Vrae en antwoorde oor die evangelie

Questions and Answers

Ek het ‘n paar weke gelede vir jou gesê dat die gemiddelde Afrikaanse kerkganger nie die evangelie verstaan nie.  Die ‘evangelie’ wat ek oor die afgelope paar jaar uit Afrikaners se monde gehoor het klink só:

 

‘Jy moet jou beste doen om in die hemel te kom.  Niemand kan dit op sy eie regkry nie, maar met God se hulp is alles moontlik.  Ek probeer om volgens die Bybel te leef, en as ek fouteer vra ek God se vergifnis.

 

‘Ek hoop dat die Here my poging sal aanvaar.  Ek is nie perfek nie, maar ten minste probeer ek.  Ek glo die Here sal verstaan; Hy is mos ‘n genadige God.’

 

Maar dit is nie hoe Paulus die goeie nuus of evangelie verstaan het nie – ten minste nie volgens Rom. 1:1-7 nie.

 

  1. Waar kom dit vandaan? (v.1-2)

Omtrent 14 jaar gelede het ‘n Hindoe vir my gesê dat sy godsdiens 5000 jaar oud is, en dat die evangelie nou maar eers 2000 jaar oud is.  ‘Jou godsdiens is ‘n baba teen myne,’ het hy gesê.

 

Volgens Paulus is hy verkeerd.  Die evangelie kom van God af en het in sy hart bestaan nog voor Hy die wêreld gemaak het (v.2, Tit. 1:2).  In die Ou Testament het Hy dit deur die profete belowe (v.2, 3:21, 1Kor. 15:3-4, Luk. 24:25-27, 44).  Deur hulle het Hy dit in die Bybel laat opteken (v.2, 2Pet. 1:20-21).

 

Onthou dit as jy ooit weer die evangelie betwyfel of bevraagteken.  Hoe kan ‘n boodskap wat honderde en duisende jare voor die tyd in detail voorspel is, onwaar wees?  Hoe anders verduidelik jy dat Jes. 53 en Ps. 22 tot op die letter in Jesus se kruisdood vervul is?

 

‘n Jood genaamd Rich Ganz vertel hoe ene Hans van Seventer Jes. 53 vir hom gelees het.  Hy was woedend dat Hans dit gedurf het om vir hom, ‘n Jood, uit die Nuwe Testament te lees.  Hy was geskok toe Hans die oop Bybel vir hom gee en hy ‘Jesaja’ bo-aan die bladsy sien.

 

Hy kon nie glo dat Jesaja hierdie woorde 700 jaar voor Jesus se dood geskryf het nie.  God het dit gebruik om hom te oortuig dat die Nuwe Testamentiese evangelie waar is, en het hom daardeur tot bekering gebring.[1]

 

Paulus het hierdie einste evangelie verkondig (v.1).  Hy was ‘n apostel en dienskneg daarvan (v.1).  Voor sy bekering het hy Christene gehaat en hulle vervolg (Hand. 8:1-3, 9:1-2, Gal. 1:13, 1Tim. 1:13a).  Maar terwyl hy Damaskus toe gereis het om hulle te arresteer, het Jesus hom koud in sy spore gestop.  Hy het hom gered en geroep om ‘n apostel of gestuurde te wees (v.1, Gal. 1:1, Hand. 9:3-19, 1 Kor. 9:1, 1Tim. 1:13b-16).

 

Paulus kon die roeping nie weerstaan nie.  Hy wou ook nie.  Hy kon nie glo dat Jesus hom voor sy geboorte reeds hiervoor afgesonder het nie (v.1, Gal. 1:15).  Hy was bly dat hy nie meer ‘n slaaf van sy sonde was nie (6:16), en het dit as ‘n voorreg beskou om ‘n slaaf van Jesus Christus te wees (v.1).

 

Deur die Gees het Jesus hom afgesonder en gestuur om die evangelie aan verlorenes te verkondig (v.1, Hand. 9:15, 13:2, 26:17).  Die ywer waarmee hy voorheen die kerk vervolg het, het hy nou gebruik om die evangelie met mense te deel (Hand. 9:20-30, 13:1-28:31, Gal. 1:23).

 

Die evangelie waardeur die Here vir Paulus verander het, is dieselfde evangelie waardeur Hy in 2018 mense se lewens omkeer.  As jy ooit gedink het dat jy of iemand wat jy ken te ver heen is om gered te word, onthou vir Paulus.  Laat dít jou opnuut aanvuur om vir die slegste sondaars te bid en die evangelie met hulle te deel.

 

  1. 2. Waaroor gaan dit? (v.3-4)

John Piper het ‘n boek hieroor geskryf.  Die titel is: God is the Gospel.  Hy is reg.  Die evangelie gaan nie oor iets nie, maar oor Iemand.  Dit is o.a. hoekom Paulus dit die evangelie van God noem (v.1).  In v.3-4 wys hy dat Jesus hierdie God is.  Hý is die inhoud van die evangelie; dit gaan oor Hóm.  Stuart Olyott sê: ‘The gospel is a Person.  He is a Man, and He is God.’[2]

 

Paulus begin deur te sê dat Jesus uit die nageslag van Dawid is (v.3, Matt. 1:1).  Hy is dus die Messias en regmatige Koning van Israel (Ps. 132:11).  Soos ons, is die Seun van God uit ‘n vrou gebore en het Hy mens geword (v.3, Joh. 1:14, Gal. 4:4).

 

Om te wys dat Hy nie nét ‘n mens is nie maar volkome God, is Hy uit ‘n maagd gebore (Matt. 1:18, 20, 23, Luk. 1:34-35).  Jesus is volkome God en volkome mens, twee nature in een Persoon.

 

Sy Goddelike natuur het duidelik geword toe die Heilige Gees Hom uit die dood uit opwek (v.4, Hand. 13:29-33, Rom. 8:11).  Sy opstanding het Hom nie die Seun van God gemaak nie – Hy was dit nog altyd – maar kragtig verklaar dat Hy die Seun van God is (v.4).

 

Sy opstanding impliseer ook dat Hy dood was.  Hoe het Hy gesterf?  Hy is soos ‘n misdadiger gekruisig.  Toe Hy aan die kruis gehang het, het Hy die galbitter wyn van God se toorn gedrink (Matt. 27:46, Gal. 3:13).  God het Hom vir óns sonde gestraf (Jes. 53:4-6, 10, 2Kor. 5:21).

 

Drie dae na sy dood het God Hom opgewek om te wys dat Hy Jesus se offer in ons plek aanvaar (4:25).  Jesus se opstanding het ook gewys dat Hy die soewereine Here is (v.4).  Jy moet onder sy heerskappy lewe en erken dat Hy jóú Here is (v.4).

 

Daar is gans te veel mense wat sê dat Jesus hulle Verlosser is, maar wat Hom nie as Here wil erken nie.  O, met hulle lippe bely hulle dit, maar wanneer dit by hulle lewens kom is dit ‘n ander storie.  Dit is aan súlke mense wat Jesus in Luk. 6:46 sê: “En wat noem julle My: Here, Here! en doen nie wat Ek sê nie?”

 

Hoekom noem jy jouself ‘n Christen as skindertaal, bitterheid, vuil grappe, seksuele sonde, materialisme, bakleiery, leuens, jaloesie, woede, dronkenskap, oneerlikheid, diefstal, onenigheid, verdeeldheid, ens. jou lewe kenmerk?

 

As jy in sonde lewe sal jy die koninkryk van God nie sien nie (Gal. 5:21b).  Moet dus nie net vir Jesus as Verlosser ontvang nie, maar ook as Here.  Erken dat jy teen Hom gesondig het.  Hou op om jou sonde te koester.  Moet dit nie so liefhê dat jy dit nie kan los nie, maar sê vir Here dat jy dit nie meer wil hê nie.

 

Vra dat Hy jou sal help om dit te los.  Bely dat jy dit nie self kan doen nie, maar dat Hy jou enigste hoop is en dat die evangelie genoeg is om jou van jou sonde en God se oordeel te red.

 

Volgens Paulus is die evangelie die “krag van God tot redding vir elkeen wat glo” (v.16).  Jesus het gesê: “As die Seun julle dan vrygemaak het, sal julle waarlik vry wees.” (Joh. 8:36).  Glo jy dit?  En wat gaan jy daaromtrent doen?

 

Al is jy ‘n Christen behoort dit jou te help om nie met ‘n slaaf-mentaliteit te lewe, asof jy verslaaf is nie kan help om ‘n sekere sonde te doen nie.  Toe die Amerikaanse Negers in 1865 bevry is, het baie van hulle vir die res van hulle lewens soos slawe gelewe.  Alhoewel hulle vry was, kon hulle eenvoudig nie die slawe-mentaliteit afskud nie.[3]

 

Moenie soos hulle wees nie.  “Staan dan vas in die vryheid waarmee Christus ons vrygemaak het, en laat julle nie weer onder die juk van diensbaarheid bring nie.” (Gal. 5:1).  Jy hóéf nie ‘ja’ te sê vir sonde nie, maar is vry en kan ‘nee’ sê.  “Want die sonde sal oor julle nie heers nie; want julle is nie onder die wet nie, maar onder die genade.” (6:14).

 

  1. 3. Waarvoor is dit bedoel? (v.5-7)

My vrou het ‘n elektriese pot vir haar verjaarsdag gekry.  Dit kan kos stadig gaar maak, dit stoom, jogurt maak, vleis en uie braai, en meer.  Dit het meer as een doel.

 

Die evangelie is so, en het nie net een doel nie.  In sy groot genade het Jesus vir Paulus ‘n apostel gemaak (v.5) om ten minste vier doele met die evangelie te bereik.  Die tweede doel is die hoof een, met die ander drie wat daaraan onderhewig is.

 

[a] Om die nasies tot geloofsgehoorsaamheid te bring (v.5)

God het aan mense die opdrag gegee om hulle te bekeer en in sy Seun te glo (Hand. 17:30, 1Joh. 3:23).  Dié wat positief hierop reageer beoefen geloofsgehoorsaamheid.  Hulle is m.a.w. gehoorsaam aan die opdrag om in Jesus te glo (10:16, Joh. 3:36, 2Tess. 1:8).  Verder lei ware geloof tot ‘n lewe van gehoorsaamheid (6:17, Jak. 2:14-26).  Dit is ook wat met geloofsgehoorsaamheid bedoel word.

 

Die uiteindelike doel is dat al die nasies – ook die Romeine – só in Jesus moet glo en aan Hom gehoorsaam moet wees (v.5-7, Ps. 22:28, 86:9, Matt. 28:19-20, Fil. 2:10-11, Op. 5:9, 7:9-10).

 

Hoe vaar Afrikaners, Engelse, Zoeloes, Indiërs, Vendas en die ander nasies van ons land?  Het hulle al die knie voor Koning Jesus gebuig?  Sal ons dapper genoeg wees om vir hulle te sê hulle moet hulle bekeer?  Wie sal die goeie nuus van God se vergifnis op Golgota met hulle deel?

 

Hoe sal die arme Shangaans in Jesus glo en ‘n lewe van gehoorsaamheid lei, as niemand die evangelie met hulle deel nie?  Bid dat die Here mense sal stuur om met die nasies te praat, en wees self bereid om te gaan as die geleentheid hom voordoen (Matt. 9:37-10:1).

 

[b] Om Jesus se Naam te verheerlik (v.5)

Dit is nie verkeerd as jy ‘n dringende begeerte vir mense se bekering het nie, maar dit moenie die hoof doel wees nie.  Die eintlike rede hoekom ons die evangelie met mense moet deel, is sodat God se Naam verheerlik kan word.  Mense moet die Here prys (Jes. 43:7, 21).  Die nasies moet voor Jesus se troon buig en Hom aanbid.

 

As dit nie ons hoof doel is nie, sal ons mens-gesentreerd raak.  En as dit gebeur sal ons enigiets doen om mense tot bekering te lei.  Ons sal hulle met dreigende uitnodigings en herhalende musiek manipuleer: ‘As jy nie vandag vorentoe kom nie, mag dit dalk net jou laaste kans wees.’

 

Ons móét dringend wees (2Kor. 5:20, 6:2), maar ons moenie maak asof iemand se hart outomaties saam met sy voete beweeg nie.  Kan die Here die persoon nie ná die byeenkoms by sy huis red nie?

 

Mens-gesentreerde evangelisasie sal maak dat jy die evangelie afwater.  Jy sal Jesus as die Verlosser verkondig, maar nie as die Here wat verwag dat jy alles moet prysgee om Hom te volg nie.  Jy sal vir mense sê dat hulle in Jesus moet glo om gered te word, maar nie dat hulle hulle sonde moet los nie.

 

Jy sal tevrede wees as mense die feite van die evangelie glo, maar sal nie eers agterkom dat hulle nie berou het oor hulle sonde nie.  Sien jy nou hoekom dit belangrik is dat jy ‘n God-gesentreerde fokus moet hê as jy die evangelie met ongelowiges deel?

 

[c] Sodat Jesus mense kan roep om syne te wees (v.6-7)

Vir iemand om tot bekering te kom is dit nie genoeg om die evangelie te hoor nie.  God moet hulle roep en hulle harte oopmaak om die evangelie te verstaan (Hand. 16:14).  Dit is die roeping waarna Paulus in v.6-7 verwys (vgl. 8:28-30).

 

Maar alhoewel die Heilige Gees in mense se harte moet werk, kan hulle nie sonder die evangelie tot bekering kom nie (10:13-15).  Om dus die roepstem van God in hulle harte te hoor, moet hulle die roepstem van die evangelis hoor (10:17).  Of dit nou een tot een, in ‘n pamflet, ‘n preek, of in die Bybel is – iemand moet die goeie nuus van Jesus met hulle deel.

 

In die lig van die bg. waarhede moet ons nie net die evangelie deel en dink dat dit genoeg is nie.  Ons moet bid dat die Here mense se harte sal oopmaak.  Maar ons moet ook nie nét bid en dink dat hulle self tot bekering sal kom nie.  Ons moet die evangelie met hulle deel.

 

Dié wat dit glo ontvang die grootste voorreg wat ons in die evangelie het, naamlik dat God die Vader ons as heiliges [Eng. saints] afsonder om aan Jesus te behoort (v.6-7, Joh. 1:12, 1Kor. 1:2, Ef. 1:5, Gal. 4:5).  Omdat jy God se kind is, ontvang jy al die voorregte wat die hemel jou kan bied:

 

God is nie meer jou Regter nie, maar jou Vader.  Hy vergewe jou, sorg vir jou, voorsien vir jou, gee om vir jou, beskerm jou, leer jou, tugtig jou, gee vir jou die hemel as erfdeel, maak jou deel van sy familie, bemoedig jou, gee sy Gees om in jou te woon, jou te lei, jou te vertroos en meer.

 

[d] Sodat God sy liefde, genade en vrede vir mense kan gee (v.7)

In die evangelie leer sondaars dat God hulle liefhet, en dat Hy hulle voor die skepping reeds liefgehad het (v.7, Jer. 31:3, Ef. 1:4-5).  Hoe weet hulle dat God hulle liefhet?  Jesus het sy lewe vir hulle gegee (Joh. 3:16).  Hy het vir hulle gesterf toe hulle nog sondaars was (5:8).

 

Buiten vir God se liefde, het die Vader en die Seun se genade deur die Gees na ons harte toe gekom, sodat ons nou vrede met God het (v.7).  Ons het nie die eerste stap geneem om vrede te maak nie; Hý het (v.7).

 

Ons het God se oordeel verdien, maar Jesus het gesê dat Hy bereid is om die boete te betaal.  God het Hóm vir ons sonde gestraf, en daarom is Hy nie meer kwaad vir óns nie.  Die vrede wat jy in hart ervaar (v.7) is die direkte gevolg van die vrede wat Hy tussen ons en die Vader bewerk het (5:1).

