy.  Jy kom nie eers agter dat jy kwaad is, omdat sy nie dinge op jóú manier wil doen nie.

 

Dit sal help as jy jouself weer aan God se heiligheid meet, sodat jy kan sien jy is glad nie so belangrik soos wat jy dink nie.  ‘n Nederige man sal nie dink dat hy te goed is om ‘n ‘vrou se werk’ te doen nie.  Hy sal sy vrou help en die kind se doek ruil, skottelgoed was, die huis opruim, die kinders oppas, ‘n siek kind dokter, kruideniers koop, ens.  Om ‘n leier te wees moet jy nederig wees en soos Jesus dien (Matt. 20:25-28).

 

Iemand wat regtig nederig is sal dit nie agterkom nie, maar erken dat hy baie hoogmoedig is.  Omdat hy dit besef, sal hy soos Dawid wees toe hy in sy militêre sukses geroem het:  hy het hom bekeer en vir die Here gevra om hom te vergewe (2Sam. 24).

 

Wees rein

Toe ek laas week vir die vroue gepreek het, het ek my vrou iets oor die onderwerp gevra.  ‘Kyk op Cosmopolitan se webblad,’ het sy gesê.  ‘As jy die teenoorgestelde sê sal jy reg wees.’

 

Wanneer dit by seksuele reinheid kom is dit ook so.  Om te weet wat jy moet doen, moet jy 2Sam. 11 lees (Dawid se egbreuk met Batseba) en die teenoorgestelde doen.  Eintlik het Dawid se sonde nie hier begin nie.  Die Here het al in Deut. 17:17 gesê dat die koning nie baie vroue moet hê nie, maar Dawid was ongehoorsaam (2Sam. 3:2-5, 5:13-16).  Sy huwelike met al hierdie vroue het ook gemaak dat hy nie eintlik ‘n verhouding met sy kinders gehad het nie (bv. Amnon en Absalom).

 

Al was hy dan ‘n man na God se hart, is sy gesinslewe nie juis die beste voorbeeld om na te volg nie.  Sy sonde met Batseba moet veral vir ons ‘n waarskuwing wees.  Manne, ek weet dat dit partykeer ‘n stryd is om jou begeertes in toom te hou.  Maar jy is nie hulpeloos nie.  As jy volgende stappe toepas, kán jy rein wees.

 

[1] Glo dat Jesus se kruisdood en opstanding genoeg is om jou sonde te oorkom (1Kor. 6:11, 9-10, Tit. 2:11-12).  Moet dit nie net weet nie, maar glo in Hom.

 

[2] Aanvaar persoonlike verantwoordelikheid.  Moenie sê dat pornografie ‘n siekte in jou brein is nie.  As jy saam met jou meisie slaap, is dit nie omdat jy uit ‘n gebroke huisgesin kom nie.  Jy kan nie jou egbreuk of emosionele gehegtheid aan jou sekretaresse op jou vrou blameer nie.  Ek sê nie dat jou vrou onskuldig is nie, maar moenie soos Adam die skuld van jouself wil afskuif en dink jy gaan daarmee wegkom nie (Gen. 3:12).  Erken eerder saam met Dawid dat dit jou eie skuld is, en dat jy teen die Here gesondig het (Ps. 32, 51).  Totdat jy dít nie doen nie, kan jy nie vergewe word nie (1Joh. 1:9).

 

[3] Bid baie vir die Heilige Gees se hulp (Luk. 11:13, Rom. 8:13).

 

[4] Memoriseer gepaste Bybelverse en gebruik dit wanneer jy versoek word (Ps. 119:11, Ef. 6:17).  As jy jou gedagtes met goeie dinge vul, sal dit die vuil dinge uitsuiwer (Rom. 12:2, Fil. 4:8).

 

[5] Vra jou vrou en ‘n betroubare Christen-vriend om vir jou te bid en jou aanspreeklik te hou.

 

[6] Onthou dat jy saam met Christus begrawe is, en dat jy as ‘n nuwe mens saam met Hom opgewek is – jy hóéf nie te sondig nie (Rom. 6:3-4, 11-14, 2Kor. 5:17).

 

[7] Herinner jouself aan die erns van sonde en aan die rykdom van God se vergifnis as jy die nagmaal gebruik.

 

[8] Maak ‘n skoon breek in sondige verhoudings (Spr. 5:8).  Raak ontslae van jou TV, die internet, jou selfoon, ens. as dit jou versoek om onrein te wees (Matt. 5:28-29, Rom. 13:14).

 

[9] Onthou dat mense wat in seksuele sonde volhard, hel toe gaan (1Kor. 6:9-10, Op. 21:8).

 

[10] Moenie ledig wees nie – dit is hoe Dawid geval het (2Sam. 11:1-2).

 

[11] Neem Num. 32:23 en Luk. 12:2 ernstig op:  “…weet dan dat julle sonde julle sal uitvind … En daar is niks bedek wat nie geopenbaar sal word nie, en verborge wat nie bekend sal word nie.”

 

[12] Trou as jy enkel is.  Dit sal nie al jou probleme oplos nie, maar dit is ‘n oplossing (1Kor. 7:2, 9, 1 Tess. 4:4).

 

[13] Werk hard aan jou huwelik.  Jou vrou is soos ‘n plant wat tyd en aandag nodig het.  As jy haar afskeep moet jy nie verbaas wees dat jou huwelik soos ‘n verlepte plant lyk nie.  “In enige moeitevolle arbeid is voordeel, maar praatjies is net tot gebrek.” (Spr. 14:23).

 

Moet dan nie net dat jou vrou nr. 1 in jou lewe is nie; wys dit.  Hou op om jou kinders, vriende, familie, kerk, werk, en stokperdjies bo haar te stel.  Maak tyd om met haar te gesels en nie net om saam met haar te slaap nie.

 

[14] Moet jouself nie seksueel uithonger nie, maar geniet jou vrou as jy getroud is (1Kor. 7:3-5).

 

[15] Wellus is die saad waaruit die onkruid van egbreuk en pornografie groei (Matt. 5:27-28, Jak. 1:14-15).  Roei die saad uit en moenie net bossies uittrek nie.

 

[16] Lees The Purity Principle van Randy Alcorn.

 

[17] Vroue, help asb. julle broers in die Here.  Moenie so aantrek dat jy hulle versoek nie (Matt. 18:7, 1Tim. 2:9).

 

Ek glo jy het agtergekom dat Dawid ‘n goeie voorbeeld is, maar dat hy nie die perfekte voorbeeld is nie.  Hy is immers nie die Messias nie, maar ‘n sterflike mens soos ons (Hand. 2:29).  Die 15 helde wie se potlood sketse in my studeerkamer hang is ook nie volmaak nie.

 

Daar is net een volmaakte Verlosser en voorbeeld:  die seun van Dawid, Jesus Christus.  Behoort jy aan Hom?  “Hy wat sê dat hy in Hom bly, behoort self ook so te wandel soos Hy gewandel het.” (1Joh. 2:6).  Uiteindelik is Jesus, nie Dawid nie, die Man na God se hart:  “Dit is my geliefde Seun in wie Ek ‘n welbehae het.  Luister na Hom!” (Matt. 17:5).

[1] Dawid het een keer besluit om wraak te neem.  Nadat hy goed was vir Nabal, het die dwaas hom kwaad aangedoen:  stank vir dank (1Sam. 25).  Dawid het besluit om hom dood te maak, maar terwyl hy oppad was het die Here Nabal se vrou na hom toe gestuur.  Sy het hom afgeraai en gesê dat die Here met Nabal sal afreken.  Dawid was dankbaar Abigail hom gekeer het.  Hy het haar raad gevolg en nié wraak geneem nie.  Tien dae later het die Here vir Nabal doodgemaak.

Advertisements

‘n Boodskap vir vroue

Women discipling women 2

In 1979 het John MacArthur ‘n boodskap uit Tit. 2 gepreek.  Tit. 2 sê o.a. dat vroue hulle mans en kinders moet liefhê, tuisteskeppers moet wees, en aan hulle mans onderdanig moet wees.  Op 3 Feb. 1979 het die Los Angeles Times gesê dat Grace Community Church (MacArthur se kerk) ná die preek vyf of ses sekretaresses afgedank het.  Maar dit was ‘n leuen.  Die vroue het self bedank, omdat hulle besluit het om meer tyd aan hulle gesinne te gee.[1]

 

Ek hoop nie dat enigiemand hierdie boodskap uit Tit. 2:3-5 verkeerd sal verstaan nie.  Die doel is nie dat vroue onderdruk moet word nie, maar dat hulle die ereplek moet inneem waarvoor die Here hulle geskep het.

 

Ouer vroue (v.3-4a)

Sonder ouer vroue kan die gemeente en samelewing nie voortbestaan nie.  Hulle beïnvloed immers die jonger vroue, wat op hulle beurt weer húlle kinders beïnvloed.  Jonathan Edwards se vrou Sarah is ‘n goeie voorbeeld hiervan.  Die wyse waarop sy en haar man hulle 11 kinders grootgemaak het, het die geslagte ná hulle beïnvloed.[2]  In die jaar 1900, het ‘n sekere A.E. Winship ‘n studie van twee families gemaak.  Die eerste familie se honderde nasate was ‘n las vir die samelewing, terwyl Jonathan en Sarah Edwards se nageslag ‘n suksesvolle bydrae gelewer het.

 

Tussen 1728 (toe Sarah se eerste kind gebore is) en 1900, het Jonathan en Sarah meer as 1400 nasate gehad.  Onder hulle was daar:

 

  • 13 Kollege hoofde
  • 65 Professors
  • 100 Prokureurs en ‘n dekaan van ‘n regskool
  • 30 Magistrate
  • 66 Dokters en ‘n dekaan van ‘n mediese skool
  • 80 Mense in publieke ampte, insluitend:

[a] 3 Amerikaanse senators

[b] 3 Burgemeesters van groot stede

[c] 3 Amerikaanse goewerneurs

[d] ‘n Amerikaanse Visie-President

[e] Iemand in beheer van die V.S. Tesourie

 

Baie van Edwards se nasate het eienaars en direkteure van groot Amerikaanse maatskappye geword.  Groot getalle het ook predikante geword.  Teen 1900 het Edwards se nasate 135 boeke geskryf, op sendingkomitees gedien, en 100 sendelinge oorsee gestuur.

 

In die lig van die bg. inligting skryf Elizabeth Dodds:  ‘Has any other mother contributed more vitally to the leadership of a nation?’[3]  Mnr. Winship stem saam, en reken dat die sukses en karakter van Edwards se nageslag grootliks te danke is aan Sarah Edwards.[4]  Ons weet natuurlik dat hulle sukses van die Here af kom, maar dit is ook so dat Hy vroue gebruik om die volgende geslag te beïnvloed.  Dit is waaroor Tit. 2:3-5 gaan.  Vir nou wil ek veral op v.3 fokus.

 

Soos die ouer mans in v.2, moet die ouer vroue karakter hê (v.3).  Haar eerbare en waardige optrede moet wees soos dit by ‘n Christen vrou pas (v.3).  Sy moenie kwaadpraat van ander nie (v.3).  Wanneer sy by ‘n vriendin tee drink, moet sy nie oor haar skoondogter, buurvrou, man, ds., of die meenthuis kompleks se opsigter skinder nie.  Sy moenie sê:  ‘Hoor hier, ons moet vir Hettie bid,’ en dan oor haar skinder nie.

 

Wanneer sy op die foon praat moet sy nie soos die Huisgenoot wees en almal se besigheid ken nie.  Sy moet haar eerder by haar eie sake hou, en goeie dinge van ander mense sê.  As sy dit nie doen nie is sy soos die duiwel (v.3, Gk. diabolos].

 

Sy moenie aan baie wyn verslaaf wees nie – of aan hoesstroop, pynpille, slaappille, anti-depressante, koeksisters, melktert, 7de Laan, ens. nie (v.3).  Sy moet haarself daaraan wy om goeie lering te gee (v.3).  Sy mag nie die gemeente leer nie (1Tim. 2:12), maar sy kan die jonger vroue leer (v.3-4).  Sy het meer lewenservaring as hulle, en stap al ‘n langer pad met die Here.  As sy sien dat hulle verkeerd lewe, kan sy hulle vir koffie nooi en hulle op ‘n mooi manier reghelp.  Haar leefwyse as ‘n Christen moet ook vir hulle ‘n leerskool wees.

 

Die Griekse woord vir leer [v.4, sõphronizõ] beteken ook ‘oplei, dissipeleer, dissiplineer, korrigeer, vermaan’.  Dit is soos in die film War Room waar ‘n ouer vrou ‘n jonger een help om haar verhouding met die Here, lewe, huwelik, gesin en prioriteite in orde te kry.  Wil jy nie dieselfde doen nie?

 

Nooi ‘n jonger vrou na jou huis toe om ‘n goeie boek saam met jou deur te werk.  Dalk kan jy met Womanly Dominion van Mark Chanski begin.  Iemand het vir my gesê dat dit die beste boek op die onderwerp is.  A Woman After God’s Own Heart van Elizabeth George, Lies Women Believe van Nancy Leigh DeMoss, en Disciplines of A Godly Woman van Barbara Hughes is ook goeie opsies.

 

Bid saam met ‘n jonger vrou.  Bid in jou stiltetyd vir haar.  Nooi haar vir koffie.  Stuur vir haar ‘n Bybelvers.  Wie gaan haar dissipeleer as jý dit nie doen nie?  ‘n Man kan dit nie doen nie; hy verstaan nie ‘n vrou se probleme nie.  Dit is ook gevaarlik, omdat hy maklik verlief kan raak op die jong meisie wat elke week haar hart met hom deel.  As dit ooit gebeur dat jy vir ‘n vrou móét raad gee, is dit belangrik dat jou vrou by jou is, of dat die vertrek se deur oop is en jou vrou by die huis is.