 

Indien jy dus jy ‘n rustige gevoel in jou hart het, maar nie in Jesus se kruisdood rus nie, beleef jy ‘n vals vrede (Jer. 6:14).  Dalk sal jy selfs op jou sterfbed rustig voel, en met ‘n wrede skok jou oë in die hel oopmaak.

 

Dalk pla jou gewete jou en ervaar jy nie God se vrede nie, omdat jy in sonde leef.  “Geen vrede, sê die HERE, vir die goddelose nie!” (Jes. 48:22).

 

Dit mag ook wees dat jy op Jesus se kruisdood vertrou, maar nie God se vrede ervaar nie.  In daardie geval moet jy onthou dat God se vrede groter as die subjektiewe gevoel in jou hart is.  Rus in die vrede wat Hy deur Jesus se kruisdood bewerk het, en nie in die afwesigheid van ‘n lekker gevoel in jou hart nie.

 

Om dan die openingsverse van Paulus se brief aan die Romeine op te som kan ons die volgende woorde van John Stott aanhaal:  ‘the good news is the gospel of God, about Christ, according to Scripture, for the nations, unto the obedience of faith, and for the sake of the Name.’[4]

 

Ek wil byvoeg dat ons die voorreg van aanneming, asook God se liefde, genade en vrede in die evangelie ontvang.  Indien jy nóg vrae oor die evangelie het, sal ek dit in die res van hierdie reeks beantwoord.

 

My begeerte is dat jy die evangelie na ‘n jaar of meer in Romeine op jou vingerpunte sal ken (nie net in jou gedagtes nie, maar in jou persoonlike belewenis), beter as wat ‘n wiskundige sy maaltafels ken.

 

[1] http://richardganz.com/rich-ganz-testimony.php

[2] Stuart Olyott, The Gospel as it Really is, Evangelical Press, Darlington: England, 1979, p. 7

[3] Sinclair Ferguson, Devoted to God, The Banner of Truth Trust, Edinburgh: Scotland, 2016, pp. 68-69

[4] John Stott, The Bible Speaks Today: The Message of Romans, Inter-Varsity Press, Nottingham: England, 1994, p. 54

Advertisements

Hoe om die duiwel te ontwyk

Blocking flaming arrows

Twee jaar gelede het ek my rifrug hondeskool toe gevat.  In sy eksamen moes hy o.a. ‘n speelding vir my bring.  Hy het daarmee weggehardloop.  Van daar af was dit vir hom ‘n speletjie.

 

Hy bring nie ‘n tennisbal terug nie, maar dink dat hy daarmee moet weghardloop en dat ons hom moet vang.  Hy is so rats soos ‘n Springbok senter wat sy opponente ontduik: ons kan hom nie gevang kry nie.

 

Gelowiges moet so wees en die duiwel se strikke deur vals leraars ontduik.  Jud. 17-25 sê vir ons hoe.

 

  1. Onthou die voorspellings (v.17-19)

Waldo is ‘n mediese student in die Kaap.  Voor sy finale eksamen sê die dosent dat hy baie vrae oor die mens se senuweestelsel gaan vra.  Toe die dosent dit sê het Waldo nie geluister nie, maar aan sy meisie gedink.  Die vraestel het hom omkant gevang, sodat hy die jaar moes oordoen.

 

Moenie dat die duiwel jou omkant vang nie.  Jesus en die apostels het hierdie ketters se dwaling voorspel (v.17, Matt. 7:15-20, 24:24, Hand. 20:29-30, 2Tess. 2:9-12, 1Tim. 4:1-3, 2Tim. 4:3-4, 2Pet. 2:1-3:7, 1Joh. 2:18).  Hulle is so glad soos ‘n paling en so skelm soos ‘n jakkals: hulle wen mense se guns en maak vriende met almal.

 

Wat hulle sê klink in die begin vreemd, maar as hulle dit genoeg sê en ‘n paar Bybeltekste aanhaal, val dit sag op die oor.  Hulle oortuig eers een persoon, dan nog een, en dan ‘n hele gesin.  Hulle hou aan totdat hulle ‘n klomp gesinne oorgehaal het.  Hulle doen dit om ryk te word (v.11, 16).

 

Hulle leef wellustig en goddeloos (v.18, 4, 7-8, 15-16), maar spot as jy met hulle oor die hel praat (v.18).  Hulle beklemtoon God se liefde en praat asof Hy hulle nie sal oordeel nie (2Pet. 3:2-4).

 

Hierdie goddelose vals leraars was in Judas se tyd al aktief.  Judas beskryf dit as ‘die laaste tyd’.  Dit verwys na die tydperk voor die verwoesting van die tempel in 70 n.C. (Hand. 2:17, 1Kor. 10:11, 2Tim. 3:1-5, Heb. 1:1, 9:26, Jak. 5:3, 1Pet. 1:20, 1Joh. 2:18).[1]

 

Soos in Judas se tyd is daar vandag nog baie vals leraars.  “Dit is hulle wat skeuring maak, sinnelike mense wat die Gees nie het nie.” (v.19).  Vals leraars roem daarin dat hulle die Gees het, maar hulle wêreldse lewens en die verdeeldheid wat hulle veroorsaak wys dat hulle ongered en sonder die Gees is (v.19, Rom. 8:9, Gal. 5:19-21, 1Joh. 2:15-19).

 

Moet dan nie dink dat iemand met die Gees gevul is omdat hy dinamies en emosioneel is, omdat jy hoendervleis kry wanneer hy preek, of omdat hy sê die Here praat met hom in drome nie (v.8).  Kyk eerder na die vrug van sy lewe (v.19, Gal. 5:22).

 

  1. 2. Bly in God se liefde (v.20-21)

Wanneer die see verdamp vorm dit wolke wat na die binneland toe waai.  Daar word dit soos reuse gieters uitgegooi.  Dit loop na die riviere toe en beland weer in die see.  God is soos ‘n oseaan van liefde.  Deur Jesus en die Heilige Gees vul Hy ons met sy liefde (Rom. 5:5, Ef. 3:16-19).  Die strome van jou liefde wat na Hom toe vloei is ‘n reaksie op sy liefde vir jou (1Joh. 4:19).

 

Volgens Judas is ons God se geliefdes en moet ons in sy liefde bly (v.1, 3, 17, 20-21).  Hy sal ons daarin bewaar (v.1, 24), maar ons moet self ook daarin bly (v.21a).  Hy maak ons gewillig en bekwaam, maar ons moet gehoorsaam wees (Fil. 2:12-13).  Wat beteken dit om jouself in die liefde van God te bewaar?

 

Dit beteken eerstens om bewus te wees van God se liefde.  Verder beteken dit dat jy sal aanhou om die Here lief te hê.  Om in sy liefde te bly moet jy Hom gehoorsaam (Joh. 14:15, 21, 15:9-10).  Om dit verder op te breek kan ons v.20-21 soos volg opsom:

 

Hoofwerkwoord: Bewaar jouself in God se liefde (v.21).  Doen dit…

 

[a] Terwyl jy jouself in die geloof opbou (v.20a)

Hoe doen ‘n mens dit?  Ten eerste moet jy aan die Christelike geloof vashou (v.3).  Jy moet glo dat die Bybel die Woord van God is (2Tim. 3:16).  Jy moet in die Drie-Enige God glo: die Vader, die Seun en die Heilige Gees is drie Persone, maar dieselfde God (Matt. 28:19).

 

Jy moet glo dat Jesus volkome God is, en dat Hy mens geword het (Joh. 1:1, 14).  Jy moet glo dat Jesus sondeloos is, dat Hy aan die kruis gesterf het vir sondaars, en dat Hy liggaamlik opgestaan het uit die dood (2Kor. 5:21, Jes. 53:4-6, 1Kor. 15:1-19).  Jy moet glo dat Jesus weer sal kom om die wêreld te oordeel (1Tess. 4:13-18, Op. 20:11-15).

 

Jy moet glo dat jy nie deur jou goeie werke gered kan word nie, maar dat God die enigste Een is wat jou kan red (Ef. 2:8-9).  Om sy verlossing te ontvang moet jy jou bekeer en op Jesus alleen vertrou om jou te red (Mark. 1:15).

 

As jy dit nie doen nie, sal jy vir ewig in die hel wees (Matt. 13:41-42, Joh. 3:16, 36).  Maar as jy in Hom glo, sal jy vir ewig in sy lieflike teenwoordigheid lewe (Matt. 13:43, 25:34).

 

Dít is die geloof waarin jy jouself moet opbou (v.20a, 3).  Daarvoor het jy die gemeente nodig: die gereelde prediking van God se Woord, ander se geestelike gawes en gebede, die nagmaal (Hand. 2:42, 20:32, 1Kor. 14;12, 26, Ef. 4:11-12).

 

Baie mense dink dat hulle die Here op hulle eie kan aanbid, en dat hulle nie die gemeente nodig het nie.  Ek wonder wat hulle in die vroeë kerk sou doen as daar net een gemeente in die dorp was en niemand sy eie Bybel gehad het nie?

 

Die ‘Jesus’ wat hierdie mense aanbid is nie die Jesus van die Bybel nie, aangesien die Jesus van die Bybel ‘n liggaam het.  Iemand wat ontrou is aan die liggaam is ontrou aan die Hoof.  Geen gelowige kan sonder die gemeente groei soos hy moet nie.

 

Hy stel homself ook in gevaar, en is soos ‘n jong olifant wat op sy eie ronddwaal.  Sonder die liggaam is Hy meer kwesbaar vir vals lering (Ef. 4:14, 11-13).

 

[b] Terwyl jy in die Heilige Gees bid (v.20b)

Wat beteken dit?  Wanneer God se Gees jou wederbaar woon Hy in jou (kontr. v.19), en help hy jou om te bid (v.20b).  Hy gee aan jou die begeerte om te bid (Ef. 2:18).  Hy leer jou om volgens God se wil te bid (Rom. 8:26-27).  Hy help jou om die Gees-geïnspireerde woorde van die Bybel in jou hart te bêre en daarvolgens te bid (Ef. 6:17-18).

 

Om jouself in God se liefde te bewaar (v.21) móét jy in die Heilige Gees bid (v.20b).  Die punt is dus dat ware gelowiges ‘n gesonde gebedslewe handhaaf.  Ek het lank terug in ‘n preek gehoor hoe John Piper sê: ‘If you do not love prayer, you do not love God.’

 

Ongelowiges is soos die Fariseërs wat elegant voor ander kan bid, maar nie ‘n persoonlike gebedslewe het nie.  Ander ongelowiges bid by hulle huise, maar doen dit uit vrees.  Hulle hoop dat dit hulle kanse om hemel toe te gaan sal verbeter.

 

Net ware gelowiges het ‘n lewende verhouding met die Here.  Gebed is deel van hulle normale lewens (Hand. 9:11, Ef. 1:16, 3:14, Fil. 1:3-4, Kol. 1:3, 9, ens.).

 

[c] Terwyl jy Jesus se barmhartigheid verwag (v.21b)

As jy weet dat daar spoedkameras en padblokkades op die N3 is, ry jy versigtiger.  En as jy weet dat Jesus oppad is, leef jy versigtiger (v.21b, Tit. 2:12-13, 2Pet. 3:10-14, 1Joh. 3:2-3).

 

Toe God jou gered het, het jy barmhartigheid ontvang (1Tim. 1:13, 16, 1Pet. 2:10).  Daarna ontvang jy dit elke dag (v.2, Klaagl. 3:22-23).  Maar dit sal spesiaal aan jou geopenbaar word wanneer Jesus weer kom (v.21b).  Dan sal jy nie net die kraan oopmaak om dit te drink nie, maar in die kristalhelder rivier swem.

 

Om dan die duiwel en sy valsheid te ontwyk, moet jy aanhou om God lief te hê (v.21a).  Om dit reg te kry moet jy saam met ander gelowiges in die Woord groei (v.20a), in gebed volhard (v.20b), en in die lig van Jesus se wederkoms lewe (v.21b).

 

  1. Wees barmhartig (v.22-23)

‘n Vriend van my vra dikwels vir mense: ‘Are you born again?’  ‘n Ander gelowige het hom onlangs hieroor aangespreek.  ‘Stop asking people that question; it is offensive,’ het hy gesê.

 

Maar om kos en komberse vir die armes te gee is nie die enigste manier om barmhartig te wees nie.  Volgens Jud. 22-23 is dit barmhartig om gelowiges te dissiplineer en die evangelie met ongelowiges te deel.  Soos wat die Here barmhartig is (v.21b), moet ons met ander wees (v.22-23).

 

[a] Wees barmhartig met dié wat deur vals lering verwar is en twyfel (v.22)

Doen wat ‘n vriend eenkeer vir my gesê het.  Ek was ongeduldig omdat mnr. en mev. X ‘n sekere waarheid nie kon insien nie.  ‘Jy moet onthou dat daar ‘n tyd was toe jy dit óók nie ingesien het nie, Ivor.  Wees geduldig met ander soos wat die Here met jóú is.’

 

[b] Wees barmhartig met dié wat in vals lering vasgevang is (v.23a)

Ek ken meer as een persoon wat na Prosperity Crusades toe gaan om mense teen hierdie vals ‘evangelie’ te waarsku.  Een van my vriende het al ‘n paar mense so vir die Here gewen.  Hy vrees nie om die vuuroond se deur oop te maak en mense uit die vlamme te red nie (v.23a, Gen. 19, Amos 4:11, Sag. 3:2, 1Kor. 3:15).

 

Volgens Calvyn help dit nie om jou vinger te wys wanneer jy mense teen vals lering waarsku nie – jy moet jou hand uitstrek en hulle uit die vuur ruk.[2]  Moenie bang wees om vir mense die waarheid te wys en hulle kerk toe te nooi nie.

 

As jy vals lering by die naam noem sal sommige sê dat jy liefdeloos is, maar volgens Judas is dit liefdevol en barmhartig.  ‘n Ou Skotse prediker het gesê: ‘They do not love you that do not warn you, poor hell-deserving sinners.  O! remember that love warns.’[3]

 

[c] Wees barmhartig met dié wat deur die vals leraars se sonde besmet is (v.23b)

Mense het eenkeer vir my gesê om nie kerktug toe te pas nie, omdat dit liefdeloos is.  Volgens Judas is dit barmhartig.  ‘As jy genoeg vir ander mense omgee sal jy dit doen,’ is in effek wat hy in v.23b sê.  Wees lief vir die sondaar en haat sy sonde.

 

Wees bang wanneer jy ingaan om hierdie mense te red.  Herinner hom daaraan dat die Here sondaars sal oordeel, en sê vir hom hoe erg die hel sal wees (v.23, 2Kor. 5:11).

 

Wees ook versigtig vir die vieslike dinge wat jy sal sien en hoor wanneer jy ingaan om die persoon te help (v.23).  Jy is soos iemand wat ‘n siek persoon se beddegoed vol dodelike en aansteeklike kieme moet was.  Vra die Here se beskerming voor jy dit doen.

 

  1. 4. Rus in God se bewaring (v.24-25)

Toe John Bunyan se Pilgrim na die hemelse stad toe reis, het hy deur die Vallei van Vernedering geloop.  Daar het hy vir Apollion (die draak) ontmoet.  In sy eie krag kon hy nie teen hom veg nie – hy het die Here se hulp en wapenrusting nodig gehad.

 

Net so het jy die Here se bewaring nodig om die duiwel te ontwyk en ander mense uit sy strik te bevry (v.24-25).  Jy kan dit nie in jou eie krag doen nie.  Maar as jy op die Here vertrou, sal Hy jou tot die einde toe bewaar sodat die duiwel jou nie kan wegsteel nie (Joh. 10:28-29, 17:12, Rom. 8:38-39, 2Tim. 4:17-18).