 

Eintlik is dit beter dat jou vrou of ‘n ander vrou met die jong vrou gesels.  Omdat jy self ook ‘n jong vrou was, weet jy hoe hulle dink, en verstaan jy hulle unieke probleme, uitdagings, versoekings en sondes.  Kies vir jou ‘n jong vrou, en doen moeite om haar te dissipeleer.  As jy dit doen sal sy later die vrymoedigheid hê om raad te vra, en sal sy heel moontlik in die toekoms iemand anders dissipeleer, soos jy dit met haar gedoen het.

 

Jonger vroue (v.4b-5)

Ek het ‘n Amerikaanse sendeling-vriend wat in Limpopo werk.  ‘n Paar jaar gelede het hy vir my gesê:  ‘Die ding wat ek die meeste op die sendingveld mis, is die invloed van iemand met grys hare.’  Kort daarna het hy ‘n ou Bybelvertaler ontmoet, en het hulle goeie vriende geraak.  My vriend praat gedurig van die positiewe invloed wat die ou man op hom het.

 

Die jonger vroue moet soos my vriend wees:  nie eiewys wees nie, maar gretig om by die ouer vroue te leer (v.3-5).  Wat moet die ouer vroue vir hulle leer?  Paulus noem ses dinge.

 

[1] Hulle moet hulle mans en kinders liefhê (v.4).  Dié wat nog gaan trou en kinders hê moet ook leer wat die Here van hulle verwag.  Ek sal in v.5 wys hoe ‘n vrou haar man moet liefhê en respekteer.  Vir eers wil op haar ouerlike plig fokus:  hoe moet sy haar kinders liefhê?

 

Sy moet hulle nie afskeep nie.  Sy moenie die TV, X-Box of i-Pad aansit om hulle groot te maak, omdat sy haar eie ding wil doen nie.  Daar is ‘n tyd en plek vir ontspanning, maar sy moet hulle nie los om hulle eie kos te maak, omdat sy vir ure op ‘n dag boek lees, TV kyk, in die mall is, op die bed lê, met ‘n vriendin kuier, studeer, op haar slimfoon of Facebook sit, of by die werk is nie.  Dit is sleg as haar kind vir ‘n halwe dag met ‘n vuil doek moet rondloop, omdat sy te lui is om dit te ruil.

 

Sy kan eerder tyd maak om vir haar kinders boekies te lees, met hulle te speel, of om hulle op die swaai te stoot.  Sy moet hulle dissiplineer, vir hulle bid en Bybelstories vir hulle lees.  As haar kinders ouer is kan sy by hulle op die bed lê en gesels, hulle vir ‘n melkskommel vat, hulle met hulle skoolwerk help, hulle saam met haar winkel toe vat, frisbee saam met hulle gooi, met hulle praat oor die Here en hulle verhouding met Hom, saam met hulle bid en die Bybel lees, haar dogter leer om koek te bak of ‘n spyskaart uit te werk, met hulle oor seks praat (as sy dit nie doen nie, sal haar dogter se vriendinne dit doen!), vir haar seun sê sy is trots op hom as hy die braai skoongemaak het, ens.

 

[2] Hulle moet ingetoë wees (v.5).  Dit beteken o.a. dat ‘n jong vrou selfbeheersing moet hê.  Sy moet haar tong, emosies en aptyte beheer.  Sy moenie nors en humeurig wees, net omdat dit ‘n sekere tyd van die maand is nie.  Sy moet ook die paradokse van die Christelike lewe leer.  ‘n Paradoks is iets wat soos ‘n kontras lyk, maar nie eintlik een is nie.  ‘n Belangrike paradoks is bv. dat die Christelike lewe radikaal is, maar nie uitspattig nie.  Jy moet jouself verloën en jou kruis opneem as jy vir Jesus wil volg (Luk. 9:23), maar jy moet ook ingetoë of matig wees (v.2, 5, 6, 12, 1:8).  Kom ons neem kos as ‘n praktiese voorbeeld.  ‘n Jong vrou kan dit geniet om lekker kos te maak, maar dit moenie haar afgod wees nie (Fil. 3:19).  Aan die ander kant moet sy nie haar liggaam aanbid, sodat sy van een dieet na die volgende toe te spring, en ‘n obsessie het met oefening nie.  Sy moet matig wees (v.5).

 

[3] Hulle moet kuislik of rein wees (v.5).  Daar is sekere storieboeke, tydskrifte, DVD’s en internet blaaie wat nie in ‘n jong vrou se lewe hoort nie.  Sy moet getrou wees aan haar eie man, en nie ander mans se geselskap uitsoek nie.  Sy moet ook nie so aantrek dat sy ander mans verlei nie.  As sy enkel is kan sy bid dat die Here vir haar ‘n man stuur, maar sy moet nog steeds rein bly.

 

[4] Hulle moet huislik wees (v.5).  ‘n Jong vrou se huis moet vir haar ‘n prioriteit moet wees.  Dit is nie sonde as sy ‘n buitewerk het nie, maar dit moenie haar prioriteit wees nie.  Haar werk moet haar nie so besig hou, dat sy nie tyd het vir haar gesin nie.  Dit moenie soveel tyd in beslag neem, dat sy nie by haar huislike pligte uitkom nie.  Ek weet dat die man ook in die huis moet help, maar vroue het ‘n gawe wat mans nie het nie.  Hulle weet net hoe om ‘n huis te versier en seker te maak dat dinge glad verloop.  Die ouer vroue moet die jonger vroue help om nie hierdie gawe te minag of te verwaarloos nie.

 

Indien ‘n jong vrou nie haar sekulêre werk en haar God-gegewe huislike pligte kan nakom nie, moet sy haar gesin kies en ‘n huisvrou wees.  Dalk sê jy:  ‘Maar ons het die tweede werk nodig.’  Bid dan dat die Here vir jou ‘n halfdag werk sal gee, sodat jy meer by jou kinders kan wees.  Dit sal ook goed wees as jy weer deur jou begroting werk.  Het julle miskien die tweede werk nodig, omdat jy nie jou BMW op ‘n kleiner karretjie wil inruil nie, of omdat jy nie bereid is om DSTV op te gee en op ander maniere af te skaal nie?

 

Dalk is dit glad nie die geval nie, en sukkel julle regtig.  Kyk mooi na jou begroting.  Dalk gee jy onnodig geld uit omdat jy werk:  ‘n tweede kar, ekstra brandstof, die kleuterskool of naskool, ‘n bediende om te was en te kook omdat jy nie tyd het nie, ekstra wiskunde klasse omdat jy by die werk is en nie tyd het om jou kind te help nie, ens.

 

Dalk is dit nie die rede hoekom julle sukkel nie, en is dinge regtig net moeilik.  Jou kinders benodig jou liefde en tyd meer as jou geld.  “Liewer ‘n porsie groente waar liefde by is, as ‘n vetgevoerde bees en haat daarby.” (Spr. 15:17).  Dalk sukkel jy omdat jy ‘n enkel ma is.  In daardie geval moet jy seker maak dat die kind se pa onderhoud betaal.  Probeer om die saak mooi met hom uit te praat.  Indien dit nie help nie, moet jy met sy ouderlinge praat.  As hy ongered is, kan jy ‘n Christen prokureur vir raad vra.  As jy op Bybelse gronde geskei is, moet jy vir ‘n man bid, trou, jou kinders opvoed en jou huislike pligte nakom (1Tim. 5:14).

 

As jy regtig nie ‘n man kry nie, kan jy jou familie nader en vra of jy by hulle kan bly.  Soek ‘n halfdag werk om by te dra vir kos, water en ligte.  Dalk kan jy jou kind tuisskool (dit is goedkoper as ‘n publieke skool).  Dalk kan jy van die huis af werk om geld te maak (bv. beskuit bak of klere maak).  Is daar ‘n ouer vrou in die kerk wat vir jou ‘n vaardigheid kan leer?  Kan sy jou miskien met jou begroting help?  As jy alles probeer het en daar geen ander uitweg is nie, kan jy met die ouderlinge praat.  Dalk het jy iets misgekyk.  Of dalk is jy regtig net arm, en moet die kerk aan maniere dink om jou te help.

 

Wat as jy graag by die huis wil werk, maar jou man verbied jou?  Bid vir jou man.  Wys uit Tit. 2:5 en 1Tim. 5:14 vir hom hoekom jy graag by die huis wil werk.  Sê vir hom dat jy van die huis af dinge sal doen om ekstra geld te maak.  Indien hy ná dit nog daarop aandring dat jy moet werk, moet jy jou op ‘n sagmoedige wyse aan hom onderwerp en bid dat die Here hom sal verander.

 

[5] Hulle moet goed doen en vriendelik wees (v.5).  Jong vroue moenie humeurig en geïrriteerd wees met hulle mans en kinders nie.  Goeie werke moet vir hulle belangrik wees (1Tim. 2:10, 5:10).  Hulle huise moet oop wees, en as hulle mense ontvang moet hulle vriendelik wees (1Pet. 4:9).

 

[6] Hulle moet aan hulle eie mans onderdanig wees, sodat die Woord van God nie belaster word nie (v.5, Ef. 5:22-23, Kol. 3:18, 1Pet. 3:1-6).  In ons samelewing het onderdanigheid ‘n vloekwoord geword.  Maar in die konteks van die Bybel het onderdanigheid niks te doen met ‘n man wat sy vrou boelie, beheer, onderdruk of met ‘n ystervuis regeer nie.  Dit beteken nie dat sy geen besluite mag neem, of dat sy soos ‘n slaaf voor haar man se voete moet val nie.

 

Dit beteken eerder dat sy haar man moet respekteer (Ef. 5:33).  Sy het die mag om haar man op te bou of af te breek, om hom te laat kwyn of te laat floreer (Spr. 31:12).  Wanneer sy by ander mense is, moet sy haar man se goeie punte uitlig, en hom nie afbreek nie.  Sy moet hom nie verkleineer, met hom baklei, hom ‘nag’, opdragte gee, sy vuil wasgoed ophang, oor hom kla, hom soos ‘n kind hanteer, of disrespekvol met hom praat nie.  Sy moet eerder voorstelle maak, en hom eenkant op ‘n sagmoedige wyse korrigeer.

 

Om hom te respekteer moet sy ook op haar voorkoms let.  Sy moenie 11 uur in die oggend nog in haar nagklere wees, en die hele dag nie haar tande borsel nie.  Sy hoef nie soos ‘n model te lyk nie, maar sy moet netjies wees vir haar man (Spr. 31:22).

 

Om respek te wys moet sy hom bemoedig, vir hom bid, en dankie sê dat hy hard werk om vir hulle te sorg.  Sy moenie lui wees om etes voor te berei nie.  Sy moet haar man vir raad vra.  As hy ‘n seksuele behoefte het, moet sy nie verskonings gebruik soos:  ‘Wag tot môre… ek het hoofpyn… ek is moeg, ens.’ nie.

 

Wat moet ‘n vrou doen as haar man nie die gesin goed lei nie; moet sy haar man se rol oorneem?  As ‘n losskakel nie sy posisie goed speel nie, beteken dit nie die slot moet sý posisie los en die losskakel s’n oorneem nie.  Die afrigter sal met die losskakel afreken; die slot moet sy posisie speel.  Vervul jou rol en moenie jou ongehoorsame man s’n wil oorneem nie; die Here sal met hom afreken.

 

Hoekom moet ‘n vrou haar man respekteer?  “…sodat die Woord van God nie belaster word nie.” (v.5, 8, 10, Rom. 2:24, 1Tim. 6:1).  ‘n Illustrasie sal v.5 verduidelik.  Toe ons onlangs in Jeffreysbaai was, het ‘n Christen jong man gesê dat sy ateïs-vriend met ‘n Christen wil trou, omdat Christen meisies nie soos ongelowiges is nie.  A.g.v. die Christen-vroue se seksuele reinheid, en toewyding aan hulle mans en kinders, het ‘n sekere heiden (Libanius) in die vierde eeu gesê:  ‘What women these Christians have!’[5]

 

As ‘n Christen vrou haar man respekteer, sal die wêreld sien dat God se Woord waar is, en dat Jesus inderdaad mense se lewens verander (v.11, vgl. 1:12).  Dit sal hulle verstom dat hierdie vrou nie met haar man baklei nie, maar dat sy sagmoedig, eerbiedig en onderdanig is (Matt. 5:16, 1Pet. 2:12, 3:15).  As sy egter disrespekvol is, sal ongelowiges die Bybel uitlag en sê dat hulle nie Christene wil wees nie.  As ongelowiges hoor hoe sy haar man slegsê, verloor sy kredietwaardigheid en kan sy nie met hulle oor die Here praat nie.  Haar lewe weerspreek haar getuienis.

 

Dalk hoor jy hierdie dinge en sê jy:  ‘Niemand kan dit regkry nie; jy leef in ‘n onrealistiese wêreld.’  Natuurlik kan jy dit nie self regkry nie, maar met die Here is alle dinge moontlik.  Deur die genade van God in Jesus se kruisdood, kan ons ‘nee’ sê vir sonde en ‘ja’ vir goeie werke (v.11-14).

 

As jy dit nie regkry om uit liefde vir God aan jou man onderdanig te wees nie, moet jy wonder of jy gered is.  Die rede hoekom jy teen jou man se gesag rebelleer, is omdat jy jou nie aan die Woord van God (bv. Tit. 2:5) wil onderwerp nie.  Jy is op ‘n gevaarlike pad, want volgens 1Sam. 15:23 is rebelsheid vir die Here so ernstig soos heksery.  Bekeer jou en glo dat Jesus jou deur sy kruisdood kan vergewe.  Verneder jou voor die Here.  Los jou rebelsheid en vra Hom om jou te verander, sodat jy uit liefde vir Hom aan jou man onderdanig kan wees.

 

Uiteindelik gaan dit nie eers oor jou man, kinders of enigiemand anders nie, maar oor die Here (1Pet. 3:4).  Dit is hoe dit vir Sarah Edwards was.  ‘Oh how good…is it to work for God in the daytime, and at night to lie down under his smiles!’ het sy gesê.  Vir haar was haar huislike take deel van haar diens aan God, en so wonderlik soos gebed.[6]  Mag dit so wees vir elke vrou wat bely dat sy die Here ken.