 

Die Here sal seker maak dat jy eendag sonder skuld voor Hom staan (v.24, Rom. 8:1, Ef. 5:27, Kol. 1:22, 28, Op. 14:5).  Alhoewel jy vir ‘n tyd lank deur dwaling mislei kan word, sal die Here sy kinders daaruit red en nie toelaat hulle finaal wegval nie (v.24, Matt. 24:24, Fil. 1:6).

 

Wanneer jy op die laaste dag voor die Here staan, sal dit nie soos die goddelose met vrees en bewing wees nie, maar met oorvloedige blydskap (v.24).  Deur die Here Jesus Christus sal jy die enigste God en Verlosser met jou oë sien (v.25).

 

Jy sal sy die heerlike glans, koninklike majesteit, soewereine heerskappy, en Goddelike mag sien (v.25).  Sodra dit gebeur sal jy weet dat dit nog altyd aan Hom behoort het, en dat dit vir ewig syne sal wees: Amen (v.25).

 

‘n Groot en akkurate siening van God is die fondasie waarop elke ander Bybelse waarheid gebou is.  As jy op hierdie punt reg is sal geen ketter jou uitvang nie, en sal jy die duiwel ontwyk.  Wie is die ware God?

 

  • Hy is ‘n volmaakte, onsigbare en oneindige Gees wat oral in sy volle wese teenwoordig is (Ps. 139:7-8, Jer. 23:24, Joh. 4:24, 1Tim. 1:17).
  • Hy is een God wat in drie Persone bestaan (Deut. 6:4, Matt. 3:16-17, 28:19, 1Kor. 8:4, 6).
  • Hy is onafhanklik en het nie die skepping nodig nie (Hand. 17:25).
  • Hy is onveranderlik en betroubaar (Mal. 3:6, 1Kor. 1:9). Sy Woord en karakter bly konstant.  As Hy iets gesê het sal Hy dit doen (Num. 23:19).
  • Hy is ewig en het geen begin of einde nie (Eks. 3:14, Ps. 90:2).
  • Hy weet alles gelyktydig en hoef nooit iets oor die verlede, hede, of toekoms te leer nie (Job 37:16, Ps. 139:1-4, Matt. 6:8, 1Joh. 3:20).
  • Hy is alwys en raak nooit gefrustreerd omdat Hy nie weet wat om te doen nie (Ps. 104:24, Rom. 11:33, 1Tim. 1:17).
  • Hy is liefdevol, goed, barmhartig, geduldig en genadig – dit is deel van wie Hy is (Eks. 34:6-7, Ps. 119:68, 1Joh. 4:8-10).
  • Hy is almagtig: niks is vir Hom onmoontlik of eers moeilik nie (Jer. 32:17, 27, Matt. 19:26, Luk. 1:37).
  • Hy is heilig, uniek, gans-anders, en ver verhewe bo die skepping (Jes. 6:3).
  • Hy is soewerein. Hy regeer oor alles en doen wat Hy wil (Ps. 103:19, 135:6).
  • Hy is regverdig en doen net wat reg is (Deut. 32:4). Hy is die definisie van wat reg en verkeerd is.
  • Hy is toornig, wat beteken dat Hy alle sonde haat (Rom. 1:18).
  • Hy is salig of vreugdevol in die hoogste sin van die woord (1Tim. 6:15).
  • Hy is pragtig en begeerlik, mooier as enigiets in die skepping (Ps. 27:4, Jes. 33:17).

 

Vir hierdie God om jou teen die duiwel te beskerm en veilig in die hemel te bring, is makliker as vir ‘n 60-voet beton muur om jou teen ‘n enkele waterdruppel te beskerm.

 

[1] Dit impliseer o.a. dat 1Johannes voor 70 n.C. geskryf is.  Die algemene siening is dat dit tussen 85 en 95 n.C. geskryf is, maar daar is genoegsame bewyse dat Johannes dit voor die verwoesting van die tempel geskryf het.  Sien bv. http://www.datingthenewtestament.com/John.htm EN John A.T. Robinson, Redating the New Testament, Wipf and Stock Publishers, Eugene: Oregon, 1976 [SCM Press], 2000, hfst. 9.  Robinson se boek is by die volgende skakel beskikbaar: http://web.archive.org/web/20071120235525/http:/www.preteristarchive.com/Books/1976_robinson_redating-testament.html

[2] Aangehaal in Michael Green, Tyndale New Testament Commentaries: 2Peter & Jude, Inter-Varsity Press, Leicester: England, 1968, p. 187

[3] Robert Murray McCheyne, Sermons of M’Cheyne, The Banner of Truth Trust, London: England, 1961, p. 168

‘n Goeie toekoms vir Christene

Field of flowers

Die meeste mense stem nie saam met my tema nie, en dink dat daar ‘n donker toekoms vir Christene voorlê.  Hulle herinner ons op Facebook en Whatsapp dat die aardbewings, droogtes, vloede, toenemende vals lering, afvalligheid, vervolging en oorloë die vervulling van tekste soos Matt. 24, 2Tess. 2 en die boek Openbaring is.

 

Maar soos ek hierdie tekste verstaan, is dit hoofsaaklik in die eerste eeu vervul.  Jesus het bv. gesê dat die gebeure van Matt. 24 in die eerste eeu sou plaasvind: “Voorwaar Ek sê vir julle, hierdie geslag sal sekerlik nie verbygaan voordat al hierdie dinge gebeur het nie.” (Mat 24:34).  Ek weet dat hierdie stelling baie vrae onbeantwoord laat, en daarom beplan ek om oor ‘n paar weke deur Matt. 24 te preek.

 

Volgens Paulus het die Tessalonisense geweet wie of wat dit is wat die man van wetteloosheid terughou (2Tess. 2:6).  Ons kan dus ten minste sê dat hierdie vers in die eerste eeu vervul is.  As ek Matt. 24 klaar gepreek het, sal ek 2Tess. 2 preek en poog om die onduidelikhede op te klaar.

 

M.b.t. Openbaring het die verdrukking in Johannes se tyd plaasgevind (Op. 1:9, 2:9-10, 22, 3:10).  Die eerste lesers het bv. geweet wie die 666 is: hulle het sy naam geken en moes net sy nommer uitwerk (Op. 13:18).  Weereens weet ek dat dit nie al jou vrae beantwoord nie.  Daarvoor kan jy die skakels hieronder besoek of hfst. 15 en 24 in my boek, Openbaring: Gister en Vandag lees.[1]

 

Ek probeer nie sê dat daar nie ‘n wederkoms is nie, maar dat ek nie soos talle mense glo daar sal êrens in die toekoms ‘n groot verdrukking wees nie.  Die feit dat dinge op die oomblik sleg lyk, beteken nie dat die Here se hande afgekap is nie.

 

Vir Jesaja het die onmiddellike toekoms bleek gelyk, maar in Jes. 35 leer ons dat daar in die verre toekoms mooi dinge voorlê.  Dele van Jes. 35 verwys na Jesus se eerste koms, dele na sy tweede koms, en dele na die tydperk tussen twee komste.  Kom ek wys dit vir jou.

 

  1. Heerlikheid (v.1-2)

Die meeste Suid-Afrikaners weet van Namakwaland: die plek waar geel, oranje, wit, pienk, pers en ander kleure blomme in die woestyn groei.  Dit is blykbaar iets om te sien.  Jesaja het iets soortgelyk voorspel.  Daar is egter ‘n dieper betekenis aan sy woorde.

 

Die Here sal sy volk se vyande oordeel (Jes. 34), maar háár seën (Jes. 35).  Edom sal ‘n woestyn wees (34:9-15), maar Israel se woestyn sal blom (35:1).  Jakob se nageslag sal voorspoedig wees, terwyl die Here Esau s’n sal oordeel.  “Soos geskrywe is: Jakob het Ek liefgehad en Esau het Ek gehaat.” (Rom. 9:13).

 

Die volk wat eens soos ‘n dorre woestyn was, sal bly wees wanneer die Here se oorvloedige reën daarop val (v.1).  Sy sal wees soos ‘n woestyn wat met pers krokusblomme[2] bloei: dit sal soos ‘n dik pers mat op die woestyn vloer lê (v.1).  Die woestyn sal met groot blydskap jubel en sing (v.2).

 

God sal aan die woestyn die heerlikheid van die pragtige Libanon woud met sy indrukwekkende sederbome gee (v.2).  Dit sal so majestieus soos berg Karmel teen die see wees, soos groen weivelde in die Saron vlakte (v.2, 65:10, 1Kron. 5:16, 27:29, Jer. 50:19, kontr. Jes. 33:9).  God se volk sal sy heerlike majesteit in die herstelde skepping sien (v.2).

 

Wat beteken hierdie verse?  Wanneer Jesus kom sal Hy die skepping nuut maak (Rom. 8:19-22).  Die nuwe skepping begin egter wanneer iemand weergebore word (2Kor. 5:17).  Die lewe in sy hart is so heerlik en oorvloedig soos ‘n woestyn wat blom (v.1-2, Joh. 10:10).  Alhoewel hy nie Christus se heerlikheid met sy oë sien nie (v.2, 40:5, Joh. 1:14), sien hy dit met die oë van geloof (2Kor. 4:6).  In die hemel en by die wederkoms sal hy die volheid daarvan sien (v.2, Joh. 17:24, 2Tess. 1:10).

 

Mense wat in sonde lewe kan dit nie sien nie (Rom. 3:23).  Hulle is soos ‘n versiende persoon wat na ‘n kleurvolle skoenlapper kyk en sê dat dit lelik is.  As hulle egter na die Here toe draai, sal Hy die sluier wat hulle verblind wegvat sodat hulle mooi kan sien (2Kor. 3:16).

 

Het jy al iets van Christus se heerlike majesteit gesien, of sê jy ‘ja’ maar eintlik weet jy nie waarvan ek praat nie?  As jy dit gesien het sal jy dit weet.  Dit sal wees soos om op ‘n warm dag in ‘n waterval poel te lê, die gesing van voëls in ‘n reënwoud te hoor, Namakwaland se blomme te sien, ‘n ligte seebries op jou vel te voel, en jou gunsteling nagereg te eet.

 

Die sleutel wat hierdie heerlike skatkis vir jou sal oopmaak is Jesus se kruisdood.  Geloof en bekering is die hand wat die sleutel optel en die deur oopsluit.  Dalk sal Jesus se heerlikheid eers net deur die skrefie skyn.

 

Maar as jy aanhoudend met die Here praat, die Woord leer en uitleef, Hom saam met ander gelowiges aanbid en die nagmaal gebruik, sal sy heerlikheid soos die oggendson op jou skyn (Mal. 4:2).  Soos wat jy groei sal die son al hoe helderder skyn, totdat dit by Jesus se wederkoms so helder soos sewe sonne skyn (Spr. 4:18, Jes. 30:26, 2Kor. 3:18, Op. 21:23).

 

En sal hierdie vooruitsig jou nie help om die Here meer lief te hê en meer na Hom te verlang nie: “[Jesus Christus] vir wie julle, al het julle Hom nie gesien nie, tog liefhet; in wie julle, al sien julle Hom nou nie, tog glo en julle verbly met ‘n onuitspreeklike en heerlike blydskap” (1Pet. 1:8)?

 

  1. Verligting (v.3-4)

Harry is 10-jaar oud.  Kapers het hom ontvoer.  Hulle gebruik hom as ‘n slaaf op hulle suikerplantasies.  Wanneer hy in die dag werk is daar ‘n man wat hom oppas.  In die aand sluit hulle hom in ‘n hoek toe.  Hy kry ‘n sny brood en ‘n koppie water voor hy gaan slaap.  Hy bid baie dat die Here iemand sal stuur om hom te help.

 

Op ‘n dag toe hoor Harry se bedroefde pa dat sy seun nog lewe, en dat hy as ‘n slaaf op hierdie plantasies werk.  Hy het ‘n kaartjie geboek, na die vreemde land toe gevlieg, en met die polisie se hulp die skelms uitgehaal.  Harry kon sy vreugde nie inhou toe hy sy pa sien nie.  Die verligting was so groot soos om ‘n sak sement vir 10 km te dra en dan neer te sit.

 

So sou dit met God se volk wees.  Omdat die Here oppad was, het Hy vir hulle gesê om hulle slap hande op te tel en hulle lam knieë te versterk (v.3-4).  So moes hulle mekaar moed inpraat, eerder as om angstig en verskrik te wees (v.4).  Hulle moes na die Here kyk wat op die water loop en nie na die golwe nie, na die Here en nie na hulle omstandighede nie, na die toekoms en nie na die hede nie.

 

Die Here sou met wraak kom om hulle van die vyand se mag te bevry en aan hulle verligting te skenk (v.4, 40:10).  Hy het dit deur sy kruisdood gedoen (Kol. 2:15, Heb. 2:14-15, 1Joh. 3:8), en sal dit finaal by die wederkoms doen (Jud. 15, 2Tess. 1:6-9, Op. 20:10-15).

 

Soos wat Jesus se eerste koms vir Simeon en Anna ‘n verligting was (Luk. 2:25-38), moet die vooruitsig na sy wederkoms vir jou ‘n verligting wees.  Dit moet jou help wanneer jy wil uitsak en nie meer met die wedloop wil aanhou nie, wanneer jy nie meer lus is om te bid, die Bybel te lees en kerk toe te kom nie.

 

Dit moet jou help wanneer jy soos Demas die Here wil los om na die wêreld toe terug te keer, omdat jy soos Adam en Eva dink dat die Here goeie dinge van jou af wil weghou (Gen. 3:1-6, 2Tim. 4:10).  Dit moet jou help om te sien dat die wêreld se plesiere leeg is, en dat jy niks goed kan hê sonder die Here nie (Ps. 16:2, 73:25).

 

Dit moet jou help wanneer die las vir jou te swaar raak en jy wil opgee.  Dit moet jou help wanneer die Christelike lewe moeilik raak, wanneer kollegas en kinders by die skool jou uitskuif omdat jy die Here dien.  Dit moet toegewyde predikante en sendelinge help as hulle die bediening wil los omdat dit te hard is.

 

Jesus en die wenpaal van sy wederkoms sal vir jou ‘n tweede asem wees wat jou help om verder te hardloop (v.3-4, Heb. 12:1-2).  “Daarom, rig die slap hande en die verlamde knieë weer op; en maak reguit paaie vir julle voete, sodat wat kreupel is, nie uit lit raak nie, maar liewer gesond gemaak word.  Jaag die vrede na met almal, en die heiligmaking waarsonder niemand die Here sal sien nie” (Heb. 12:12-14).

 

  1. Wonderwerke (v.5-7)

‘n Ateïs het my eenkeer oor wonderwerke gevra.  Ek het gesê dat die wonderwerke wat Prosperity predikers doen geen wonderwerke is nie.  ‘Yes!’ het hy gesê: ‘Uiteindelik is daar iemand wat dit besef.’

 

Maar hy het nie klaar geluister nie, en was teleurgesteld toe ek sê dat ek wel in wonderwerke glo.  Die feit dat ek die Prosperity Gospel se sg. wonderwerke verwerp, beteken nie dat ek die Messias s’n verwerp nie.

 

Omtrent 700 jaar voor Jesus aarde toe gekom het, het Jesaja sy wonderwerke voorspel: “Dan sal die oë van die blindes geopen en die ore van die dowes ontsluit word.  Dan sal die lamme spring soos ‘n takbok, en die tong van die stomme sal jubel” (v.5-6, vgl. Matt. 9:27-33, 12:22, Mark. 2:1-12, 7:31-37, Joh. 5, 9, Hand. 3:1-10).

 

Johannes noem hierdie wonderwerke tekens (bv. Joh. 2:11)Waarvan is dit ‘n teken; waarheen wys dit?

 

  • Dit wys dat Jesus die Messias en God van Jes. 35 is (vgl. Luk. 4:18-19, 7:18-22).
  • Dit is ‘n illustrasie van iets groter, bv. dat Jesus gekom het om mense se geestelike oë te open (Joh. 9, 2Kor. 4:4, 6).
  • Dit is ‘n voorskou van ‘n verheerlikte liggaam wat ons by die wederkoms ontvang. As die Here ons liggame klaar opgewek het, sal gelowiges wat doof, blind, lam, stom, ens. was, vir altyd genees wees.

 

Die rede hoekom die lamme soos ‘n takbok spring en die stomme sing, is omdat die Messias se Gees hulle verander het (v.6).  Hulle was eens soos ‘n dor woestyn waar jakkalse gelê het, maar toe Hy sy Gees op hulle uitstort het hulle soos ‘n woestyn vol water geword (v.6-7, 29:17, 32:15, 44:3-4).  God het hulle na liggaam en siel getransformeer (Joh. 3:3, 5, 7:37-39, Tit. 3:5-6).

 

Dit is ook waar van ons.  Wanneer die Here jou wederbaar is jy nie die persoon wat jy voorheen was nie.  Almal om jou kan dit sien.  Jou optrede, gesprekke, wêreldbeskouing, begeertes, gesindheid, vriendekring, verhoudings, prioriteite, belangstellings, tydverdryf – alles het verander.  Jy is letterlik ‘n nuwe mens.

 

Maar jy is nog nie volmaak nie; jy doen nog sonde.  Jou liggaam is ook ver van volmaak af.  Eers as jy doodgaan sal jou siel volmaak wees (Heb. 12:23), en wanneer Jesus weer kom sal jy ‘n nuwe liggaam kry (1Kor. 15:51-52, 1Joh. 3:2).

 

Dit sal nie splinternuut wees in dié sin dat dit ‘n ander liggaam is nie.  Soos met Jesus, sal die liggaam wat begrawe is die een wees wat uit die graf uit opstaan (Joh. 5:28-29, 20:24-27, 1Kor. 15:35-44).  Die Here sal m.a.w. die liggaam wat jy nou het opwek en verheerlik.

 

Hierdie verheerliking beteken dat jou liggaam in ‘n ander sin heeltemal nuut sal wees.  Jou nuwe liggaam sal vir ewig beeldskoon, jonk, sterk, energiek, gesond, onsterflik en onder die leiding van God se Gees wees (1Kor. 15:42-44).  Die verskil tussen jou huidige liggaam en die een wat jy dán sal hê, is so groot soos die verskil tussen ‘n woestyn en ‘n weiveld vol blomme (v.5-7).

 

  1. Verlossing (v.8-10)

In Suid-Afrika weet ons hoe dit voel om op ‘n pad vol slaggate te ry.  Is dit nie lekker om op ‘n pad te ry as dit nuut geteer is nie?  Jesaja sê dat die Christelike lewe so is, en noem dit die hoofweg van heiligheid (v.8).  God het dit gemaak vir dié wat heilig is, en sal nie toelaat dat onheilige mense met hulle busse en sleepwaens vol sonde daarop ry nie (v.8, 52:1, Op. 21:27).

 

Maar as hulle hulle sonde los en daarop loop, sal die Here hulle beskerm sodat hulle nie wegval nie (v.8).  As jy op die hoofweg van heiligheid bly is jy veilig, omdat leeus en ander roofdiere in die woestyn ronddwaal en nie op die hoofweg kom nie (v.9).  Vermy dus die woestyn van sonde en bly op die hoofweg van heiligheid.  So sal die Here jou van leeus red en veilig in sy hemelse Koninkryk uitbring (2Tim. 4:17-18, 1Pet. 5:8-10).

 

Alvorens jy op die hoofweg van heiligheid kan loop moet jy verlos word (v.9-10).  Omdat Jesus die Weg is, moet jy eers in Hom glo (Joh. 14:6).  Volgens 1Pet. 1:18-19 het Hy sy lewe gegee om ons uit die slawerny van sonde te bevry.  Noudat ons vry is – Jode en heidene wat in Jesus glo – kan ons na die hemelse Sion of Jerusalem toe terugkeer (v.10, 2:2-3, Op. 21:24, 26).

 

Omdat ons dankbaar is, sing ons terwyl ons dit doen (v.6, 10, 51:11, Ps. 105:43).  God se oordeel hang nie meer soos ‘n swaard bo ons koppe nie, maar Hy het die parfuum van sy verlossing oor ons uitgestort.  Ons sing omdat ons dit nie kan inhou nie (v.10, Kol. 3:16).  Soos ‘n blikkie Coke wat geskud word, loop dit vanself oor (v.10).

 

In die hemel en op die nuwe aarde sal hierdie blydskap voortduur (v.10).  Dit kan nie anders nie, omdat die dinge wat droefheid, gesug en trane veroorsaak het weg is (v.10, 65:19, Op. 21:4).  As dít nie ‘n blink toekoms is nie, weet ek nie wat is nie.

 

Ek is optimisties oor die toekoms en verwag selfs ‘n tydperk van seën nog voor die Here kom.  In ‘n preek oor Ps. 86:9 het Charles Spurgeon gesê: ‘David was not a believer in the theory that the world will grow worse and worse…’[3]

 

Ek stem saam met John Owen as hy sê: ‘The gospel shall be victorious.  This greatly comforts and refreshes me.’[4]  ‘n Puritein genaamd Thomas Goodwin het gesê: ‘There will come a time when the generality of mankind, both Jew and Gentile, shall come to Jesus Christ.’[5]

 

Ek sien uit na die dag wanneer “die aarde sal vol wees van die kennis van die HERE soos die waters die seebodem oordek” (11:9), na die dag wanneer die Messias “sal heers van see tot see en van die Rivier tot by die eindes van die aarde.” (Ps. 72:8).

 

Natuurlik is dit heeltemal moontlik dat daar tye van vervolging voor die herlewing sal wees.  Buitendien kyk ek nie na die sg. goue era as die finale hoop waarna ons uitsien nie.  As jy vir my vra wat die Christen se hoop is, sal ek nie my eindtyd siening op jou afdwing nie.  Ek sal Jesus en die wederkoms vir jou voorhou: “Christus onder julle, die hoop van die heerlikheid.” (Kol. 1:27).  Dít is tog die goeie toekoms waarna ons uitsien.

 

[1] https://baptistekerkkemptonpark.wordpress.com/2017/02/17/oor-die-vals-profeet-en-die-antichris-of-die-berugte-666/

https://baptistekerkkemptonpark.wordpress.com/2016/09/24/die-goeie-effek-van-die-groot-verdrukking/

[2] Die Ou Vertaling praat van ‘n narsingblom.

[3] Aangehaal in Iain Murray, The Puritan Hope, The Banner of Truth Trust, Edinburgh: Scotland, 1971, p. xiv

[4] Ibid., p. xii

[5] Ibid.

Henog se profesie oor vals profete en die wederkoms

Second Coming clouds

Oor die Kersseisoen het ons weekliks mense vir ete gehad of by iemand anders se huis gaan eet.  Maar ‘n maand van vleis, gebakte aartappels, vleis, drie soorte groente, vleis, ‘n verskeidenheid van slaaie, vleis, paptert, vleis, knoffelbrood, vleis, roomys en warm poeding, vleis… is vir my te veel.  My dubbel ken, maag en gewete het swaar gevoel.  Ek het vir my vrou gesê dat ek daarna uitsien om weer spaghetti en maalvleis te eet.

 

Partykeer kan ‘n mens geestelik so voel – veral as jy vir 6 weke in ‘n ry boodskappe oor vals lering hoor.  Maar ek wil jou vra om vas te byt.  Hopelik is ons binne die volgende 3 weke klaar en sal ons met Romeine begin.  Vandag wil ek by Jud. 14-15 stilstaan.

 

  1. Die profesie is waar (v.14a)

Een keer in ‘n blou maan ontmoet ek iemand wat wonder hoekom die boek Henog nie in die Bybel is nie.  Omdat Judas dit in v.14-15 aanhaal, het sommige kerkvaders gesê dat die boek Henog die Woord van God is.[1]  Vandag glo die Etiopiese Ortodokse Tewahedo Kerk, die Mormone en sommige vêr regse Afrikaners dit.[2]

 

Volgens sommige in die vroeë kerk wys Judas se aanhaling van Henog dat sy brief ook nie geïnspireer is nie.[3]  Ek weet nie van mense in ons tyd wat dit glo nie, maar is seker dat daar so iemand is.  ‘n Derde groep het gesê dat Judas in die Bybel moet wees, maar Henog nie.[4]  Vandag glo alle Christene ter wêreld dit.

 

Maar wat beteken dit dan dat Judas uit 1Henog 1:9 aanhaal; hoe moet ons dit verstaan?

 

In die eerste plek moet ons sê dat daar regtig so iemand soos Henog was.  As ons Henog en Adam inreken, was hy die sewende geslag van Adam af (v.14a, Gen. 5).  Hy het die Here tevrede gestel, in ‘n nabye verhouding met Hom gelewe, en soos Elia hemel toe gegaan sonder dat hy dood is (Gen. 5:21-24, Heb. 11:5).

 

Tweedens moet jy weet dat 1Henog nie deur Henog geskryf is nie.  Dit is tussen die 3de eeu v.C. en die 1ste eeu n.C. deur verskillende mense geskryf.[5]  Ons beskou dit dus nie as die Gees-geïnspireerde woorde van ‘n belangrike profeet nie.

 

Derdens is dit belangrik om te onthou dat Paulus by drie geleenthede uit buite-Bybelse geskrifte uit aanhaal: Hand. 17:28, 1Kor. 15:33, Tit. 1:12.  Dit beteken nie dat hy hierdie geskrifte as geïnspireer beskou nie, maar dat hulle iets gesê het wat waar is.

 

Wanneer die Nuwe Testament skrywers uit die Ou Testament aanhaal, sê hulle: ‘Soos geskrywe is… die Skrif sê,’ of so iets.  Judas gebruik nie hierdie formule wanneer hy uit die boek Henog aanhaal nie.  Hy glo dus dat hierdie profesie waar is, maar dink nie dat die hele boek geïnspireer is nie.

 

Henog se profesie begin deur te sê dat die Here met tienduisend van sy heiliges gekom het (v.14a).  Sy gebruik van die verledetyd [Gk.] wys dat die profesie seker is.  Dit is soos Jes. 53 wat 700 v.C. sê dat Jesus vir ons sonde gesterf het.  Teoloë noem dit ‘n profetiese verledetyd.  Dit is asof dit reeds gebeur het.

 

Henog se profesie is eerste tydens die vloed vervul toe God die goddelose wêreld geoordeel het (v.14-15, 2Pet. 2:5).  Hy het egter ‘n voller vervulling daarvan in die wederkoms gesien.  Dit is ook hoe Judas dit in v.14-15 gebruik (vgl. Matt. 24:36-39, 2Pet. 3:4-7).

 

Hoe moet ons v.14a op onsself toepas?  Henog was die sewende geslag van Adam af; sy bloedlyn het deur Set teruggeloop na Adam toe (Gen. 5).  Lameg was die sewende geslag van Adam af deur Kain (Gen. 4:15-18).  Lameg en Henog het dus in dieselfde tyd gelewe.

 

Toe Lameg op die aarde was, het mense losbandig gelewe en nie die Here gedien nie (Gen. 4:19-26).  Henog was een van die min mense wat die Here gedien het.  In sy agterkleinseun Noag se tyd was dinge so erg, dat Noag die enigste man op aarde was wat die Here gedien het (Gen. 6:5-13).  Niemand hoef dus te wonder hoekom Henog die vloed voorspel het nie (v.14-15).

 

Die punt wat ek wil maak is dat dit moontlik is om in ‘n goddelose samelewing, kultuur, skool, huwelik, familie en werkplek toegewyd aan die Here te lewe.  Natuurlik moet jy nie ‘n goddelose omgewing kies nie, maar as jy teen jou sin in so ‘n situasie beland moet jy nie sê: ‘Ek kan nie help om sonde te doen nie; as jy in my situasie was sou jy dieselfde gedoen het,’ nie.

 

Dit is nie jou omstandighede wat maak dat jy sonde doen nie, maar jou hart (Matt. 15:19).  Die probleem is dat jy nie toegewyd is soos Henog nie.  Bely jou sonde, bekeer jou, en vra dat die Here jou sal help om toegewyd te wees.

 

Dit kan net gebeur as jy gedurig in gebed met die Here praat, erns maak om nie net die Bybel te ken nie maar te doen, en op ‘n gereelde basis met ander gelowiges ontmoet en saam met hulle die Here aanbid.  As jy waarlik gered is sal jy die begeerte hê om jouself aan die Here toe te wy, en sug omdat jy dit nie so goed regkry soos wat jy graag wil nie.

 

  1. Die profesie is skrikwekkend (v.14b-15)

Wat bedoel ek as ek sê dat daar op Black Friday duisende mense in die land se winkels was?  Ek bedoel nie dat daar net een of twee duisend mense was nie, maar dat daar te veel was om te tel.  Ek gebruik dit om ‘n onbepaalde hoeveelheid mee uit te druk.

 

So was dit in die Bybel met tienduisend.  Volgens v.14b het die Here met sy tienduisende heiliges gekom.  Die heiliges verwys na gelowiges en engele (v.14b, 3, Deut. 33:2, Ps. 68:18, Dan. 7:10, 1Kor. 1:2, Heb. 12:22, Op. 5:11).  Wanneer Jesus weer kom sal hulle saam met Hom na die aarde toe terugkeer (v.14b, Matt. 25:31, 1Tess. 3:13, 4:14, 2Tess. 1:7).

 

Dit sal ‘n skrikwekkende gesig wees wanneer Jesus in vuur en vlam kom om die goddelose te oordeel (v.15, Matt. 25:41, 2Pet. 3:7).  Volgens 1Kor. 6:2-3 sal ons Hom hiermee help, en volgens Matt. 13:41-42, 49-50 sal die heilige engele die goddelose in die hel gooi.  In v.15 praat Judas vier keer van die goddelose.  In die konteks verwys dit na die goddelose vals leraars (v.4, 18), maar ons kan sy woorde op alle ongelowiges toepas.

 

In die res van die Skrif verwys goddelose mense na dié wat God se wet oortree (1Tim. 1:9):

 

[1] Na mense wat seks, geld, ander mense, hulle verslawings, ens. aanbid; wat God se Woord verwerp en hulle eie godsdiens opmaak.

 

[2] Na mense wat die Bybel opsy skuif om God te aanbid soos húlle wil.

 

[3] Na mense wat die Here se Naam met hulle lippe en lewens misbruik.

 

[4] Na mense wat nie met ander gelowiges wil saamkom om God te aanbid nie.

 

[5] Na mense wat ongehoorsaam en disrespekvol is met hulle ouers.

 

[6] Na mense wat ander haat, afbreek en doodmaak.
[7] Na mense wat die huwelik ontheilig, wellustig is en seksueel losbandig lewe.

 

[8] Na mense wat oneerlik is en steel.

 

[9] Na mense wat leuens vertel en hulle beloftes breek.

 

[10] Na mense wat geldgierig, ontevrede, materialisties en jaloers is.

 

Die Here sal al hierdie mense oordeel – nie een van hulle sal wegkom nie (v.15).  Die wet sal hulle monde toestop (Rom. 3:19).  Hulle sal nie kan sê dat die Here onregverdig is, of dat Hy hulle te swaar oordeel nie.  Omdat hulle goddeloos was sal hulle erken dat hulle die Here se straf verdien, al haat hulle Hom ook terwyl hulle dit sê.

 

Die vals leraars wat ander op ‘n dwaalspoor na die hel toe gelei het, sal strenger geoordeel word (v.15, Matt. 23:2-3, 15, Luk. 12:47-48, Jak. 3:1).  Soos met elke ongelowige sal die Here hierdie vals leraars se goddelose woorde en dade voor die wêreld uitblaker (v.15, Luk. 12:2-3).  Almal sal weet watse bose dinge hulle teen die Here gesê en gedoen het (v.15).