 

[1] Iain Murray, John MacArthur: Servant of the Word and Flock, The Banner of Truth Trust, Edinburgh, 2011, pp. 46-47

[2] John Piper & Justin Taylor (Red.), A God Entranced Vision of All Things: The Legacy of Jonathan Edwards, Crossway Books, Wheaton: Illinois, 2004, pp. 62-63

[3] Aangehaal in Ibid., p. 63

[4] Aangehaal in Ibid., p. 62

[5] Alvin J. Schmidt, How Christianity Changed the World, Zondervan, Grand Rapids: Michigan, 2001, 2004, p. 85

[6] Piper & Taylor, p. 71

Manlikheid, vroulikheid en die gay agenda

Gay agenda

Die gay agenda verwys na die gay en lesbian gemeenskap se poging om seks tussen mense van dieselfde geslag te normaliseer.  In lande soos Kanada, Amerika en selfs Suid-Afrika, het hulle God se definisie van die huisgesin en die huwelik op sy kop gekeer.  D.m.v. TV-programme, films, die internet, sosiale media, Whatsapp, tydskrifte ens., het die gay gemeenskap ons met hulle ‘reënboog’ agenda gebreinspoel.  Soos jy seker weet het hulle ook ‘n voet in die kerk se deur gekry, sodat daar vandag hele denominasies is wat manlikheid en vroulikheid misverstaan.  My gebed is dat die Here Gen. 1:26-27 sal gebruik om die kraaines uit te sorteer.

 

Wat is die huwelik?

Die homoseksuele gemeenskap se verkeerde verstaan van manlikheid en vroulikheid, lei outomaties tot ‘n verkeerde verstaan van die huwelik.  Die twee is onlosmaaklik aan mekaar verbind.  Kom ons definieer die huwelik voor ons na ‘n Bybelse definisie van manlikheid en vroulikheid kyk.

 

Die wêreld het nog altyd probeer om die huwelik te herdefinieer.  Jare gelede het iemand vir my gesê dat ‘n man en vrou wat saam slaap, getroud is in God se oë.  Vir hom was dit nie ‘n probleem dat twee ongetroudes in ‘n seksuele verhouding saambly nie.  Indirek het hy gesê dat daar nie so iets soos seks voor die huwelik is nie, omdat seks die huwelik is.  Toe ek hom oor Joh. 4:18 vra, het hy nie ‘n antwoord gehad het nie:  “want vyf mans het jy gehad; en die een wat jy nou het, is nie jou man nie.”

 

Duidelik is gay mense nie die enigstes wat die huwelik herdefinieer nie.  Maar van die mense wat seksueel immoreel is, is geen groep so aktief en aggressief teen die Bybel gekant soos die gay en lesbian gemeenskap nie.  Waar het jy al gesien dat mense wat egbreuk pleeg, optogte hou en in die hof baklei om hulle sonde te normaliseer?

 

Verskeie lande het aan die intimidasie van die gay agenda toegegee.  Maar as Christene moet ons nie onder die gewig van die kultuur se druk knak nie.  Geen groep of individu het die reg om die huwelik volgens hulle persoonlike voorkeure te definieer nie.  Van die begin af was die huwelik Gód se idee, en daarom het net Hý die reg om dit te definieer.  Kom ons bekyk sy definisie van nader.

 

God het die mens as man en vrou gemaak en hulle vir mekaar gegee (Gen. 1:27, 2:18-25).  Hy het nie twee mense van dieselfde geslag vir mekaar gegee nie, en daarom is homoseksualiteit onnatuurlik en sonde.  Die Ou- en die Nuwe Testament bevestig dit (Gen. 19, Lev. 18:22, 20:13, Rigt. 19, Rom. 1:26-27, 1Kor. 6:9-10, 1Tim. 1:10, Jud. 7).[1]  Volgens God se definisie dan is ‘n sg. ‘huwelik’ tussen twee mense van dieselfde geslag geen huwelik nie.

 

God se definisie beteken ook dat jy nie meer as een lewensmaat mag hê nie, al is dit ook deel van jou godsdiens of kultuur.  Poligamie is uit.  Wat egskeiding betref het God twee uitsonderings gegee, maar dit was nie deel van die oorspronklike plan nie (Matt. 19:8-9, 1Kor. 7:15).  Selfs as Adam moeg geraak het vir Eva, was daar nie iemand anders om mee te trou nie, en daarom moes hy met haar getroud bly.

 

Omdat Gen. 1:27, 2:18-25 die huwelik beskryf, is dit ook sonde vir mense wat ongetroud is om saam te slaap (Heb. 13:4).  In God se oë is seks ‘n uitdrukking van die eenheid tussen mense wat met mekaar getroud is, maar dit is nie gelyk aan daardie eenheid nie.  Die huwelik gaan oor baie meer as seksuele eenheid.

 

As ons ‘n Bybelse definisie vir die huwelik moet gee, kan ons dit soos volg opsom:  ‘Die huwelik is ‘n lewenslange verbond tussen een man en een vrou, ‘n verbond waarin hulle belowe om unieke en intieme vriende te bly totdat die dood hulle van mekaar skei.’

 

Twee spesifieke tekste wys vir ons dat die bg. definisie akkuraat is.  Spr. 2:17 beskryf die getroude vrou se huwelik as ‘n verhouding met “die vriend van haar jeug” en “die verbond van haar God”.  Mal. 2:14 praat van die getroude man se huwelik met “die vrou van [sy] jeug” en “die vrou van [sy] verbond.”  In Matt. 19:4-5 het Jesus een man en een vrou by sy definisie van die huwelik ingesluit.  Jesus het Gen. 2:24 aangehaal om te wys dat hierdie man en vrou een word wanneer hulle met mekaar trou.  Omdat God hulle op hierdie manier een gemaak het, mag hulle dit nie self beëindig nie; net Hý mag (Mal. 2:14-16, Matt. 19:6).

 

Dit help nie dat jy God se definisie van die huwelik verstaan as dit nie ook deel van jou lewe is nie.  Hoe moet jy dit prakties toepas?  Ons kan sê dat enkel mense nie immoreel moet wees nie, dat ouers dit nie moet goedkeur nie, dat getroude mense getrou moet bly en nie moet skei nie, en dat jong mense moet trou as hulle die regte persoon ontmoet het, eerder as om vir 7 jaar uit te gaan.  Ek wil egter my toepassing tot homoseksualiteit beperk, aangesien daar selfs in die kerk verwarring is hieroor.

 

Ek het vroeër gesê dat ‘n homoseksuele huwelik geen huwelik is nie.  Wanneer ‘n gay vriend, familielid of kollega jou dus na sy troue of verlowingspartytjie toe nooi, moet jy ‘nee’ sê.  As jy so ‘n geleentheid bywoon, sê jy indirek dat jy die persoon se sonde goedkeur, en dat God se definisie van die huwelik nie akkuraat is of saak maak nie.

 

Dit is beter om direk vir die persoon te sê dat jy hom of haar liefhet, en dat jy nie wil hê hulle moet hel toe gaan nie.  Sê vir hulle dat almal God se oordeel verdien.  Soos met enige sondaar kan Jesus hulle van hulle sonde bevry (Joh. 8:34, 36, 1Kor. 6:9-11, Tit. 2:11-14).  Vertel vir hulle dat Jesus op Golgota die straf vir sulke en ander sondes gedra het, dat Hy begrawe is en dat Hy na drie dae opgestaan het uit die dood.  As die persoon sy sonde haat, dit laat staan, en glo dat Jesus hom van God se oordeel en sy sonde kan red, sal God hom vergewe.  Maar as hy met sy sonde aanhou, sal die Here hom oordeel.

 

As jy gay mense liefhet, sal jy hierdie dinge vir hulle sê.  Meer as 150 jaar gelede het die 29-jarige Skotse prediker, Robert Murray McCheyne, die volgende gesê:  ‘They do not love you that do not warn you, poor hell-deserving sinners.  O! remember that love warns.’[2]  Onthou dit asb. wanneer jy met gay mense praat.  Moenie bang wees om vir hulle te sê dat hulle geestelike VIGS het, en dat God hulle vir hulle sonde gaan oordeel nie.  Maar jy moet ook nie nalaat om vir hulle te sê dat Jesus se bloed hulle van die terminale siekte van hulle siele (sonde) kan genees nie.

 

Vir die ouers van gay kinders wil ek sê:  ek glo dat dit nie maklik kan wees wanneer jou kind die nuus breek en vir jou sê hy is gay nie.  Maar ek wil jou in liefde vermaan om nie jou geloof in die Bybel prys te gee wanneer jy dit hoor nie.  Daar is ouers wat glo dat homoseksualiteit sonde is.  Wanneer hulle egter uitvind dat hulle seun of dogter gay is, verander hulle van mening.  Dalk het jý dit gedoen.  In daardie geval moet jy Jesus se woorde in Matt. 10:37 onthou:  “wie seun of dogter bo My liefhet, is My nie waardig nie.”

 

Sê eerder vir jou kind wat ek hierbo gesê het.  Bid vir jou kinders dat die Here hulle oë sal oopmaak.  As jy hulle liefhet, sal jy nie hulle sonde goedkeur of toesmeer nie, maar die evangelie met hulle deel.  Sê vir hulle dat hulle altyd welkom is in jou huis, maar dat hulle ongelukkig nie met hulle ‘maatjie’ by jou huis kan oorslaap nie.  As jy dít sê is die kanse goed dat hulle jou verwerp en niks met jou te doen wil hê nie.  Mense sal sê dat jy liefdeloos en onsensitief is.  Jý weet dat dit nie so is nie, en dat jou optrede juis deur liefde gemotiveer is.  Jy weet ook dat jou kind se woede teen jou ‘n tipe vervolging vir die waarheid is (2Tim. 3:12).

 

Wat moet jy doen as jou gay kind sê dat hy of sy ‘n Christen is?  Volgens Jesus sal jy die boom aan sy vrugte ken.  Moet dus nie op jou kind se belydenis gaan nie, maar op sy lewe.  In sy hart rebelleer hy teen die God van Bybel.  Hy het ‘n god geskep waarmee hy gemaklik is, ‘n god wat sy sonde aanvaar en hom nie daarvoor sal oordeel nie.  Help hom om dit te sien, en bid dat die Here hom tot sy sinne sal bring.  Soos met die verlore seun in Luk. 15, is die Here heeltemal in staat om kinders wat in hulle sonde gesink het, terug te bring.

 

Wat is manlikheid en vroulikheid?

Jare gelede het ‘n man van die Bahá’i godsdiens vir my gesê:  ‘Die probleem wat ek met Christene het, is dat julle dink net júlle is reg.’  Ek het Joh. 14:6 aangehaal.  Nie alleen het Jesus gesê dat Hy die enigste weg is nie; Hy het ook gesê dat Hy die waarheid is.  Hy is die standaard waarvolgens ons alle waarheid moet meet om te besluit of dit reg of verkeerd, waar of vals is.

 

Wanneer mense dan sê:  ‘Net omdat iets vir jóú waar is, beteken dit nie dat dit vir ander mense waar is nie,’ sê hulle in effek dat daar nie eintlik so iets soos reg en verkeerd is nie.  Sulke denke kom uit ‘n evolusionistiese en ateïstiese wêreldbeskouing.  In ‘n wêreld sonder ‘n soewereine en ewige God, is daar nie ‘n absolute wetgewer nie, en kan elkeen seker maar vir homself besluit wat reg en verkeerd is, nie waar nie?

 

Dit is presies wat die gay en lesbian gemeenskap doen:  hulle het die eerste hoofstuk van die Bybel verwerp, en besluit dat ‘n huwelik nie net tussen mense van die teenoorgestelde geslag is nie, maar ook tussen mense van dieselfde geslag.  Om die waarheid te sê bestaan daar nie eintlik vir hulle so iets soos geslag nie, en kan elke mens self besluit wat ‘dit’ wil wees.

 

Die American Psychological Association tref bv. ‘n kunsmatige onderskeid tussen ‘sex’ en ‘gender’.  Volgens hulle kan jy manlike chromosome, hormone en liggaamsdele hê (‘sex’), terwyl jy in jou persoonlikheid, uitdrukkings, kleredrag, haarstyl en optrede ‘n vrou is (‘gender’).[3]  ‘n Man kan dus ‘n handsakkie en ‘n stywe pienk broekie dra, sy gewrig buig en met ‘n fyn stemmetjie praat.  ‘n Vrou kan soos ‘n rugbyspeler loop, ‘n verband styf om haar bors draai, mansklere dra, en haar hare met ‘n nr. 1 kammetjie skeer.  Volgens die wêreld maak Gen. 1:27 nie saak nie, en kan jy self jou seksualiteit en geslag kies.  As jy ‘n operasie wil ondergaan om jou geslag te verander is dit jou keuse, en as jy in ‘n seksuele verhouding met iemand van dieselfde geslag wil lewe is dit ook reg (kontra Rom. 1:26-27).

 

Dit is niks anders as rebellie teen God nie.  Hy haat dit as ‘n man of vrou hulle geslag wil verander, en nie wil wees wat Hy hulle gemaak het nie.  In Deut. 22:5 staan daar:  “’n Vrou mag geen mansklere dra nie, en ‘n man mag geen vrouensklere aantrek nie; want almal wat dit doen, is vir die Here jou God ‘n gruwel.”  Die punt is nie dat daar nie so iets soos vroue kort hare of langbroeke is nie, maar dat jy nie so moet optree of aantrek dat iemand jou vir die teenoorgestelde geslag misken nie.

 

Die wêreld voel natuurlik ‘n veer vir God se Woord.  In hulle gedagtes is elkeen die kaptein van sy of haar eie skip, en kan mense self besluit wat hulle wil wees.  Hulle praat bv. van ‘n persoon se ‘gender identity’, en gee dan die volgende skokkende definisie:  ‘Gender identity refers to a person’s internal sense of being male, female or something else’.[4]  Hulle het dus nie net manlikheid en vroulikheid omgeruil nie, maar ‘n derde kategorie uitgedink:  ‘something else’ (wat dít ook al beteken!?).