 

Hoe moet ons hierop reageer?  Moenie vir jouself sê dat jy hemel toe gaan as jy ‘n goddeloos is nie.  As jy in ongehoorsaamheid lewe wil ek jou vra om nie soos die man te wees wat seksueel losbandig was, en vir my gesê het hy is nie goddeloos nie.  As jy in sonde lewe is jy goddeloos.  Totdat jy dit nie erken nie, sal die Here jou nie vergewe nie.

 

Maar as jy jou verlore toestand erken is daar vir jou hoop (Spr. 28:13).  Jesus het immers aan die kruis gesterf om goddelose mense van hulle sonde en God se oordeel te red (Rom. 5:6).  As jy in Jesus glo sal die Vader sy dood in jou plek aanvaar en sy perfekte rekord van onskuld aan jou toereken (Rom. 4:5).  Deur die Heilige Gees sal Hy jou verander en in staat stel om soos Henog te lewe: Godvresend te midde van ‘n goddelose samelewing (Tit. 2:11-12, 1Joh. 5:4-5).

 

Indien jy dink dat dit onmoontlik is, moet jy onthou dat Henog nie altyd die Here gevolg het nie.  Volgens Gen. 5:21-22 het hy die Here begin volg toe hy 65 was.  Wat het gebeur?

 

Sy kind is gebore: Metusalag.  Hoekom het dit hom verander?  Volgens sommige beteken Metusalag ‘man van die spies’.  Ander reken egter dat dit die volgende beteken: ‘wanneer hy sterf sal dit gestuur word’.[6]  As jy tyd het om die sommetjie te maak, sal jy sien dat God die vloed gestuur het in die jaar wat Metusalag dood is (vgl. Gen. 5:21-32, 7:6).

 

Dit blyk dus dat Metusalag se geboorte ‘n profesie aan Henog was.  Toe hy gebore is het Henog geleer dat die Here die wêreld gaan oordeel.  Dit het so hom geskud dat hy hom bekeer en vir die volgende 300 jaar met die Here gewandel het (Gen. 5:22, Heb. 11:5).  En kan die Here jóú nie verander nie, al was jy tot nou toe die goddeloosste mens in jou familie, vriendekring, skool, werkplek of dorp (sien 1Tim. 1:15)?

 

Dien jy die Here?  Pasop dat jy nie die ketters se dwaling volg en na jou ou lewe van goddeloosheid toe terugkeer nie.  Dit is immers wat vals lering in jou lewe sal meebring.  Soos ek reeds in hierdie reeks gesê het, kan vals lering nie goddeloosheid teenwerk nie maar lei dit daartoe.  Hoe gebeur dit?

 

Daar is twee soorte vals leraars.  Een groep sal vir jou sê om ‘n stel reëls te volg sodat jy vir die Here aanneemlik kan wees.  Hulle weet nie hoe die wet werk nie.  Die wet is soos ‘n spieël wat vir jou wys hoe vuil jou gesig is, maar dit kan nie jou gesig was nie (1Tim. 1:8-11).  Vals leraars weet dit nie, en sê vir mense om hulleself met die spieël te was (Kol. 2:16-17, 21-23).  Dit werk nie.  Hoe meer wette jy vir jouself maak, hoe meer wil die ou sondige begeertes in jou dit oortree (Rom. 7).

 

Die ander groep verkondig Joseph Prince se hiper- of goedkoop genade, en gooi die wet by die venster uit.[7]  Volgens hulle hoef jy nie eers jou sonde te bely nie, omdat God dit reeds deur Jesus se kruisdood vergewe het.  Jy is klaar in die fontein van Golgota gewas en hoef nooit weer in die spieël te kyk nie.  Hulle vergeet blykbaar dat mense wat met sandale op stof paadjies loop se voete vuil word, al het hulle reeds gebad.  So iemand moet dus deur die dag nog sy voete was (Joh. 13, Matt. 6:12, 1Joh. 1:7, 9).

 

Mense wat hiper-genade predikers volg dink dat heiligmaking nie 2Pet. 1:5 se moeite verg nie, maar dat dit passief is: Let go and let God.  Hulle verstaan nie dat God vir sy kinders die vermoë en wilskrag gee, sodat húlle met toewyding kan werk om heilig te wees nie (Fil. 2:12-13, Kol. 3).

 

Uiteindelik sal hierdie mense se sg. ‘genade’ daartoe lei dat hulle in losbandigheid verval – iets waaroor hulle gewetens hulle kamtig nie hoef te pla nie (v.4, Gal. 5:13, 1Pet. 2:16).

 

Wil jy toegewyd wees soos Henog?  Moenie wetties wees nie (Gal. 5:18), maar moet ook nie die wet weggooi nie (Rom. 8:4, Gal. 5:23).  Maak in die eerste plek seker dat jy weergebore is, omdat jy nie sonder die Heilige Gees toegewyd kan wees nie.

 

Daarna moet jy die Skrif biddend oordink en jou hart daarmee vul.  Onderwerp jou aan die Gees en vra dat Hy jou in die waarheid van die Woord sal lei (Ef. 5:18, Kol. 3:16, Joh. 16:13).  Gehoorsaam wat Hy jou in die Bybel leer.

 

Sê ‘nee’ vir die goddeloosheid van vals leraars en die wêreld; vlug daarvoor sodat jy nie saam met die wêreld geoordeel word nie (v.14-15, Op. 18:4).  Wees gereed vir die wederkoms.  Moenie dat Jesus jou op heterdaad betrap waar jy goddelose dinge dink, begeer, beplan, kyk, hoor, doen en sê nie (v.15, Matt. 24:42-51, 1Joh. 2:28).

 

Moenie soos iemand wees wat skaam kry wanneer gaste onverwags by sy huis opdaag en sien hoe deurmekaar dit is nie.  Wees eerder soos iemand wat geweet het hulle kom, en gister al die huis opgeruim het.

 

[1] Bv. [1] Tertullian, On the Apparel of Women: Book I, 3:1-3. [2] Origen, De Principiis IV. [3] Irenaeus, The Proof of the Apostolic Preaching. [4] Epistle of Pseudo-Barnabas, 4:3, 16:5-6. [5] Clement of Alexandria, Fragments: Comments on the Epistle of Jude

[2] http://www.ethiopianorthodox.org/english/canonical/books.html

https://www.lds.org/ensign/1975/10/a-strange-thing-in-the-land-the-return-of-the-book-of-enoch-part-1?lang=eng

Vêr regse groepe het die boek Henog in ‘n geskrif wat hulle Die Boek van Herinnering noem.

[3] In die 4de eeu het mense soos Didimus en Hiëronimus [Eng. Jerome] gesê dat hulle Judas as die Woord van God aanvaar, maar dat baie mense dit op grond van Judas se aanhaling van buite-Bybelse geskrifte verwerp (uit Didimus se epistula judae enarratio en De Viris Illustribus van Hiëronimus).

[4] Augustine, The City of God: Book XV, 23:4, Book XVIII, 38

[5] Gene L. Green, Baker Exegetical Commentary on the New Testament: Jude and 2 Peter, Baker Academic, Grand Rapids: Michigan, 2008, p. 27 n. 23

[6] https://creation.com/biblical-chronogenealogies en Andy McIntosh, Genesis for Today, Day One Publications, Leominster: England, 1997, 2001, 2006, pp. 152, 160

[7] https://au.thegospelcoalition.org/article/the-hypergrace-of-joseph-prince-a-review-of-destined-to-reign/

‘n Waarskuwing aan Edomiete en Afrikaners

Groot kerk

‘n Groot groep mans, vroue en kinders wil deur Suid-Jordanië reis.  ‘Kan julle asb. vir ons ‘n bietjie water gee?’ vra hulle: ‘ons sal daarvoor betaal.’  Die mense weier en dreig hulle met die dood (Num. 20:14-21).  Die groep het omgedraai en verder gereis.

 

Toe hulle by hulle bestemming kom, het die mense van Suid-Jordanië alewig dinge vir hulle moeilik gemaak (1Sam. 14:47, 2Sam. 8:14, 1Kon. 11:14, 2Kon. 8:20, 14:7, Amos 1:11).  Toe ‘n ander sterk weermag die groep aanval, was die mense van Suid-Jordanië bly (Ps. 137:7, Obad. 10-12).  Hulle het gehelp om die groep se kamp te plunder, vlugtelinge vermoor, en oorlewendes aan die weermag oorhandig (Obad. 13-14).

 

Die groep se Leier het besluit om wraak te neem.  Hy het die mense van Suid-Jordanië uitgewis, sodat wilde diere die land oorgeneem het (Jes. 34).  Wat dink daarvan?

 

Wat as ek vir jou sê dat die groep Israel is, die mense van Suid-Jordanië Edom, die weermag Babilon, en die Leier wat vir Edom uitgewis het God?  Aan die een kant verbly ons ons oor geregtigheid.  Ons is bly as rebelse skoliere geskors word, kapers doodgeskiet word, of ‘n terroriste basis opgeblaas word.

 

Maar sodra die Here dit doen, sê ons dat Hy wreed en onregverdig is: ‘Hoe kan ‘n God van liefde onskuldige mense hel toe stuur?’  Maar dit is presies waar ons die fout maak, omdat geen mens onskuldig is nie, en omdat God se liefde nie sy heiligheid en geregtigheid uitskakel nie.

 

Wat die Here in Jes. 34 met Edom gedoen het, sal Hy met ongehoorsame Afrikaners doen.  Jy sal net-nou sien wat ek bedoel.

 

  1. Dagvaardiging en slagting (v.1-7)

Ek het eenkeer ‘n dagvaardiging in die pos gekry.  Ek het my yskoud geskrik en nie geweet waaroor dit gaan nie.  Ek was verlig toe ek sien dat dit by die verkeerde adres afgelewer is.

 

Die dagvaardiging in v.1 is nie by die verkeerde adres afgelewer nie.  God het die nasies gedagvaar en voor sy hof gedaag.  Hy was kwaad en het besluit om hulle met die banvloek te tref, om hulle uit te wis sodat daar van hulle niks oorbly nie (v.2, Jos. 6:21).  Hulle lyke is nie begrawe nie, maar het op die berge ontbind (v.3).  Dit wys dat die Here hulle vervloek het (1Kon. 14:11-13, 2Kon. 9:34-37).

 

Die hemel het vergaan en is soos ‘n boekrol opgerol; die sterre het soos ‘n wingerd of vyeboom se blare geval (v.4).  Volgens v.11-15 sal daar nog diere wees as dit klaar gebeur het, wat beteken dat Jesaja simboliese taal gebruik.  Sy punt is dat die nasies soos sterre en blare sal val, en dat die Here hulle soos ‘n opgerolde boekrol sal neersit (v.4).  Dit is asof Hy die boek van haar geskiedenis deurgelees en tot ‘n einde gebring het.

 

Hy het hemel en aarde met sy swaard getref (v.5).  Hy het besluit om vir Edom uit te wis (v.5).  “Soos geskrywe is: Jakob het Ek liefgehad en Esau het Ek gehaat.” (Rom. 9:13).  Soos die Here offerdiere met sy swaard geslag het, het Hy die sterk manne van Edom – buffels, stiere en sterk bulle (vgl. Ps. 22:13) – in Bosra geslag (v.6-7, 63:1-6).  God het die offers gebring wat hulle móés bring, maar nie het nie.

 

  1. Vergelding en verwoesting (v.8-17)

‘n Paar jaar gelede het een van ons kinders gevra hoekom die Here mense mag doodmaak, maar ons nie.  ‘Is dit nie moord nie?’ het sy gesê.  Nee dit is nie.  Vir die Here om dood te maak is soos vir ‘n regering om die doodstraf toe te pas, of soos vir die polisie om ‘n misdadiger dood te skiet.

 

Vir Hom was dit heeltemal reg om die Edomiete met die dood te vergeld (v.8).  Ek het in die inleiding gewys dat Hy dit vir sy volk se onthalwe gedoen het (v.8).  Hy het Edom se strome in pik verander, en die grond in swael (v.9).  Soos Sodom en Gomorra was Edom ‘n voorskou van die hel (v.10, 66:24, Jer. 49:17-18, Jud. 7, Op. 14:11, 21:8).

 

Alhoewel Edom vandag as die suidelike deel van Jordanië bekend staan, is daar geen Edomiete meer nie (v.10, Mal. 1:3-4).  Het jy al ooit een ontmoet?  Teen die einde van die Ou Testament was Edom ‘n woestyn vol dorings en distels, onrein diere en demone: ystervarke, uile, kraaie, pelikane, krimpvarkies, jakkalse, volstruise, hiënas, wildehonde, valke wat ander voëls se neste beroof (kuikendiewe), naggeeste en veldduiwels (v.11, 13-15).[1]

 

Volgens v.11 het die Here die land met sy skietlood of waterpas gemeet en dit verwoes.  Hy het dit so vormloos soos voor die skepping gemaak (v.11, Gen. 1:2, Jer. 4:23).  Daar was nie meer prinse, edeles of eers ‘n koninkryk oor nie (v.12).

 

Dié wat Jesaja se profesie betwyfel het kon die res van sy boek deursoek: wat die Here aangaande Edom bepaal het sou gebeur (v.16).  God se Gees sou verseker dat onrein diere die land volgens Jesaja se profesie oorneem (v.16).  Soos God die Beloofde Land vir Israel afgemeet het (Num. 33:54), sou Hy Edom vir die wilde diere afmeet en hulle vir altyd daar laat woon (v.17).

 

Ek glo dat ons Jes. 34 op verskeie maniere kan toepas, maar ek wil op een aspek fokus, nl. versoening.  Hoe vind versoening plaas, en hoe kan die mens reg wees met God?  Hoe kan jy ‘n skoon gewete hê?  Hoe kan jy maak dat die Here nie meer vir jou kwaad is nie?  Hoe kan jy weet dat Hy jou sonde vergewe het?  Hoe kan jy in vrede sterf?

 

Hierdie is vrae waarmee elke mens worstel.  Hoe ons dit egter beantwoord is waar die probleem lê.  Die meeste mense op aarde dink dat jy iets moet doen om reg te wees met God: ‘As jy genoeg goeie werke doen, sal die Here jou vergewe en kan jy in vrede sterf.’

 

Anders as die res glo Christene dat jy niks kan doen om jouself te red nie, maar dat alles genade is.  Verlossing is m.a.w. ‘n gratis geskenk wat die Here vir jou gee – jy kan dit nie koop of verdien nie.

 

Mense het nog altyd op een van die bg. maniere oor verlossing gedink.  Die oomblik toe sonde in die wêreld inkom het die mens self probeer om sy sonde, skuldige gewete en skande te bedek (Gen. 3:7).  Dit het nie gehelp nie, en daarom het Adam en Eva tussen die bome van die tuin vir die Here weggekruip (Gen. 3:8).  Hý moes die offer voorsien sodat hulle sonde bedek en vergewe kon word (Gen. 3:21).

 

Soos sy ouers het Kain self ‘n poging aangewend om God se guns te wen.  Die Here het dit nie aanvaar nie (Gen. 4:3, 5).  Abel was ‘n profeet en het deur direkte openbaring geleer dat hy ‘n offer moes bring (Luk. 11:50-51, Heb. 11:4).  Die Here het hom en sy offer aanvaar (Gen. 4:4).

 

Soos Abel het Noag, Abraham, Isak, Jakob en sy nasate altare vir die Here gebou (Gen. 9:20, 22:13, 26:25, 35:7, Eks. 5:3).  Die Here het vir hulle geleer dat hulle sonde die dood verdien, maar dat Hy ‘n dier sal gee om in hulle plek te sterf: “sonder bloedvergieting vind daar geen vergifnis plaas nie.” (Heb. 9:22).

 

Al hierdie offers het heengewys na die Finale Offer waardeur God sy volk se sonde sou wegneem: “jy moet Hom Jesus noem, want dit is Hy wat sy volk van hulle sondes sal verlos… Dáár is die Lam van God wat die sonde van die wêreld wegneem!” (Matt. 1:21, Joh. 1:29).

 

Jesus is die Plaasvervanger wat in ons plek sterf (53:4-6).  God se swaard het Hom getref, sodat dit jou nie hoef te tref nie (v.5-7).  As jy erken dat jy teen God gesondig het, dat jy sy straf verdien, dat jy niks kan doen om sy guns te wen nie, en dat Jesus jou enigste hoop is, sal God sy offer in jou plek aanvaar.

 

Maar as jy sy offer eenkant toe skuif en deur godsdienstige dade of goeie werke probeer om sy guns te wen, sal Hy jou streng bestraf.  Jy het Jesus se offer verwerp en in jouself probeer om reg te wees met God.  Jy het gedink dat jou sonde nie so erg is nie, en dat jy Hom met jou goeie werke kan omkoop.  Jy het gehoop dat jou kerkbywoning, tiendes en ander godsdienstige werke sy toorn kan afwend.  Jy wou nie erken dat jy geestelik brandarm is nie, en het gedink dat jy ryk genoeg is om sy vergifnis te koop.

 

En sal die Here jou nie hiervoor straf nie?  Sal Hy jou nie oordeel as jy die offer van sy liefde verwerp, en dink jý kan beter doen nie (v.6)?  Dit bekommer my dat die gemiddelde Afrikaner soos Edom die Here se offer verwerp.  Ek praat nie hier van rou ongelowiges nie, maar van mense wat al vir jare in evangeliese kerke sit.

 

Ek het oor die afgelope paar jaar met meer as 30 kerkmense gepraat wat nie vir my die evangelie kon sê nie.  Die kern van ons geloof (wie Jesus Christus is en wat Hy gedoen het) was nie eers op hulle geestelike radar nie.  Toe ek hulle oor hulle redding vra het hulle nie ‘n woord oor Jesus se kruisdood en opstanding gesê nie.  Hulle hoop vir die hemel is so te sê uitsluitlik op hulle goeie werke gebaseer.

 

‘n Vriend van my het dieselfde ervaar.  Maar in sy geval was dit erger.  Hy het die predikante in sy dorp besoek.  ‘Wat is die evangelie?’ het hy hulle gevra.  Twee van hulle kon vir hom ‘n duidelike antwoord gee.  Vir die res was Jesus se kruisdood nie deel van die evangelie nie; dit het oor goeie werke gegaan.

 

Ek verstaan dat mense soms geïntimideer voel of senuweeagtig is.  In party gevalle praat mense van bekering en genade, maar nie van Jesus se kruisdood nie.  In sulke gevalle dink ek dat hulle dalk die Here ken, maar nie goeie lering ontvang het nie.

 

Maar in my ervaring is dit die uitsondering en die reël nie.  In die meeste gevalle ken hierdie mense nie die Here nie.  Omdat Jesus se offer nie vir hulle belangrik is nie, sal die Here hulle soos offerdiere slag (v.6-7).  Kan jy Hom hiervoor kwalik neem as Hy alles gedoen het om sondaars te red, en hulle sy offer verag?  Dit is asof hulle sê: ‘Die Here het nie genoeg gedoen om sondaars te red nie; ons moet iets byvoeg.’

 

Sal die Here ons onkunde verskoon as ons duisende kerke, die Bybel in ons eie taal, en baie ander evangelie-voorregte het?  Hiervoor sal die Here sy swaard ekstra skerp maak en ons met ‘n dubbele oordeel vergeld.

 

Dié wat gereeld die evangelie hoor maar nie ter harte neem nie, sal nóg strenger geoordeel word.  Ek praat van mense soos ek en jy.  “En elkeen aan wie veel gegee is, van hom sal veel gevorder word; en aan wie hulle veel toevertrou het, van hom sal hulle oorvloediger eis.” (Luk. 12:48).

 

Die strengste oordeel wag egter vir dié wat in die Here se diens staan, maar nie die evangelie verkondig nie: “wee my as ek die evangelie nie verkondig nie!” (1Kor. 9:16).  “Moenie baie leermeesters wees nie, my broeders, omdat julle weet dat ons ‘n groter oordeel sal ondergaan.” (Jak. 3:1).

 

In die lig hiervan wil ek vir jou sê om nie gerus te wees omdat jy in ‘n gemeente betrokke is, of omdat jou familie darem in ‘n kerk kom nie.  Glo jy die evangelie?  Hoor en glo jou familie dit?  Hoe verstaan hulle verlossing: vertrou hulle op hulle werke, of rus hulle in niks anders as in Jesus Christus en sy kruisdood vir sondaars nie?

 

As ek aan hierdie dinge dink, heg ek nie veel waarde aan mense wat sê dat ons ‘n ‘Christelike volk’ is nie.  Ek dink nie eers dat ons dit in die verlede was nie.  Vir my lyk dit of Afrikaners Christelike waardes gehad het, maar nie geweet het wat dit beteken om weergebore te wees nie.

 

Ek wonder partykeer of ‘n sekere jong predikant in Johannesburg reg is: ‘South Africa is a pre-Christian country.’  Ons neem m.a.w. aan dat mense gered is omdat hulle kerk toe gaan, maar eintlik het ons die evangelie dringend nodig.

 

Ek is seker dat Afrikaners dit vir die eerste twee of drie geslagte geglo het.  Maar daarna het ons van die bus af geval.  Talle Afrikaners het geglo dat hulle op grond van hulle Afrikanerdom, die uitverkiesingsleer, die verbond, die doop, hulle aanneming en voorstelling, hulle ouers se geloof of iets anders gered is.

 

In sommige hoofstroom kerke was dit ongehoord om die evangelie met sg. ‘verbondskinders’ te deel.  Die kerk en kinders se ouers het aangeneem dat die volgende geslag gered is, en nie die evangelie met hulle gedeel nie.  So het hulle ‘n heidense geslag grootgemaak – kerkgangers wat nie die eerste dinge van die evangelie verstaan nie.

 

Toe hierdie geslag groot word, het hulle kinders gesien dat hulle op ‘n Sondag vroom in die kerk sit, maar in die week soos die wêreld lewe.  Nou, 35 en 40 jaar later is hierdie kinders groot.  Baie van hulle voel ‘n veer vir die kerk.  Hulle sal baie eerder op ‘n Sondag fietsry of by ‘n braai wees as om in die kerk te sit.

 

Die ergste van alles is dat hulle nog steeds dink hulle is ‘okay’ met die Here.  Hulle het immers ‘n Christelike agtergrond, is gedoop, en is nog êrens lidmaat by ‘n gemeente.  Wat D.A. Carson se kollega van die Amish gemeenskap in Amerika gesê het, is tot ‘n mate waar van ons eie volk:

 

‘Die eerste geslag het die evangelie geglo en die uitvloeisel daarvan in hulle lewens gehad.  Die tweede geslag het aanvaar dat hulle die evangelie ken, en op die uitvloeisels gefokus.  Die derde geslag het die evangelie verwerp, en al wat hulle oor gehad het was die uitvloeisels.’

 

Vandag het ons skaars die uitvloeisels oor.  Die gevolge van ‘n sterk evangelie-invloed is vinnig besig om te verdwyn.  Soos die res van die tale in ons land, het Afrikaners die evangelie nodig.  Wie sal dit vir hulle bring?  Sal ons te skaam wees om dit met ons eie mense te deel?

 

Paulus wou hê dat sy stamgenote gered moet word (Rom. 9:3).  En sal jy nie soos hy wees nie?  Wat John Knox van Skotland gesê het, moet ek en jy van ons mede-Afrikaners en die res van ons landgenote sê: ‘Give me Scotland or I die!’  Give me South Africa or I die!

 

[1] Vertalers kan nie die identiteit van elke dier vasstel nie.

God se hulp in jou krisis

Drowning man

In die mid-1700’s het Jonathan Edwards sy gemeente se verkeerde praktyke oor die nagmaal aangespreek.  Hy is van die gemeente afgesny.  ‘n Vriend van my het onlangs iets soortgelyk ervaar.  Dalk het so iets al met jou gebeur: jy doen wat jy dink reg is, en dan neem dinge ‘n wending vir die ergste?  Skielik beleef jy ‘n krisis, sodat jy nie weet waarheen nie.  Jy besef dat jy nie meer op jouself kan staatmaak nie.  Nou is dit net jy en die Here.  Hy is die enigste hulp in jou krisis.  En soos gewoonlik stel Hy nie teleur nie.  Dit is waaroor Jes. 33:1-12 gaan.

 

  1. Assirië se verraad (v.1)

Voor elke verkiesing is daar politieke werwing of ‘canvassing’.  Politieke partye maak die paaie reg, gee gratis hulp aan die armes en belowe om vir hulle huise te bou.  Wanneer die verkiesing egter verby is, vervul hulle nie hulle beloftes nie, en bly die mense so arm soos wat hulle voor die verkiesing was.

 

Dit is wat Assirië volgens 2Kon. 18:13-17 met Jerusalem gedoen het.  ‘As jy vir my 10 ton silwer en ‘n ton goud gee, sal ek jou nie aanval nie,’ het Sanherib van Assirië vir koning Hiskia van Juda gesê.

 

Hiskia het Sanherib se vereistes nagekom, maar nog steeds het Sanherib met ‘n weermag Jerusalem toe gekom.  Sy plan was om dit te verwoes soos hy die nasies verwoes het (v.1, 16:4, 36:10, 37:12).  Sanherib was ‘n troubreker en het vir Hiskia ‘n rat voor die oë gedraai (v.1).

 

Maar elke hond kry sy dag.  Êrens in die toekoms sou iemand met die Assiriërs trou breek en hulle verwoes (v.1).  Alec Motyer sê: ‘for every trickster there is a trickster to outdo him’.[1]

 

Kort na hierdie gebeure het die Here op een nag 185 000 Assiriërs doodgemaak (37:36).  Sanherib se eie seuns het hom doodgemaak (37:38).  Jare later het God die Babiloniërs gebruik om die Assiriese ryk tot ‘n val te bring.

 

Dalk het mense jou onregverdig behandel en, soos my vriend, afgeskryf.  As jou sonde dit verdien, is dit nie eerbaar nie (1Pe 4:15).  Maar as jy nie verkeerd was nie, sal die Here met jou vyande afreken (v.1).  Moet daarom nie mense terugkry nie, maar staan terug en laat ruimte vir die Here om wraak te neem (Rom. 12:19).  Hy weet hoe om dit te doen, en het nie jou of my hulp nodig nie.

 

  1. Jerusalem se gebed (v.2)

Een van ons lidmate het my Vrydag van ‘n ander lidmaat se moeilike omstandighede vertel.  ‘Dit gaan baie sleg met hom, maar wat sy verhouding met die Here betref gaan dit baie goed.’

 

Is dit nie hoe dit met Israel was nie: sodra hulle voorspoed beleef het, het hulle van die Here af weggedraai (Deut. 6:10-12, 28:47)?  Maar as die Here die bankskroef van hulle omstandighede stywer gedraai het, was hulle geestelik op ‘n goeie plek.  Dit is die les in v.2

 

In reaksie op Sanherib se aanval, het Jesaja, Hiskia en die volk in gebed na die Here toe gedraai.  “HERE, wees ons genadig, op U wag ons; wees hulle arm elke môre, ja, ons verlossing in die tyd van benoudheid!” het hulle gebid (v.2).  Hulle het besef dat hulle ‘n dag op ‘n slag moes neem, en dat hulle elke dag op die Here moes staatmaak.

 

Soos reeds gesê besef ons dit nie altyd wanneer dit goed gaan nie.  Ons dink dat ons onsself kan help, en is soos ‘n stout kind wat nie sy pa se hand wil vashou om oor die besige pad te kom nie.  Ons steun op ons lewenservaring, geld, talente, dissipline, die internet, geleerdheid en nie op die Here nie.

 

Omdat ons op onsself staatmaak, bid ons nie soos ons moet nie.  Dit is hoekom die Here ons partykeer deur moeilike tye laat gaan, sodat ons op Hom kan vertrou en kan weet waar ons hulp vandaan kom.  As Hy dit nie doen nie, sal ons self oor die pad wil hardloop en raakgery word.  Ons sal onsself m.a.w. geestelik benadeel.

 

  1. God se reaksie (v.3-4)

‘n Bekende aanhaling oor gebed sê:  ‘When man works, man works; but when man prays, God works.’  Dit is wat ons in Jes. 30:2, 31:3, 33:3-4 sien.  Jerusalem wou self die krisis oplos, en het vir Egipte gevra om haar te help.  Sy was onsuksesvol.  Toe sy egter in gebed na die Here toe draai, het Hy eenvoudig opgestaan en soos donderweer gedreun om die Assiriërs te verjaag (v.3, 37:36-38, 1Sam. 7:10).

 

Net so is dit vir die Here kinderspeletjies om jou krisis op te los; NIKS is vir Hom onmoontlik of moeilik nie (2Kon. 3:18, Jer. 32:17, 27, Luk. 1:37, Ef. 3:20).  Volgens v.3-4 was die oorlog verby nog voordat dit begin het.  Soos wat sprinkane ‘n mielieland kaal stroop, het Jerusalem goud, silwer en allerhande buit by die vyand afgeneem (v.4).

 

Alhoewel dit vir die Here maklik is om jou omstandighede te verander, doen Hy dit nie altyd nie.  Indien Hy dinge onveranderd laat, is dit om jou meer soos Jesus te maak (Rom. 8:28-29).  Hy wil jou volharding leer… of sagmoedigheid, nederigheid, liefde, geloof, geduld, ens.

 

Uit eie ervaring weet ek dat dit nie maklik is nie, maar ongelukkig is daar nie ‘n ander manier om dit te leer nie.  ‘Swords get sharpened through heating and beating,’ het iemand eenkeer by ‘n konferensie gesê.

 

  1. Jerusalem se fondasie (v.5-6)

Vyf jarige Martin de Bruin se pa is besig om die kar se remme te vervang.  Terwyl hy besig is, wil Martin die wiel losmaak.  ‘Laat ek jou help,’ sê sy pa.  ‘Ek het nie pa se hulp nodig nie; ek kan dit self doen,’ antwoord hy.  Na 3 minute se gesukkel vra hy dat sy pa hom moet help.

 

Jerusalem was so, en het gedink dat sy nie die Here se hulp teen Assirië nodig het nie.  Kort voor lank het sy besef dat nie sy óf Egipte haar kan help nie.  Sy moes haarself verneder en na die Here toe draai.  Sy moes erken dat sy klein is, en dat Hy in die hoogste hemel verhef is (v.5, 2:11, 17).

 

In antwoord op haar gebede het die Here belowe om Jerusalem of Sion met reg en geregtigheid te vul (v.5).  Jerusalem sou nie meer ‘n stad vol ongeregtigheid wees nie.  In koning Hiskia en Josia se tyd het reg en geregtigheid geheers (2Kon. 18-20, 22-23).  Maar toe hulle oorlede is, het ongeregtigheid weer die oorhand gekry.

 

Volkome reg en geregtigheid kan net deur die Messias kom.  Hy het dit deur sy kruisdood verseker, maar sal dit by die wederkoms vervul (2Pet. 3:13).  Vir mense in ‘n land en wêreld soos ons s’n, is dit iets om na uit te sien.  Geen meer aborsie, moord, korrupsie, rowery, diefstal, rebelse jongmense, dronkenskap, rasse haat, seksuele losbandigheid, ens. nie.