 

In liberale dele van die wêreld, het party ouers besluit om hulle kinders so groot te maak.  Ek het ‘n Sweedse speelgoedwinkel advertensie gesien, waarin ‘n seuntjie Spiderman klere dra en ‘n pienk ‘pram’ stoot.  Swede gebruik selfs ‘n geslagsneutrale woord (hen), omdat hulle ‘seksistiese’ woorde soos hy en sy wil vermy.[5]  In hulle verdraaide denke moet die kind self besluit wat dit wil wees wanneer dit eendag groot is.

 

As ek dit hoor wonder ek of hierdie mense oplet as hulle die kind se doek ruil?  Kan hulle nie sien dat daar ‘n duidelike verskil tussen mans en vroue is, en dat hulle liggame verskillend lyk nie?  Weet hulle nie dat die ma en nie die pa nie, die kind vir 9 maande gedra het?  Het hulle vergeet dat jy ‘n man en vrou nodig het (nie twee mense van dieselfde geslag nie!) om kinders te hê (Gen. 1:27-28)?  Weet hulle nie dat mans en vroue se hormone en chromosome verskil nie?  Die manier waarop ons breine saamgestel is, dink en funksioneer verskil selfs.  Ek kan bv. goed op een taak fokus, terwyl my vrou vier of vyf dinge gelyk kan doen.  Ongelowiges weet nie waarvan hulle praat as hulle sê dat daar nie ‘n verskil tussen mans en vroue is nie.

 

Omdat mans en vroue so verskillend is, moet jy jou kind grootmaak volgens die geslag die Here hulle gemaak het.  Dalk bedoel jy nie om jou seun soos ‘n dogter groot te maak of andersom nie.  Maar as jy nie in jou kind se lewe betrokke is nie, is jy onbewustelik besig om hom of haar in ‘n verkeerde rigting te lei.

 

[1] ‘n Seun het ‘n pa nodig om hom van man-wees te leer.  Jy moet hom leer om dapper te wees, nie harde werk te vrees nie (soos om ‘n hoop bakstene te skuif), nie aan sy ma se rokpante vas te klou nie, te huil as hy sy knie geskraap het, maar dan die trane af te vee en verder te speel.  Jy moet hom leer om God te vrees en heilig te wees.  Die invloed wat John Paton se godvresende pa op hom gehad het, kan nie gemeet word nie.[6]

 

‘n Seun moet ook leierskap by sy pa leer, omdat dit onlosmaaklik deel is van manlikheid.  Feministe wil jou skuldig laat dat jy so vermetel is om manlikheid en leierskap in dieselfde asem te noem.  Maar volgens God se orde is die man sy vrou se hoof (Gen. 1:26, 5:1-2, 18:19, 1Kor. 11:3, 8-9, 1Tim. 2:12-13).  Wat waardigheid betref is jy en jou vrou gelyk (Gen. 1:26-27, Gal. 3:28, 1Pet. 3:7).  Maar in die huwelik moet jy jou vrou lei, beskerm, dien en liefhê soos Jesus dit met die kerk gedoen het (Ef. 5:22-25).

 

Jy moet ook onthou dat jou vrou fisies en emosioneel swakker is as jy (1Pet. 3:7).  Jy moet haar dus nie fisies, verbaal, seksueel, emosioneel of intellektueel boelie nie.  Leer ook vir jou seun om saggies met meisies en vroue te werk, om nie perverse opmerkings oor hulle te maak nie, om die deur vir hulle oop te maak, om te help as hulle swaar dra, ens.

 

[2] ‘n Seun het ook sy ma nodig.  Tim Challies sê:  ‘’n Verhouding tussen ‘n seun en sy ma is uniek en kosbaar.  Ongelukkig kyk ons soms met agterdog daarna, asof ‘n hegte verhouding tussen ‘n seun en sy ma gevaarlik is, asof dit onderliggend meisieagtigheid of moontlik selfs homoseksualiteit aandui.  Ons het name vir seuns wat naby – of té naby aan hulle ma’s is – hulle is mama’s boys, sissies of pansies.  ‘n Seun wat te naby aan sy ma is, is ‘n seun wat swak is en nie sterk nie.’[7]

 

Maar ‘n seun het sy ma nodig om vir hom te leer dat hy nie net breins en spiere moet hê nie, maar ‘n hart.  Sy moet hom help om sy emosies te deel, raad te vra, liefde te wys, ‘n Bybelse begrip van vroulikheid te hê, en God lief te hê.  ‘n Ma se invloed op haar seun is baie groter as wat ons besef.  Die gesegde wat sê:  ‘The hand that rocks the cradle, rules world’ is waar.  Groot Godsmanne in die geskiedenis is sterk deur hulle ma’s beïnvloed.[8]  John Welsey het bv. gesê:  “I learned more about Christianity from my mother than from all the theologians of England.”[9]

 

[3] ‘n Dogter benodig haar pa se leiding.  Hy moet haar van die Here leer, haar kerk toe vat, vir haar bid, en ‘n heilige voorbeeld stel.  Hy moet haar teen seuns beskerm wat haar wil misbruik.  Sy het ook ‘n pa nodig om vir haar drukkies te gee, haar te koester, respek vir haar te wys en die nodige sekuriteit te bied.  “In the fear of the Lord one has strong confidence, and his children will have a refuge.” (Spr. 14:26, ESV).  As ‘n pa hierdie dinge vir sy dogter doen, is die kanse goed dat sy geestelik en emosioneel stabiel sal wees as sy eendag die huis verlaat.

 

[4] ‘n Dogter het ook ‘n ma nodig om vroulikheid vir haar te leer.  Haar ma moet haar van die Here leer, en vir haar wys dat daar inderdaad ‘n goeie vrou agter elke goeie man is:  “Sy doen aan hom goed, en nie kwaad nie, al die dae van haar lewe.” (Spr. 31:12).  ‘n Engelse prediker genaamd John Angell James (1785-1859) het gesê:  ‘Woman’s advice, had it been asked for and acted upon, would have saved thousands of men from bankruptcy and ruin.  Few men have ever had to regret their taking counsel from a prudent wife’.[10]  Ek kan uit persoonlike ervaring bevestig dat dit waar is.

 

Verder het ‘n dogter haar ma nodig om vir haar te wys dat vroulikheid meer oor innerlike skoonheid, goeie werke en karakter gaan, as oor uiterlike skoonheid.  Sy het ‘n ma nodig om sagmoedigheid, wysheid, reinheid en geduld vir haar te wys.

 

In die lig van die bg. waarhede wil ek daarop aandring dat jy nie so besig is met jou eie lewe, dat jy jou seun of dogter afskeep, en hulle in effek sonder ‘n pa of ma grootword nie.  Dalk het jy nie gekies dat jou kind sonder een of beide ouers grootword nie.  In daardie geval moet die familie, gemeente, en betroubare vriende in jou kinders se lewe betrokke raak.

 

As ons nie iets vir hierdie kinders doen nie, sal die wêreld hulle harte wen.  Hulle sal wees soos die 17-jarige seun in die film, Courageous.  Hy het met ‘n bende en dwelmhandelaars deurmekaar geraak.  Op die einde het hy in die tronk beland.  Toe die polisieman hom vra hoekom hy met sulke skobbejakke meng, het hy met trane gesê:  ‘I ain’t got nobody man… I just ain’t got nobody.’

 

[1] Ek het hierdie verse in twee ander preke verduidelik: ‘n Reaksie op gay huwelike in die NG-Kerk en Sê die Bybel REGTIG homoseksualiteit is sonde?

[2] Sermons of M’Cheyne, The Banner of Truth Trust, London, 1961, 1972, p. 168

[3] http://www.apa.org/topics/lgbt/transgender.aspx

[4] Ibid.

[5] http://www.bbc.com/news/world-europe-14038419

[6] John G. Paton: Missionary to the New Hebrides, The Banner of Truth Trust, Edinburgh, 1965, 2007, pp. 14-17, 25-26

[7] Vry vertaal uit https://www.challies.com/articles/boys-need-their-moms/

[8] https://www.challies.com/series/christian-men-and-their-godly-moms/

[9] https://www.challies.com/articles/boys-need-their-moms/

[10] Aangehaal in Jeff Pollard & Scott T. Brown, Red., A Theology of the Family, The National Center for Family-Integrated Churches, Wake Forest: NC, 2014, p. 173

Die Drie-Enige God en jou huwelik

Trinity symbol

A.W. Tozer het gesê:  ‘What comes into our minds when we think about God is the most important thing about us.’[1]  Gen. 1:26a lê die fondasie vir hoe ons reg oor die Here moet dink.  As jy dit doen, sal dit jou huwelik vir die goeie beïnvloed.  Hoe kan ons weet dat die Here ‘n Drie-Enige God is en hoe help dit ons huwelike?

 

Mense kon dit nie uitdink nie

‘n Maand gelede het ‘n Jehova’s Getuie by my hek gestaan.  Volgens hom het mense die Drie-Eenheid uitgedink.  ‘Kan jy die Drie-Eenheid verstaan?’ het hy gevra.  ‘Kan jy God se ewigheid verstaan, die feit dat Hy nooit ‘n begin gehad het nie?’ het ek geantwoord.

 

Die feit dat ons die Drie-Eenheid nie kan verstaan nie, beteken nie dat dit nie waar is nie.  As jy God se wese heeltemal kan verstaan, is jy so groot soos Hy.  En as jy so groot soos die Here is, is dit nie die moeite werd om Hom te dien nie.

 

Bloot die feit dat ons die Drie-Eenheid nie kan verstaan nie, wys dat dit nie deur ‘n mens uitgedink is nie en dat dit die waarheid is.  Wie kon ‘n leerstelling uitdink wat sê dat daar net een God is, maar dat Hy in drie Persone bestaan?

shield_trinity

  • Die Vader is God, die Seun is God, die Heilige Gees is God.
  • Die Vader is nie die Seun of die Heilige Gees nie; die Seun is nie die Vader of die Heilige Gees nie; die Heilige Gees is nie die Vader of die Seun nie.
  • Daar is net een God, nie drie nie.
  • God is altyd al drie Persone gelyk, en nie partykeer die Vader, op ander kere die Seun, en by tye die Heilige Gees nie.

 

Die eerste vers in die Bybel leer dit

Ken jy Gen. 1:1 uit jou kop uit?  Baie mense wat die vers ken, het nog nooit diep daaroor gedink nie.  Die vers sê:  “In die begin het God die hemel en die aarde geskape.”  Die Hebreeuse woord vir God is ‘Ĕlôhîym en staan in ‘n meervoud.  Dit dui op God se menigvuldige krag, maar impliseer ook dat Hy in meer as een Persoon bestaan.

 

In Gen. 1:2 lees ons van God se Gees, en in v.3 van sy Woord (‘God het gesê’).  Volgens die res van die Bybel is God se Woord en sy Gees unieke Persone.  Joh. 1:1-3 sê dat die Woord God is, maar dat Hy ‘n aparte Persoon is wat alles geskep het.  Volgens Hand. 5:3-4 is die Heilige Gees God, maar uit Joh. 15:26 weet ons dat Hy nie die Vader of die Seun is nie.  Gen. 1:2, Job 33:4, Ps. 33:6, 104:30 leer vir ons dat Hy lewe en orde in die skepping gebring het.

 

Die res van die Bybel bevestig dit

Meer as 40 persone uit alle vlakke van die samelewing het die Bybel oor ‘n tydperk van 1600 jaar neergeskryf.  As almal van hulle die punte en diagram hierbo bevestig, kan ons met sekerheid weet dat ons nie per ongeluk ‘n vers of twee verkeerd geïnterpreteer het nie.  Waar bevestig die Bybel dit?

 

In Gen.1:26a lees ons:  “En God het gesê:  Laat Ons mense maak na ons beeld, na ons gelykenis”.  Die Joodse rabbi’s het gesê dat God in v.26a met engele praat.  Maar dit kan nie wees nie, omdat die engele ons nie gemaak het nie, omdat ons nie na hulle beeld gemaak is nie, en omdat God nie hulle raad gevra het toe Hy ons geskep het nie (Jes. 40:14).

 

Ander dink dat God in v.26a ‘n koninklike meervoud gebruik.  ‘n Koning sal bv. sê:  ‘Dit is vir ons ‘n voorreg om jou in ons midde te hê.’  Ons lees egter nie in die Hebreeuse taal van konings wat só na hulleself verwys nie.[2]

 

Die Skrif leer baie duidelik dat daar net een God is, maar dat Hy in drie Persone bestaan.

 

[1] Daar is net een God

Gen. 1:1, Deut. 6:4, 4:35, 39, 32:39, Jes. 44:6, 8, 45:5-6, 21-22, Joh. 10:30, 1Kor. 8:4-6, 1Tim. 2:5.

 

[2] God bestaan in drie Persone

Gen. 1:26, 3:22, 11:7, Ps. 2:2, 6-7, 45:7-8, 110:1, Jes. 6:8, 48:16, Matt. 3:16-17, 28:19, Joh. 1:1, 14:16, 23, Hand. 2:33, 1Kor. 12:4-6, 2Kor. 13:13, Ef. 2:18, 4:4-6, Heb. 1:1-3, 1Pet. 1:2.

 

God se liefde wys dit

In 2013 het ek Ps. 136 gepreek.  In die ESV sê al 26 verse:  ‘his steadfast love endures forever.’  Op daardie stadium het ek oor God se liefde probeer dink, en kon ek dit nie verstaan nie.  Ek het vir my vrou gevra:  ‘Wat is liefde – ek kan dit nie verstaan nie?’  ‘God is liefde,’ het sy geantwoord.

 

Wat beteken dit dat God liefde is (1Joh. 4:8)?  Dit beteken o.a. dat God in sy diepste wese liefde is.  Hy definieer wat liefde is.  Dit beteken ook dat God in meer as een Persoon bestaan.[3]  Hoe weet jy dit?  As God nog altyd liefde was, moes daar iemand gewees het om lief te hê.  Volgens Joh. 17:24 het die Vader die Seun van ewigheid af liefgehad.  Die Heilige Gees het ook in die liefde tussen die Vader en die Seun gedeel, net soos wat Hy God se liefde aan óns harte kommunikeer (Rom. 5:5).

 

Omdat die Drie-Enige God nog altyd in perfekte liefde en gemeenskap met Homself gelewe het; het Hy ons nie gemaak omdat Hy eensaam of verveeld was, of omdat Hy ons nodig gehad het nie.

 

Die huwelik wys dit

Die maan bewys dat die son bestaan, omdat die lig wat dit afgee ‘n weerkaatsing van die son is.  ‘n Spieël bewys dat die objek wat daarin gereflekteer word bestaan.  Alhoewel dit onvolmaak is, wys die huwelik dat God in meer as een Persoon bestaan:  Adam en Eva was twee persone, maar in die huwelik was hulle een (Gen. 1:27, 2:23-24).

 

As jy aan die Here behoort is jy nie net fisies een in die huwelik nie, maar ook geestelik een (Mal. 2:15).  As jy een is met die Here, is jy immers een met almal wat met Hom verenig is, nie waar nie?  As jy die eenheid in jou huwelik wil versterk, moet jy seker maak dat jy en jou lewensmaat een is met die Here.  Hoe gebeur dit?

 

Voordat God die wêreld gemaak het, het Hy ons in Christus gekies om sy kinders te wees (Ef. 1:4-5, 2Tim. 1:9).  Deur Jesus se kruisdood het Hy sy plan in werking gestel en ons in Christus verlos en vergewe (Ef. 1:7).  As jy jou bekeer en in Christus glo, sal die Heilige Gees in jou woon en sal jy hierdie wonderlike eenheid ervaar (1Kor. 6:17, Ef. 1:13).  Jy sal een wees met die Drie-Enige God en Hy met jou (Joh. 14:23, 17:21, Gal. 2:20, 1Joh. 2:24, 4:13).  Dit beteken nie dat jy God word nie, maar eerder dat sy lewe in jou is (Joh. 15:4-5, 17:3, 2Pet. 1:4).

 

Jy moet hierdie eenheid bely deur in die Naam van die Drie-Enige God gedoop te word (Matt. 28:19).  Ek het reeds gewys dat jy deur jou eenheid met die Here ook een word met sy liggaam, die kerk (1Kor. 12:12-14).  Hy het ook die Woord en gebed as middele gegee, sodat jy in Hom kan bly en in gemeenskap met Hom kan lewe (Joh. 8:31, 15:7).  Jy moenie net die Woord hoor nie maar dit doen, sodat jy in Hom en sy liefde kan bly (Joh. 15:9-10).

 

As jy en jou lewensmaat só een is met die Here, is daar geen rede om verdeeld te wees nie.  Soos die Vader, die Seun en die Heilige Gees een is en julle een is met Hom, kan julle ook een wees met mekaar (Ef. 4:4-6).  Om hierdie eenheid te bewaar moet jy met die Gees se hulp nederig, vredevol, sagmoedig, geduldig, liefdevol, verdraagsaam en vergewensgesind wees (Ef. 4:1-3, Fil. 2:1-5, Kol. 3:12-15).  As jy selfsugtig is, sal daar verdeeldheid wees (Jak. 4:1-2).

 

Dalk het jy en jou lewensmaat nie dieselfde persoonlikheid, talente of belangstellings nie.  Dit is nie ‘n rede om verdeeld te wees nie.  Die dinge wat julle saambind is baie hegter as julle belangstellings (Ef. 4:4-6).  Buitendien kan julle die verskille gebruik om mekaar aan te vul, net soos wat ‘n klavier verskillende note moet hê om ‘n melodie te maak.  Moet dan nie soos die wêreld skei omdat julle nie ‘compatible’ is nie.  As beide van julle in Christus glo is julle ‘compatible’.

 

As jy met ‘n ongelowige getroud is sal julle tot ‘n sekere mate verdeeld wees, omdat jý een is met die Here en jou maat nie (Matt. 10:34-36).  As jou ongelowige lewensmaat getroud wil bly moet jy nie skei nie, maar eerder Christus se liefde uitleef en verkondig sodat hy of sy gered kan word (1Kor. 7:12-14, 1Pet. 3:1-6).

 

Hoe kan jy prakties in jou huwelik wys dat jy in die Drie-Enige God glo en dat jy aan Hom behoort?  Die Vader, die Seun en die Heilige Gees was nog nooit jaloers op mekaar nie; elkeen dink aan die ander se heerlikheid.  Die Vader en die Seun verheerlik mekaar (Joh. 8:54, 17:1, 5).  Die Heilige Gees verheerlik die Seun (Joh. 16:14).  So moet ‘n man en vrou mekaar in die huwelik eerste stel; elke moenie net aan sy of haar eie belange dink nie (Fil. 2:3-4).

 

Ons moet ook onthou dat ons na God se beeld gemaak is (Gen. 1:26-27).  As jy verdeeld is in jou huwelik straal jy ‘n verkeerde beeld uit.  Jy sê in effek dat die Vader, die Seun en die Heilige Gees verdeeld is.  Jou lewe is ‘n slegte advertensie vir die evangelie.  Jy reflekteer nie die beeld van God soos jy moet nie.

 

Omdat ons soos die Here een is, kan ons nie met ons lewensmaats of ander gelowiges baklei sonder om onsself te beskadig nie.  Paulus sê:  “So behoort die mans hulle eie vroue lief te hê soos hul eie liggame.  Wie sy eie vrou liefhet, het homself lief; want niemand het ooit sy eie vlees gehaat nie, maar hy voed en koester dit, net soos die Here die gemeente.” (Ef. 5:28-29).  Wat in 1Kor. 12:26, Ef. 4:25 vir die liggaam van Christus geld, geld ook vir die huwelik:  “En as een lid ly, ly al die lede saam … Daarom, lê die leuen af en spreek die waarheid, elkeen met sy naaste, want ons is mekaar se lede.”

 

Kommunikeer jy sleg in jou huwelik?  Kyk hoe die Vader, die Seun en die Heilige Gees met mekaar kommunikeer (v.26, Joh. 15:15, 16:13-15).  As jy aanhoudend deur die Woord en gebed met die Drie-Enige God kommunikeer (Ef. 2:18, 1Joh. 1:3), sal jy leer om met jou lewensmaat te kommunikeer.  Spreuke, Ef. 4:25-32 en Jak. 1:19 sal jou help om reg te praat en te luister.  Vra die Here om jou te help om hierdie gedeeltes toe te pas.

 

Maak tyd en doen moeite om te kommunikeer.  Moenie so besig raak dat jy vergeet om te gesels nie.  As jy ‘n film saam kyk kan jy voor die TV eet, maar moenie ‘n gewoonte daarvan maak nie.  As jy voor die TV sit kyk almal voor hulle en gesels niemand nie.  Pasop ook vir Facebook, Whatsapp en YouTube:  dit steel maklik die tyd wat jy kon gebruik het om te gesels.

 

Lees eerder ‘n boek saam, gesels oor wat in jou dag gebeur het, beplan saam om die huis of die tuin mooi te maak, bid saam, eet saam, drink saam koffie, lees saam uit God se Woord en gaan saam kerk toe.

 

Om jou huwelik te help moet jy in die Drie-Enige God glo.  Sonder Hom is jy soos iemand wat ‘n huis sonder ‘n fondasie bou.  Maar dit is nie genoeg dat jy die Bybelse waarheid oor die Drie-Eenheid ken nie:  jy moet dit toepas en deur Jesus Christus in ‘n persoonlike verhouding met hierdie God lewe.  As jy dit nie doen nie, is jy soos iemand wat ‘n swak fondasie lê en buitendien niks daarop bou nie.

 

[1] A.W. Tozer, The Knowledge of the Holy, HarperCollins, New York, 1961, p. 1

[2] Wayne Grudem, Systematic Theology, Inter-Varsity Press, Nottingham: England, 1994, 2007, p.227

[3] C.S. Lewis, Mere Christianity: Fiftieth Anniversary Edition, HarperCollinsPublishers, London, 1942, 2002, pp. 174-176.  Jonathan Edwards, Essay on the Trinity aangehaal in John Piper, The Pleasures of God, Mentor: Christian Focus Publications, Ross-shire: Great Britain, 2001, pp. 44-45, n. 24

‘n Liefdeslied vir Jesus

Psalm 45

Die meeste liede wat jy op die radio hoor gaan oor liefde.  Dit is asof die wêreld daarna soek, maar dit nie kry nie.  En hulle sal dit ook nie kry nie, omdat dit net in die Bruidegom, Messias en Koning van Ps.45 gevind kan word.  Net dié wat met Hom getroud is, kan begin om te verstaan wat ware liefde is.

 

Die seuns van Korag het ‘n lied geskryf wat onder begeleiding van die musiekleier op die Koning se troue gesing moes word (v.1).  Dit moes op die wysie van ‘Lelies’ gesing word, omdat die mense van die dag daarmee bekend was (v.1).

 

Die Psalm se inhoud was bedoel om dié wat dit gesing en gehoor het, te onderrig (v.1).  Maar omdat dit ‘n liefdeslied was, moes hulle dit nie as koue feite geleer het nie (v.1).  ‘n Diep liefde vir die koning moes hulle harte gevul het; dit moes selfs trane in hulle oë gebring het (v.2).

 

Vir die psalmis was dit so (v.2).  Hy kon dit nie meer inhou nie, maar moes met elegante woorde sy emosie op papier gesit het en dit aan die Koning voorgedra het (v.2).

 

Hierdie lied is op verskeie konings se troues gesing, maar uiteindelik is dit in die Messias vervul.  Sekere dele daarvan kan op geen aardse koning toegepas word nie (bv. v.7-8), terwyl daar ander elemente is wat nie vir die Messias geld nie (bv. die prinsesse en bruidsmeisies in v.10, 15).  Die res van die Skrif sal ons help om die Psalm reg te interpreteer en toe te pas.[1]

 

Die Bruidegom (v.3-10)

In ons kultuur wag almal vir die bruid wanneer daar ‘n troue is.  Maar in die ou Joodse kultuur was dit nie so nie, veral nie by die koning se troue nie.  Die fokus was op die koning; dit was sý groot dag.  Mense het hom dikwels as die mooiste en aantreklikste man in die land beskou (1 Sm.9:2, 16:12, 18).

 

By Jesus se eerste koms was Hy nie aantreklik nie (Jes.53:2), maar toe Hy in die hemel verheerlik is was Hy die aantreklikste van almal, die skoonste uit 10 000 (v.3).

 

As Hy gepraat het, was die woorde van sy lippe vol van genade; Hy het bemoedigende en opbouende woorde gepraat (v.3, Sp.22:11).  Die genade in sy woorde het gewys wat in sy hart was, en daarom het God Hom vir ewig geseën (v.3, Mt.12:34).

 

Hy was ‘n Magtige Held op sy perd wat met die swaard sy vyande oorwin het (v.4-5, Ps.24:8, Jes.9:5, 49:2, Heb.4:12, Op.1:16, 6:2, 19:11, 15, 21).  Hy het geveg om waarheid, ootmoed [Eng. ‘meekness’] en geregtigheid te bevorder, en nie omdat Hy bloedlustig was nie (v.5).

 

Sy plan was om valsheid en bedrog in die nek te slaan, om diktators tot ‘n val te bring, en om die leeu van ongeregtigheid dood te skiet (v.5).  Sy sterk regterhand sou hiervoor gesorg het (v.5).  Sy vyande sou vreesbevange gewees het vir die swaard in sy regterhand (v.5, 4).

 

Hy was ook ‘n dodelike skut wat met een skoot sy skerp pyle in hulle harte getref het (v.6).  Al die volke sou voor Hom geval het, totdat Hy al sy vyande aan sy voete onderwerp het (Ps.110:1-2, 5-6).  In al hierdie dinge het Hy sy Koninklike heerlikheid en majesteit gewys (v.4-5, Jud.25).

 

Die rede hoekom Hy sy vyande so maklik oorwin het, is omdat Hy nie net ‘n mens was nie, maar God op die troon (v.7).  En omdat Hy God was, sou Hy en sy troon vir ewig bestaan het (v.7, Dn.2:44, 7:14, Lk.1:33, Heb.1:8-12).  Daar sou geen opvolger tot die troon gewees het nie.  Met sy septer sou Hy vir ewig in geregtigheid regeer het (v.7).  Hy het dit immers liefgehad en goddeloosheid gehaat (v.8, 11:7).

 

Om hierdie rede het God Hom gesalf om die Messias te wees (v.8).[2]  Volgens die psalmis het God vir God gesalf (v.8).  Daar is net een God (Dt.6:4), maar uit v.8 is dit duidelik dat daar meer as een Persoon in die Godheid is (Mt.3:16-17, 28:19, Ef.4:4-6).

 

Toe die Messias sy aardse bediening begin het, het God Hom gesalf en vir sy werk afgesonder (v.8, vgl. 1 Sm.16:13).  Hy het Hom met vreugde-olie gesalf (v.8).  Wat beteken dit?

 

Die olie is simbolies van die Heilige Gees wat Hom vir sy taak bekragtig het (Lk.3:22, 4:18, Jh.1:33, Heb.1:9).  Die vreugde-olie verwys na die Vader se tevredenheid met die Seun, sodat Hy Hom gesalf het om die Messias te wees (v.8, Mt.3:17).  Vir die Vader was Hy ver verhewe bo die res, en was daar niemand anders op die lys van moontlike kandidate nie (v.8).

 

Sy klere het soos parfuum geruik wat van mirre, aalwyn en kassie gemaak is (v.9, vgl. Eks.30:23-24, Sp.7:17).  Mirre was afkomstig van ‘n sekere soort Arabiese balsamboom.  Die boom se geurige rooi-bruin gom is uitgedroog en tot ‘n fyn poeier gemaal.  Ons almal weet wat aalwyn is.  Kassie kom van ‘n geurige boombas af.[3]  Toe die Messias met hierdie geurige mengsel gesalf is, het dit tot op sy skouers afgeloop, sodat Hy lekker geruik het vir sy troudag (v.8-9, vgl. Ps.133:2).