 

Op die nuwe aarde sal mense in Jesus se oorvloedige liefde, blydskap en vrede lewe.  Ons sal altyd ander bo onsself stel.  My vriend sal nie weer deur ander Christene uitgeskuif word nie, en ons sal nie vir ‘n enkele sekonde bitter voel of met iemand baklei nie.

 

God is die Rots wat sal sorg dat sy volk in standvastige tye leef (v.6, 26:4).  Hy het dit in Hiskia en Jesaja se tyd gedoen (39:8), en sal dit in die toekoms herhaal (v.6).  Ons liefde vir die Here, menseverhoudings, die politiek, die ekonomie, die weer, die diereryk, en alles anders sal nie so onstabiel, wispelturig en wisselvallig wees soos nou nie.  Dit kán nie, omdat die Here self die fondasie van sy volk is (v.6).

 

Wanneer sal dit wees?  Premils glo dat dit na die wederkoms in die millennium sal wees.  Postmils dink dat dit êrens voor die wederkoms tydens ‘n goue era sal wees, en volgens amils sal dit op die nuwe aarde gebeur.  Hoe dit ook al sy, ons moet hiervoor bid: “laat u koninkryk kom” (Matt. 6:10).

 

Ons hoef egter nie tot in die toekoms te wag voordat ons die rykdom van hierdie lewe kan smaak nie.  In Christus is die rykdom van God se verlossing, wysheid en kennis ons s’n (v.6, Joh. 10:10, 1Kor. 1:30, Kol. 2:3, 2Pet. 1:2).  Wat beteken dit in die praktyk?

 

God se oorvloedige verlossing beteken dat Hy jou tot die uiterste toe kan red.  Sy verlossing is m.a.w. nie tydelik nie.  Dit is nie net vir hierdie lewe bedoel nie.  Jy verloor dit nie as jy jou asem uitblaas nie.  As jy by die Here is, sal jy dit eers geniet.  Wanneer Jesus weer kom en jy jou nuwe liggaam het, sal die volheid van God se verlossing jou oorweldig soos ‘n vis wat uit ‘n seetenk in die oseaan vrygelaat word.

 

Maar die feit dat ons die rykdom van God se verlossing op die nuwe aarde sal geniet, beteken nie dat jy dit nie nou al kan geniet nie.  Wat ek bedoel is dat jy nie in hierdie wêreld misrabel hoef te wees, omdat jy eers op die nuwe aarde vreugde kan hê nie.  As jy in Jesus glo het jy reeds sy lewe in jou.  Dit beteken dat jy in die midde van die grootste krisis die Here se lewe, liefde en krag kan ervaar – sy oorvloedige verlossing.

 

Sy oorvloedige verlossing beteken verder dat dit nie opraak nie.  Hy kan m.a.w. nie op ‘n punt kom waar Hy vir iemand sal moet sê: ‘Ek weet jy het gevra Ek moet jou red, maar ongelukkig het die fontein van my verlossing opgedroog en kan Ek jou nie help nie.’

 

Ek het eenkeer met ‘n man gewerk wat gedink het sy sonde is te groot.  Hy het geglo dat die Here hom nie kan red nie.  Hy het gedink dat Jesus se kruisdood vir ander mense was, maar nie vir hom nie.

 

Ek het hom van die oorvloedige verlossing vertel wat van Golgota afstroom.  Hy moes leer dat daar genoeg verlossing is vir almal wat in berouvolle geloof na Jesus toe draai.  As jy vir die Here vra om jou te red, sal Hy jou nie wegwys nie.  “Ek sal hom wat na My toe kom, nooit uitwerp nie.” (Joh. 6:37).

 

Die oorvloed van God se verlossing beteken laastens dat die Here jou kan vergewe as jy vir baie jare met dieselfde sonde sukkel.  Ek bedoel nie dat jy met jou sonde moet aanhou nie (Rom. 6:1-2), maar sê dit as ‘n bemoediging vir die gelowige wat alweer in dieselfde strik getrap het, en depressief voel omdat hy dink die Here kan hom nie hiérdie keer vergewe nie.

 

God se verlossing is oorvloedig.  As jy jou sonde bely en jou daarvan bekeer, sal die Here jou vergewe… al is dit ook 70 x 7, so hoog soos Berg Everest, of so diep soos die Stille Oseaan (Matt. 18:21-35, Ef. 3:17-19, 1Joh. 1:9).

 

There is a fountain filled with blood

Drawn from Immanuel’s veins

And sinners plunged beneath that flood

Lose all their guilty stains

-William Cowper-

 

Omdat die Here ons God is, het ons ook ‘n oorvloed van wysheid en kennis (v.6).  In Hom maak al jou vrae oor God, jouself, die lewe, die dood, sonde en die ewigheid sin.

 

Waar kom God vandaan?  Waar het alles begin?  Hoe kan ons besluit wat reg en verkeerd is?  Wat is die doel van die lewe?  Wat is die sin daarvan om vir 70 of 80 jaar ‘n eindelose siklus te volg:  opstaan, werk, slaap, opstaan, werk, slaap… naweek… opstaan, werk, slaap… naweek… aftree, oud word, doodgaan?

 

Hoe het die dood in die wêreld ingekom, en wat gebeur wanneer iemand sterf?  Jesus is die bron van alle wysheid en kennis (v.6), en daarom kan net Hý hierdie vrae beantwoord.  Hy hét dit ook in die Bybel gedoen.

 

Deur Jerusalem se kennis van die Here (v.6b), sou hulle leer om Hom te vrees (v.6c).  Die vrees van die Here sou vir hulle ‘n skat wees (v.6c), want saam met dit kry ons baie ander voordele:

 

  • Kennis en wysheid (v.6, Spr. 1:7, 9:10, 15:33).
  • Haat vir sonde (Spr. 3:7, 8:13, 16:6).
  • Goeie gesondheid (Spr. 3:7-8).
  • ‘n Vol, gelukkige en lang lewe; beskerming teen die strikke wat tot die dood lei (Spr. 10:27, 14:27, 19:23, 22:4).
  • Sterk sekerheid en ‘n veilige vesting vir jou kinders (Spr. 14:26).
  • Rykdom en eer (Spr. 22:4).

 

  1. Jerusalem se krisis (v.7-9)

Ek ken ‘n sendeling wat in Etiopië gewerk het.  Hy het my vertel hoe die polisie sommer in die strate op mense losbrand.  In sulke plekke huil mense in die strate, en bly hulle liewer in hulle huise.

 

In Jerusalem was dit ook so.  Die boodskappers wat na die Assiriërs toe uitgegaan het om vrede te bewerk was onsuksesvol.  Die koning van Assirië het besluit om die stad aan te val en dit te vernietig.  Toe Hiskia se boodskappers na die stad toe terugkeer het hulle bitterlik gehuil (v.7, 36:22).  Jerusalem was in beroering, sodat selfs die dapperste helde in die strate geskreeu het (v.7).

 

Niemand het dit gewaag om op die hoofweë te reis nie (v.8).  Alles was verlate; Jerusalem was letterlik van die buitewêreld afgesny (v.8, vgl. Rigt. 5:6).  Assirië het haar vredesverbond met Jerusalem gebreek; sy was gereed om voor die voet dood te maak en die stad te vernietig (v.8, 1).

 

A.g.v. die Assiriërs het die land getreur en weggekwyn (v.9).  Om skanse te bou het hulle die Libanon woud en Basan – vandag se Golan hoogte in Sirië – se bome afgekap (v.9, 2:13).  Met duisende perde het hulle die Saron vlakte, Basan en berg Karmel se prentjiemooi-weivelde in ‘n woestyn verander (v.9, 1Kron. 5:16, 6:71, Jer. 50:19, Nah. 1:4).

 

Maar selfs in die ergste krisis kan die Here jou woestyn in ‘n paradys verander, jou trane in gejuig en jou geween in voete wat dans (35:1-2, Ps. 30:6, 12).  Soms beteken dit dat Hy jou omstandighede verander.  Maar partykeer verander Hy jóú, sodat jy in jou krisis ‘n vrede en blydskap ervaar wat jy nie kan beskryf nie (Hand. 16:25, Fil. 4:4, 7).

 

  1. God se toorn (v.10-12)

Partykeer kyk ek op my dag af stories saam met my vrou en kinders.  In een film was daar ‘n klein vroutjie wat in die biblioteek gewerk het.  Sy het kwaad geword as iemand in die biblioteek raas.

 

Toe een van die karakters dit hoor, toe sê hy:  ‘Who’s afraid of a little librarian?’  Toe die klein vroutjie agter die toonbank opstaan was sy glad nie so klein nie; sy was amper so hoog soos die dak.

 

Assirië het haarself verhef… totdat die Here van sy troon af opgestaan en Homself oor haar verhef het (v.10).  Toe dit gebeur was dit asof Assirië met strooi swanger was, stoppels gebaar het, en haarself met haar eie vurige asem aan die brand gesteek het (v.11).  Haar sonde het soos ‘n boemerang na haar toe teruggekom; sy het haarself vernietig (37:38).

 

Soos kalksteen het die Here haar tot poeier verbrand; soos doringtakke het Hy haar in vlamme laat opgaan (v.12).  Dit is nie net die lot van die Assiriërs nie, maar van Moslems, Kommuniste, ateïste en elke vyand wat God se kinders onderdruk: “wie julle aanraak, raak sy oogappel aan.” (Sag. 2:8).

 

Dit is hartseer om te sê, maar op die einde van die dag is dit nie God se kinders wat die krisis het nie.  Dit is dié wat op sy liefde spoeg en nie wil luister om hulle te bekeer en in Jesus te glo nie (Joh. 3:16, 36).  Hulle sal ‘n ewige krisis beleef, en die Here sal hulle nie help om daaruit te kom nie.  Hulle wou nie sy hulp hê toe hulle op die aarde was nie, en sal dit ook nie in die hel kry nie.  Hoekom nie?

 

C.S. Lewis het gesê: ‘Sin is man’s saying to God throughout life, “Go away and leave me alone.”  Hell is God’s finally saying to man, “You may have your wish.”  It is God’s leaving man to himself, as man has chosen.’[2]

 

[1] Alec Motyer, The Prophecy of Isaiah, Inter-Varsity Press, Leicester: England, 1993, p. 263

[2] C.S. Lewis, The Problem of Pain, MacMillan, New York, 1962, p. 28 aangehaal in Millard J. Erickson, Christian Theology, Baker Book House, Grand Rapids: Michigan, 1983, p. 1240

Oorlog, blydskap en vrede

War and Peace

Wat beteken Jerusalem?  Volgens party kom dit van twee Hebreeuse woorde af (‘îyr en shâlôm) wat ‘stad’ en ‘vrede’ beteken.  Dit is m.a.w. die stad van vrede.  Ander dink dat dit ‘fondasie of lering van vrede’ beteken.  Hoe dit ook al sy, dit het iets te doen met vrede.

 

Maar in die praktyk is dit nie so nie.  Dwarsdeur die geskiedenis het Jerusalem oorloë gehad.  In 586 v.C. het die Babiloniërs die stad en die tempel verwoes, en in 70 n.C. het die Romeine dit gedoen.  In die Middeleeue het die Moslems en Katolieke daaroor baklei, en vandag doen die Jode en Palestyne dit.

 

Jes. 29 beskryf hoe God Jerusalem se vyande teen haar gestuur het, en hoe sy net deur Hóm vrede kan hê.

 

Jerusalem se vyande (v.1-8)

Jerusalem het gedurig geestelike egbreuk gepleeg.  Sy het haar rug op die Here gedraai en agter ander gode aangeloop.  Sy was soos ‘n vrou van wie iemand my vertel het.  Soms het sy spoorloos verdwyn, en moes haar man haar soek.  Ander kere het sy bewusteloos op die vloer gelê as hy by die huis kom.  Maar ten spyte van haar ‘affair’ met dwelms, het hy haar nog steeds liefgehad.

 

God se liefde vir sy volk was so (vgl. Hosea).  En tog was sy liefde nie sentimenteel nie.  Toe Jerusalem teen Hom gesondig het, het Hy haar nie oorgesien nie maar gedissiplineer.  “Wee Ariël, Ariël, stad waar Dawid laer opgeslaan het!” het Jesaja teen haar uitgeroep (v.1).  ‘n Vergelyking met v.8 en 2Sam. 5:6-9, wys vir ons dat Ariël ‘n skuilnaam vir Jerusalem is.

 

Ariël het meer as een betekenis, maar in die konteks pas ‘vuurherd of altaar’ die beste [vgl. Eseg. 43:15-16, Hebreeus].  Jerusalem was immers die plek waar diere op die vuurherd of altaar geoffer is.  Dié voorreg het gemaak dat sy dink sy kan met haar sonde aanhou:  ‘Dit maak nie saak of ons sonde doen nie; oor ‘n paar maande sal ons ‘n fees bywoon en offers bring, en oor ‘n jaar of twee sal alles vergewe wees’ (v.1).

 

Maar dit het nie so gebeur nie.  Toe die Here vyande teen haar stuur, was sy bedroef en benoud (v.2).  Die hele stad het nou ‘n vuurherd of Ariël geword (v.2).  Wat beteken dit?  Nadat die offerdiere se bloed op die altaar gestort is, is hulle verbrand.  Jerusalem was ‘n vuurherd waarin die mense se bloed gevloei het en die stad verbrand is.  God het die stad omsingel en skanse teen haar oprig (v.3).  Toe Hy klaar teen haar geveg het, was sy niks meer as die dowwe fluisterstem van ‘n gees in die doderyk nie (v.4).

 

Daarna het Hy ook haar vyande geoordeel (v.5-8).  Hy het hulle soos kaf en stof gemaak wat deur die wind wegwaai word (v.5).  Sy oordele was so kragtig, verwoestend en skielik soos donderweer, ‘n aardbewing, ‘n warrelwind, ‘n storm en vuur (v.5-6, 37:36-38).  Jerusalem se vyande sou soos ‘n slegte droom verdwyn (v.7).  Hulle was gereed om God se volk in te sluk, maar is teleurgestel soos ‘n man wat van kos droom en honger wakker word, soos iemand wat van koue water droom en dors wakker word (v.8).

 

Wat moet ons uit v.1-8 leer?  Omdat Jerusalem die Ariël of plek van brandoffers was, het sy gedink niks kan met haar gebeur nie.  Sy het haarself oortuig dat godsdiens plus tyd God se toorn sal bedaar en dit laat afkoel (v.1).  Maar sy was verkeerd.  In Jeremia se tyd nog het die Here haar hierteen gewaarsku:  “Vertrou nie op bedrieglike woorde nie – wat sê:  Die Here se tempel, die Here se tempel, die Here se tempel is dit!” (Jer. 7:4).

 

Hoe doen mense dit vandag?  Hulle vlei hulleself dat hulle met hulle sonde kan aanhou en nog steeds hemel toe sal gaan.  “Moenie dwaal nie!” sê Paulus.  “Geen hoereerders of afgodedienaars of egbrekers of wellustelinge of sodomiete of diewe of gierigaards of dronkaards of kwaadsprekers of rowers sal die koninkryk van God beërwe nie.” (1Kor. 6:10).  Moenie dink die Here is tevrede met jou omdat jy stiltetyd hou, kerk toe gaan, tiendes gee en ander godsdienstige dinge doen nie.  Die vraag is of jy jou bekeer het en op Jesus se kruisdood vertrou?  Wys jou gehoorsame dade dat jou geloof eg is?

 

Party mense dink hulle is gered, omdat hulle vrede het.  Ek het onlangs met iemand gepraat wat dit dink.  ‘Hoe weet jy jy’s gered?’ het ek gevra.  ‘Ek voel lekker aan die binnekant,’ het hy gesê.  ‘Ek kan nie die warm gevoel in my bors beskryf nie.’  Maar die feit dat jou gewete jou nie pla nie en jy vrede het, wys nie noodwendig jy is reg met die Here nie (1Kor. 4:4).  Om vrede te hê terwyl jy met jou sonde aanhou, is ‘n vals vrede (Jer. 6:14).  Jy is rustig, maar eintlik is die Here kwaad vir jou (Jona 1:5, 1-4).  Om vrede te hê terwyl jy met sonde besig is, wys dat jy mak geraak het.  Jy is gewoond aan jou sonde, sodat jou gewete so hard en gevoelloos is soos ‘n Boesman se hak.  In die begin het jou gewete jou gepla, maar nou hoor jy nie meer die sagte stemmetjie in jou binneste nie.  Jy is in die moeilikheid.

 

As die dinge wat ek sopas gesê het jou soos ‘n skerp naald prik, is daar hoop.  Jou gewete werk nog.  Vat die kans wat die Here jou gee en bekeer jou.  As jy dit nie doen nie, mag die Here dalk net besluit om jou gewete heeltemal te verhard (Spr. 29:1, Dan. 5).  Jy sal soos Farao wees en nie die begeerte hê om jou te bekeer nie (Eks. 5-12, Rom. 9:17-18).  En as dít gebeur het is dit nie lank voordat jy die onvergeeflike sonde pleeg nie.

 

Sorg asb. dat jy vandag nog dinge met die Here regmaak.  As jy met ‘n berouvolle hart na die Here toe kom is daar altyd hoop.  As jy na Hom toe kom sal Hy jou nie wegwys nie.  Maar as jy volstrek weier, sal jy soos Jerusalem ‘n vuurherd of Ariël wees (v.2):  jou bloed sal vloei en jy sal vir ewig in die ‘vuurherd’ van die hel brand.  Die Here sal skielik en onverwags soos ‘n natuurramp op jou afkom (v.5-6).  In die hel sal niemand jou dors les of jou honger stil nie (v.8, Luk. 16:24-25).

 

Jerusalem se blindheid (v.9-16)

Sesjarige Hennie het in die stad groot geword; hy was nog nooit op die plaas nie.  Toe hy laas maand vir die eerste keer op die plaas kom, het hy ‘n varkie in die modder sien ‘vassit’.  Hy het hom uitgehelp en onder die kraan gaan afspoel.  Hy was bly dat hy die varkie kon help, maar was teleurgesteld toe die varkie aspris na die modder toe terugkeer om daarin ‘vas te sit’.

 

Jerusalem was soos die varkie.  Toe die Here haar klaar gehelp het (v.5-8), het sy na die modder van haar sonde toe teruggekeer (v.9-16).  God se verlossing was ‘n ervaring waaroor sy haar verwonder het, maar sy het nog steeds nie na Hom toe gedraai nie.  Sy kón nie die waarheid sien nie (v.9).  Sy en haar leiers was geestelik blind, dronk en aan die slaap (v.9-10).  Dié wat die Woord kon lees wou dit nie doen nie, omdat dit te veel moeite was (v.11); dié wat dit nié kon lees nie, het nie juis die moeite gedoen om te leer hóé nie (v.12).

 

As jy in Jesaja se tyd geleef het, sou jy nie dadelik agterkom dat die volk geestelik blind is nie.  Hulle het die regte woorde gesê, maar in hulle harte was hulle ver van God af (v.13, Jer. 12:2, Matt. 15:8).  Hulle het sy Woord eenkant toe geskuif en hulle eie reëls opgemaak (Matt. 15:9).  Uiteindelik het hierdie reëls die Bybel vervang, sodat die Jode in Jesus se tyd ‘n spul ekstra reëls gehad het (bv. Mark. 7:1-5, Joh. 5:9-10).

 

Soos moderne wetenskaplikes het hulle gedink hulle het te slim geraak vir die Here, en dat Hy nie hulle diep wysheid verstaan nie (v.15).  Hulle was so ‘wys’ dat hulle die Skepper-skepsel orde op sy kop gekeer het (v.16, 10:15, Rom. 1:22-23).  So asof die klei die pottebakker gevorm het en nie andersom nie (v.16).  Deur sy wonderbare dade sou die Here hulle sg. ‘wysheid’ en ‘onderskeid’ tot niet maak (v.14, vgl. 1Kor. 1:19, Hab. 1:5).

 

Hoe moet ons v.9-16 in die 21ste eeu toepas?  Om te weet hoe dit met ‘n volk gaan, moet jy kyk na wat hulle met die Bybel doen.  Moenie dink hulle het verander omdat hulle oor God se groot werke (reën en die afdanking van Robert Mugabe) praat nie (v.9).  Die vraag is:  wat doen hulle met die Bybel?

 

Beskou hulle dit as die onwetenskaplike opinies van feilbare mense?  Sê hulle dat dit ouderwets en oudmodies is?  Ignoreer hulle dit geheel en al, omdat dit nie meer relevant is vir vandag nie?  Beskou hulle dit op die vlak van enigiemand se opinie?  Sê hulle dat dit gelyk is met boeke soos die Koran?  Verban hulle dit?  Glo hulle dat dit nie meer ‘n plek het in die kansel nie?

 

Of preek hulle dit as die Gees-geïnspireerde, algenoegsame, onfeilbare, foutlose, gesaghebbende, duidelike Woord van God, wat noodsaaklik is vir redding en vir lewe?  Respekteer en gehoorsaam hulle dit (66:2)?  Of is hulle soos die diaken wat ek in Nelspruit ontmoet het:  gedurende die koor oefening het hy die Here geprys, maar tydens die breek het hy gevloek?  Is hulle soos die ouderling in ‘n ander dorp, wat daarvoor bekend is dat hy te veel drink?

 

Hulle eer God met hulle lippe, maar hulle harte is ver van Hom af (v.13).  Soos die Rooms-Katolieke Kerk hou hulle ‘n spul kerklike reëls, terwyl hulle nie omgee wat die Bybel sê nie.  In sommige kweekskole bevraagteken hulle die Bybel, in kontemporêre gemeentes gebruik hulle dit om mense lekker te laat voel, en in charismatiese kringe verlaag hulle dit tot op die vlak van hulle ekstatiese ervarings.

 

Soos Jerusalem sluit Suid-Afrikaners hulle oë vir hierdie waarheid.  As ons ons nie bekeer nie, sal die Here ons blind maak.  Daar sal nog Christene, preke, Bybels en kerke wees (of nie), maar mense sal die waarheid nie begryp nie, omdat God hulle verblind het (v.9-12, 6:9-10, Matt. 11:25, 13:10-17, Rom. 11:8, 1Kor. 2:14).

 

In hulle blindheid sal hulle dink dat ateïste wetenskaplik dink, en dat hulle hulle breins gebruik.  Een van ons oorlede lidmate se seun is ‘n ateïs.  Toe hy jonk was, het sy pa hom van die Here geleer.  Maar toe hy ‘n ateïs word, toe sê hy:  ‘Die oogklappe het nou van my oë afgeval, pa.’  Ateïste roem daarin dat hulle wys is, en dat jy nie sommer ‘n onintelligente ateïs sal raakloop nie.

 

Baie mense is deur hierdie sg. ‘wysheid’ beïnvloed; hulle oortuig hulleself dat Darwin se evolusie teorie wetenskap is.  Maar hoe is dit wetenskap om te sê dat lewe uit iets ontstaan het wat nie lewe is nie, of dat die heelal homself gemaak het?  Volgens ateïste het God nie die mens gemaak nie, maar het hulle Hóm uitgedink (v.16).  En dan noem hulle dit wysheid, dinge wat te diep is vir die Bybel (v.14-15).

 

Jerusalem se verlossing (v.17-24)

In sy boek, The Peacemaker, vertel Ken Sande van ‘n vrou wat haar man geskei het en by iemand anders ingetrek het.  Hy het teen sy eie selfbejammering en bitterheid gestry.  Hy het geweier om sy eks-vrou voor die kinders en ander mense te kritiseer.  Hy het aanhoudend vir haar gebid, en probeer om liefde en respek te wys as hy haar sien.

 

‘n Jaar later het haar verhouding met die ander man verbrokkel.  Sy het besef dat sy ‘n groot fout gemaak het om haar man te los.  ‘Is daar ‘n kans dat ons weer kan probeer?’ het sy gevra.  Hy het ingestem en voorgestel dat hulle dadelik met berading begin.  Agt maande later het hulle weer getrou en is hulle verhouding herstel.[1]

 

God se verhouding met Jerusalem was so.  T.s.v. van dit wat sy met Hom en die Woord gedoen het (v.9-16), het Hy beplan om haar te verlos en vrede te maak (v.17-24).  Die verandering in God se volk sou so groot wees soos die Libanon woud wat in ‘n vrugteboord verander of andersom (v.17, 32:15, 35:1-2).

 

Dit het ‘n paar honderd jaar later in Hand. 2:41 begin, toe 3000 Jode op een dag tot bekering kom.  Daarna het duisende meer in die Here geglo (Hand. 4:4, 5:14, 6:1, 7, 9:35, 42).  Dit gebeur nog steeds wanneer mense tot bekering kom en getransformeer word soos ‘n woud wat in ‘n vrugteboord verander (Hand. 9).  Dit sal gebeur wanneer massas Jode in die toekoms tot bekering kom, en baie heidene as gevolg daarvan in die Here glo (Rom. 11:12, 15, 25-26).

 

Die transformasie van v.17 het met Jesus se eerste koms begin.  Dowes kon die Woord van God hoor, terwyl blindes nie meer in die donker was nie maar kon sien (v.18, 9-12, 35:5, Matt. 9:27-31, Mark. 7:31-37, Luk. 7:22, 18:35-43).  Hierdie wondertekens was ‘n illustrasie van die gehoor en sig wat gekom het vir dié wat geestelik doof en blind is (6:9-10, Hand. 26:18, 2Kor. 4:4, 6, vgl. Joh. 9).

 

Dié wat hierdie transformasie ondergaan, sal nederig voor die Here buig en vars blydskap ervaar (v.19).  Hulle sal vreugde op vreugde smaak in die Here, die soet vrugte van ‘n verhouding met Hom (v.17, 19).  Hulle vreugde sal nie saam met wêreldgebeure, die ekonomie of persoonlike omstandighede fluktueer nie.  Hulle blydskap sal konstant wees, omdat dit nie op veranderlike dinge gebaseer is nie, maar op die vaste Rots van God se onveranderlike karakter (v.19, Fil. 4:4).

 

Om hierdie blydskap te ervaar moet jy geestelik arm wees (v.19, 61:1).  Jy moet erken dat jy niks is nie, dat jy niks vir die Here kan gee nie, dat jy niks tot jou redding kan bydra nie, en dat alles van God af kom.  Jy moet weet dat jý onheilig is en die Here Heilig (v.19).  As jy v.19 ernstig opneem, sal jy hemelse rykdom erf (Matt. 5:3, 5, 2Kor. 8:9).

 

Soos God se volk bly was toe Farao en sy weermag wat in die Rooi See verdrink het (Eks. 14-15), sou hulle bly wees oor die tiranne, spotters en kwaaddoeners wat verwyder is (v.20).  Dit is in Jesaja se tyd vervul (v.5-8, hfst. 36-38), maar ook toe Jesus aarde toe gekom het.  Aan die kruis het Hy die tiranne ‘n nekslag toegedien:  sonde, die dood, die hel, Satan en sy magte (Joh. 12:31, Ef. 2:1-10, Kol. 2:15, Heb. 2:14-15, 1Joh. 3:8, Op. 1:5b).  As jy aan Jesus behoort, is sonde en Satan se greep besig om te verswak; in die hemel sal jy glad nie hulle invloed voel nie.

 

Bose mense sal ook verdwyn; mense wat soos Jesus en Daniël se vyande planne beraam om gelowiges uit te vang, wat soos Jesus en Stefanus se vyande leuens teen hulle vertel en hulle vir omkoopgeld straf (v.20-21, Amos 5:10, 12, Dan. 6:5-6, Matt. 26:59-60, Luk. 11:53-54, Hand. 6:13).  Dit sal wees soos tydens die herlewing in Jonathan Edwards se tyd.  Omdat daar nie meer misdaad was nie, het die prokureur op Northampton nie werk gehad nie.  Edwards het dit beskryf as ‘a kind of heaven upon earth.’[2]  In die toekoms sal daar weer herlewings wees, en sal dit die einde van korrupte prokureurs, regters en vals getuies beteken (v.21).

 

Die Here wat ‘n maan-aanbidder soos Abraham gered het (Jos. 24:2-3), sal ook sy nageslag red en hulle seën (v.22, Gen. 12:3).  Sy nageslag verwys natuurlik na die Jode en heidene wat in Jesus glo (Gal. 3:7-9, 29).  Jakob sal nie meer skaam kry, bleek word en in sy graf omdraai oor sy  nageslag se sonde nie (v.22).  Hy sal bly wees dat die Here hulle gered het en dat hulle sy Naam heilig (v.23, 8:13, Matt. 6:9).  Hulle sal hulle oor die Here verwonder, en erken dat Jesus die Messias is (v.23).  Hulle sal bely dat hulle die werk van sy hande is, en soos Paulus hulle redding aan Hom toeskryf (Rom. 8:29-30, 11:36, Ef. 2:8-10).  Soli Deo Gloria – aan God alleen die eer!

 

Die volk wat gedurig afgedwaal en gemurmureer het, sal insig verkry en God se lering aanvaar (v.24, Eks. 15:24, 16:2, 7-9, 11, 17:3, Num. 11:1, 4-6, 14:2, 36, 16:11, 41, 17:5, Deut. 9:7, 24, 31:27, Ps. 95:10, Luk. 5:30, 15:2, 19:7, Joh. 6:41, 43, 61, Hand. 7:51).  Dit is my konstante gebed, dat God die Jode tot bekering sal bring (Rom. 10:1).

 

Maar terwyl ons vir die Jode bid, moet ons nie dink ons het gearriveer nie.  Soos hulle, kla ons partykeer omdat ons dink ons verdien beter.  Onthou dat ‘n hart wat oor alles kla kenmerkend is van ongelowiges (v.24, Rom. 1:21, Jud. 16).  As gelowiges moet ons in alle omstandighede dankbaar wees (Ef. 5:20, Fil. 2:14, 1Tess. 5:18, 1Pet. 4:9).  Die Here het jou gered, die Heilige Gees woon in jou, jy het die Bybel in jou eie taal, jy is deel van ‘n geestelike familie, jou Vader sorg vir jou, Jesus is besig om plek vir jou voor te berei in die hemel, ens.

 

Die petrol is duur, maar jy het ‘n kar.  Die e-tol is onnodig, maar daar is ‘n snelweg om op te ry.  Die regering is korrup, maar jy het ten minste nog ‘n mate van vryheid.  Ons het meer as genoeg rede om dankbaar te wees, en elke rede in die wêreld bly te wees.  Die vrede en blydskap wat Jesus gebring het, is nie tydelik soos die vrede en blydskap wat die Verenigde Nasies of Nelson Mandela bring nie.  Dit is nie ‘n vals vrede soos die innerlike vrede wat Boeddhiste ervaar nie.  Dit is nie ‘n filosofie of teorie soos in Leo Tolstoy se boek, War and Peace nie.

 

Die vrede en blydskap wat Jesus gee is ewig en eg.  Hy is die Vredevors deur wie se lewe, kruisdood en opstanding daar vir ons vrede gekom het (9:5, Rom. 5:1, Kol. 1:20).  “En mag die God van die hoop julle vervul met alle blydskap en vrede deur die geloof, dat julle oorvloedig kan wees in die hoop deur die krag van die Heilige Gees! … En mag Hy, die Here van die vrede, julle altyd vrede gee op allerlei wyse!” (Rom. 15:13, 2Tess. 3:16).

 

[1] Ken Sande, The Peacemaker, Baker Books, Grand Rapids: MI, 1991, 2004, pp. 251-252

[2] Iain Murray, Jonathan Edwards: A New Biography, The Banner of Truth Trust, Edinburgh, p.270