 

Die troue is gehou in paleise wat uitgelê is met ivoor (v.9, vgl. 1 Kon.22:39).  Daar was ook musikante wat met snaarinstrumente by die troue gespeel het (v.9, 33:2, 150:3-4).  Die Koning was wêreld-beroemd, sodat die dogters van konings as eregaste na sy troue toe genooi is (v.10).

 

Die koningin – die kerk volgens Ef.5:32 – het die ereplek aan sy regterhand ingeneem (v.10, vgl. 1 Kon.2:19, Ef.2:6).  Haar trourok is van Ofir se kwaliteit fyngoud gemaak (v.10, Job 28:16, 1 Kon.10:11).  So het sy die Koning se rykdom en heerlikheid weerspieël (2 Kor.3:18).

 

Die Bruid (v.11-18)

Geen fees in ons kultuur is so groot soos ‘n troue nie.  Bittermin mense nooi bv. 150 of 200 mense na hulle verjaarsdae toe.  Ek ken ook nie iemand wat so baie mense na sy of haar huis toe nooi vir Kersfees nie.

 

In die Bybelse kultuur was dit dieselfde, en wanneer Jesus terugkeer sal dit weer so wees.  Ps.45 gee vir ons ‘n idee van hoe groot, ryk en belangrik hierdie fees sal wees.

 

Die Koning het in v.11 vir die koningin gesê dat sy ‘n nuwe lojaliteit gehad het.  Om by Hom te wees, moes sy haar volksgenote en ouerhuis verlaat het (Gn.2:24, 24:58).  Hy moes vir haar belangriker gewees het as haar familie (v.11).

 

As sy dít gedoen het, sou Hy haar skoonheid begeer het (v.12).  Haar toewyding en onderdanige eerbied waardeur sy Hom Here genoem het, was vir Hom belangriker as haar goue rok en uiterlike skoonheid (v.10-12, 95:6, Jes.54:5, 1 Pt.3:3-4, Op.19:7-8, 21:2).

 

Hy was so verhewe, dat ‘n skatryk stad soos Tirus haar skatte aan sy voete kom neerlê het (v.13, Ps.72:10, Jes.49:7, 60:6-7, Mt.2:11, Op.21:24, 26, vgl. Esg.26-28).  Hy het van die skatte vir sy aanstaande gegee, sodat sy haarself daarmee versier het (v.14).  Die prinses van v.14 was oppad om die koningin van v.10 te word.  Haar veelkleurige trourok was met dun goue draad deurweef (v.14-15, 10, vgl. Gn.37:3).

 

Die bruidsmeisies het agterna geloop toe die prinses na die Koning toe gelei is (v.15).  Hulle was bly toe sy by die Koning aangekom het (v.16, Gn.2:22, Jh.3:29, 2 Kor.11:2).  ‘Die Koning sal baie kinders hê; hulle sal saam met Hom oor die land regeer!’ het hulle gesê (v.17, Heb.2:10, 13, Op.5:10).

 

Maar al het hulle so van sy kinders gepraat, sou Hy alleen deur die nasies geprys word en vir ewig onthou word (v.18, 22:31-32, 145:4, Jes.59:21, 1 Kor.11:26, Op.5:9).  Hy was nie net die Messias van die Jode nie, maar van die hele wêreld.

 

As Hy dan moeite gedoen het om sy troue onder die nasies aan te kondig, moet jy moeite doen om dit by te woon.  Moenie op die gratis en ewige feesmaal van die hemel uitmis, omdat jy flou verskonings gehad het vir hoekom jy nie daar kan wees nie (Lk.14:18-20).  Moenie soos sommige mense sê:

 

  • ‘Ek wil my kinders en kleinkinders geniet terwyl hulle nog jonk is, en het nie nou tyd om oor die hemel te dink nie – ek sal dit doen wanneer hulle uit die huis uit is.’
  • ‘Ek het dinge wat ek in die lewe wil bereik, en sal later die hemel oorweeg. Ek wil eers geld maak, my jongmens lewe geniet, die wêred sien en trou.  As ek dit klaar gedoen het, sal ek dink oor wat Jesus gesê het.’
  • ‘My lewensmaat en kinders stel nie belang in geestelike dinge nie. As ek heeltyd oor die Here praat, sal ek hulle verloor.  Dalk moet ek wag dat hulle tot bekering kom, gedoop word, by die kerk aansluit en die Here volg.  Dit sal beter wees as ons dit saam doen, en daarom sal ek ‘n bietjie wag.’
  • ‘Die Here het my kind van my af weggevat. Die kerk het my seergemaak.  Die ds. het my nie besoek toe ek in die hospitaal was nie.  Hoekom moet ek dan die Here dien?’
  • ‘Ek werk 14 ure per dag. Om nog op ‘n Sondag my gesin se tyd te steel en in die kerk te sit werk nie vir my nie.  Wanneer ek die dag aftree sal ek oor die Here en die lewe hierna dink.’

 

Op grond van Jesus se woorde in Lk.14:26, 33 wil ek vir jou sê:  ‘Toemaar, moenie jou tyd mors nie.  As jou lewe, persoonlike gemak, jou huweliksmaat, jou kinders, familie, rykdom, werk, toekomsplanne of enigiets anders vir jou belangriker is as Jesus, moet jy Hom nie volg nie.’

 

Volgens v.11 vereis die Koning sy bruid se totale toewyding.  Hy stel nie belang in ‘n bruid wat in haar hart wens dat daar ‘n ander prins op ‘n wit perd na haar toe sal kom nie.  Hy weier om met self, geld, plesier en die afgode wat in ons harte is, te kompeteer (Jk.4:4-5).

 

As ons egter ons lewens aan Hom wy, sal Hy die volle rykdom van sy liefde aan ons openbaar.  Ons sal sy heerlike skoonheid bewonder en bevoorreg voel dat Hy ons gekies het om sy bruid te wees (v.3, 2 Ts.1:10).  Hy sal sagte woorde vir jou sê om jou te bemoedig in die swaarkry wat jy in hierdie wêreld moet deurmaak (v.3, Jes.50:4, Lk.4:22, Jh.1:14, 16-17, 7:46).

 

Hy sal veg om jou teen Satan en die wêreld se aanvalle te beskerm, en het dit eintlik reeds tot die dood toe gedoen toe Hy aan die kruis gehang het (v.4-6, Jh.12:31, 16:33, 1 Jh.3:8, 5:4).

 

Hy sal jou geestelike armoede in rykdom verander, en die lelike eendjie van jou sonde in ‘n beeldskone en weelderige bruid verander; Hy sal vir jou die waardigheid gee wat jy nie in jouself het nie; Hy sal aan jou ‘n ereplek in sy teenwoordigheid gee, sodat jy nie die lof van mense hoef te soek nie (v.10, 13-15).

 

Alles wat jy nog ooit in hierdie wêreld begeer het, kan nie met daardie dag vergelyk word nie.  Dit sal soos die lekkerste troue wees wat al ooit bygewoon het, en dit sal nie ophou nie.  Dit sal nie ‘n huwelik wees wat op die wankelrige fondasie van Hollywood se romanse gebou is, sodat dit soos húlle s’n in die skeihof eindig nie.  Dit sal eerder gebou wees op die rotsfondasie van Jesus Christus se ewige liefde, karakter, verbond en beloftes.

 

Die groot vraag is of jy daar sal wees?  Sal jy die enigste perfekte Bruidegom ontmoet en vir ewig saam met Hom in sy hemelse paleis woon?  Sal die dapper Koning op sy perd as ‘n vriend of ‘n vyand na jou toe aangery kom?

 

Sal die pyle van sy toorn jou hart penetreer en laat bars, omdat jy nie heiligheid liefgehad het en goddeloosheid gehaat het nie (v.8, 97:10)?  Sal Hy sy skerp swaard deur jou siel dryf, omdat jy vir jouself gelewe het en nie vir Hom wat die asem in jou longe, en elke ander goeie gawe vir jou gegee het nie?

 

Hoekom praat jy nie liewer vandag nog dinge met Hom uit nie?  Hy is baie gawer as wat jy dink, en sy liefde vir jou is baie groter as wat jy besef.  Dit is soos ‘n oseaan waarvan die water verdamp en in reënwolke verander.  Die wind van sy Gees waai dit na jou lewe toe, en veroorsaak dat dit in emmers oor die riviere van jou hart reën (Rm.5:5).

 

Wie kan dan keer dat hierdie riviere van liefde vir Jesus terugvloei na die oseaan van sy liefde toe waar dit begin het?  Jou liefdeslied vir Jesus is eintlik maar net ‘n eggo van die liefdeslied wat Hy eerste gesing het.  “Ons het Hom lief, omdat Hy ons eerste liefgehad het.” (1 Jh.4:19).

 

[1] Al kan ons nie elke detail op die Messias toepas nie, maak ek deurgaans van hoofletters gebruik wanneer ek van die Koning praat.  Die Psalm het immers hoofsaaklik betrekking op die Messias.

[2] Messias beteken ‘gesalfde’.

[3] James Orr, International Standard Bible Encyclopedia, inskrywings onder ‘myrrh’, ‘aloes; lignaloes’ en ‘cassia’.

’n Reaksie op gay huwelike in die NG-Kerk

Gay wedding

Soos jy in laasweek se koerant gesien het, het die onlangse NG-Sinode besluit om gay huwelike te aanvaar. Dr. André Bartlett het die saak voorgestel.  Die Vergadering het dit met 102 teen 88 stemme deurgestem.  ‘n Dag later is die herbewoorde mosie met 114 teen 63 stemme aanvaar.  Hierdie stem het nie net opskudding in die NG-Kerk veroorsaak nie, maar in verskillende Christelike kerke in Suid-Afrika.  Hoe moet ons daarop reageer?  ‘n Deeglikse studie van Romeine 1:26-27 sal vir ons wys hoe.

 

Vroue (v.26)

Verlede Vrydag was ek by ‘n debat tussen James White en Graeme Codrington. In die debat het Codrington gesê Romeine 1:26 verwys nie na lesbianisme nie, omdat dit nie algemeen was in die eerste eeu nie.  Volgens hom het Paulus gepraat van Jode wat dit as ‘n skande beskou het dat vroue nie swanger word nie.  Maar volgens die Romeinse digter Juvenal was lesbian aktiwiteit algemeen in die eerste eeu.[1]  Buitendien sal God nie ‘n samelewing straf, omdat vroue swanger wil word, maar nie kan nie.  In v.26 praat Paulus ongetwyfeld van lesbianisme wat in God se oë ‘n skandelike sonde is.

 

Mense is goddeloos en onderdruk God se waarheid (v.18-19). Hulle sien sy heerlikheid in die skepping, maar wil Hom nie eer of dank nie (v.20-21).  Hulle aanbid die skepping eerder as die Skepper (v.22-23).  Dáárom gee God hulle oor aan seksuele sonde (v.24), homoseksuele sonde (v.26-27), en onderstebo denke, sodat hulle allerhande sondes doen en goedkeur (v.28-32).  Mense wat die ware God vir vals gode verruil (v.23) en die waarheid vir die leuen (v.25), sal die natuurlike omgang met die teenoorgestelde geslag verruil vir dit wat teen-natuurlik is (v.26-27).  As jy dus die Skepper-skepping orde omruil (v.23, 25), sal jy die man-vrou orde van Genesis 1-2 omruil (v.26-27).  Enige samelewing wat dít doen wys daardeur dat hulle onder God se oordeel is (v.26, vgl. Genesis 19).  God gee hulle oor aan skandelike drange, sodat hulle hul luste bevredig en hulleself vernietig (v.26-27).  Hulle is soos ‘n trok wat afdraende ry sonder remme.

 

Codrington het by die debat gesê ‘skandelike drange’ verwys na dit wat skandelik was vir die Joodse kultuur. Maar hoekom gee God mense oor en straf Hy hulle vir iets wat teen die kultuur is, maar nie teen die Skrif nie (v.18, 26)?  Codrington het ook gesê dat die dade van v.26 skandelik is, maar nie sondig nie.  Hy is verkeerd, want Paulus koppel ‘skandelik’ aan ‘drange of hartstogte’.  Die Grieks vir drange (pathos) word altyd in die Nuwe Testament gebruik in die konteks van seksuele sonde (v.26, Kolossense 3:5, 1 Tessalonisense 4:5).

 

Volgens Paulus is homoseksuele drange en dade teen die natuur (v.26-27, vgl. Genesis 1:26-27, 2:18-25, Matteus 19:4-6). Volgens party sê Paulus eintlik dat mense wat gay gebore is, nie heteroseksueel moet wees, of andersom nie.  Met ander woorde, jy moenie anders wil wees as wat God jou gemaak het nie.  Maar Paulus sê nie dat gays teen húlle natuur optree nie, maar eenvoudig teen die natuur.  Homoseksualiteit is onnatuurlik.  Twee mense van dieselfde geslag se liggame pas nie biologies bymekaar nie, en hulle kan ook nie kinders kry nie (Genesis 1:28).  Daar is ook geen wetenskaplike bewys dat gays so gebore is nie.[2]  As mense so gebore is, kan hulle nie verander nie.  Tog wys die Skrif en ervaring dat hulle kan (1 Korintiërs 6:11).

 

Daar is mense wat Matteus 19:12 aanhaal om te wys gays is so gebore: “Want daar is persone wat onbekwaam is om te trou, wat van die moederskoot af so gebore is, en daar is persone wat deur die mense onbekwaam gemaak is, en daar is persone wat hulleself onbekwaam gemaak het ter wille van die koninkryk van die hemele.  Wie dit kan vat, laat hom dit vat.”

 

Jesus praat nie hier van gays nie. Hy praat oor die huwelik, egskeiding, hertrou, en enkelskap.  Hy sê dat enkelskap, nie homoseksualiteit nie, die enigste alternatief is vir die huwelik tussen ‘n man en ‘n vrou.  Party mense is enkel omdat hulle so gebore is:  misvormd, gestremd, of geen begeerte om te trou nie.  Ander is enkel omdat hulle ontman is (Jesaja 56).  Ander kies om enkel te bly vir die Koninkryk (1 Korintiërs 7:32).  Die vers het niks te doen met gays, asof party so gebore is, ander so gemaak is, en ander dit kies vir die Koninkryk nie.

 

Mans (v.27)

Kobus en Alan is deel van ‘n Bybelskool. Albei sit ure in om voor te berei vir hulle klasse, maar hulle interpretasies van sekere verse verskil lynreg.  Hoekom verskil hulle?

 

Kobus is ‘n gelowige. Hy glo die Bybel is God se woorde, weerspreek homself nie, is onfeilbaar, foutloos, geïnspireer, die finale gesag vir geloof en lewe, verander nie saam met die tyd of kultuur nie, is die standaard vir alle waarheid, akkuraat in alles wat dit leer (profesie, wetenskap, geskiedenis), algenoegsaam vir lewe en godsaligheid.

 

Voor hy die Skrif bestudeer ondersoek hy sy hart, bely hy die sonde wat die Heilige Gees bedroef, en bid hy volgens Psalm 119:18 vir insig. Hy kyk na die letterlike betekenis van woorde en sinne, bestudeer die agtergrond, kyk na die onmiddellike en breë konteks, vergelyk dit met die res van die Skrif, kyk hoe heilige manne deur die kerk se geskiedenis dit verstaan het, en soek hoe hy dit kan gehoorsaam.  Vir hom moet die betekenis uit die teks self kom (eksegese).

 

Alan glo die Bybel is nie altyd akkuraat nie, weerspreek homself, is nie algenoegsaam nie, is soms outyds en moet aanpas by die tye, is vol van mense se opinies, en is nie die enigste gesag vir geloof en lewe nie. Hy benader die Skrif akademies, buig hom nie neer voor God se Woord nie, maar sit soms in oordeel daaroor, en sê dit is verkeerd op plekke.  Hy is nie ernstig oor ‘n heilige lewe nie, en probeer selfs om sonde uit die Bybel te regverdig.  Hy glo wat die kultuur sê, en wil die Skrif daarby aanpas.

 

Hy verwerp die interpretasie van die kerk deur die geskiedenis, en heg meer waarde aan die interpretasie van mense wat krities is oor die Bybel. Hy bestudeer die Skrif om slim te word, en nie om dit te gehoorsaam nie.  Hy is nie gepla oor eksegese soos Kobus nie.  Hy het klaar besluit wat hy glo, en probeer om die Skrif daarby aan te pas.  Hy lees sy vooropgestelde idees in die teks in (eisegese).  Alan se metode van Skrif-interpretasie is die metode van mense wat pro-gay is.

 

Hoe móét ons dan v.27 interpreteer?

 

Soos die vroue, het die mans die natuurlike omgang verruil vir dit wat teen-natuurlik is, en met begeerte gebrand vir mekaar (v.27). Hierdie vers wys dat God nie net gay dade verdoem nie, maar ook gay aangetrokkenheid of drange (v.26-27).  Gay oriëntasie of neigings is ‘n mite.  Mense sê:  ‘Ek kan nie onthou dat ek ooit gekies het om gay te wees nie.’  Sonde werk op ‘n baie dieper vlak as die mens se wil.  Dit werk in ons wese en harte.  Ek kan nie onthou dat ek ooit gekies het om hoogmoedig te wees of mense te vrees nie, en tog sê die Skrif dis sonde.  Geen gay persoon is per ongeluk wellustig, kyk per ongeluk na gay porn, of klim per ongeluk saam met iemand in die bed nie.  Hulle kies om God se skeppingsorde te verruil (v.26-27).

 

By die debat het Codrington gesê v.27 praat van gay dade met seuns, van gay prostitusie in afgodstempels. Dit is ‘n skoot in die donker, want die teks sê niks van ‘n afgodstempel, prostitute, of jong seuns nie.  Mense wat pro-gay is sê:  ‘Paulus basseer v.27 op Levitikus 18:20 wat gay dade in die konteks van afgodery verbied.  Liefdevolle gay verhoudings is nie verkeerd nie.’  Maar wat van die ander sondes in Levitikus 18?  Is egbreuk, bestialiteit, en bloedskande net verkeerd in die konteks van afgodery, maar aanvaarbaar as jy dit by jou huis doen?  Paulus is nie net teen gay prostitusie, verkragting, en molestering nie.  Hy sê dat die mans brandende luste vir mekaar het (v.27).  Duidelik is alle gay drange en dade skandelik (v.26-27).

 

As ‘n natuurlike gevolg van hulle skandelike dade, ontvang hulle in hul liggame die gepaste straf vir hulle dade (v.27). Paulus verwys moontlik na siektes soos VIGS of ander seksueel-oordraagbare siektes.  Die straf pas by die oortreding.  Die oortreding was seksueel, en daarom is die straf ook seksueel.  Hulle maai wat hulle gesaai het (Galasiërs 6:7-8).

 

Codrington het gewys dat hulle gestraf word vir hulle dwaling, nie vir hulle sonde nie.  Sy punt was om te wys dat die dade van v.27 nie sondig is nie.  Maar die Skrif gebruik die Griekse woord vir ‘dwaling’ (planēs) met verwysing na die ‘dwaalweg van sonde’ (Jakobus 5:20, 2 Petrus 2:18, Judas 11).

 

Hoe moet ons dan reg reageer op die kwessie van gay huwelike in die NG-Kerk? Moenie ‘n blinde oog gooi en maak of dit niks met jou te doen het nie.  Dit het alles met jou te doen.  Hier is vyf redes hoekom ek so sê:

 

[1] Baie van ons het familie, vriende, en kollegas in die NG-Kerk. Help hulle om nie saam met die stroom te gaan nie (Eksodus 23:2).  Wys vir hulle dat die Kerk se interpretasie van die Skrif nie stand hou onder die normale lees van die teks, deeglike eksegese, die interpretasie wat deur die geskiedenis gehandhaaf is nie.

 

Besef ook dat nie almal in die NG-Kerk ‘ja’ gestem het nie. Raai hulle aan om nie in ‘n gemeente te bly wat teen die besluit is, maar nogsteeds hande vat met pro-gay leraars en kerke nie.  As die NG-Kerk gered kan word, moet hulle saam met ander toegewyde Christene ‘n poging aanwend om dit te doen.  Hulle moet by die fakulteit begin en van die nie-behoudende en liberale dosente ontslae raak.

 

As dit ‘n verlore situasie is, moet hulle die Kerk verlaat (2 Korintiërs 6:17) en ‘n gemeente soek wat die Skrif verantwoordelik preek, heilig is, nie mense vrees nie, en gays liefhet en die evangelie van verlossing met hulle sal deel. God ken sy skape en sal hulle uit die vyand se hande red (Johannes 10:27-29, Esegiël 34:10, 22, 13:22-23).

 

[2] Dalk het jy ‘n gay kind, familielid, kollega, of vriend. Wat sal jy sê as hulle jou oor die NG-Kerk se besluit vra?  As jy Jesus liefhet kan jy nie huiwerig ‘ja’ sê, omdat jy nie jou kind wil verloor nie.  Jesus wil hê jy moet Hom meer liefhê as jou familie (Matteus 10:37, Lukas 14:26).  Wees gaaf met jou gay geliefdes, maar moenie hulle sonde goedkeur met jou woorde, dade, of stilte nie.  Moenie vir jou lesbian dogter en haar meisie ‘n kamer in jou huis gereed maak nie.  As jy hulle sonde goedkeur, sal God hulle bloed van jóú hande eis (Esegiël 3:18).

 

Dalk is jy bang jy verloor jou kind as jy vir hom of haar die waarheid vertel. Maar as jy niks sê nie, sal jy vir ewig jou kind verloor in die hel (1 Korintiërs 6:9-10).  As jy die evangelie deel kan jy jou kind se lewe red (v.16, 1 Korintiërs 6:11).  Vir verdere hulp in die saak kan jy my preek op die blog hieroor lees by https://baptistekerkkemptonpark.wordpress.com/2013/11/16/n-oplossing-vir-homoseksualeit/

 

[3] Die NG-Kerk was vir baie jare die gesig van konserwatiewe Christenskap in Suid-Afrika. Ongelowiges in ons land beskou die NG-Kerk se opinie as die Christen-kerk s’n.  As hulle gesê het:  ‘Ons glo nie wat die Bybel oor gays sê nie,’ kon jy dalk nog stilgebly het.  Maar as hulle die Skrif verdraai, móét ons reageer en opstaan vir die waarheid.  Mense moet weet jy kan nie homoseksualiteit uit die Skrif regverdig nie.  Vir nóg argumente kan jy my preek soek met dié titel:  Sê Bybel REGTIG homoseksualiteit is sonde? (sien die link onder voetnota 2).

 

[4] Gays sal lidmate van ons kerk wil word, by ons Teologiese Seminarium wil studeer, en vra of jou ds. hulle sal trou. Jy en buitestaanders moet weet wat ons glo.  Ons glo dat Christene nie in sonde volhard nie.  Ons glo homoseksualiteit is sonde.  Ons glo net Christene kan lidmate van die kerk wees.  Daarom glo ons dat gays nie lidmate kan wees nie.  Ons glo predikante moet gered wees, heilig leef, en seksueel rein wees (1 Timoteus 3:2).  Ons glo dat mense wat in homoseksualiteit of enige ander sonde volhard nie gered is nie (1 Korintiërs 6:9).  Daarom glo ons gays kan nie predikante wees nie.

 

[5] Pro-gay kerke sal ons valslik beskuldig en sê ons haat gays. Soos alle sondaars is gays baie welkom om ons eredienste by te woon, sodat hulle die Woord kan hoor.  Soos alle sondaars sal ons gays vriendelik en met liefde behandel.  Ons sal vir hulle sê:

 

  • Ons was ook hopelose sondaars net soos julle, en het God se straf verdien.
  • Jesus het die straf vir homoseksualiteit en ander sondes op Homself geneem aan die kruis.
  • Jesus skenk graag bekering en vergifnis vir gays en sondaars van elke soort (1 Korintiërs 6:11).
  • Die evangelie is die krag van God om ook sondes soos homoseksualiteit te oorkom (v.16, Titus 2:11-12).
  • God se genade is groter as ons sonde – daar is hoop in Jesus (Romeine 5:20).

 

Hoekom moet ons reg reageer op die saak van gay huwelike in die NG-Kerk? Want as ons die Skrif verdraai, het dit ewige gevolge.  Ons doen dit tot ons eie ondergang (2 Petrus 3:16).

 

Wanneer mense gesond is, dink hulle nie ernstig oor die lewe nie. Maar as hulle ernstig siek word, dink hulle diep na oor die lewe, hulle sonde, God, die hemel, die hel.  Die gay kwessie in die NG-Kerk is so ‘n tyd.  Mense wat voorheen nie ernstig gedink het oor God, die Bybel, sonde, die hemel, en die hel nie, sal nou daaroor dink.

 

Twee jaar gelede het ek oor homoseksualiteit gepreek. Tussen 15 en 30 mense het elke maand my preek op die blog opgesoek.  Nadat die NG-Kerk laasweek oor die saak besluit het, het meer as 250 mense oor ‘n tydperk van sewe dae die preek opgesoek.  Mense is verward en het vrae oor die kwessie.  Ons moet gereed wees om vir hulle ‘n antwoord te gee oor die hoop wat in ons is (1 Petrus 3:15).

[1] Satire 6. Aangehaal in Alvin Schmidt, How Christianity Changed the World, p.89

[2] Sien Edward T. Welch, Blame it on the Brain?, pp.165-171; James Kennedy & Jerry Newcombe, What’s wrong with same-sex marriage, pp.97-110.  Ek gebruik van Welch en Kennedy se argumente in my preek by https://baptistekerkkemptonpark.wordpress.com/2013/11/01/se-die-bybel-regtig-homoseksualiteit-is-sonde/

’n Tyd om enkel te wees

Bored woman

George Whitefield is my gunsteling prediker (Charles Spurgeon kom bitter naby).  Soos enige van ons helde het hy kleivoete gehad.  Sy vriend, Howell Harris, het baie van ‘n sekere weduwee, Elizabeth James gehou.  Die gevoel was wedersyds.  Harris wou egter uitsluitlik op sy verhouding met God fokus, en het besluit om nie te trou nie.  Hy wou haar aan Whitefield voorstel.  Na sy hom ontmoet het, het mev. James ‘n stryd in haar hart gehad.

 

Na ‘n worstelstryd het sy besluit om met Whitefield te trou (sy het eers 10 jaar later haar gevoelens vir Harris oorkom!).  Harris het haar by die kansel aan Whitefield afgegee.  Direk ná die sermonie het die groepie verder gereis, en het Whitefield gepreek.  Whitefield en sy nuwe vrou het geen wittebrood gehad nie.  Hy het vir ‘n volle week twee keer per dag gepreek. Daarna het hy alleen vir ‘n maand lank op ‘n preektoer na Birstol, Gloucester, en London vertrek.  Op Kersdag het hy teruggekeer huistoe, en toe weer op 26 Desember ‘n preektoer na Bristol en London onderneem.  Whitefield het hom voorgeneem dat sy huwelik geensins sy bediening sou verhinder nie.[1]

 

Whitefield het reg gedink oor die bediening, maar verkeerd oor die huwelik.  Hy het nie sy bruid in ag geneem nie.  Na my mening het Harris ‘n beter besluit as Whitefield geneem.  In omstandighede soos Whitefield s’n, sou dit beter gewees het om enkel te bly (1 Korintiërs 7:25-40).

 

Vervolging (v.25-27)

‘When the high seas are raging it is no time for changing ships.’[2] (Leon Morris).  ‘A man who is a hero in himself becomes a coward when he thinks of his widowed wife and his orphaned children.’[3] (Lightfoot).

 

Jy wil nie jou gesin deur vervolging of honger sit as jy dit kan help nie.  In sulke tye het ouers hulle kinders geëet (Deuteronomium 28:53-57).  Jesus het gesê:  “Maar wee die vroue wat swanger is en die wat nog soog, in daardie dae.” (Matteus 24:19).  In sulke tye is enkelskap beter.

 

In v.1-16 het Paulus hoofsaaklik met die getroudes gepraat.  In v.25-40 praat hy hoofsaaklik met mense wat enkel is.  Paulus haal nou wel nie vir Jesus aan nie (vgl. v.10), maar in dié saak praat hy as iemand wat deur die Gees betroubaar is (v.25, 40), as een wat barmhartigheid ontvang het (v.25).

 

Paulus se raad is dít:  bly soos jy is, veral omdat moeilike tye oppad kom (v.26).  Die moeilike tye verwys dalk na die hongersnood wat in keiser Claudius se tyd gekom het (Handelinge 11:28), of na die vervolging onder keiser Nero.

 

So, is jy deur verlowing of in die huwelik gebind?  Moenie skei nie (v.27, Matteus 1:19, 19:6).  Is jy reeds geskei of nie verloof nie, en daarom los van ‘n maat?  Moenie ‘n maat soek nie (v.27).  Hoekom nie?  Want daar is swaar tye wat kom (v.26).

 

Hoe moet ons vandag v.26 toepas?

 

[1] Bly enkel as jy vir ses maande op ‘n keer in die buiteland is vir werk.  Hoekom wil jy trou as jy nooit by die huis gaan wees nie?

 

[2] Bly enkel as jy ‘n sendeling wil word na ‘n land waar die vervolging van Christene erg is (Matteus 19:12).

 

[3] Bly enkel as Suid-Afrika soos Zimbabwe word, as daar nie kos is nie.

 

[4] Bly enkel as vervolging in ons land uitbreek.

 

As jy wél in sulke omstandighede trou is dit nie sonde nie (v.28, 9).  As jy in dié omstandighede beter sal vaar met ‘n maat, trou.  Oor die algemeen sal die las ligter wees as jy in sulke tye enkel bly.

 

Vlees (v.28)

Toe ek studeer het, het ‘n getroude vriend eendag vir hom ‘n Caramello beer gekoop.  Hy het dit alleen geëet en die papier in kar gelos.  Toe sy vrou die papier sien was sy kwaad.  Hoe kon haar man sjokolade eet sonder haar?  As my vriend enkel was kon hy tien Caramello’s geëet het sonder om probleme op te tel (hy sou wel gewig opgetel het J).  ‘n Getroude persoon moet altyd sy of haar maat in ag neem.

 

‘n Enkel- of geskeide persoon wat in die v.26-bootjie is, sondig nie as hy of sy trou nie (v.28, vgl. 9, 15, Matteus 19:9).  As jy egter enkel bly en nie met ‘n ander sondaar saamgedruk word in ‘n lewe waar jy skielik alles moet deel nie, spaar dit jou van die sorge wat die vlees bring (v.28).

 

As jy dan enkel is moet jy nie dink om te trou sal al jou sorge oplos nie:  jou seksdrang, eensaamheid, jou eie kinders hê, ens.  Die huwelik bring nuwe uitdagings:  skoonfamilie, konflik, verdeling van jou tyd, huis, kos, bed, geld, lewe, en meer.  Onthou dit, want as jy eers getroud is kan jy nie sommer weer skei nie (Matteus 19:6).

 

Verganklikheid (v.29-31)

Dave maak gereed om Mt. Everest te klim.  In sy rugsak pak hy twee van alles, asook sy gunsteling boeke, lekkernye, sy eie kussing, sy laptop sodat hy op Facebook kan gaan, sy grootlens kamera vir fotos, en sy verkyker.  Toe hy begin klim, het hy gou besef dat sy rugsak te swaar is.  Hy het baie van sy bagasie by die basis gelos, en die res in die sneeu op die berg gelos.  Die les is duidelik:  pelgrims pak lig.  So is dit in hierdie wêreld.  Te veel bagasie sal jou terughou.

 

Ons tyd op aarde is min, veral in vervolging (v.29, 26).  Fokus op die Here asof jy ongetroud is (v.29, 32-34).  Kyk verby die tydelike trane, vreugde, en besittings van hierdie wêreld, en fokus op Jesus en die ewigheid (v.30-31).  Die Skrif sê immers:

 

  • “Salig is julle, armes, want aan julle behoort die koninkryk van God. Salig is julle wat nou honger het, want julle sal versadig word. Salig is julle wat nou ween, want julle sal lag… Maar wee julle, rykes, want julle het jul troos weg. Wee julle wat vol is, want julle sal honger ly. Wee julle wat nou lag, want julle sal treur en ween.” (Lukas 6:20-21, 24-25).
  • “Moenie vir julle skatte bymekaarmaak op die aarde, waar mot en roes verniel en waar diewe inbreek en steel nie; maar maak vir julle skatte bymekaar in die hemel, waar geen mot of roes verniel nie en waar diewe nie inbreek en steel nie” (Matteus 6:19-20).
  • “Maar die dag van die Here sal kom soos ‘n dief in die nag, waarin die hemele met gedruis sal verbygaan en die elemente sal brand en vergaan, en die aarde en die werke wat daarop is, sal verbrand… Maar ons verwag volgens sy belofte nuwe hemele en ‘n nuwe aarde waarin geregtigheid woon.” (2 Petrus 3:10, 13).
  • “En die wêreld gaan verby en sy begeerlikheid, maar hy wat die wil van God doen, bly vir ewig.” (1 Johannes 2:17).

 

Pak lig.  Dit geld ook vir enkel mense.  Die lewe is kort.  Twee weke gelede het ek gelees van ‘n man wat in April getrou het, en twee maande later dood is aan kanker.  Moenie vir die hier-en-nou of vir jou huweliksmaat lewe nie.  Ignoreer Afrikaanse liefdesliede wat sê:  ‘Ek lewe net vir jou, jy lewe net vir my, oooh…’

 

Indien jy wel besluit om te trou moet jy ‘n Efesiërs 5-fokus hê.  Wees lief vir jou vrou soos wat Christus die kerk liefhet.  Respekteer jou man soos wat die kerk aan Jesus onderdanig is.  Fokus op jou siel, jou maat se siel en die ewigheid.  Moenie op ‘n tydelike en aardse huwelik fokus nie.

 

Enkel en getroude persoon:  is jy gereed vir die ewigheid?  Is jy gereed om geoordeel te word?  Is jy gereed om vir ewig in die hemel te lewe of in die hel te sterf?  Is jou sondes vergewe of sal jy daarin sterf?  Het jy jou van jou sonde bekeer of leef jy soos jý wil en nie soos Gód sê nie?  Maak jy staat op jou godsdiens, jou gebede, jou kerkbywoning, jou tiendes, jou goeie werke, jou ouers, jou doop om hemel toe te gaan?  Hoop jy maar vir die beste?  Of maak jy deur geloof staat op Jesus se lewe, kruisdood, opstanding, en op niks anders nie?  Pak lig en maak gereed om jou God te ontmoet.  Voor jy weet is hierdie wêreld en alles daarin tot niet.

 

Fokus (v.32-35)

‘n Man wat ek ken het onlangs uit die sendingveld bedank, omdat hy baie min by sy vrou en kinders is.  ‘n Man in William Tyndale se tyd het Jesus verloën toe die soldate gedreig het om sy vrou dood te maak.  Hy het later sy sonde bely en homself oorgegee om verbrand te word.

 

As jy getroud is kan jou aandag maklik verdeeld raak tussen Jesus en jou huweliksmaat.  Dis die punt van v.32-35.

 

Die vervolgde persoon wat geskei of enkel is, het nie die ekstra angs om sy of haar maat te behaag nie, maar kan geheel en al op die Here en ‘n heilige lewe fokus (v.32, 34a, 26).  ‘n Vervolgde persoon wat getroud is, kan op die Here fokus, maar sal ook angstig wees oor sy of haar maat se veiligheid (v.33-34).

 

Paulus beveel nie enkelskap aan om gelowiges te benadeel nie.  Hy soek eerder mense se voordeel, sodat hulle geheel en al op die Here sal fokus (v.35).  Hy wil nie hê dat ons ooit vir Jesus moet sê:  “Ek het ‘n vrou getrou en daarom kan ek nie kom nie.” (Lukas 14:20).

 

As jy enkel bly hoef jy nie twee keer te dink oor:

 

  • ‘n Gevaarlike sendingveld. My sendeling-vriend en sy gesin bly in ‘n Shangaan village. Hulle is onlangs in hulle huis aangeval. Vir beter evangelisasie doeleindes wou hy in die village aanbly, maar moes hy sy vrou en kinders se veiligheid en vrese in ag neem, en dorp toe trek.
  • Lang ure in gebed (1 Timoteus 5:5).
  • ‘n Halwe dag van straat evangelisasie.
  • ‘n Uur of twee by ‘n Woensdagaand Bybelstudie (jy het nie kinders wat vroeg in die bed moet wees, omdat hulle die volgende dag skool het nie).
  • ‘n Groot deel van jou salaris gee vir sending.

 

Kan jy die Here beter dien deur enkel te bly of deur te trou?  Doen dít.  Oor die algemeen kan ‘n enkel gelowige makliker op die Here fokus.

 

Vaders (v.36-38)

‘n Paar jaar gelede was my jongste suster verloof.  ‘Hy is nie die regte man nie,’ het my ouers gesê.  Sy het die verlowing verbreek, lang trane gehuil, en gedink dis die einde van die wêreld.  Vir my huidige swaer was dit die begin van die wêreld.  My punt is eenvoudig dit:  party mense is enkel as gevolg van hulle ouers se besluit.  Dis wat Paulus in v.36-38 leer.

 

Na my mening verwys ‘sy maagd’ in v.36-37 na die pa se dogter, en nie na die jong man se verloofde nie (in Paulus se tyd het die pa sy dogter se troue gereël, vgl. Genesis 34:6).  Gestel die pa wil hê sy dogter moet enkel bly om meer toegewyd aan God te lewe (v.36, 35), maar sy is in die blomtyd van haar lewe en wil graag trou (v.35-36, 9)?  As die pa sy voorneme verbreek en haar weggee om te trou, is dit nie sonde nie (v.36).  Indien sy dogter se begeerte vir ‘n maat nie so sterk is nie en hy by sy besluit bly, is dit beter (v.37-38) – veral in die lig van probleme wat op die horison is (v.26).

 

Om ouers te vra is nie bloot ‘n formaliteit nie.  Totdat sy trou (nie tot sy 21 is nie!) is die pa die hoof van sy dogter (v.36-37).  Soos God Eva vir Adam gegee het (Genesis 2:22, 24), moet pa’s hulle dogters in die huwelik weg gee (Eksodus 22:16-17).  Volgens Jesus is dít hoe dit sal wees totdat Hy weer kom (Matteus 22:30, 24:38-39).

 

Moenie jou pa inlig dat jy trou nie:  die man moet toestemming vra.  Ouers moet hulle kinders help om goeie maats te kies.  ‘n Pa moenie te hard wees of moeilik raak as sy dogter die regte man ontmoet het nie:  laat sy trou (v.36).

 

Verlies (v.39-40)

Op 5 November 1858 het sendeling John Paton op Tanna-eiland aangeland.  Op 12 Februarie 1859 het hy en sy vrou Mary ‘n baba seun gehad.  Op 3 Maart 1859 het Mary gesterf, en op 20 Maart sy baba seun.  Paton het hulle met sy eie hande begrawe.  Hy het in sy dagboek geskryf:  ‘But for Jesus… I must have gone mad and died beside that lonely grave!’[4]  Ook vir dié rede is die enkel persoon beter af.

 

As jy trou is dit lewenslank (v.39).  Behalwe vir die uitsonderings in v.15 en Matteus 19:9, kan jy net hertrou as jou maat dood is (v.39).  In dié geval kan jy volgens jou voorkeur hertrou.  Jy hoef nie vir ‘n stem te wag om te sê met wie jy moet trou nie.  Trou met wie jy wil, maar net in die Here:  met ander woorde, net met ‘n ander Christen (v.39, 2 Korintiërs 6:14).  Onthou tog dat die maat met wie jy hertrou óók kan sterf (v.39).  Op grond van die redes in v.26, 32-35 sal jy ook gelukkiger wees as jy enkel bly.  Paulus se lering oor enkelskap is nou wel sy opinie, maar dis ‘n geïnspireerde opinie (v.40).

 

Is jy enkel?  Dink aan v.39 voor jy trou.  ‘n Mens se huweliksmaat is nader aan jou as enigiemand anders (Genesis 2:24).  Die dood is erg, veral as jy vir baie jare getroud was en ‘n diep liefde vir mekaar gehad het.  Skielik is jy eensaam.  Mense mis veral hulle maats oor kerstyd, met verjaarsdae, as hulle kinders trou, as hulle agter-kleinkinders gebore word.  As gevolg hiervan is dit goed om enkel te wees.  As jy weier om oor die dood te dink is jy onrealisties.

 

As jy iets beklemtoon staan jy gevaar om misverstaan te word.  Mense oorbeklemtoon maklik wat jy gesê het, en dink jy is dwars of teen iets.  ‘n Predikant in Alberton het gesê dat sekere verse oor die ‘wederkoms’ eintlik nie na wederkoms verwys nie, maar na verwoesting van Jerusalem in 70 n.C.  Mense het sy beklemtoning verdraai en gesê hy glo nie in die wederkoms nie.

 

Dieselfde is waar van dié preek.  Mense kan maklik dink ek sê om te trou is sleg.  Enkel mense kan dink ek is ongelukkig getroud, en wil hulle afsit om dieselfde fout te maak.  Mense wat só dink mis die punt.  Ek hoop jy sien dat Paulus se punt ook mý punt is:  daar is ‘n tyd om enkelskap te oorweeg (v.25-40).  Besluit self wat jou gawe is (v.7) en doen dan wat jy wil.  As jy binne God se wil is, is die huwelik en enkelskap ewe goed.

[1] Arnold Dallimore, George Whitefield vol.2, pp.101-113

[2] Leon Morris, 1 Corinthians: Tydnale New Testament Commentaries, p.113

[3] Ibid, p.115

[4] John G. Paton:  Missionary to the New Hebrides, pp.79-80